☉ Basauri
Alex Garcia Galas basauriarrak errekuperazio aldi “oso luzea” izango du Gurutzetako Ospitalean
Igandean bertan, Thailandiatik aberriratu zutenean, kendu zioten kaltetutako pankrea zatia Gurutzetako Ospitalean
Alex Garcia Galas basauriarra indarberritzen ari da Gurutzetako Ospitalean. Igandean aberriratu zuten Thailandiatik pankreatitisak jota eta egunean bertan kendu zioten kaltetutako pankrea zatia.
Zaintza Intentsiboetako Unitatean (ZIU) dago eta errekuperazio aldi “oso luzea” izango duela iragarri dute Gurutzetako medikuek.
Medikuek jakinarazi dute Alex kontziente eta egoera egonkorrean dagoela, duela bi hilabetetik jasaten ari den abdomen-prozesuaren larritasunaren barruan, eta Medikuntza Intentsiboko taldearen ardurapean jarraitzen du bere tratamenduarekin.
Asteburu solidarioa
Apirilaren 27an eta 28an antolatu du asteburu solidarioa Basozelaiko El Maño Auzo Elkarteak, Alexen familiari laguntzeko.
Besteak beste, haurrentzako parkea, urdaiazpiko moztailea, paella solidarioa, bingo solidarioa, barra solidarioa eta zozketak antolatu dituzte. Egitaraua osorik hemen.
Bilduko duten dirua Alexen familiari emango diote. Izan ere, basauriarra Thailandian ospitalean egon zen bitartean (bi hilabete) egunero 3.000 eta 4.000 euro artean gastatu zituen familiak Alexi mediku probak egiteko.
Bestetik, itsulapikoak ere jarri ditu Basozelaiko Auzo Elkarteak Basauriko saltokietan.
☉ Basauri
Argazkiak / Abarka Eguneko bazkariak 900 lagun batu ditu Bentako jaien hasieran
Hasi dira Bentako Jaiak, eta bai indartsu hasi ere! Abarka Eguna ospatzen ari dira basauriarrak, eta Solabarria plazan egin den bazkarira 900 lagun hurbildu dira. GEURIA bertan egon da, eta honak hauek dira atera ditugun argazkiak:
☉ Basauri
Argazkiak / Mischa Bredewoldek irabazi du Itzulia Womeneko bigarren etapa Basaurin
104 kilometroko ibilbidea izan da gaurkoa hiru mendi portuekin eta 25ºtan
Mischa Bredewoldek atzoko garaipena errepikatu du Ituzlia Womeneko bigarren etapan (basauri-Basauri). 104 kilometroko ibilbidea izan da gaurkoa hiru mendi portuekin eta 25ºtan.
Basauri-Sarasola Gaina – Lemoa – Aretxabalgane Gaina – Gamiz -Urruztigaina – Galdakao eta azkenik Basaurira heldu dira txirrindulariak, izerdi patzetan, baina ikuskizun polita eskainiz herritarrei. GEURIAko kazetariak lasterketako hasieran eta amaieran izan gara, momentu onenak jasotzen.
☉ Basauri
Bideoa / Itzulia Women lasterketako irteerak txirrindulari zaleez bete du Basauri
Maiatzak 11 dituen honetan Itzulia Women 2024 lasterketako bigarren etapak Basaurin izan du irteera. Zehazki, Social Antzokiaren paretik irten dira txirrundulariak irteera neutralizatuan San Migeleraino. Bertan izan gara lehen lerroan.
☉ Basauri
BSK Basauriko neskek Estatuko Bigarren mailara igotzeko Final Fourra jokatuko dute asteburuan Urbin
Bigarren urtez jarraian, emakumezko seniorren Final Foura jokatuko da Urbiko kiroldegian maiatzaren 11n eta 12an
BSK Basauri emakumezkoen senior taldea momenturik onenean dago. Bigarren urtez jarraian jokatuko du Final Four bat mailaz igo ahal izateko. Oraingoan, Estatuko Bigarren mailara igotzeko lehiatuko dira BSKko emakumeak.
Mailaz igotzeko Final Fourra maiatzaren 11n eta 12an jokatuko da berriro Basaurin, Urbiko kiroldegian. Basauriko klubeko emakumeek txapelketa irabaziz gero, Euskadiko, Nafarroako eta Errioxako taldeen aurka jokatuko luke datorren denboraldian.
“Orain arte lurralde mailan jokatu izan dugu, eta Final Fourra irabaziz gero, salto handi bat emango genuke”, diote BSK Basauriko arduradunek.
Iaz Lehen Erregional Mailan fase erregularrean galdu gabe mantendu ziren basauriarrak 26 garaipenekin, eta kategoriako Final Fourrean parte hartu ahal izan zuten.
“Igo berriak izanik, denboraldi honetan lider izatea lortu dute 23 garaipenekin eta 3 porrotekin. Aurtengo Final Fourreko txapeldunak modu zuzenean lortuko du Emakumezkoen Bigarren Maila Nazionalean jokatzeko”, diote.
Azken bi urteetan “bloke indartsu eta bateratu bat” sendotu dutela diote klubeko ordezkariek, “bai kantxa barruan bai kantxatik kanpo ere”. “Horrela, jauzi kualitatibo eta kuantitatiboa lortu dugu”, diote.
Asteburu honetan Final Fourra etxean antolatzeaz gain, maiatzaren 25ean BSK klubak bere urteroko jaia ospatuko du Solobarriako karpan. “Bertan, saskibaloiarekin lotutako jarduerak egingo ditugu, hala nola, partidak, erakustaldiak eta tiro-lehiaketak, eta ondoren bazkaria egingo dugu klubeko denok”, diote.
Saskibaloia / Final Four 2024
Maiatzak 11-12 · Urbiko kiroldegia (Basauri)
Maiatzak 11, larunbata
16:00 Kibuc BSK Basauri vs Erandio Altzaga Montajes Meccano
18:15 Begoñazpi 86 vs Tabirako Baque
Maiatzak 12, igandea
12:15 Lehenengo finalaurrekoko irabazlea vs Bigarren finalaurrekoko irabazlea
☉ Basauri
Auto batek su hartu du San Migelen, zauriturik utzi gabe
Ezbeharrak ez du zauriturik utzi, bai ordea, kalte materialak. 14:15etarako sua itzali dute Basauriko suhiltzaileek
Furgoneta batek su hartu du San Migelen, Atxukarroko biribilgune parean. Autoko gidariak GEURIAri azaldu lez, ibilgailua martxan zegoen eta bat-batean gelditu egin da: “Momentu batean kea irteten hasi da eta kea su bihurtu da”, azaldu du autoaren jabeak, urduri.
Gidaria autotik irten eta ibilgailuak, kontrolik gabe maldan behera egin du errepide ertz baten aurka jo arte. Bertan, suzko bola bilakatu da eta barruan zeraman zama guztia (elikagaiak) segundu batzuetan kiskali da.
Basauriko udaltzainek azaldu dute litekeena autoak zirkuitulabur bat izan duela. Ezbeharrak ez du zauriturik utzi ezta bestelako kalte materialik sortu. Larrialdi zerbitzuek errepideko errei bat itxi behar izan dute eta ez du trafiko arazorik sortu.
Ezbeharra 14:00ak baino lehen gertatu da eta Basauriko suhiltzaileek arin itzali dute sua: 14:15etan ez zegoen suaren arrastorik errepidean.