☉ Basauri
Iker Casanova (EH Bildu): “La Basconiako nabeak birgaitzea izango da Basaurirekiko zor bat kitatzea”
La Basconiako nabeak birgaitzeko 4 milioi euroko partida lortu zuen iaz EH Bilduk Aurrekontu Orokorretan. Azaroan iragarri bezala, koalizio ezkertiarrak akordioa erdietsi zuen Espainiako Gobernuarekin aurtengo aurrekontu orokorra onartzeko, eta besteak beste, Basauriko La Basconia eraikin enblematikoko nabeak birgaitu eta egokitzeko 4 milioi euro bideratuko dituzte. Gaur, Oskar Matute EH Bilduko Kongresuko diputatua, Iker Casanova Bizkaiko ahaldun nagusi izateko hautagaia, Izaskun Duque Bizkaiko batzarkidea eta Exabier Arrieta, Bea Agirre eta Javi Valle Basauriko zinegitziak elkartu dira Basaurin, eta akordio horren inguruan egin dute berba.
“Pabilioi hauek ondare arkitektoniko industrialaren ikuspuntik sekulako garrantzia daukate, babestuta daude eta birgaitzea izango da herri honekiko zor bat kitatzea”, adierazi du Casanovak: “Nahi dugu ondare hori etorkizunera proiektatzea, hau da, industria ez izatea soilik gure lehenaldia. Bizkaia garai batean izan zen Estatu osoko lokomotora ekonomikoa bere industria sendoari esker. Industria hori kokatu zen, besteak beste, Basauri bezalako herrietan, baina gaur egun zearo desindustrializatuta gaude eta hirugarren sektorean kokatzen da gure ekonomiaren muina. Horrek ondorio negatiboak ekarri dizkigu, beraz, guretzat Bizkaiaren berrindustrializazioa oso garrantzistua da”.
Industria erabilerari dagokionez, enplegua Basaurira ekartzea “lehentasunezkoa” dela adierazi zuen azaroan Asier Iragorri Basauriko alkateak (EAJ), Udalak Sepesekin (Espainiako Garraio, Mugikortasun eta Hiri Agendako ministerioari atxikitako Lurzoruaren Enpresa Erakunde Publikoa) hitzarmena sinatu zutenean. “Ez da duela urteetako industria ezarriko La Basconiako lursailetan. Gaur egungo industria eraldatu da, eta teknologia, digitalizazioa eta I+D+i bezalako kontzeptuak dira egungo industria. Horrelakorik ekartzea onuragarria litzateteke Basaurirentzat eta herritarrentzat”, adierazi zuen Iragorrik.
Momentuz ez dago epe zehatzik La Basconiako lursailetan esku hartzeko. Sepesek Plan Berezia egin behar du, eta azaroan aurreikusi zutenez, aurten gauzatuko dute plan hori: “Lehendabizi eremua garbitu behar da, eta gero urbanizatu. Hori behin eginda, eraikuntza faseari ekingo genioke, baina oraindik data zehatzik gabe”, adierazi zuen Fidel Vazquez Sepesen zuzendari nagusiak.
Prozesu parte-hartzailea
Lau milioiko diru-partida onartu baino egun batzuk lehenago sinatu zuten Basauriko Udalak eta Sepesek hitzarmena. Hitzarmen horren arabera, Sepesek 35 milioi euro baino gehiago inbertituko ditu La Basconiako lursailetan, eta alokairuzko 398 etxebizitza eta industria eraikiko dituzte, eta La Basconiako nabe nagusia Udalari lagako dio. Basauriko udal gobernu taldearean (EAJ-PSE) asmoa lursai horri erabilera berri bat ematea da, eta pabilioiak zein erabilera izango duen zehazteko prozesu parte-hartzailea abiaraziko dutela adierazi zuen azaroan bertan Iragorrik: “Pabilioi horren erabilera zehaztu beharko da, eta herritarrentzat irekia izatea nahi dugu. Ondoren, landu beharreko proiektu bat idatzi beharko da. Eta nabe horretan zer egingo dugun zehazteko, basauriarren iritzia izango dugu, partaidetza-prozesu baten bidez”.
“Prozesu parte-hartzaile horren alde gaude, eta pabilioi horiek herriak berrearbiltzea nahi dugu. Auzoek behar dituzten ekipamenduak izan daitezke, edo jarduera ekonomikoa ezartzekoak ere. Hori oraindik ez dago zehaztuta, baina, jakina, bat etorri behar du Sepesen zati horren jarduera ekonomikoaren garapenarekin”, dio Exabier Arrieta Basauriko EH Bilduko zinegotziak.
Oskar Matute EH Bilduko diputatuak Madrilen zera adierazi dio GEURIAri: “Orain dagokiguna da Udalak 4 milioi euroko diru-partida horrek dakarzkion aukera guztiak aktibatzea hitzarmen baten bidez, eta Udaletik bertatik ere urratsak ematen hastea, adibidez, partaidetza-prozesu batekin, lur horiek berreskuratzeari edukia eta zentzua emateko”, dio, eta gaineratu du: “Lurrak berreskuratzea garrantzitsua zen, baina askoz garrantzitsuagoa da helburu argi bat izatea. Gure ikuspuntutik, helburua ekipamenduak hobetzea eta Basauriko jendearen bizi-kalitatea hobetzea izan behar da, eta, nire ustez, hor presionatu behar du orain Udalak proiektu argi eta sendo batekin, zuzkidura ekonomikoa eta lurren lagapen hori gauzatzeko eta zentzuz gauzatzeko”.
Etxebizitza-eredu alternatiboak azaltzeko topaketa antolatu dute Setem Hego Haizeak eta Sagarrak Ekologista Taldeak gaur, urtarrilak 21, Basaurin.
Irati Mogollon soziologoak ‘Posible al da komunitatean bizitzea?’ hitzaldia emango du 18:00etatik 20:00etara Pozokoetxeko Kultur Etxean. Hitzaldia gazteleraz izango da.
Solasaldian, komunitatean bizitzearen kasu praktikoak, esperientziak, baldintzak eta etxebizitrza kolaboratibo motak azalduko ditu.
“Gure egungo etxebizitza-errealitateei buruz hausnartuko dugu, errealitate horiei aurre egiteko estrategia kolektibo posibleak detektatuko ditugu eta Europan zeharreko etxebizitza kolaboratiboen kasuak aztertuko ditugu”, diote antolatzaileek.
Zaintza kolektiboak
Bestetik, urtarrilaren 22an, Irati Mogollon soziologoak tailer bat eskainiko du: ‘Zaintzaren arkitekturak eta zahartze aktibista’. Jarduera hau ere Setem Hego Haizeak eta Sagarrak Ekologista Taldeak antolatu dute.
“Tailer honetan, zaintza kolektiboari dagokionez toki bakoitzean dauden egiturak aztertuko ditugu, baita egitura horiek nolakoak izatea gustatuko litzaigukeen eta horiek gauzatzeko zer ekintza-ahalmen dugun ere.
Tailerra online izango da eta hau ere gazteleraz. Interesdunek izena eman behar dute esteka honen bitartez (doakoa).
Irati Mogollon euskal soziologoa da, adinekoen ahalduntze feministan, ekonomia feministako ikerketa-ekintzan eta etxebizitza kolektiboen prozesuen talde-bideratzean espezializatua, diziplinarteko ikuspegi batetik.
☉ Basauri
‘Basauriko auzokide berriak’ dokumentalak herrian bizi diren migratzaileen bizipenak ikusaraziko ditu
‘Basauriko auzokide berriak’ dokumentala aurkeztuko dute urtarrilaren 25ean, larunbatez, San Migeleko Taberna Nagusian
Basaurin bizi diren migratzaileen bizipenak ikusarazten dituen dokumentala diseinatu eta sortu du Zurrumurruen Aurkako Sareak, Basauriko Udalaren laguntzarekin.
‘Basauriko auzokide berriak’ da dokumentalaren izenburua eta zazpi bizilagunen testigantzak jasotzen ditu: Carol, Alí, Bouba, Fatu Matu, Jon, Toktam eta Nati.
Testigantza horien bidez, jasotako harrerari buruzko eta herrian kulturen arteko elkarbizitza eraikitzeari buruzko beren esperientziak, sentsazioak eta proposamenak partekatzen dituzte dokumentalean agertzen diren herritarrek.
Dokumentala urtarrilaren 25ean, larunbatez, aurkeztuko dute San Migeleko Taberna Nagusian, 11:00etan. Aurkezpenera joateko izen-ematea telefonoz (606 050 662) edo posta elektronikoz (amekadi@gmail.com) egin dezakete herritarrek.
“Basauriar guztiak animatu nahi ditugu film laburraren aurkezpen ofizialean parte hartzera, lan kolektibo baten emaitza baita. Dokumental horren bidez, hausnarketarako hainbat gune bultzatu nahi ditugu, hausnartu ahal izateko gure harremanak zelakoak diren eta zer egin dezakegun, gure egunerokotasunean, Basaurin, gure aniztasuna aitortzeko eta, gure aurreiritziak atzean utzita, errespetuz eta inklusioz jarduteko”, dio Isabel Cadaval Basauriko Udaleko Bizikidetza Aniztasunean Ataleko eta Immigrazioko zinegotziak.
Urtarrilaren 25ean, larunbatez, GKSk manifestazioak deitu ditu Bilbon eta Iruñean (18:00, Jesusen Bihotza plazatik), ‘Gerraren eta faxismoaren aurka, gazte langileok lehen lerrora’ lemapean.
Mobilizatzeko deialdia zabaltzeko helburuarekin, Basaurin eta Galdakaon mural-margoketak antolatu dituzte gaur, urtarrilak 18: goizean Basaurin eta arratsaldean Galdakaon.
Muralaren diseinua Elene Uribarri galdakoztarrak egin du eta Basaurin dozena bat gazte batu dira.
Eguerdian batu dira Bentako plazan Basauriko GKSko dozena bat gazte // Geuria
Olatz Galindez Verano Hego Uribeko GKSko kidearekin berba egin dugu goizean Basaurin: “Azken aldian eskualdean hedatzen ari dira faxismoari bidea ireki ahal dioten ideia erreakzionarioak, konkretutik, arrazistak eta matxistak. Adibidez, Basaurin pintada arrazistak agertu dira eta Arrigorriagan eraso arrazista bat eman zen abenduan”.
“Faxismoa langile klasearen aurkako ideologia eta praktika bezala identifikatzen dugu, eta sektore zaurgarrienak kolpatzen ditu; batez ere, migranteak, emakume langileak eta LGTBI kolektiboak. Horregatik, horren aurrean ikusten dugu beharrezkoa dela kaleak hartzea eta gurekin mobilizatzera animatzen zaituztegu”, dio Galindezek.
☉ Basauri
Basaurik 82.000 euro gastatu behar izan zituen 2024an ekintza bandalikoek eragindako kalteak konpontzeko
Zenbateko osoaren erdia baino gehiago, 45.800 euro, Solobarriako karpako pintadak eta olana konpontzeko erabili zituen iaz Basauriko Udalak
2024an zehar herrian izandako ekintza bandalikoek eragindako kalteak konpontzeko 82.000 euro gastatu zituen Basauriko Udalak.
Datuak datu, kalte hauek ordaindu zituen iaz Udalak:
- Eraikinetako hormetako edo Solobarriako karpako pintadak kentzeko: 45.800 euro
- Erre zituzten 10 edukiontzi ordezkatzeko: 12.000 euro
- Igogailuak konpontzea: 11.844 euro
- Bizkotxaldeko parkeko sareak eta segurtasun-zoru berriak konpontzeko: 7.477 euro
- Arrapala mekanikoetako beiren haustura konpontzeko: 4.260 euro
- Komun publikoetan egindako ekintzak garbitzeko: 1.016 euro
“Ekintza horiek kalte handiak sortzen dizkiete zuzenean basauriar guztiei, espazio publiko partekatuak hondatzen dituzte eta herritar guztiengan eragin duen aparteko gastua dakarte”, diote udal ordezkariek: “Adibidez, norbaitek nahita eragitea igogailuek eta arrapala mekanikoek ibiltzeari utz diezaioten izugarrizko kaltea da mugikortasun murriztua duten bizilagun askorentzat”.
Gauzak horrela, Basauriko Udalak dei egiten die gizalegerik gabe jarduten duten edo beren ardurapeko pertsonei hori egiten uzten dieten herritar gutxi horiei, eta eskatzen die haien ekintzen ondorioez jabe daitezen.
Pirritx, Porrotx eta Marimotos pailazoek ‘Euskararen zuhaitza’ oparitu zieten iazko maiatzean Basozelaiko Beat taldekoei. Pago bat da eta Sagarrak talde ekologistaren laguntzarekin, abenduan landatu zuten auzoan.
Ekitaldira bertaratu ziren. “Landatu dugun pago txiki honek, Euskararen zuhaitza, hazi egingo da eta horrekin batera euskararen erabilerak ere egingo du gora gure auzoan”, diote Beateko kideek.
Sagarrak taldeko ordezkariak kultura guztietan zuhaitzek balore sinboliko handia dutela nabarmendu zuen: “Euskal Herrian bi zuhaitz nagusi ditugu: haritza eta pagoa. Zuhaitzek eta basoek, hizkuntzak eta kulturak bezala, lurra behar dute sustraiak landatzeko. Zuhaitza hazi egingo da gu apenas konturatu gabe, eta espero dezagun ere euskal hiztunak ere haztea zuhaitzarekin batera”.
Ametzeta auzoko basoak naturalizatuko dituen herri landaketa egingo dute Zaratamon
Arrigorriagako gazteek Logo lehiaketa abiarazi dute kamisetak egiteko
Enaitz Arandia eta Arhane Mendibil zeberioztarrak txapeldun eta txapeldunorde izan dira Bizkaiko Eskuz Banakakoan
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Argazkiak / 650 lagunek hartu dute parte Arrigorriagako Ausartak Mendi Lasterketaren azken egunean
Argazkiak / Errege Magoen magiak etxeko txikienen ilusioa piztu du beste urte batez
Bideoa / Ibilaldia 2025 batzordea: “Herri kirolen desafioa arrakastatsua izan da! Oso pozik gaude”
Bideoa / Gerraren eta faxismoaren aurkako murala margotu du Hego Uribeko GKSk Basaurin
