Sareak

☉ Basauri

Trans eta LGTB lege-proiektuaz hausnartzeko saioa antolatu dute otsailean Basauriko Marienean

|

Aitzole Araneta donostiar sexologo eta ekintzaile transfeministak gidatuko du saioa // Argazkia: ETB, 'Ta bihar zer?' saioa

‘Feministen arteko eztabaidak’ zikloaren barruan, Trans eta LGTB lege-proiektuaren inguruko hausnarketa saioa antolatu dute otsailean Marienea Basauriko Emakumeen Etxean. Otsailaren 2an, ostegunez, izango da 18:00etatik 20:30era bitartean. Saioa euskaraz izango da.

Aitzole Araneta Zinkunegi donostiar sexologo eta ekintzaile transfeministak gidatuko du saioa. 2017an ETB1eko Ur Handian programan parte hartu zuen Aranetak ‘Transexualitatea’ saioan.

Saioa doakoa da, baina parte hartu nahi dutenek izena eman behar dute esteka honen bitartez.

Trans eta LGTB lege-proiektua

Abenduaren 22an Diputatuen Kongresuan argi berdea eman zioten Trans eta LGTB lege-proiektuari. Testuak onartzen du pertsonaren borondatea dela baldintza bakarra erregistroan sexua aldatzeko; 16 urtetik beherakoen eta 14 urtetik gorakoen kasuan, berriz, gurasoekin edo tutoreekin joan beharko dute. Eta 12 eta 14 urte bitartekoek epaile baten oniritzia beharko dute erregistro-aldaketarako. 12 urtetik beherakoen kasuan, ezin izango dute sexua aldatu erregistroan, baina bai izena NANean.

Gainera, konbertsio-terapiak debekatzen ditu lege-proiektuak; lesbianei, bisexualei eta transei ugalketa laguntzeko teknikak erabiltzeko aukera izatea bermatzen die; eta lesbianen eta bisexualen seme-alaben filiazioa onartzen du, ezkonduta egon beharrik gabe. Bestalde, besteak beste, trans pertsonak gizarteratzeko estatu-estrategia bat aurreikusten du, kolektibo horren aldeko neurriekin, lan-arloan, hezkuntzan edo etxebizitzan, esaterako. Orain Senatuak jasoko du lege-proiektua, eta ondoren berriro itzuliko da auzia Kongresura.

Trans eta LGTB lege-proiektu honek kontrako iritziak izan ditu gizartean. Hala nola, mugimendu feministaren zati baten gaitezpena jaso du, esaten baitute lege honek “emakumea ezabatu” eta “lege iruzurra” egongo dela.

Legea eztabaidan

☉ Basauri

Bideoa / San Juan gaua San Migelen, Basaurin

|

San Juan bezperan sua piztu dute San Migelen, Basaurin. Mikelats Kultur Elkarteak irudiak bidali dizkigu.

Osorik irakurri

☉ Basauri

Argazkiak / San Juan bezperako sua piztu dute Basauriko Pozokoetxen, euripean izan bada ere

|

Ekainak 23 ditu gaur, San Juan bezpera. Ohiturak jarraituta, sua piztu dute Basauriko hainbat tokitan, Pozokoetxen esaterako. Euritakoen azpian ikusi dute auzotarrek Basauritar Dantza Taldearen emanaldia eta San Juan bezperako sua.

Osorik irakurri

☉ Basauri

Espetxeratu dute droga-trafikoa leporatuta Basaurin atxilotu zuten ertzaina

Basaurin atxilotutako ertzainaz gain, beste bederatzi pertsona espetxeratu dituzte. Droga-trafikoa eta erakunde kriminaleko kide izatea egotzi diete

|

Behin-behineko espetxealdia ezarri diete hamar atxilotuei // Irekia

Guardia Zibilak eta Ertzaintzak hamar pertsona atxilotu zituzten duela hiru egun Bizkaian eta Kantabrian, droga-trafikoaren aurkako ‘Tahocei-Lizar’ operazioaren barruan.

Atxilotutakoen artean Basaurin atxilotu zuten 31 urteko ertzain bat. Polizia-eginbideak amaitu ondoren, atzo, larunbata, atxilotuak epailearen esku utzi zituzten, eta guztiak espetxeratzeko agindua eman zuen.

Droga-trafikoa, sare elektrikoan iruzurra egitea, sekretuak ezagutaraztea eta erakunde kriminal bateko parte parte izatea egotzi dizkiete.

Behin-behineko espetxealdia ezarri diete, epaiketa egin bitartean. Zigor-zuzenbidean, orohar, errugabetasun-presuntzioa nagusitzen da beti epaiketa egin bitartean, eta epaileak salbuespenezko neurri moduan soilik agintzen du behin-behineko espetxealdia; ihes egiteko arriskua dagoenean, edo frogak suntsitu daitezkeenean.

Operatiboan parte hartu zuten agenteek 78.840 euro konfiskatu zituzten eskudirutan. Substantzia estupefazienteei dagokienez, 19.592 gramo haxix, 22.973 gramo marihuana-kukulu, 10 kilogramo marihuana-ziztada, 1.300 gramo kokaina, 40 gramo MDMA eta 900 gramo ebaketa-substantzia atzeman zituzten.

Era berean, lau marihuana indoor landaketa desegin zituzten, hazkuntza fase desberdinetan zeuden 5.273 landarerekin. Landare horiek sareari legez kanpo lotutako elektrizitatea erabiltzen zuten. Gainera, atxilotuek erabilitako 14 telefono mugikor eta 6 ibilgailu okupatu zituzten.

Ikerketa Sestaoko ertzain-etxeko agenteek hasi zuten, zenbait pertsona beren mugapeko zenbait tokitan marihuana lantzen eta trafikatzen ari zirela ikusi zutenean.

Terrorismoaren eta Krimen Antolatuaren aurkako Inteligentzia Zentroaren (CITCO) bidez ezarritako koordinazio-esparruaren barruan, egiaztatu zen Guardia Zibilak susmagarrietako bati buruzko ikerketa bat irekita zuela, eta erabaki zuten elkarrekin operazio bat martxan jartzea.

Bi polizia-kidegoek droga-trafikoan aritzen zen erakunde kriminala zegoela egiaztatu ondoren, joan den ostegunean, ekainak 20, operatiboaren ustiapen-fasea garatu zuten.

Miaketak Basaurin, Abanto-Zierbenan, Alonsotegin, Barakaldon, Bilbon, Erandion, Leioan, Portugaleten, Sestaon eta Castro Urdialesen egin zituzten.

Osorik irakurri

☉ Basauri

Denac industrialdea hobetzeko hitzarmena sinatu dute Basauriko Udalak eta Aldundiak

|

Hitzarmenak enplegua sortzen eta mantentzen lagunduko du // Google

Cervantes etorbidean dagoen Denac industrialgunea hobetu eta enpresen lehiakortasuna handituko dute. Horretarako hitzarmena sinatu dute enpresa zentroak eta Basauriko Udalak, eta akordioari esker, Bizkaiko Foru Aldundiak hobekuntza-prozesua finantzatuko du. Hitzarmenak enplegua sortzen eta mantentzen lagunduko du.

Alde batetik, Basauriko Udalak beharrezkoak diren izapideak erraztu eta arinduko ditu eta Denacekin lankidetzan arituko da udal eskumenei eragiten dieten jarduerak diseinatzen, hala nola, urbanizazioa, estolderia edota argiteria publikoa.

Bestetik, Denac enpresa zentroak bi plan idatziko ditu: bata kudeaketakoa eta bestea jardutekoa. Gainera, bi planetan jasotzen diren jarduketak kontratatu eta finantzatu egingo ditu, Aldundiaren diru-laguntzarekin.

Osorik irakurri

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri