☉ Basauri
Basauriko makro jaialdiak Basconiako lurren etorkizuneko garapena baldintzatuko du
Joan den abenduaren 28an, Basauriko Udalak prentsa-ohar baten bidez jakinarazi zuen 2009an SEPESekin (Espainiako Gobernuaren Lurzoruaren Estatuko Erakundea) sinatutako hitzarmena eguneratu zutela. Akordioak Baskonia-Larrazabal auzoko La Basconia fabrika zaharreko lurren ustiapena arautzen zuen.
Aste batzuk geroago, GEURIAk jakin ahal izan du Madrilgo Mad Cool musika jaialdiaren sustatzailea lanean ari dela 2022ko irailaren hasieran makro jaialdi bat egiteko lur horietan. Ekitaldi horrek milaka pertsona biltzeko gaitasuna izango du, eta, urtean behin egingo dela uste den arren, lur horietan herriarentzat baliagarriak izan daitezkeen jarduera ekonomikoak sortzeko beste aukera batzuk baldintzatuko ditu. Albistea hau argitaratu eta ordu gutxira, Basauriko Udalak prentsa ohar bidez jaialdia egiteko harremanak existitu direla baieztatu, baina proiektua baztertuta dagoela adierazi du.
Herria bitan banatzen zuen Pozokoetxeko trenbide-multzoa bereganatu ondoren, La Basconiako lursaila (130.000 metro karratu) azken aukera da Basauriren garapen ekonomikoa ahalbidetzeko; izan ere, gaur egun, Bizkaiko langabezia-tasa handienetako bat du, eta, urteen poderioz, jarduera ekonomikoa ahuldu da.
Udal gobernu taldeak, EAJ-PNV buru dela PSEren babesarekin, duela aste batzuetako prentsa-oharrean azaldu zuenez, “udalerriarentzat hain estrategikoak diren lur horietan egin nahi den edozein jarduerari euskarria ematea ahalbidetzen du hitzarmenak”, Asier Iragorri alkatearen hitzetan. Era berean, gobernuko bazkide Isabel Cadaval sozialistak, duela egun batzuk BIDEBIETAri eskainitako elkarrizketa batean, adierazi zuen “etxebizitzak eraikitzea eta enpresa berriak iristea izango dela Basauriko Zabalgunearen gakoa, eta gai hori funtsezkoa izango da etorkizunerako, baita biztanleriari dagokionez ere”.
Hala ere, SEPESekin sinatutako hitzarmenaren eguneratzeak ez du zehazten etxebizitzak eraikitzeaz haragoko ekintza edo proiektu zehatzik. Hori dela eta, akordioa publiko egin ondoren, beste alderdi politiko batzuen kritikak jaso zituen. Oposiziotik, EH Bilduk zalantzan jarri zuen, GEURIAri egindako adierazpenetan, Basaurik lurren gainean erabakitzeko ahalmena izatea: “Beti defendatu izan dugu lurrak Udalari lagatzea, udal interesa beste erakunde batzuen interes ekonomikoen gainetik jarriz, eta hitzarmen hau ez doa ildo horretatik. Kalitateko enplegua sor dezaketen jarduera ekonomiko potentzialen instalazioa behar du Basaurik”, adierazi zuen Exabier Arrieta zinegotziak. Era berean, Elkarrekin Podemosek zuhurtziaz jaso zuen hitzarmenaren birformulazioa, eta deitoratu zuen gobernu-taldeko ezein kidek ez diela azalpenik eman edo zalantzak argitu, akordioaren dokumentuak berak jasotzen duen informazio teknikoaz harago.
Hitzarmen berriak bitan banatzen ditu La Basconiako hamahiru hektareak: ‘Basconia Ipar-mendebaldea’, erabilera tertziario eta industrialeko 74.845 m²-ko azalerakoa; eta ‘Basconia ipar-ekialdea’, 62.455 m²-koa bizitegi-erabilerarako. ‘Basconia Ipar-mendebaldea’ eremuan, hitzarmen berriak jasotzen duenez, “SEPESek lur horiek askatasunez erabiltzeko aukera gordetzen du, baldin eta eremu horietako jarduketen ondorioz jasotako diru-sarrerek operazioaren itzulera ekonomikorako helburuak betetzen ez badituzte, eta horrek kezka sortzen digu”, adierazi zuen EH Bilduk.
Makro festibala Baskoniako lursailean ezarriz gero, lursail horiek Basauriko lurren zati handi bat okupatzen duten proiektu, erakunde edo instalazioen zerrenda batera gehituko lirateke, udalerriaren ekintza-askatasuna murriztuz garapen ekonomikoaren etorkizunari buruz erabakitzeko orduan, edota, lursail horiek ustiapena eragotziz.
Ezaugarri horietako edozeinetan daude Polizia Nazionalaren kuartelak, espetxea, Mercabilbao, Finagako argindar geltokia, etorkizuneko AHT geltokia, Ariz trenbide-multzoa, Renfeko trenbidea, Metro Bilbaoko kotxerak edo Bilbo Bizkaiko beste eremu batzuekin lotzeko udalerria zeharkatzen duen errepide korapiloa. Aipatutako azpiegitura guztiek eragin ekonomiko positibo oso txikia dute Basaurirako, eta azken hamarkadetan eztabaida politikoaren parte izan dira udalerrian.
Aipatutako azpiegiturek hartzen duten eremuari Sidenor eta Bridgestone enpresa handien lurrak gehitu beharko litzaizkioke. Hori guztia, 40.000 biztanlerekin batera, zazpi kilometro koadro dituen herri batean pilatuta.
2009KO HITZARMENA. Espainiako Gobernuko Etxebizitza Ministerioak, Estatuko Lurzoru Erakundearen (SEPES) bidez, La Basconiako lursailak erosi zituen 2009an Basaurin, 40 milioi euroren truke, lurzorua erosteko eskaintza publikoko eragiketa baten barruan, orotara, 180 milioikoa.
Ministerioak eta Udalak, garai hartan PSOEk gobernatutako bi erakundeen arteko hitzarmen bat sinatu ondoren, 2015erako 1.350 etxebizitza eraikiko zituztela iragarri zuten, gehienak babes ofizialekoak, eta pabiloi industrialetan arte-galeria bat. Edozein jarduketa egiteko ezinbestekoa zen lurzoruen kutsadura erabat garbitzea, 80 urte baino gehiagoko industria-jardueraren ondoren oso kutsatuta zeudelako.
Hamabi urte geroago, SEPESek eta Basauriko Udalak La Basconiako lurren ustiapen ekonomikoaren bidea aktibatzeko hitzarmena eguneratu dute.
Urtarrilaren 25ean, larunbatez, GKSk manifestazioak deitu ditu Bilbon eta Iruñean (18:00, Jesusen Bihotza plazatik), ‘Gerraren eta faxismoaren aurka, gazte langileok lehen lerrora’ lemapean.
Mobilizatzeko deialdia zabaltzeko helburuarekin, Basaurin eta Galdakaon mural-margoketak antolatu dituzte gaur, urtarrilak 18: goizean Basaurin eta arratsaldean Galdakaon.
Muralaren diseinua Elene Uribarri galdakoztarrak egin du eta Basaurin dozena bat gazte batu dira.
Eguerdian batu dira Bentako plazan Basauriko GKSko dozena bat gazte // Geuria
Olatz Galindez Verano Hego Uribeko GKSko kidearekin berba egin dugu goizean Basaurin: “Azken aldian eskualdean hedatzen ari dira faxismoari bidea ireki ahal dioten ideia erreakzionarioak, konkretutik, arrazistak eta matxistak. Adibidez, Basaurin pintada arrazistak agertu dira eta Arrigorriagan eraso arrazista bat eman zen abenduan”.
“Faxismoa langile klasearen aurkako ideologia eta praktika bezala identifikatzen dugu, eta sektore zaurgarrienak kolpatzen ditu; batez ere, migranteak, emakume langileak eta LGTBI kolektiboak. Horregatik, horren aurrean ikusten dugu beharrezkoa dela kaleak hartzea eta gurekin mobilizatzera animatzen zaituztegu”, dio Galindezek.
☉ Basauri
Basaurik 82.000 euro gastatu behar izan zituen 2024an ekintza bandalikoek eragindako kalteak konpontzeko
Zenbateko osoaren erdia baino gehiago, 45.800 euro, Solobarriako karpako pintadak eta olana konpontzeko erabili zituen iaz Basauriko Udalak
2024an zehar herrian izandako ekintza bandalikoek eragindako kalteak konpontzeko 82.000 euro gastatu zituen Basauriko Udalak.
Datuak datu, kalte hauek ordaindu zituen iaz Udalak:
- Eraikinetako hormetako edo Solobarriako karpako pintadak kentzeko: 45.800 euro
- Erre zituzten 10 edukiontzi ordezkatzeko: 12.000 euro
- Igogailuak konpontzea: 11.844 euro
- Bizkotxaldeko parkeko sareak eta segurtasun-zoru berriak konpontzeko: 7.477 euro
- Arrapala mekanikoetako beiren haustura konpontzeko: 4.260 euro
- Komun publikoetan egindako ekintzak garbitzeko: 1.016 euro
“Ekintza horiek kalte handiak sortzen dizkiete zuzenean basauriar guztiei, espazio publiko partekatuak hondatzen dituzte eta herritar guztiengan eragin duen aparteko gastua dakarte”, diote udal ordezkariek: “Adibidez, norbaitek nahita eragitea igogailuek eta arrapala mekanikoek ibiltzeari utz diezaioten izugarrizko kaltea da mugikortasun murriztua duten bizilagun askorentzat”.
Gauzak horrela, Basauriko Udalak dei egiten die gizalegerik gabe jarduten duten edo beren ardurapeko pertsonei hori egiten uzten dieten herritar gutxi horiei, eta eskatzen die haien ekintzen ondorioez jabe daitezen.
Pirritx, Porrotx eta Marimotos pailazoek ‘Euskararen zuhaitza’ oparitu zieten iazko maiatzean Basozelaiko Beat taldekoei. Pago bat da eta Sagarrak talde ekologistaren laguntzarekin, abenduan landatu zuten auzoan.
Ekitaldira bertaratu ziren. “Landatu dugun pago txiki honek, Euskararen zuhaitza, hazi egingo da eta horrekin batera euskararen erabilerak ere egingo du gora gure auzoan”, diote Beateko kideek.
Sagarrak taldeko ordezkariak kultura guztietan zuhaitzek balore sinboliko handia dutela nabarmendu zuen: “Euskal Herrian bi zuhaitz nagusi ditugu: haritza eta pagoa. Zuhaitzek eta basoek, hizkuntzak eta kulturak bezala, lurra behar dute sustraiak landatzeko. Zuhaitza hazi egingo da gu apenas konturatu gabe, eta espero dezagun ere euskal hiztunak ere haztea zuhaitzarekin batera”.
☉ Basauri
Bizkaiko Buruz buruzko esku pilota txapelketako finalak jokatuko dituzte larunbatean Basaurin
Basauriko Bidebieta Pilota Taldetik bi ordezkari izango dira finaletan: Jon Aperribai kadete mailan eta Eva Martinez emakumezkoen kategorian
Bizkaiko Buruz buruko esku pilota txapelketako finalak hartuko ditu Basaurik urtarrilaren 18an, larunbatez, Artunduagako frontoian, 10:00etatik aurrera.
Lau final jokatu dira: kadeteak, gazteak, emakumeak eta nagusiak.
Basauriko Bidebieta Pilota Taldetik bi ordezkari izango dira finaletan: Jon Aperribai kadete mailan eta Eva Martinez emakumezkoen kategorian.
Aperribaik, gainera, Hego Uribe eskualdeko aurkaria izango du aurrean: Zaratamoko Upo Mendi klubeko Oier Gil.
Lau final
Urtarrilak 18, larunbata
Artunduagako frontoia · 10:00
Kadeteak (3. maila): Jon Aperribai -Bidebieta- vs Oier Gil -Upo Mendi-
Gazteak (3. maila): Galder Buruaga -Lagun Artea- vs Aratz Diez -Olaburu-
Emakumezkoak: June Agirrebeitia -Durango- vs Eva Martinez -Bidebieta-
Nagusiak (3. maila): Markel Cabello -Lezama- vs Enaitz Arandia -Danak Bat-
☉ Basauri
38 urteko gizon bat atxilotu dute Basaurin beste pertsona bati pistola batekin mehatxatzeagatik
Ertzaintzak 38 urteko gizon bat atxilotu du Basaurin, beste pertsona bati pistola batekin mehatxatzeagatik eta gertakarian parte hartu zuten agenteen aurka jotzeagatik.
Gertaerak atzo arratsaldean jazo ziren. Bakoitza bere ibilgailuan zihoan eta atxilotua modu arriskutsuan gidatzen zegoenez, atzetik zihoan gidariak argi-keinuak egin zizkion.
Aurretik zihoan gidariak orduan pistola atera zuen leihotik eta airera tiro egin zuen, eta ondoren, beste gidariaren aurka apuntatu zuen “modu mehatxagarrian”, Segurtasun Sailetik adierazi dutenez.
Gertaera horren ondoren, bistatik galdu ziren Basaurira iritsi arte. Bertan, biak beraien ibilgailuetatik jaitsi ondoren, berriro topo egin zuten, eta arma zeramanak berriro erabili zuen, mehatxu gehiago eginez.
Biktimak Sos Deiakera deitu zuen eta Ertzaintzako agenteak berehala bertaratu ziren eta ustezko egilea identifikatu zuten.
Identifikatzerako orduan, atxilotuak agenteen aurka egin zuen irainekin eta heriotza-mehatxuak egin zizkien.
Ertzainek ikusi zutenez, atxilotuak alkohola kontsumitzearekin bateragarriak ziren sintomak zituen eta minutu batzuk lehenago ibilgailua gidatzen ari zenez, agenteek alkoholemia-proba egin zioten: baimendutako tasa baino askoz ere handiagoa eman zuen. Gauzak horrela, bide-segurtasunaren aurkako delituagatik ere eginbideak ireki dizkiote.
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Argazkiak / 650 lagunek hartu dute parte Arrigorriagako Ausartak Mendi Lasterketaren azken egunean
Bideoa / Gerraren eta faxismoaren aurkako murala margotu du Hego Uribeko GKSk Basaurin
Argazkiak / Ibilaldiaren urteari hasiera emateko Herri kirolen desafioa giro bikainean ospatu dute Galdakaon
Argazkiak / 650 lagunek hartu dute parte Arrigorriagako Ausartak Mendi Lasterketaren azken egunean
Argazkiak / Errege Magoen magiak etxeko txikienen ilusioa piztu du beste urte batez
Bideoa / Gerraren eta faxismoaren aurkako murala margotu du Hego Uribeko GKSk Basaurin
Gorka Perez: «Mendiko artzaintza galtzen ari da eta han behar dira, hain zuzen ere, txakurrak»
