Sareak

☉ Basauri

Marienearen 10 urteak ospatzeko Flashmoba, irakurketa kolektiboa eta ginkana feminista antolatu dituzte Basaurin

|

Bosgarren urteurrenean, 2017an, kalera irten zen Marienea // Geuria

Marienea Basauriko Emakumeen Etxeak 10 urte beteko ditu. Hori dela eta, urteurrena ospatzeko egitarau oparoa antolatu dute maiatzean zehar. Besteak beste, erakusketak, hitzaldiak, bertso saioa, mahai inguruak, azoka, bazkaria, Flashmob, herri korrikaldia, jolasak, perkusio saioa, irakurketa kolektiboa edota ginkana feminista antolatu dituzte ‘Ametsak eraikitzen jarraituko dugu’ lemapean.

“Badirudi atzo izan zela, baina 10 urte dira Basauriko Emakumeen Etxea inauguratu genuela. Zorionak Marienea! Urte zoragarriak izan dira, baina une zailak ere igaro ditugu, pandemia barne; horregatik, aurten ospakizun berezi bat egin nahi dugu. Gurekin ospatzera animatzen zarete?”, diote Marieneako ordezkariek: “‘Ametsak eraikitzen jarraituko dugu’ lelopean, Marieneako ateak ireki nahi ditugu, baita kaleak okupatu ere, gure kontsigna eta aldarrikapenekin”.

Marieneak 10 urte hauetan izan duen bilakaerari eta etorkizunean egin behar duen bideari buruz gogoeta egiteko unea dela dio Isabel Cadaval Basauri Udaleko Berdintasun arloko zinegotziak: “Gogoeta egiteko unea da, udalerriko emakumeekin eta kolektibo feministekin batera, Marieneak izan duen bilakaerari buruz eta etorkizunean egin behar duen bideari buruz, baina, halaber, hamar urteotan lortutakoa ospatzeko garaia ere bada”.

Berdintasun-politikak aitzindari

“Duela 10 urte inauguratu genuen Marienea, Basauriko Emakumeen Etxea. Feminismoaren klasiko batekin lotzen gaituen mugimendu feministaren aldarrikapen historikoa zen, elkar aurkitzeko, ikusteko eta ezagutzeko beharrezkoa genuen gela propioa. Egindako aurrerapenak gorabehera, zoritxarrez, gaur egun oraindik ere gure gizartean hain errotuta jarraitzen duen matxismoaren aurka borrokatzeko sareak eraikitzeko erreferentzia bat da”, diote Marieneatik.

Marienea sortu zenean EAEn emakumeen etxe gutxi zeuden; gaur egun, ordea, hogeina etxe daude autonomia erkidego osoan. “Udalerri honetan berdintasun-arloko politikak aitzindariak izan dira beti, eta historikoki elkarrizketa garrantzitsua izan da beti erakundeen eta mugimendu feminista konprometitu eta proposatzaile baten artean”, diote.

Marienea / 10. urteurrena

Maiatzak 12-20

Maiatzean zehar
– Emakumeen Dokumentazio Zentroko kartelen erakusketa
– Urteurreneko koadernoak banatzea
– Marieneako fatxada eta horma irudiak berriro margotzea

Maiatzak 12, osteguna
– 18:30 Hitzaldia Marienean: ‘Zer dago maitasunaren ondoren?’

Maiatzak 13, ostirala
– Ateak zabaltzeko eguna, Kiskali Gazte Talde Feministaren eskutik
– 18:30 Bertso saioa Marienean: ‘Ez da kasualitatea’

Maiatzak 14, larunbata
– 12:00 Mahai ingurua talde eta elkarte feministekin: Kiskali, Marienea, Intercambio, Korrikalariak, Adinekoak
– 13:30 Trukerako azoka txikia
– 14:30 Bazkari partekatua
– 16:30 Pasarela alternatiboa
– 17:30 Flashmoba Marienean: ‘Patriarkatua guk garaitu’

Maiatzak 15, igandea
– 12:00 Emakumeon Herri Korrikaldia Marieneatik
– 13:00 DJ saioa Bentako plazan

Maiatzak 16, astelehena
18:00 Jolas eta inprobizazio saioa Marienean Las Kapritxosas taldearekin

Maiatzak 17, asteartea
18:30 Perkusio saioa Marienean BasFemBand taldearekin

Maiatzak 18, asteazkena
17:30 ‘Visibilina’ren aurkezpena Marienean Argazki-hitza taldearekin
18:30 Irakurketa kolektiboa Marienean: ‘Andrezaharraren manifestua’ (Mari Luz Esteban), ‘Sexo, raza y genero’ (Angela Davis), ‘El feminismo es para toso el mundo’ (Bell Hook). Euskaraz eta gaztelaniaz dagoen liburu bat aukeratuko du partaide bakoitzak, bakoitzak nahi duen hizkuntzan irakurri ahal izan dezan.

Maiatzak 19, osteguna
18:30 Hitzaldia Marienean: ‘Gerra eta bakeari buruzko ikuspegi feministak’. Olga Rodriguez, Ane Irazabal eta Marina Gallego kazetariak

Maiatzak 20, ostirala
17:30 Ginkana feminista Marienean neska gazteentzat (9-14 urte)

☉ Basauri

Bideoa / San Juan gaua San Migelen, Basaurin

|

San Juan bezperan sua piztu dute San Migelen, Basaurin. Mikelats Kultur Elkarteak irudiak bidali dizkigu.

Osorik irakurri

☉ Basauri

Argazkiak / San Juan bezperako sua piztu dute Basauriko Pozokoetxen, euripean izan bada ere

|

Ekainak 23 ditu gaur, San Juan bezpera. Ohiturak jarraituta, sua piztu dute Basauriko hainbat tokitan, Pozokoetxen esaterako. Euritakoen azpian ikusi dute auzotarrek Basauritar Dantza Taldearen emanaldia eta San Juan bezperako sua.

Osorik irakurri

☉ Basauri

Espetxeratu dute droga-trafikoa leporatuta Basaurin atxilotu zuten ertzaina

Basaurin atxilotutako ertzainaz gain, beste bederatzi pertsona espetxeratu dituzte. Droga-trafikoa eta erakunde kriminaleko kide izatea egotzi diete

|

Behin-behineko espetxealdia ezarri diete hamar atxilotuei // Irekia

Guardia Zibilak eta Ertzaintzak hamar pertsona atxilotu zituzten duela hiru egun Bizkaian eta Kantabrian, droga-trafikoaren aurkako ‘Tahocei-Lizar’ operazioaren barruan.

Atxilotutakoen artean Basaurin atxilotu zuten 31 urteko ertzain bat. Polizia-eginbideak amaitu ondoren, atzo, larunbata, atxilotuak epailearen esku utzi zituzten, eta guztiak espetxeratzeko agindua eman zuen.

Droga-trafikoa, sare elektrikoan iruzurra egitea, sekretuak ezagutaraztea eta erakunde kriminal bateko parte parte izatea egotzi dizkiete.

Behin-behineko espetxealdia ezarri diete, epaiketa egin bitartean. Zigor-zuzenbidean, orohar, errugabetasun-presuntzioa nagusitzen da beti epaiketa egin bitartean, eta epaileak salbuespenezko neurri moduan soilik agintzen du behin-behineko espetxealdia; ihes egiteko arriskua dagoenean, edo frogak suntsitu daitezkeenean.

Operatiboan parte hartu zuten agenteek 78.840 euro konfiskatu zituzten eskudirutan. Substantzia estupefazienteei dagokienez, 19.592 gramo haxix, 22.973 gramo marihuana-kukulu, 10 kilogramo marihuana-ziztada, 1.300 gramo kokaina, 40 gramo MDMA eta 900 gramo ebaketa-substantzia atzeman zituzten.

Era berean, lau marihuana indoor landaketa desegin zituzten, hazkuntza fase desberdinetan zeuden 5.273 landarerekin. Landare horiek sareari legez kanpo lotutako elektrizitatea erabiltzen zuten. Gainera, atxilotuek erabilitako 14 telefono mugikor eta 6 ibilgailu okupatu zituzten.

Ikerketa Sestaoko ertzain-etxeko agenteek hasi zuten, zenbait pertsona beren mugapeko zenbait tokitan marihuana lantzen eta trafikatzen ari zirela ikusi zutenean.

Terrorismoaren eta Krimen Antolatuaren aurkako Inteligentzia Zentroaren (CITCO) bidez ezarritako koordinazio-esparruaren barruan, egiaztatu zen Guardia Zibilak susmagarrietako bati buruzko ikerketa bat irekita zuela, eta erabaki zuten elkarrekin operazio bat martxan jartzea.

Bi polizia-kidegoek droga-trafikoan aritzen zen erakunde kriminala zegoela egiaztatu ondoren, joan den ostegunean, ekainak 20, operatiboaren ustiapen-fasea garatu zuten.

Miaketak Basaurin, Abanto-Zierbenan, Alonsotegin, Barakaldon, Bilbon, Erandion, Leioan, Portugaleten, Sestaon eta Castro Urdialesen egin zituzten.

Osorik irakurri

☉ Basauri

Denac industrialdea hobetzeko hitzarmena sinatu dute Basauriko Udalak eta Aldundiak

|

Hitzarmenak enplegua sortzen eta mantentzen lagunduko du // Google

Cervantes etorbidean dagoen Denac industrialgunea hobetu eta enpresen lehiakortasuna handituko dute. Horretarako hitzarmena sinatu dute enpresa zentroak eta Basauriko Udalak, eta akordioari esker, Bizkaiko Foru Aldundiak hobekuntza-prozesua finantzatuko du. Hitzarmenak enplegua sortzen eta mantentzen lagunduko du.

Alde batetik, Basauriko Udalak beharrezkoak diren izapideak erraztu eta arinduko ditu eta Denacekin lankidetzan arituko da udal eskumenei eragiten dieten jarduerak diseinatzen, hala nola, urbanizazioa, estolderia edota argiteria publikoa.

Bestetik, Denac enpresa zentroak bi plan idatziko ditu: bata kudeaketakoa eta bestea jardutekoa. Gainera, bi planetan jasotzen diren jarduketak kontratatu eta finantzatu egingo ditu, Aldundiaren diru-laguntzarekin.

Osorik irakurri

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri