☉ Basauri
Bizkotxalden 94 etxebizitza eraiki ahal izateko Hirigintza Plana behin betiko onartu du Basauriko Udalak
Kareaga Goikoa kaleko 1, 3, 5 eta 7 zenbakietako ingurunea eraberritzea eta Bizkotxalden etxebizitza berriak eraikitzea onartu du Basauriko udalbatzak EAJren, PSEren, Elkarrekin Podemosen, PPren aldeko botoekin eta EH Bilduren abstentzioarekin
Basauriko Udalak behin betiko onartu du Basauriko Hiri Antolamenduko Plan Orokorraren (HAPO) aldaketa, Bizkotxalden 94 etxebizitza berri eraiki ahal izateko.
Aldaketa horri esker, berroneratu egingo dute Kareaga Goikoa kaleko 1, 3, 5 eta 7 zenbakietako ingurunea, eta etxebizitza berriak eraikiko dituzte Bizkotxalden.
Beste alde batetik, gune horretan bertan, Kareaga Goikoa kaleko 1, 3, 5 eta 7 zenbakien ondoko eraikinak eristeari ekin zion enpresa pribatu batek, bertan etxebizitza batzuk eraikitzeko. Etxe-agentzia batek 33 etxebizitza eraikiko ditu bertan.
Kareaga Goikoa kaleko 1, 3, 5 eta 7 zenbakietako ingurunea lurzoru pribatuan dago -ez da Udalarena-, eta sustatzaile pribatuek azken 26 urteetan ez dutenez jarduketarik bideratu, Basauriko Udalak plangintza berri bat sustatzeko erabakia hartu zuen: Kareaga Goikoako jarduketa-unitatea Uribarriko udal-jabetzako beste lursail batekin lotzeko erabakia, hain zuzen, guztia jarduketa-unitate bakar batean integratuz.
Modu horretan, aldaketa horri esker, Kareaga Goikoako lursaileko jabeek (enpresa pribatuak) hirugarren bati saldu ahal izango dute lurzorua, 1, 3, 5 eta 7 zenbakietako eraikinak eraisteko, eremua urbanizatzeko eta Bizkotxalden 94 etxebizitza eraikitzeko, zaharren egoitzaren eta Uribarri Institutuaren artean dagoen lursailean.
Sutea, “inflexio puntua”
HAPOaren behin betiko aldaketa hori atzoko osoko bilkuran onartu zuen udalbatzak, gobernu taldearen (EAJ-PSE), Elkarrekin Podemosen eta PPren aldeko botoekin eta EH Bilduren abstentzioarekin.
“Hirigintza plangintzaren behin betiko aldaketa da onartu duguna. Hasierako onespena duele urtebete onartu genuen aho batez, baita duela hilabete batzuk, 2024ko abenduan, behin-behinean onartu genuen plangintza aldaketa”, adierazi zuen Zuriñe Goikoetxea Hirigintza arloko zinegotziak: “Lurzoru publiko bat bilatu genuen Bizkotxalden eta horrela baretu ahal izango den eremu bat sortuko dugu Kareaga Goikoan”.
Isabel Cadaval PSEko zinegotziak uste du aldaketa hau “behin betiko irtenbidea” izango dela Kareaga Goikoa kaleko 1, 3, 5 eta 7 zenbakien lursoruan kudeaketa urbanistikoa egin ahal izateko.
Zigor Isuskiza EH Bilduko ordezkariak abstentzioaren arrazoia argudiatu zuen: “Teknikoki ez dugu ezer esaterik. Ez dugu oztoporik jarriko: abstentziora joko dugu aldaketa hau hirigingtza garapena egiteko konponbiodea izan daitekeelako. Hala ere, gure kezka adierazi nahi dugu, berandu onartu dugulako behin betiko aldaketa hau”.
Zentzu horretan, Goikoetxea Hirigintza arloko arduradunaren arabera, “urtebetean lortu dugu hasierako onespena, behin-behineko onespena eta behin betiko onespena onartzea”.
Marian Cantero Elkarrekin Podemoseko bozeramaileak ere uste du “atzerapen gehiegi” egon dela, baina urtarrilean Kareaga Goikoa kaleko 5. zenbakian sute larria gertatu zen, eta gertaera hori “inflexio puntua” izan zela adierazi zuen Canterok.
Kareaga Goikoa kaleko 1, 3, 5 eta 7 zenbakietako etxebizitzek nahita eragindako sute larria jasan zuten urtarrilaren amaieran, eta aurri-deklarazioaren fasean daude. Horrek esan nahi du egoiliarrak ezin direla itzuli higiezinak behin betiko hondatu direlako eta higiezin horiek eraisteko legezko betebeharra dagoelako.
Basauriko Udalak lehendik higiezin horiei buruz azaldu duen bezala, bertan bizi zirenek, gehienak etxebizitza horietako jabeak, ez dute beste bizileku bat jasotzeko eskubiderik, esparruan ez baitago abian hirigintza-jarduketarik.
“Baldintza hori ez zen betetzen sutea jazo aurretik, eta gaur egun ere ez da betetzen, onartutako HAPOaren aldaketak hirigintza-plangintzan baizik ez baitu eragiten eta ez baitakar esparrua kudeatzeko jarduketa”, esan zuen Goikoetxeak.
Epai judiziala betetzea
HAPOaren aldaketa hau Kareaga Goikoa eta Bizkotxalde artean banatutako hiru-lurzoruko esparru batean bideratuko dute. Eta, aldaketa hori epai judizial baten ondorioz zehaztu zuen Udalak.
Ikusirik sustatzaile pribatuek –ez da lurzoru publikoa– 26 urtetan Kareaga Goikoa kaleko 1, 3, 5 eta 7 zenbakietako ingurunean ez dutela inolako jarduketarik bideratu, Basauriko Udalak plangintza berri bat sustatzeko erabakia hartu zuen.
Plangintza hori 2021ean indarrean jarri zen HAPO berrian jaso zuten. Horretarako, Udalak lurzoru publikoa bilatu zuen aprobetxamenduak baliatzeko eta eragiketa egingarria egingo zuen jarduketa-unitate bakarra sortzeko. Hala bada, HAPOaren idazketa berrian Kareaga Goikoako jarduketa-unitatea Uribarriko udal-jabetzako beste lursail batekin lotzeko erabakia hartu zuen.
“Hasiera batean, Eusko Jaurlaritza eragiketan inplikatzeko aukera aztertu zen, baina Eusko Jaurlaritzak inbertsio-ahalegin handia egin du jada gure udalerrian etxebizitzaren arloan, eta ideia ez zen gauzatu. Gobernu taldeak orduan higiezinen merkatua aztertu zuen, etxebizitzak egingo zituen sustatzaile bati lursailak saltzea bideragarria ote zen ebaluatzeko, baina egiaztatu zen ez zirela parametro onargarriak ekimen pribaturako”, adierazi zuen Goikoetxeak.
Udala egiten ari zen azterketa horiekin batera, Trocabide enpresak, Kareaga Goikoa kaleko 3. zenbakiko eraikin osoaren jabeak, errekurtso bat aurkeztu zuen Administrazioarekiko Auzien Epaitegian, eraikigarritasun oso txikia zuela eta HAPOn integratutako beste jarduketa batzuen batez besteko eraikigarritasunekin parekatu behar zela iritzita.
Epaitegiak arrazoia eman zion Trocabide enpresari, eta gobernu taldeak epaia ez errekurritzea erabaki zuen, esparrua zegoen blokeo-egoera askatzen saiatzeko. “Izan ere, agindu judiziala betetzeak eraikigarritasuna handitzea zekarren, eta horrek erakargarriagoa egiten du eragiketa sustatzaile pribatu batentzat, eta bideragarritasun ekonomiko handiagoa ematen dio eragiketari”.
Aldaketa horri esker, lursaila hirugarren bati saldu ahal izango dio Kareaga Goikoa 1, 3, 5 eta 7 zenbakkietako jabeak, betako etxebizitza eraikinak eraisteko, eremua urbanizatzeko eta Bizkotxalden 94 etxebizitza eraikitzeko.
☉ Basauri
‘Emakumeak eta industria musikala’ solasaldia antolatu dute gaur Marienean, MAZ Basauri jaialdiaren baitan
Musikaren industriako emakumeek euren esperientziak partekatuko dituzte gaurko topaketan
Aurten, iaz bezala, hirugarren jardunaldi bat ere izango du MAZ Basauri jaialdiak bere 13. edizioan: azaroaren 6an, ostegunez, ‘Emakumeak eta industria musikala’ topaketaren bigarren edizioa antolatuko dute Rockeinek, MAZ Basaurik eta Marieneak elkarlanean.
Topaketa Marienea Basauriko Emakumeen Etxean izango da 18:00etan. Musikaren industriako emakumeen esperientziak beste emakume batzuekin partekatzea bilatzen du ekimenak, sektorean eta eszenatokietan emakumeen presentzia handiagoa sustatzeko helburuarekin.
Aurten, La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira protagonistak. Emilia Arias kazetari eta idazleak (TVE, Pikara Magazine) gidatuko du hitzaldia, eta doakoa izango da.
MAZ Basauri Basauriko Udalak sustatzen du. Aurtengoa 13. edizioa da eta aurreko hamabi edizioetan, udalerria erreferente musikal gisa kokatu du, eta Basauriko kultura-, merkataritza- eta ostalaritza-bizitzarako pizgarria izan da.
Basauritik mundura. Horrela definitu daiteke atzoko gaua St James’ Park estadioan, egun berean bi basauriarrek egin baitzuten debuta: Selton Sanchezek (18 urte) eta Asier Hierrok (20 urte). Ez zen debut gozoa izan, taldeak 2-0 galdu baitzuen, baina zalantzarik gabe ahaztuko ez duten eguna izango da bi lehoientzat.
Selton Sanchez, 18 urteko erdilaria da, bere irudimen eta maila teknikoagatik nabarmentzen dena. Durangon jaiotakoa den arren, Basaurin bizi da aspalditik. Asier Hierro, aldiz, 20 urteko aurrelaria, amaierako minutuetan atera zen eta gola bilatu zuen etengabe, ausardiaz eta lotsa izpirik gabe. Biek ibilbide luzea egin dute Lezaman, Hierroren kasuan kimua zenetik ari baita zurigorriekin.
Partidaren ondoren, Unai Simonek gazteen lana txalotu zuen: “Selton eta Hierro Txapeldunen Ligako mailan aritu dira”, adierazi zuen atezainak.
Basauriko bi futbolariek amets bat bete dute: Lezamako harrobia eta Basauriren izena Europako eszenatokirik handienetara eramatea.
☉ Basauri
68,8 milioi euroko aurrekontua kudeatuko du 2026an Basauriko Udalak
Gobernu taldeak aurrekontu proposamena aurkeztu du gaur eta oposizioak azaroaren 19ra arte dute zuzenketak aurkezteko epea zabalik
Basauriko udal gobernu taldeak 2026ko aurrekontu proposamena aurkeztu du gaur. Guztira 68,8 milioi euro kudeatuko ditu Udalak datorren urtean, aurten baino 3 milioi gehiago (% 4,6 gehiago).
Besteak beste, aurrekontua handitu da diru-sarrerak, oro har, handitu egingo direlako. Besteak beste, Udalkutxatik 36,1 milioi euro jasoko ditu Basauriko Udalak, aurten baino 2,1 milioi gehiago.
Inbertsioetara 2,7 milioi euro bideratuko ditu Udalak 2026an. Eta, inbertsioen arten bi narbamendu ditu gobernu taldeak. Alde batetik, haurreskola berria eraikitzea eta bestetik, hiri-ortuak sortzea.
Martxoan aurreratu bezala, haurreskola berria eraikiko dute herrian, Arizko Ikastolaren ondoan dagoen berdegune batean. Basauriko hirugarren haurreskola publikoa izango da, Basozelaikoaz eta San Migelekoaz gain. Gutxienez 42 plaza izango ditu eta 0-1 eta 1-2 urte bitartekoentzako lau gela izango ditu. 2026ko aurrekontuan milioi bat bideratuko du Basauriko Udalak haurreskola eraikitzeko.
Asier Iragorri alkateak eta Berta Montes Ogasun arloko zinegotziak aurkeztu dute gaur 2026ko aurrekontu proposamena // Geuria
Hiri-ortuei dagokienez, Iruaretxeta parkean jarriko du martxan proiektua Udalak datorren urtean. Aurreikuspenen arabera, 80 ortu inguru egokituko dituzte, bakoitza 35 eta 40 metro karratu arteko azalerarekin. Udalak 400.000 euro gordeko ditu aurrekontuan hiri-ortuak sortzeko.
Inbertsioen atalaren barruan, hezkuntza-zentroetan hobekuntza lanak egiteko 310.000 euro erabiliko ditu Udalak.
Eta, aurrekontu parte-hartzaileen prozesua ere inbertsioen baitan sartu du gobernu taldeak: hartara 400.000 euro zer egiteko erabakiko dute herritarrek. Irailean herritarrek euren proposamenak egiteko epea zabalik izan zuten eta laster bozkatzeko epea irekiko du Udalak.
Garapen jasangarrirantz
2026rako proposatutako kontuen ezaugarri azpimarragarrienetako bat da aurrekontuaren % 42 erabili nahi dutela 2030 Agendaren Garapen Jasangarrirako Helburuei (GJH) loturiko gastu sozialean, helburua izanik desberdinkeria murriztea eta herritar guztiei aukera ematea oinarrizko eskubideak baliatzeko: hezkuntza, osasuna, aukera-berdintasuna eta gizarte-babesa.
“Aurrekontuaren ia erdia GJHen gastu sozialean erabiltzeak agerian uzten du gure konpromisoa pertsonekin eta basauriarren bizi-kalitatea hobetzearekin. Inbertsioen helburua da inor ez uztea atzean, eta herritar denek eskubide eta aukera berberak izatea”, adierazi du Asier Iragorri Basauriko alkateak.
Helburu horietan giltzarri den Gizarte Zerbitzu eta Gizarte Sustapen Arloak “inoizko aurrekontu handiena” izango duela nabarmendu dute udal ordezkariek. Guztira, 10,8 milioi euro; aurten baino % 3,9 gehiago.
“Adinekoentzako aurrekontua % 4,9 handituko da, 5,1 milioi euroraino (2025ean, 4,8 milioi); eta Berdintasun aurrekontua % 4,5 haziko da (2025ean, 519.000 euro; 2026an, 540.000 euro). Hezkuntza Atalaren aurrekontua, berriz, % 151 igoko da (2025ean, 623.000 euro; 2026an, 1.564.000), haurreskola berrirako partida milioi batekoa izango delako”, azaldu du Berta Montes Ogasun arloko zinegotziak.
Zor publikoari dagokionez, 2026an 806.000 euroko zorra izatea aurreikusi du gobernu taldeak: “Doitasun eta gestio eraginkorreko politikak etengabe aplikatzeak maila ia sinbolikoan utziko du Udalaren zorra”, dio Montesek.
“2024. urtea amaitu genuen 1,6 milioi euroko zorrarekin, eta urte hau amaituko dugu 1,2 milioiko zorrarekin. 2026. urtean, 806.000 eurora murriztuko dugu; hau da, sarrera guztien % 1,2era. 2012an, Udalaren zorra 12 milioi eurokoa zen, eta horrek agerian uzten du egin dugun ahalegin handia, Basauriko bizilagunen euro bakoitza eraginkortasunez eta erantzukizunez administratzeko”, nabarmendu du Montesek.
Oposizioan dauden udaltaldeek azaroaren 19ra arte dute zuzenketak egiteko. Ondoren, asmoa da azaroko osoko bilkuran eztabaidatzea 2026ko aurrekontua.
☉ Basauri
Maialen Ibarra DA! PRO topaketan kontzertua emango du azaroan Durangon
Uxue Kerejeta abeslari gipuzkoarrak ere parte hartuko du topaketan: bere ‘Amaiera’ diskoan Beñat Armentia galdakoztarrak kolaboratu du teklatuan
DA! PRO topaketaren zazpigarren edizioa helduko da azaroaren 25ean eta 26an, Durangoko Azokaren atarian. Musika eta familia ikuskizunak antolatuko dituzte eta horien artean Maialen Ibarra sanmigeldarrak kontzertua emango du.
Maialenen kontzertua Durangoko Plateruena aretoan izango da azaroaren 26an, asteazkenez.
Era berean, Sueder, Sara Zozaya, Gartxot, Jonkass, Hondora, Ilargi, Euskal Barrok Ensemble, Maider eta Uxue Kerejeta arituko dira Plateruenan.
Aipatzearren, Uxue Kerejeta musikari zumarragarraren ‘Amaiera’ diskoan Beñat Armentia Arriandiaga galdakoztarrak kolaboratu du teklatuan.
Durangoko Azokako jarduna Azokako egunetatik haratago hedatzeko asmoz sortu zuen Gerediaga elkarteak DA! PRO topaketa.
☉ Basauri
Basauri Pintxo Festa antolatuko dute datozen bi asteburuetan: aurten 42 tabernak eman dute izena
Moluskuak, tomatea edota patata izango dira Basauri Pintxo Festako osagai protagonistak, azaroaren 14tik 16ra eta 21etik 23ra
Pintxoen hiriburu izango da Basauri azaroaren 14tik 16ra eta 21etik 23ra bitartean: Pintxo Festa antolatuko dute.
Aurten 42 tabernak hartuko dute parte, iaz baino bost gehiago. Horiek dira: Maybe, Valhalla, Edudoga, Luna, Bai Horixe, Coffee; El Cruce, Rymari, Toison de Oro, Nastase, Uribarri, Zutarri; Neure, Boxes, Dafne, Izarra Berria, Itxina Berria, La Zona, Berezi, Geltoki; Bonboi, Herriko Etxea, Arume, Haizebarri, Apolo XII, Erretoki Arin, New Magic; Nervion, Katilu, Irati, La Sede, Beitia Zaharra, 7 Calles, Galizia, Xuroi; Fission’s Berria, Ganeko, Thomas, Batzoki Central, Excelsior Berri, Nagusia eta Uribarri 22.
Horiek guztiek pintxo lehiaketan hartuko dute parte eta taberna bakoitzak bere miniaturazko jakia salgai jarriko du Pintxo Festa egingo den egun guztietan zehar. Pintxoek moluskuak, tomatea edota patata osagaiak izan behar dituzte.
Lehiaketan Urrezko Pintxoa, Zilarrezko Pintxoa, Brontzezko Pintxoa, Fusio-pintxoa, Soiltasuna eta Zaporea Pintxoa eta Pintxo Herrikoia sariak banatuko dituzte. Epaimahai profesional batek aukeratuko ditu irabazleak.
Urrezko Pintxoaren saria irabazten duenak 300 euroko txartela jasoko du, herriko hiru saltokitan, gehienez, gastatzeko. Zilarrezko Pintxoaren irabazleak 200 euroko txartela jasoko du, herriko bi saltokitan, gehienez, gastatzeko. Eta Brontzezko Pintxoari 100 euroko txartela emango diote, gehienez herriko bi dendatan gastatzeko.
Bestalde, bi lagunentzako bost menu zozkatuko dituzte pintxo gogokoena hautatzeko botoa eman, eta boto-paperean bost taberna desberdinen zigilua duten herritarren artean.
Pintxo Festa izango den bitartean kale animazioa egongo da Basauriko kaleetan: Etxebarria Aita-Seme Trikitilariak, Sama Siku fanfarrea, Danbayan batukada, Danbolin Txistulari Elkartea, Basauri Koral Elkartea eta Kilometrokantu.
Eta aurrekoetan bezala, Helmuga-Basauri-Pintxo Festa Gida publikatu eta banatuko du Udalak. Gida horrek pintxo lehiaketan parte hartuko duten 42 tabernaren izena, helbidea eta kokapen geografikoa jasoko ditu, eta kanpainan zehar kalea girotzeko egongo diren jardueren berri ere emango du.
Liburuxka parte hartuko duten tabernatan eta Basauriko erreferentziazko tokietan banatuko dute.
Usansoloko ikasleek Galdakaoko Elexalde Institutura joateko autobus-zerbitzua “laster” izango dutela dio Jaurlaritzak
Fernando Izagirrek ukatu egin du epaiketan DYAren dirua desbideratu izana
‘Emakumeak eta industria musikala’ solasaldia antolatu dute gaur Marienean, MAZ Basauri jaialdiaren baitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
