Sareak

☉ Basauri

Basaurik indarkeria matxistaren biktimei arreta eskaintzeko koordinazio protokoloa sinatu du

Gaur sinatutako protokoloaren helburuak dira biktima ardatz izango duen udal-zirkuitu bat bermatzea, eta baliabide publikoak izatea biktimaren beharretara egokitzen direnak, arreta koordinatua, integrala eta, batik bat, eraginkorragoa jaso ahal izan dezaten

|

Udal ordezkariak, Ertzaintzako Edurne Arce eta Osakidetzako Jon Guajardorekin // Basauriko Udala

Basauriko Udalak instituzioen arteko koordinazio protokoloa sinatu du Osakidetza eta Ertzaintzarekin batera indarkeria matxistaren biktimei arreta eskaintzeko. Gaur goizean Asier Iragorri Basauriko alkatea, Edurne Arce Ibaizabal Ertzain-etxeko burua, Jon Guajardo Osakidetzaren Barrualde Galdakao ESIko kudeatzailea eta María Larrinaga Basauriko Udaleko Gizarte Politikako zinegotzia bildu dira protokoloa sinatzeko Basauriko udaletxeko osoko bilkuren aretoan.

Protokolo horren helburuak dira biktima ardatz izango duen udal-zirkuitu bat bermatzea, eta baliabide publikoak izatea biktimaren beharretara egokitzen direnak, arreta koordinatua, integrala eta, batik bat, eraginkorragoa jaso ahal izan dezaten. “Basauriko Udalak badu, jada, sailarteko jardunerako udal-protokolo bat, eta indarkeria matxistako kasuetan esku hartzen duten udalaz gaindiko gainerako erakundeekin ere koordinatuta lan egiten dugu”, adierazi du Asier Iragorrik, “baina ez protokolo bati jarraikiz. Orain, biktimei eman beharreko arreta hobetzeko urrats bat egin dugu aurrera eraginkortasunean”, zehaztu du alkateak.

“Orain, biktimei eman beharreko arreta hobetzeko urrats bat egin dugu aurrera eraginkortasunean”

Zentralizazioa, Udalean

Horrela, eta Basauriko udal ordezkariek azaldu bezala, Basauriko Udaleko Oinarrizko Gizarte Zerbitzuetan zentralizatu eta koordinatuko da esku-hartze globala, biktima arreta-sistema publikora iristeko bidea edo zerbitzua zein izan den gorabehera. “Indarkeria matxistaren biktima bide askotatik irits daiteke arreta-sistemara, dela medikuarenera joanda, dela Emakumeen Informazio Zentrora hurbilduta eta abar, baina erreferentziako gizarte-langileak bermatuko dio arreta integrala eta ondoan izango du prozesu osoan, baita arreta psikologikoa, juridikoa edo bestelakoa jaso behar duenean ere”, zehaztu du Iragorrik.

Gaur sinatutako protokoloan jarduteko protokolo espezifikoak zehaztu dira indarkeria matxistaren biktima arreta integraleko zirkuitura iritsi den zerbitzuaren arabera: Oinarrizko Gizarte Zerbitzuetatik, Berdintasunetik, Udaltzaingotik, Osakidetzatik edo Ertzaintzatik. Udal ordezkarien arabera, arretaren jarraipena egite aldera, kasuak koordinatzeko mahaia bi hilean behin bilduko da. Gainera, protokoloaren garapenaren etengabeko ebaluazioa egingo da bi koordinazio-mahairen bitartez; bata mahai teknikoa izango da, eta bestea mahai estrategikoa.

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri

☉ Basauri

San Juan suak Basaurin: Basozelain, Pozokoetxen, San Migelen, Kareagan eta Bidebietan

|

Ekainaren 23ko gauen piztuko dituzte San Juan suak Basauriko auzoetan // Geuria

Ekainaren 23ko gaua urteko laburrena da, baita San Juan bezpera ere. Hori ospatzeko San Juan suak piztuko dira Euskal Herrian eta Hego Uriben.

Basaurin, Basozelain, Pozokoetxen, San Migelen, Kareagan eta Bidebietan piztuko dituzte San Juan suak ekainaren 23ko gauean.

Egitaraua / San Juan suak Basaurin

Ekainak 23, igandea

Basozelai
19:00 Txokolatada Solidarioa. Bildutako dirua CTNNB1 elkartearentzat
19:30 VI. Basozelaiko Bingo Solidarioa. Bildutako dirua CTNNB1 elkartearentzat
20:00 Taloak eta ogitartekoak: Loiuko
21:30 Ohiko San Juan Sua Batukale Samba taldearekin
San Juan jaien egitaraua osorik hemen!

Pozokoetxe
20:00 Txokolate jana
21:00 Basauritar Dantza Taldea
21:30 San Juan sua
San Juan jaien egitaraua osorik hemen!

San Migel
18:00 Karropoteoa
20:00 Txorizoa sagardotan egosia eta musika Ixatxak parkean
22:00 San Juan sua Ixatxak parkean
22:15 Afari herrikoia: bakoitzajk bere afaria ekar dezala

Kareaga
21:30 Txokolatada
22:00 San Juan sua

Bidebieta
21:00 Txokolate-jana bizkotxoekin
22:00 San Juan sua piztea
23:00 Keimada

Osorik irakurri

☉ Basauri

Mendi martxa antolatu dute San Migelen autismoa duen Hugo auzotarraren alde

|

Mikelats Kultur Elkarteko kideak Sofia Taramona ikastetxeko ikasleekin eta ordezkariekin // Mikelats Kultur Elkartea

Mikelats Kultur Elkarteak Mendi Martxa Solidarioa antolatu du beste urte batez. Aurtengoa hamaikagarren eduzioa da eta bilduko duten dirua autismoa duen Hugo auzotarrarentzat eta Apnabi elkartearentzat izango da. Hugok 4 urte ditu eta Sofia Taramona ikastetxeko ikaslea da.

San Migeleko Mendi Martxa Solidarioa ekainaren 22an, larunbatez, izango da, 10:15ean hasita Ixatxak parketik. Antolatu duten ibilbidea 7 kilometrokoa da.

Ekimenean parte hartu nahi dutenek 5 euro ordainduko dituzte ekainaren 22an bertan, jarduera hasi aurretik.

Mendi Martxa Solidarioaz gain, San Migeleko jaietan (irailaren 27tik urriaren 6ra bitartean) Apnabi elkartearen jarduera bultzatzera bideratutako ekimen solidario gehiago antolatuko ditu Mikelatsek.

Osorik irakurri

☉ Basauri

Elixabete Etxanobe Ahaldun Nagusiak Sarratuko metroaren L5 lineako obrak bisitatu ditu Basaurin

|

Elixabete Etxanobe Sarratun, Asier Iragorri Basauriko alkatearekin eta Ager Izagirre foru diputatuarekin // Bizkaiko Foru Aldundia

Elixabete Etxanobe Bizkaiko Ahaldun Nagusia Hego Uribe eskualdean izan zen atzo. Basaurin, Sarratuko metroaren L5 lineako obrak gertutik jarraitu zituen, Asier Iragorri Basauriko alkatearekin eta Ager Izagirre Herri Administrazio eta Erakunde Harremanetarako foru diputatuarekin batera.

Era berean, Bizkotxaldeko Etxetic zentroko lanak ere bisitatu zituzten. “Etxetic zentroaren bidez, Bizkaiko Foru Aldundiak doako laguntza-zerbitzua eskainiko du, mendekotasun-egoeran dauden Basauriko pertsonak etxean egon daitezen”, dio Iragorrik.

Foru erakundeak eguneko zentroa eta elkarbizitzarako etxebizitzak eraikitzea ere finantzatu du Basaurin, Sarratu auzoan.

“Elixabete Etxanobek eta Ager Izagirrek gure herriarentzat estrategikoak diren beste proiektu batzuekiko interesa agertu dute, hala nola, San Fausto, Bidebieta eta Pozokoetxe auzoen berroneratze eta eraldaketa urbanistikoa edo La Basconiako lurren etorkizuneko garapena jarduera ekonomikoa ekarri ahal izateko”, adierazi du Iragorrik.

Basaurin bisita egiteaz gain, Arrigorriagan Maite Ibarra alkatearekin batu zen, foru-eskumeneko hainbat proiektu partekatzeko.

Osorik irakurri

☉ Basauri

Basozelaiko Skate txapelketak adin txikikoak eta nagusiak lehiatuko ditu Basaurin

|

Ekainaren 22an, larunbatez, izango da Skate Txapelketa Basozelaiko jaietan barruan // Geuria

Skate txapelketa antolatu dute beste urte batez Basozelaiko jaietan, Basaurin. Ekainaren 22an, larunbatez, izango da txapelketa eta sei kategoria lehiatuko dira: 12 urtez azpikoa (nahiatez erabili behar dira kaskoa eta babesak), 18 urtez azpikoa, neskak, masters, open eta Half Pipe.

Sariei dagokienez, parte-hartzaileen artean materiala banatuko dute, eta Open eta Half Pipe kategorietako irabazleek dirua jasoko dute.

Parte hartzeko izena ematea ekainaren 22an bertan egingo dute parte-hartzaileek.

Basozelaiko Skate Txapelketa Basauriko Udalak antolatzen du, Zirt Zart Gazte Zerbitzuaren eta Basauriko Skate Erakundearen laguntzarekin. Aurten, Basauri Kirolaren Europako Hiria den urte honetan, jarduera fisikoa eta kirola sustatzeko jarduera mantentzen eta zabaltzen jarraitu dute.

Open Basozelai 2024

Ekainak 22, larunbata
11:00 12 urtez azpikoak
12:00 18 urtez azpikoak
13:00 Neskak
16:00 Masters
17:00 Open
18:30 Half Pipe

Osorik irakurri