☉ Basauri
Leire Palacios: “Euskaldunon begietatik herrialde ezberdinak bizitzeko begiradak dira Munduko Plazak”
Leire Palacios basauriarrak telebistara salto egin du ‘Munduko Plazan’ saioarekin. Irailaren 9an estreinatuko dute ETB1en.
Hamar urte baino gehiago dira Leire Palacios Egiguren (Basauri, 1986) basauriarra EiTBn lanean sartu zenetik. Albistegiak, webgunea, gidoilari lanak, irratsaioetako ahotsa… hamaika lan egin ditu Leirek EiTBn, eta oraingoan telebistara salto egingo du. ‘Munduko Plazan’ saioa aurkeztuko du ETB1en. Bidaia saio berria da eta irailaren 9an estreinatuko dute (ostegunero ETB1en, 22:20an). Elkarrizketak eta bidaia planak sartuko dituzte kokteleran, eta adierazi dutenez, “musikek presentzia oso nabarmena izango dute”. Istambul, Mexiko Hiria, Zurich eta Basilean, Atenas, Lisboa, Varsovia eta Krakovia bisitatu dituzte Leirek eta bere lantaldeak. Programa estreinatzen den egunean berarekin hitz egin dugu GEURIAn.
Irailaren 9an estreinatuko da ‘Munduko Plazan’ ETB1en eta zu aurkezle ikusiko zaitugu.
Hiru urte daramat PuntuEus Fundazioan lanean eta Euskadi Irratian ‘Sarean’ irratsaioa egiten. Aurten seigarren denboraldia egingo dugu eta gainera, hain zuzen, irailaren 9an hasiko gara baita ere lanean, justu ‘Munduko Plazan’ estreinatuko den egun eta ia-ia ordu berean! Kuriosoa da zenbat aukera dituzun Euskadi Irratian eta Euskal Telebistan aldi berean programa bat egiten egoteko eta zure burua kontraprogramatzeko. Lortu dut! Ordutegi berdinean nago irratian eta telebistan, ia-ia.
Argazkia: EiTB
Gogoratzen duzu noiz proposatu zizuten ‘Munduko Plazan’ aurkezteko ideia?
Lanean nengoen egun batez, Gernikan, Zinematik ekitaldian (Musika Bulegoak eta Forbidden Colours diskografiak antolatuta), eta bertan parte hartu zuen Larraitz Zuazo zinema zuzendariak. Iñaki Gorizelaiarekin batera ‘Bai, bagara’ dokumentala egin zuen, eta kontua izan zen ‘Munduko Plazan’ proiektu hau mahai gainean zegoela eta Larraitzekin jarri zirela harremanetan proiektua aurrera ateratzeko. Aurkezle bat behar zuten, eta Ane Rotaetxe programaren zuzendariarekin batera nire izena jarri zuten mahai gainean (Ane duela urte batzuetatik ezagutzen dut). Biei iruditu zitzaien ideia ona zela eta justu momentu horretan Larraitz oso haurdun zegoen; horren haurdun telefonoz deitu zidanean erditzen zegoela! Orduan proposatu zidaten.
Zelan hartu zenuen ‘Munduko Plazan’ aurkezteko erronka?
Egia esan ilusioa egin zidan nirekin gogoratu zirelako. Ez nuen espero, baina proposatu zidanean eta zein formatutan izango zen azaldu zidanean asko gustatu zitzaidan eta erronka onartu nuen. Gainera, pandemia garaian; izan ere bidaiatzen hasi ginen maiatzean, pandemia bete-betean zegoela eta deskonfinatzen hasiak ginela, baina oraindik kontu perimetralak indarrean zeudela… Munduan zehar bidaiatzeko aukera izatea, oso zortekoa nintzela iruditu zitzaidan, eta nire konfort zonatik ateratzeko aukera ikaragarria zela.
Bestetik, esan behar dut hegazkinetan montatzeko fobia daukadala eta horrek ere pisu handia eduki zuen. Asko kostatu zitzaidan, nahiz eta profesionalki oso argi ikusi, emozionalki asko kostatuko zitzaidala. Lehenengo hegazkinean negarrez montatu nintzen, bigarrenean ere bai, baina gaur egun esan dezaket fobia apur bat kontrolatuta daukadala. Hogei hegazkin inguru hartu ditut dagoeneko!
Irratia eta paperezkoa egin duzu, baina telebistan ez zaitugu asko ikusi.
EiTBn 2009an hasi nintzen lanean. Urteak aurrera doaz, gauzak egiten zoaz, baina ez nuen sekula buruan telebista saio bat aurkeztea. Ez nuen pentsatzen aukera hori helduko zitzaidala. Iruditzen zait salto logikoa ere badela: azkenean kazetaritzan, nik uste dut nahiko zortekoak garela, hainbat istorio ezagutzeko aukera daukagulako, baita hainbat formatutan ibiltzeko aukera daukagulako ere. Eta formatu horietan guztietan trebatu ahal izateak aukera politak ematen dizkigu gure burua ere frogan jartzeko eta gure buruari ikasketa-prozesuan etengabe mantentzeko.
Pandemia bete-betean, zailatasunik topatu zenituzten programa aurrera eramateko?
Gure helburua momentu oro “normalitate bat” ematea izan da. Hau da, herrialde askok trabak jarri dizkigute sartzeko, baina sartu gara sartu ahal izan garen horietan, eta joan garen herrialde guztietatik baten herrialdea konfinatuta topatu genuen. Guk aldez aurretik planning-a egin eta jada bertan geundela, aurreko egunean konfinatu zuten herrialdea. Saiatu gara ahalik eta normaltasun handiena ematen, bai herrialdearen irudi aldetik bai gure protagonisten irudia aldetik ere. Azken batean beraiek dira herriak edo munduko plazak bizi dituztenak.
Protagonistei dagokienez, zein perfil elkarrizketatu dituzu?
Euskal Herriko herritarrak elkarrizketatu ditugu, baina ez dugu nostalgiaz begiratzen Euskal Herria. Edozein arrazoirengatik kanpora bizitzera joan direnak dira protagonistak: herrialde horietan bizi dira eta ondo bizi ere! Hau da, gehienak bertan jada errotuta daude edo ikasketak ari dira egiten bertan… Nolabait herrialde horiek bizi egiten dituzten herritarrak elkarrizketatu ditugu. Herrialde horiek ezagutarazi dizkigute eta euren bizitzak ezagutzeko aukera izan dugu.
Hego Uribe eskualdeko norbaitekin topo egin duzu?
Pila bat pertsona elkarrizketatu ditugu, eta esango nuke Galdakaoko bat elkarrizketatu dugula. Pentsa, programa bakoitzean bost pertsona baino gehiago izan ditugu! Bilboko, Durangoko, Larrabetzuko edota Galdakaoko pertsonekin egin dut topo.
Instagram-era ere salto egingo duzue.
Bizitza horietaz eta kontatu digutenaz aparte, Instagramerako eta sare sozialetarako pilula batzuk aterako ditugu azaltzeko herrialde bakoitzean egin daitezkeen planak: izozkiak jatea, kafea hartzea, museo bat… Bidaiatzeko gako batzuk ere ematen ditugu, baina, era berean, bertan bizi diren euskaldunek herrialde hori nola bizi duten ezagutu nahi genuen: euskaldunen begietatik herrialde bakoitza ezagutzeko beste begirada bat, alegia.
Musikak ere garrantzia omen du programan.
Programa telebistarako da, baina oso kontziente gara aro digitalean bete-betan gaudela. Erabili dira pantailan erabiltzeko hainbat formula, eta musikak, adibidez, abesti bat jarrita dagoenean, abesti hori zein den eta norena den pantailan ikus daiteke. Eta herrialde bakoitzean saiatu gara herrialde hartako musikarien edo lotura daukan zeozer ateratzen. Beste nazioetako zein Euskal Herriko musikariak entzungo ditugu. Orduan, alde horretatik soinu bandak inguratzen ditu atalak.
‘Munduko Plazan’ grabatzen ari zinela, anekdotarik gogoan daukazu?
Asko gertatu zaizkigu, egia esan. Bat kontatzearren, Grezian gertatutako bat kontatuko dizut. Atenasen Akropolira joan ginen. Ez zegoen jende asko eta bertan grabatu nahi genuen. Kontua da Akropolian grabatzeko baimenak eskatu behar direla. Guk plangintza eginda genuen, baina lokalizazio batzuk ez genituen erabat itxita. Azkenean lortu genuen Akropolira joatea eta bertan grabatzea. Orduan, ari ginenez apur bat “de extranjis” grabatzen, ni urduri nengoen sergutasun langile asko zegoelako. Bada, plano orokor bat ari ginen grabatzen, eta oinez ari nintzela sandalian sartu zitzaidan harri bat. Harria hartu nuen eta jarraitu genuen planoa egiten (ez dakit programan agertuko den; kar, kar, kar) harria eskuan neukala. Amaitu genuenean plano hori grabatzen, lantaldea banku batean eserita zegoen eta banku horretan nire poltsoa zegoen, irekita, eta nik harria poltso horren gainean jarri nuen. Halako batean, segurtasun langile bat dator eta esaten digu: “Norbaitek hartu baldin badu harriren bat, jakin dezala hau ez dela legala”, eta noski, elkarri begiratu genuen pentsatuz: “Aizue, zer gertatu da?”, konturatu nintzen arte ni nintzela. Orduan harritxo hori bota nuen. Baina, pentsa, hortik aurrera etorri ziren adarjotzeak, saiatu nintzela Akropoliko harri bat lapurtzen, kartzela zigorra izango nuela…
☉ Basauri
Etxe Maitiako EPE azterketa egiteko aukera emango diote proba egunean erditu zuen emakume basauriarrari
Basauriko Etxe Maitia Udal Egoitzako Erizaintzako Laguntzaile lanposturako EPErako azterketa erditze egunean egitea beste aukerarik eman ez ziotela salatu zuen duela aste batzuk basauriar batek LABen bitartez, eta kexa Arartekoari aurkeztu zion sindikatuak.
GEURIArekin harremanetan jarri ziren emakumea eta bere bikotea eta gertatutakoaren berri eman zuten. “Zuzeneko diskriminazio” kasu bat izan zela adierazi zuten sindikatutik, sexuarekin zuzenean lotutako arrazoiengatik, hala nola, haurdunaldiagatik edo amatasunagatik, Emakumeen eta Gizonen Berdintasunerako eta Emakumeen aurkako Indarkeria Matxistarik Gabeko Bizitzetarako 1/2023 Legeak jasotzen duen bezala.
Basauriko Udalak esan zuen prozesu horren azterketa “deialdi bakar gisa” tipifikatuta dagoela, baina orain LABek jakinarazi duenez, azterketa beste egun batean egiteko aukera eman diote Z.G.G. basauriarrari: “LAB sindikatuak Arartekoari aurkeztutako kexaren ondoren, Basauriko Etxe Maitia egoitzak aukera emango dio kaltetutako emakumeari, erditzeko programatutako egunean enplegua egonkortzeko hautaketa-prozesuan azterketarekin bat zetorren proba beste data batzuetan egiteko”. Azterketa urriaren 21ean egingo du basauriarrak Basauriko udaletxean.
“Pozik gaude, alde batetik, Arartekoak azkar aztertu duelako kasua eta bere gomendioa egin duelako. Bestalde, sindikatu hau pozik agertzen da ere Basauriko Etxe Maitia Udal Egoitzako aldi baterako enplegua egonkortzeko prozesuaren Epaimahai Kalifikatzaileak hartutako erabaki berriagatik; izan ere, Arartekoak egindako gomendioa onartu duenez, oposizio-aldiko ariketako bi probak urrian bertan egiteko aukera emango dio kaltetutako emakumeari. Era berean, Z.G.G izangaiari edoskitzea egin ahal izateko beharrezko espazioa eta denbora emango diote proba egin bitartean”, adierazi dute LABetik.
☉ Basauri
Gizon bat atxilotu dute Basauriko Urbi auzoan, polizia-agenteei heriotza-mehatxuak egitea leporatuta
Ertzaintzak 50 urteko gizon bat atxilotu du Basaurin, bere etxean indarrez gotortu eta etxebizitza-bloke berean sutea eragitea egotzita. Gainera, polizia-agenteei heriotza-mehatxuak egitea leporatu diote
Ertzaintzak 50 urteko gizon bat atxilotu du Basaurin, bere etxean indarrez gotortu eta etxebizitza-bloke berean sutea eragitea egotzita. Gainera, polizia-agenteei heriotza-mehatxuak egitea leporatu diote.
Gertaerak atzo, urriak 13, jazo ziren Urbi auzoan 20:30ak aldera. Herritar batzuek jakinarazi zioten Ertzaintzari gizon bat zegoela bere etxebizitza barrutik objektuak bide publikora jaurtitzen.
Segurtasun Sailetik adierazi dutenez, gizona bere etxean gotortuta zegoen, eta, “bere onetik aterata, oso aztoratuta eta oihuka”. Ertzainak iritsi zirenean, irainka eta mehatxuka hartu zituen, eta leihotik kristalak eta altzariak jaurtitzen hasi zitzaien.
Berehalako Erantzuneko (PRI) patruilak bertaratu ziren eta negoziazio-taldea behin baino gehiagotan saiatu zen pertsona hori lasaitzen, baina ezin izan zuten ulertu gizona zein egoera psikofisikotan zegoen. Jarraian, ertzainek kea antzeman zuten eskaileran, eta gotortutakoak etxean sutea eragin zezakeelakoan, Larrialdi Zerbitzuek prebentzio-gisa etxebizitzen blokea hustu zuten, baina inor ez zen kaltetu eta ez zuten artatu behar izan.
Ondoren, Ertzaintzaren, Udaltzaingoaren eta Bizkaiko suhiltzaileen arteko elkarlanaren ondoren, PRIko patruila bat etxe barrura sartu zen, eta sarreran eraso egin zien gizonak, objektuak eta arma zuriak botata. “Berehala neutralizatu zuten”, diote.
Akusatua osasun-langileek artatu zuten, eta, ondoren, atxilotu gisa, Usansoloko Ospitalera eraman zuten; izan ere, zauri larriak zituen, kasu honetan, berak eragindako autolesioak.
Atxilotuak jarrera bera izan du beste batzuetan, eta oraingoan ustezko atentatu-delitu bat eta agintaritza-agenteei heriotza-mehatxuak egitea leporatu diote. Epailearen esku jarriko dute dagozkion eginbideak amaituta ostean.
Sokatira lehiaketa izan zen atzo, San Fausto egunean, Basauriko jaietan. Aurten Laguntasuna izan da garaile emakumezkoetan eta gizonezkoetan Ontzakek irabazi zuen.
Hala eta guztiz ere, airean dago mozoloen garaipena; izan ere, emakumezkoen finala baino lehen, Ontzaken gizonezkoen garaipena ospatzeko sokatira-esparrua inbaditu zuten kuadrillako kideek, emakumezkoen soka eta zorua erabat bustiz.
Txapeldunorde izan dira aurten Mozkorrak emakumezkoetan eta Urbiko Lagunak gizonezkoetan.
☉ Basauri
Argazkiak / Jo eta su aritu dira herriko taldeak sanfaustoetako sokatira txapelketan
Aurten espazio txikiagoa, jendea inoiz baino gertuago eta berotasuna eta tentsioa, inoiz baino handiagoak izan dira soka artean
Atzo bertan jokatu zuten Basauriko sanfaustoetako sokatira txapelketa, kuadrillen bazkaria eta irrintzi txapelketaren ostean. Aurten, trintxeretako obrak direla eta, jarduera Arizgoiti plazara lekualdatu dute eta jaietako txapelketa mitiko honen paisaia erabat aldatu du: espazio txikiagoa, jendea inoiz baino gertuago eta berotasuna eta tentsioa, inoiz baino handiagoa soka artean.
Plazaren bihotzean izan gara eta gertutik bizi izan ditugu aurtengo momentu erabakigarrienak.
☉ Basauri
Argazkiak / 4.600 lagun elkartu dira Basauriko kuadrillen bazkarian, eguzkipean
Herritarrek aterkinak, eguzkitakoak eta pergolak erabili dituzte eguerdiko 28ºetatik ihes egiteko
Aurten inoiz baino jende gehiago elkartu da Basauriko jaietako kuadrillen bazkarian. Guztira 4.600 pertsonek bazkaldu dute Bizkotxalde parkean 28ºko tenperaturarekin. Udako azken eguna eman du gaurkoak eta herritarrek aterkinak, eguzkitakoak eta pergolak erabili dituzte eguzki izpietatik ihes egiteko, baita ur pistolak ere.
Bazkaltzen egon zara bertan?
Danel Elezkano zaratamarrak esku pilota utziko du lesioak direla eta
Tokiko produktuak goi-mailako sukaldaritzara eramateko jardunaldiak antolatu dituzte Galdakaon
