Sareak

☉ Basauri

Basauriko Grafo enpresako langileek greba hasiko dute soldatak 2012tik izoztuta izateagatik

Basauriko Grafo taldeko Grafo eta Encover inprenta editorialeko 87 langilek greba hasiko dute 2012tik soldata izoztuak dituztelako. “Gaur egun Bizkaiko arte grafikoen hitzarmena dugu bertako langileok”, azaldu du Unai Alday enpresa batzordeko kideak. “Hitzarmen hura salatu genuen eta harrezgeroztik izoztuta daude”

|

GRAFOko lantegia, Basaurin // GMaps

Basauriko Grafo taldeko Grafo eta Encover inprenta editorialeko 87 langilek greba hasiko dute 2012tik soldata izoztuak dituztelako. “Gaur egun Bizkaiko arte grafikoen hitzarmena dugu bertako langileok”, azaldu du Unai Alday enpresa batzordeko kideak. “Hitzarmen hura salatu genuen eta harrezgeroztik izoztuta daude”. Langilearen hitzetan eta soldaten gaiaz gainera, hitzarmena “zaharkituta” dagoela salatu du Grafoko langileak: “Dagoeneko, garai hartan zaharra zen hitzarmena, arte grafikoek garapen izugarria jasan dutelako garai hartatik gaur egun arte”, azpimarratu du Aldayk.

Gauzak horrela, 2012tik langileek ez dute inolako soldata igoerarik ikusi ez eta hitzarmen propiorik lortu eta langileak “nekatuta” daude gaur egungo inflazioari aurre egiteko zailtasunak izateagatik.

Soldata: arazo larriena

Gaur egun bizi dugun inflazioa dela eta, arte grafikoen enpresako langileei gogor eragin die euren soldatetan: “Enpresako langileok 1.154 euroko oinarrizko soldatak eta 1.524 euroko gehiengoko bitarteko soldata gordinak ditugu hilabetero eta astelehenetik ostiralera egiten dugu lan hiru txandetan”, kexatu da Basauriko langilea. “Hilabete bukaerara heltzen ez diren lankideak ditut eta benetan tristea da 47 urteko langile batek amari 200 euro eskatzea eguneroko gastuei aurre egitea ezinezkoa zaiolako”.

Pandemiako aldi baterako enplegu-erregulazioko espedientearen ostean (ABEEa) eta langileak elkartzen hasi zirela ikustean, enpresak lehen mugimendua egitea erabaki zuen, Aldayren arabera: “Nahikoak ez ziren igoera batzuk proposatu zizkiguten enpresakoek: %4aren igoera 2021erako eta %3 2022rako”.

Horiek horrela, hiru eguneko grebarako deialdia egin dute Grafoko langileek: azaroaren 8an, 15ean eta 16an: “Asmoa lehen greba egunaren ostean astebeteko tartea uztea da enpresak egoera aztertu eta negoziatzeko prest egoteko”, iragarri du Aldayk. “Langileek bizi duten egoerarekin sensibleak izatea eskatzen diegu enpresaburuei. Astebeteko tartearen ostean beste bi greba egun egingo ditugu”. Hilaren 8an elkarretaratzea egingo dute enpresan bertan; 15ean, elkarretaratzea eta mobilizazioa antolatu dute Bilboko sedean; 16an Benta auzoan mobilizazioa egingo dute, herritarren artean euren egoera ikustarazteko.

☉ Basauri

Bideoa / San Juan gaua San Migelen, Basaurin

|

San Juan bezperan sua piztu dute San Migelen, Basaurin. Mikelats Kultur Elkarteak irudiak bidali dizkigu.

Osorik irakurri

☉ Basauri

Argazkiak / San Juan bezperako sua piztu dute Basauriko Pozokoetxen, euripean izan bada ere

|

Ekainak 23 ditu gaur, San Juan bezpera. Ohiturak jarraituta, sua piztu dute Basauriko hainbat tokitan, Pozokoetxen esaterako. Euritakoen azpian ikusi dute auzotarrek Basauritar Dantza Taldearen emanaldia eta San Juan bezperako sua.

Osorik irakurri

☉ Basauri

Espetxeratu dute droga-trafikoa leporatuta Basaurin atxilotu zuten ertzaina

Basaurin atxilotutako ertzainaz gain, beste bederatzi pertsona espetxeratu dituzte. Droga-trafikoa eta erakunde kriminaleko kide izatea egotzi diete

|

Behin-behineko espetxealdia ezarri diete hamar atxilotuei // Irekia

Guardia Zibilak eta Ertzaintzak hamar pertsona atxilotu zituzten duela hiru egun Bizkaian eta Kantabrian, droga-trafikoaren aurkako ‘Tahocei-Lizar’ operazioaren barruan.

Atxilotutakoen artean Basaurin atxilotu zuten 31 urteko ertzain bat. Polizia-eginbideak amaitu ondoren, atzo, larunbata, atxilotuak epailearen esku utzi zituzten, eta guztiak espetxeratzeko agindua eman zuen.

Droga-trafikoa, sare elektrikoan iruzurra egitea, sekretuak ezagutaraztea eta erakunde kriminal bateko parte parte izatea egotzi dizkiete.

Behin-behineko espetxealdia ezarri diete, epaiketa egin bitartean. Zigor-zuzenbidean, orohar, errugabetasun-presuntzioa nagusitzen da beti epaiketa egin bitartean, eta epaileak salbuespenezko neurri moduan soilik agintzen du behin-behineko espetxealdia; ihes egiteko arriskua dagoenean, edo frogak suntsitu daitezkeenean.

Operatiboan parte hartu zuten agenteek 78.840 euro konfiskatu zituzten eskudirutan. Substantzia estupefazienteei dagokienez, 19.592 gramo haxix, 22.973 gramo marihuana-kukulu, 10 kilogramo marihuana-ziztada, 1.300 gramo kokaina, 40 gramo MDMA eta 900 gramo ebaketa-substantzia atzeman zituzten.

Era berean, lau marihuana indoor landaketa desegin zituzten, hazkuntza fase desberdinetan zeuden 5.273 landarerekin. Landare horiek sareari legez kanpo lotutako elektrizitatea erabiltzen zuten. Gainera, atxilotuek erabilitako 14 telefono mugikor eta 6 ibilgailu okupatu zituzten.

Ikerketa Sestaoko ertzain-etxeko agenteek hasi zuten, zenbait pertsona beren mugapeko zenbait tokitan marihuana lantzen eta trafikatzen ari zirela ikusi zutenean.

Terrorismoaren eta Krimen Antolatuaren aurkako Inteligentzia Zentroaren (CITCO) bidez ezarritako koordinazio-esparruaren barruan, egiaztatu zen Guardia Zibilak susmagarrietako bati buruzko ikerketa bat irekita zuela, eta erabaki zuten elkarrekin operazio bat martxan jartzea.

Bi polizia-kidegoek droga-trafikoan aritzen zen erakunde kriminala zegoela egiaztatu ondoren, joan den ostegunean, ekainak 20, operatiboaren ustiapen-fasea garatu zuten.

Miaketak Basaurin, Abanto-Zierbenan, Alonsotegin, Barakaldon, Bilbon, Erandion, Leioan, Portugaleten, Sestaon eta Castro Urdialesen egin zituzten.

Osorik irakurri

☉ Basauri

Denac industrialdea hobetzeko hitzarmena sinatu dute Basauriko Udalak eta Aldundiak

|

Hitzarmenak enplegua sortzen eta mantentzen lagunduko du // Google

Cervantes etorbidean dagoen Denac industrialgunea hobetu eta enpresen lehiakortasuna handituko dute. Horretarako hitzarmena sinatu dute enpresa zentroak eta Basauriko Udalak, eta akordioari esker, Bizkaiko Foru Aldundiak hobekuntza-prozesua finantzatuko du. Hitzarmenak enplegua sortzen eta mantentzen lagunduko du.

Alde batetik, Basauriko Udalak beharrezkoak diren izapideak erraztu eta arinduko ditu eta Denacekin lankidetzan arituko da udal eskumenei eragiten dieten jarduerak diseinatzen, hala nola, urbanizazioa, estolderia edota argiteria publikoa.

Bestetik, Denac enpresa zentroak bi plan idatziko ditu: bata kudeaketakoa eta bestea jardutekoa. Gainera, bi planetan jasotzen diren jarduketak kontratatu eta finantzatu egingo ditu, Aldundiaren diru-laguntzarekin.

Osorik irakurri

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri