Sareak

☉ Basauri

Merkatariak, mundu digitalari lotzen ari den bizimodua

Gure gizarteak gero eta harreman estuagoa du teknologiarekiko. Digitalizazio honen ondorioz, merkatari txikiek haien egunerokotasuna moldatu behar izan dute.

|

Ziortza Martinez Arrieta, Alain Villaescusa Ealo eta Irune Yenes Romero Basauriko merkatariekin egin dugu berba // Geuria

[Geuria #080 alean argitaratutako erreportajea] 72. pisuan dagoen bulegotik irten, aerolabangailua motxilatik atera eta hegan egin dezaketen kotxez beteriko kalera irten zara erosketak egiteko gogoarekin. Robotez osatutako dendan sartu zara fruta erosteko asmoz. Dendan salgai dituzten jakien hologramak aztertu ostean, mandarinak erostea erabaki duzu, udan guztiz murgildurik egon arren. Ordaintzerako orduan, begi-ninia irakurtzeko gai den tresna batera gerturatu zara zure alboan dagoen pantaila batek ordaindu duzula adierazten duen arte. Erositako mandarinak zurekin hartu eta etxera itzuli zara, inorekin hitz egin gabe, ia egunero bezala.

2021ean erosketa egun bat horrelakoa izango zela uste zuten laurogeita hamargarren hamarkadako biztanleek. Nabari denez, etorkizunarekiko zuten ikuskera ez da bete; hala ere, ezin da ukatu gure gizarteak gero eta harreman estuagoa duela teknologiarekiko. Digitalizazio honen parte dira merkatariak ere, era handiagoan edo txikiagoan haien egunerokotasunean teknologiaren erabilera txertatu baitute. 

Duela 27 urte Umeak liburu denda sortzea erabaki zutenek ez zuten imajinatzen zenbateko aldaketa egongo zen ia hiru hamarkada hauetan lan egiteko orduan. Are gehiago, duela hamasei urte, Alain Villaescusa Ealo (Basauri, 1978) dendan lan egiten hasi zenean, zegoen lan egiteko era guztiz ezberdina zen gaur dutenarekin alderatuta. Lehen urtean bi edo hiru aldiz egiten zituzten material eskariak; egun, hilabetero egiten dituzte. Baina, hau ez da gehiago saltzen dutelako, baizik eta produktuek merkatuan duten iraupena askoz laburragoa delako. Villaescusaren arabera, “gaur egun, mundua azkarrago doa”, hau berak argi ikusten du modetan. Izan ere, modan dagoen Youtuber batek liburu bat idatziz gero, bi astetan zehar ondo saltzen da, baina “gero beste bat dator eta dena berriz aldatzen da”, hasierako produktua merkatutik at utziz. 

Merkatariek berehalakotasun horren atzean dihardute beti, horrek salmentetan ondorio zuzenik ez izan arren. Alain Villaescusaren aburuz, bera hasi zenean hamar gauza saltzeko egun bat behar bazuten, gaur egun, denbora hori bikoiztu egin da.  Berehalakotasun horren atzetik ibiltzeak beste aldaketa bat eragin du merkatarien lanean, batez ere liburu denden kasuan, “antzina fax edo telefonoz” egiten baitzituzten eskariak; orain, ostera, “dena” internet bitartez egiten dute, biltegiekin dituzten harreman komertzialak barne.

Digitalizazioa edonon

Digitalizazioa gizarteak azken urteetan pairatu duen aldaketarik nabariena da. Hau bizitzaren esparru guztietan aurkitzen da, baita merkataritzan ere. Basauriko merkatuko arrain-saltzaile batek, esaterako, Whatsapp-a erabiltzen du egunero mezu bat bidaltzeko bere erosleei egun horretan dituen produktuak erakutsiz. Horrela, herritarrek eskariak egin diezazkiokete; bestela, erosle askok ezingo zuketen arrain freskoa erosi merkatuan haien ordutegiak direla medio. Bitarteko berdina erabiltzen du Alain Villaescusak erosleekin harremanetan egoteko. 

Hala ere, Umeak dendakoak argi dauka: “Digitalizaziora goazen arren, horrek ez du esan nahi salmentak online egitera goazenik”. Digitalizazio berri honetara moldatze aldera, Basauriko Merkatarien elkarteak tailerrak eskaintzen dizkie merkatariei ahalik eta era egokienean molda daitezen. Eskaintzen dituzten tresnen artean, SEOri, WordPressi, Facebooki edota sare sozialetan eta web orrialdean erabiltzeko argazkilaritzari lotutakoak daude. Halaber, elkarteko batzarreko kide eta La ventana natural dendako jabea den Ziortza Martinez Arrietaren (Basauri, 1980) aburuz, “digitalizazioak daukan arazorik handiena errendimendua da”. Zeren, luzera begirako errendimendua ematen du gehienetan eta gastu ekonomiko handia da. 

Digitalizazio orokor honen adibide argia hezkuntza da. Oinarrizko heziketan ordenagailuek gero eta pisu handiagoa dute, liburuei lekua kenduz. Allain Villaescusaren arabera, hala ere, paperak ez du bere lekua guztiz galdu ordenagailuen erabilerak gora egin duen arren. Salmentetan nabaritzen du hau berak: “testuliburu gutxiago saltzen dira baina mugimendu gehiagorekin”. Eragin hau ez dator soilik haurrek matematikako liburua behar dutelako oraindik, baizik eta, “merkataritza-guneek liburuak eta papergintzako materiala saltzeari utzi diotelako”.

Alain Villaescusaren aburuz, gaur egungo merkatarien egunerokotasuna teknologiaren inguruan dabil. Umeak liburu dendan, esaterako, produktuen biltegia ordenagailuan dute. Gainera, berak ordaintzeko txartelaren erabileran igoera bat sumatu du, pandemiak lagunduta, akaso. 

TicketBAI, merkatariek ez

TicketBAI Eusko Jaurlaritzak eta Euskal Autonomia Erkidegoa osatzen duten hiru foru-aldundiek martxan jarri duten ekimena da. Ekimen honen ondorioz, jarduera ekonomiko bat aurrera eramaten duen edonork fakturazio-software bat erabili beharko du. Honekin lortu nahi dutena zergadunen jarduera ekonomikoen diru-sarrerak kontrolatzea da. Bereziki, azken kontsumitzaileei ondasunak edo zerbitzuak ematen dizkieten sektoreetako jarduerenak, neurri handi batean eskudirutan kobratzen baitute. Ogasunen aburuz, informazio hori erabiliko da zergadunei zerga-betebeharrak betetzen laguntzeko.

Merkatariek ekintza hau ez dute ondo ikusten, onurak ekarri beharrean kalteak soilik ikusten dizkiotelako. Dendako gailu elektronikoak aldatu behar izan dituzte merkatari askok. Basauriko Merkatari elkarteak ez du ekintza hau lehentasun bat bezala ulertzen, eta merkatariei eragiten dien karga ekonomikoa salatzen dute. Izan ere, arrandegi batek, adibidez, bere egunerokotasunean ez du datafonoa erabiltzen; hori dela-eta, ez du wifirik ordaindu behar, zerbitzu horren beharrik ez duelako. TicketBAIrekin, ostera, zerbitzuok kontratatu beharko ditu, beharrezkoak baitira ekimen honetarako.

Alain Villaescusak eta Ziortza Martinezek azaldutakoaren arabera, hainbat merkatarik haien egunerokotasunean erabiltzen zituzten programa informatikoak moldatu behar izan dituzte TicketBAIk eskatzen dituen ezaugarriak betetzen ez dituztelako, EAEn bakarrik eraman delako aurrera ekintza hau. La ventana natural dendaren kasuan, esaterako, programa moldatu ezin izan balu, 1500 produktutik gora berkatalogatu beharko zituzkeen, horrek suposatzen duen denborarekin.

Aldaketa hau egiteko 2024ra arte dute denbora merkatariek, Ziortza Martinezen esanetan, “ogasunek telematikoki ezin izan dutelako hau guztia kudeatu”. Gainera, Villaescusak azpimarratzen zuenez, gastu ekonomikoen eragina merkatari txikiek pairatuko dute bakarrik, El Corte Inglés edo Fnac bezalako erraldoiek egoitza fiskala EAEtik kanpo dutelako.

Erraldoiekin lehian

TicketBAIk eragin dezakeen ezberdintasuna ez da digitalizazioaren ondorioz merkatari txikien eta sektoreko erraldoien arteko konpetentzian eragiten duen faktore bakarra. Basauriko Merkatari elkarteko Ziortza Martinezen ustetan, interneten saltzeak konpetentzia handitzen du, batez ere, herritarrek hornitzaileari berari zuzenean eros diezaioketelako, eta horiek prezio baxuagoak izaten dituzte. Honi aurre egiteko, denda txikiek aholkularitza eta arreta pertsonalizatua eskaintzen dutela dio Martinezek. Bere aburuz, bere erosleek definitzen dute haren denda eta haien beharrak asetzeko behar dutena aurkitzeko aukera dute. Gainera, zerbait gaizki dagoenean aldatzeko aukera dago era erraz batean. Covid-19ak eragindako pandemia dela-eta, erosle eta dendariaren arteko harremana ere digitalizatu egin da, dendari askok Whatsapp bezalako plataformak erabiltzen baitituzte haien erosleekin kontaktuan egoteko.

Alain Villaescusaren iritziz, halaber, jendearekiko arreta pertsonalizatua ez da dendari txikien eskaintzarik garrantzitsuena, produktua momentuan eskuratzeko gaitasuna baizik. Bere ustez, “jende gehienak ez du aholkurik nahi”; nahi dutena da gauzak momentuan edukitzea, itxaron gabe. Izan ere, Amazonen leloetako bat 24 orduan produktua etxean duzula izan arren, merkatari txikiek eskaintzen duten denbora-tartearekin alderatuta eternitate bat da. Zeren, dendan produktua aukeratu eta momentuan eraman dezakezu etxera.

Umeak liburu dendako saltzaileak azpimarratzen du interneteko erraldoiak ez direla lehenengoak konpetentzia egiten: “Betidanik egon da konpetentzia eta horri aurre egiteko moldatzen joan gara. Hasieran Bilbondo bezalako supermerkatu handiak izan ziren, gero metroa etorri zen eta jendea Bilbora jaitsi zen erosketak egitera eta, orain, Amazon bezalakoak datoz”. Salmenta batzuk erraldoi hauetara doazen arren, Villaescusak ez du uste “merkatu osoa” internetera doanik.

Erakusleiho birtualak

Dena dela, erosketak ez dira aholkularitzagatik edo produktua eskuan izateko aukeragatik hasten, begietatik baizik. Antzina, dendetako erakusleihoek betetzen zuten funtzio hau, baina, dena bezala, denboraren poderioz digitalizatu egin dira. Hor sartzen dira erakusleiho birtualak, denda asko batzen dituzten ekimenak. Hego Uriben egon badago horrelako ekimen bat: Gurean. Gurean Galdakaoko Merkatari elkarteak aurrera daraman proiektua da. Bertan herriko hainbat denden informazioa jaso daiteke, kontaktua edo helbidea, esaterako.

Onurak ekar ditzakeela onartzen duen arren, Alain Villaescusak gastu ekonomiko handiegia ikusten du benetako errendimenduarekin alderatzen bada. “Herriarentzat onurak ekar ditzake denden erakusleiho bat duelako, baina dendentzat ez da hainbesterako, denbora gehiegi da lortuko duzun etekinarekin konparatuta”. Izan ere, liburuen sektorean erakusleiho birtualek denbora daramate gure artean; hauetatik azpimarragarriena todostuslibros.com izanda. Horrelako ekimenen parte izateko kuota bat ordaindu behar da urtero eta Villaescusaren arabera, “momentua ez dago halako gastuak egiteko”

Azken aldian, interneten salmenten gorakada dela-eta, hainbat erakunde eta enpresek antzeko ekimenak eraman dituzte aurrera. BBK-k esaterako, Eup! plataforma sortu du, tokiko merkatariak web orrialde bakar batean metatze aldera. Baina, todostuslibros.com-en kasuan bezala, kuota ordaindu beharra dago. “Suposatzen da gehiago saltzen dela, baina diru hori kuotan ordaindu behar baduzu, dirua eskuz mugitzen ari zara, besterik ez”, dio Alain Villaescusak. Hau kontuan izanda, bere ustetan, hobea da hamar salmenta interneten izan beharrean bi dendan izatea.

Gainera, Villaescusaren aburuz, “Instagram eta web orrialdeak dira egungo erakusleihoak”. Iritzi berdina partekatzen dute Basauriko Merkatari elkartetik, azpimarratuz webguneak erakusleihotzat erabilita, urrun bizi direnek dendaren inguruko informazioa jaso dezaketela. Ziortza Martinezen ustez, “digitalizazioak ikusgaitasunean laguntzen du”, herrian betidanik egon diren dendak interneti esker ezagutzen baititugu, kale horietatik ez garelako inoiz igaro. Instagram bezalako sareen garrantzia azpimarratzen du Martinezek, egunerokotasunean finkaturik dauden sareetan presentzia edukitzeko ahalmena ematen diotelako merkatariari.

Oihanean lanean

Merkatari txikiak ez dira Instagram erabiltzen duten bakarrak. Izan ere, digitalizazioa dela medio, hainbat gaztek denda online bat sortzea erabaki dute Instagram plataforma nagusi bezala erabilita. Hori da Irune Yenes Romero (Basauri, 1993) herritarraren kasua. Duela urtebete hasi zuen bere ibilbidea @serendipia.art.bags kontuarekin. Bertan, berak eskuz marraztutako telazko poltsak saltzen ditu; edo hobeto esanda, bere artearen “zatitxo bat” saltzen du. 

Bere ustetan, Instagramen denda bat izateak alde positibo zein negatiboak ditu. Alde batetik, ikusgaitasun handiko sarea da, hortaz, jendearengana heltzeko tresna aproposa da oso. Bestetik, konpetentzia handia dago, eta hau saiheste aldera “ordu asko sartu behar dira”. Iruneren kasuan, esaterako, egun osoan zehar egiten duen lana da; ez baita bakarrik poltsak egitea, “Instagramerako argazkiak eta bideoak egin eta prestatu” behar ditu. Yenesen aburuz, denbora nahikoa eskainita eta “ondo lan eginda” jarraitzaile kopuru handi batera heltzeko aukera dago. 

Sekretua? Besteengandik ezberdintzea eta ahalik eta era naturalenean agertzea. Basauriarraren kasuan, esaterako, bere eskaintza nagusia ez dira “diseinu normalak”, jendeak dituen ideien gainean egiten duen lana baizik. Bere aburuz, artistak oso ondo baloratuta ez daudenez, sare sozialek aukera ematen die haien artea saldu ahal izateko. Hori bai, azpimarratzen du mundu honetan sartzeko ideia ez dela birritan pentsatu behar, oihanean  lan egitea baita.

Etorkizun digitala

Merkatu osoa oihan bat bihurtu ez dadin, Ziortza Martinezen arabera, etorkizuna “kooperazioan dago”, hau da, gremioek haien artean batzea erraldoiei aurre egiteko. Izan ere, merkatariek etorkizuna “zaila” ikusten dute. Umeak liburu dendan, esaterako, “momentu oro” merkatuaren aldaketetara moldatu behar izan dira, eta horrela jarraituko dute, aldaketa digitalizazioa izan arren. Martinezen arabera, datozen hamarkadetan “digitalizazioak aurrera egingo du”.

Bere ustez, digitalizazioak lan prekarietatea sortu ez dezan, gizartea hezi beharra dago kontsumo arduratsu batean. Izan ere, gauzak dauden bezala jarraituz gero “lan prekarietatera goaz zuzenean”, gremioak desagertzen ari direlako. Gainera, Martinezek azpimarratzen du digitalizazio bortitz batek soziabilitate gabeko gizartea eratu dezakeela. Hala ere, ez du uste gure herrietan mutur hartara helduko garenik, “gizarte bihurria” garelako.  

Gure gizartearen atal garrantzitsua dira dendak, gure artean harremanetan egoteko erabiltzen ditugunak. Alain Vaillaescusak esan bezala, “herria denda barik ez da benetako herri bat”, lo egiteko eraikin multzoa baizik. Izan ere, merkatari txikien dendek ez dute herria ondasun eta zerbitzuez soilik hornitzen, denda batek argitasuna ematen dio kaleari eta mugimendua eragiten du, kale ilunak herrietatik kenduz. Gainera, Ziortza Martinezen aburuz, “herriko dendek ekonomia zirkularra eratzen dute”, dirua herrian mantenduz.

“Zer enplegu mota nahi dugu sortu?”. Hori da gure buruei egin behar diegun galdera. Zeren, ez da interneten murgildutako gizarte batean erosketak egitea, baizik eta erosketa horiek nola (eta nori) egiten diren. Horregatik, 1 eta 0en mendean dagoen gizarte honetan, momentu bat hartu beharko genuke nahi dugun bizitza ereduaz hausnartzeko, gure merkatariez hausnartzeko. 

☉ Basauri

Hauek dira Basaurik aurtengo aurrekontuan onartu dituen herritarren sei proiektu

|

Besteak beste, berdeguneak handitzea espezie autoktonoak landatuta izan da proiektu bozkatuenetariko bat // Geuria

Espaloietan tratamendu irristagaitz-lanak areagotzea, berdeguneak handitzea espezie autoktonoak landatuta, udalerriko argiteria publikoa hobetzea, adineko pertsonen jardueretarako lokalak hobetzeko lanak egitea, espaloietako baldosak konpontzeko lanak areagotzea, eta aire zabaleko kirol-instalazioak handitzea.

Horiek dira herritarren gehien bozkatu dituzten proiektuak 2024ko aurrekontuan txertatzeko, aurrekontu parte-hartzaileen bitartez. Basauriko Udalak 400.000 euro inbertituko ditu proiektu horiek aurten gauzatzen: 25.000 euro espaloietan tratamendu irristagaitz-lanak egitera; 25.000 euro berdeguneak handitzera; 100.000 euro udalerriko argiteria publikoa hobetzera; 100.000 euro adineko pertsonen jardueretarako lokalak hobetzeko lanak egitera; 100.000 euro espaloietako baldosak konpontzeko lanak areagotzera; eta 50.000 euro aire zabaleko kirol-instalazioak handitzera.

Aurrekontu parte-hartzaileen prozesua iazko irailean jarri zuen martxan Udalak. Prozesuaren lehen fasean 596 proposamen egin zituzten herritarrek, iaz baino 219 proposamen gehiago.

Udal-teknikariek proposamenak aztertu zituzten eta 18 egitasmo lehenetsi zituzten. Proposamenak baloratzean, kontuan izan zuten ekonomikoki eta teknikoki bideragarriak izatea, Basauriko herritar guztien interes orokorra interes partikularren gainetik jartzea, udalerriko lurralde-oreka bermatzea eta Garapen Jasangarrirako Helburuetara egokitzea.

1.615 bozka

Bozketa fasean 1.615 basauriarrek eman dute bozka: 653 ados.basauri.eus webgunearen bitartez; 512 boto-ontzien bitartez; 279 postontzien bidez; eta 171 informazio-karpen bitartez.

Bozka emateko parte-hartze datuak laukoiztu egin dira iazkoekin alderatuta: iaz 376 herritarrek eman zuten bozka.

“Partaidetza-zifra bikain horrek sekulako poza eman digu, ikusten ari garelako pixkana-pixkana herritarrak barneratzen ari direla udal-gaietan parte hartzeak duen garrantzia, basauritarrek beren iritzia emateak eta beren ideiak proposatzeak duen garrantzia, gure udalerria hobetze aldera”, dio Asier Iragorri alkateak: “Beste pizgarri bat da guretzat, Basauriko Udaletik jarrai dezagun martxan jartzen prozesu eta tresna gehiago, ahotsa emateko udalerriko bizilagunei”.

Kanpo: 12 egitasmo

Aurtengo aurrekontuan sei proiektu onartu dituzte, eta kanpo geratu dira 12:

  • Gizarte-etxeetako ekipo informatikoak hobetzea
  • Entsegu-aretoei ekipamendu handiagoa ematea
  • Kontzertu handi baten programazioa kalean
  • “Ospearen pasealekua”, Herriko Taldeen kuadrilla bakoitzak lurrean izar bat duela
  • Atletismo pistako materialak erosi eta berritzea eta pista berriz pintatzea
  • Hiri-baratzeak sortzea
  • Txakurren aisialdirako guneak egokitzea
  • Espaloiak handitzea, indarrean dagoen araudiaren arabera
  • Komun publiko berri bat instalatzea
  • Barandak instalatzea
  • Bideetako seinale horizontalen mantentze lanak indartzea
  • Errepideak asfaltatzeko lanak sendotzea
Osorik irakurri

☉ Basauri

Haurreskola publiko berri bat eraikitzea proposatu du Basauriko EH Bilduk gerakinarekin

|

Basaurin bi haurreskola publiko daude: bata Basozelain eta bestea San Migelen (argazkikoa) // Geuria

Basauriko Udalak 15,6 milioi euroko gerakina du. Udal gobernu taldeak azaldu duenez, “soberakin horrek auzo eta espazio publikoetako beharrei erantzuten lagunduko die, baita herritarrei zuzendutako zerbitzuak, laguntzak eta prestazioak areagotzen eta sendotzen ere”, diote.

EH Bildu udaltaldeak gerakin hori erabiltzeko bere proposamenak egin ditu. Guztira 14 dira koalizio ezkertiarrak egin dituen proposamenak; tartean, haurreskola berri bat eraikitzea Bizkotxalde ikastetxean (Lope de Vega eraikina zen tokian).

Gaur egun Basaurin bi haurreskola publiko daude: bata Basozelain (Etxeko Seine) eta bestea San Migelen (Etxeko Kuttuna).

Proposamen horrez gain, beste hauek ere egin ditu Basauriko EH Bilduk:

  • Energia berriztagarria eta iraunkorra sortuko duten tokiko energia-komunitateen eraketa bultzatzeko azterketa teknikoa
  • Plaka fotoboltaikoak Soloarte eta San Migeleko futbol zelaietan
  • Kareagako bide osasungarria eraikitzea
  • Udalerriko eremu guztiak lotuko dituen bidegorri-sarea eratzeko azterketa
  • Hiri-ortuak ezartzea
  • Udal-sukalde bat eratzeko azterketa teknikoa. Etxe-Maitia Adinekoen Egoitzari, Ikastetxeei jantokiak eta persona xaurgarriei zerbitzua emango liokeena. Zerbitzu hori, eskualdeko ekoizle eta hornitzaileen produktuak lehenetsiko lituzke
  • Bono-eskola berriro martxan jartzea
  • Erabilera sozialerako etxebizitza bat erostea
  • Gernika kalea 24-32 eraberritzea
  • Basozelaiko argiteria hobetzea
  • San Migeleko frontoi ondoan dagoen kantxan aterpea jartzea
  • Kareaga auzoan hobekuntzak urbaniazioan: Bidasoa kaleko oinezkoentzat bidea eta Frantzisko Perea kaleko parkea
  • Kulturgunea eraikitzea Social Antzokiaren ondoan: erabilera anitzerako kultur eraikin berria

Ezkerreko koalizioak ez du zehaztu proposamen bakoitzaren zenbatekoa, baina zera esan dute: “Berriro eskua luzatzen diogu udal gobernuari proposamen hauek kontuan har ditzan, jakinda Udalkutxako eta gerakinaren diru osagarriarekin urrats garrantzitsuak emateko aukera dugula”.

Osorik irakurri

☉ Basauri

Bideoa / Maialen Ibarra sanmigeldarrak ‘Zalantzari esker’ singlea kaleratu du

|

Maialen Ibarra 'Zalantzari esker' bideoklipean // Maialen Ibarra

Maialen Ibarra sanmigeldarrak ‘Nire egia zuen ezpainetan’ EPa kaleratuko du aurten. Guztira sei abesti izango ditu, eta gaur bertan ‘Zalantzari esker’ lehen singlea kaleratu du.

“‘Zalantzari esker’ gure bizitzako alderdiak zalantzan jartzeko, begiak irekitzeko eta esnatzeko gonbidapena da. Gainera, horrelako sormen prozesu batekin aurrera egitera ausartzeak eragin dezakeen beldurraz eta aldi berean, pozaz ere hitz egiten digu”, dio Ibarrak.

Dagoeneko entzungai dago abestia Spotifyn, eta bideoklipa ere ikusgai dago Youtuben. Bideokliparen proposamen bisuala Ane Berriotxoarena da. Besteak beste, Olaia Inziarte, Olatz Salvador edo Liher-ekin lan egin du Berriotxoak.

“Maialenen ahotsaren naturaltasunak eta freskotasunak doinu itsaskorrak eta indar handiko leloa bultzatzen du. Gitarrek eta sintetizadoreek eskua ematen diote elkarri, xurgatzen gaituen nostalgia, ilusio eta determinazio burbuila sortzeko. Soinu indartsua, ahots naturala eta beat itsaskorrak dira lehen single honen elementu garrantzitsuenak”, diote bere sormen taldekoek.

Datozen hilabeteetan bigarren, hirugarren eta laugarren singleak kaleratuko ditu Ibarrak, eta azken horrekin batera, EP osoa egongo da entzungai Spotifyn.

“Artistikoki oso sendoa”

Maialen Ibarrak 22 urte ditu eta 2022an ‘Zuei’ abestia kaleratu zuen. Era berean, iazko uztailean ‘Ametsekin jolasten’ kanta aurkeztu zuen Mikel Iturbe FMartenekin batera.

Maialen Ibarrarekin batera bere sormen taldean lanean daude: Mikel Iturbe (kudeaketa eta proiektuaren zuzendaritza), Mon Dvy (ekoizlea), Marina N. (ilustratzailea eta diseinatzaile grafikoa), Ane Berriotxoa (zuzendari, argazkilari eta gidoilaria) eta Maitane Campos (argazkilaria eta zuzendaria).

Mon Dvy ekoizleak, besteak beste, Bengo, Alba Reche edo Samuraï bezalako artistekin lan egin du. “The Blue Estudios-ekin batera artistikoki oso sendoa den proiektu baten aldeko apustua egin dugu denon arten”, diote.

2022ko azaroan elkarrizketa egin genion Maialeni eta orduan esan zigun EPa prestatzen zebilela. Reela ere publikatu genuen GEURIAko sareetan. Bada, laster ikusiko du argia bere lehen EPak.

Osorik irakurri

☉ Basauri

Basaurik 15,6 milioi euroko gerakina izango du, “auzoetako beharrei erantzuteko”

|

Basaurin dauden behar guztien artean lehentasunak ezarri beharko dituztela adierazi dute udal ordezkariek // Geuria

Basauriko Udalak 21,6 milioi euroko diruzaintzako gerakinarekin itxi du 2023ko ekitaldia.

Hala ere, zenbateko horri aurtengo kontuetan borondatezko zenbatekoak kendu behar zaizkiola azaldu dute udal ordezkariek; “gutxi gorabehera, 6 milioi euro”, diote udal arduradunek.

Gauzak horrela, 15,6 milioi eurokoa izango da Udalak erabilgarri izango duen gerakina.

Basauriko udal gobernu taldeak azaldu duenez, “soberakin horrek auzo eta espazio publikoetako beharrei erantzuten lagunduko die, baita herritarrek erabiltzen dituzten udal-instalazioak eta -ekipamenduak hobetzen eta basauriarrei eskainitako zerbitzuak, laguntzak eta prestazioak areagotzen eta sendotzen ere”, diote.

Udal arduradunek gaineratu dute udalerrian dauden behar guztien artean lehentasunak ezarri beharko dituztela, “premiaren, inpaktuaren eta kostu ekonomikoaren arabera”, diote.

Osorik irakurri

☉ Basauri

Lau basauriarrei 25 urteko lana saritu die Bizkaiko Futbol Federazioak

|

Francisco Javier Gonzalez 'Arija', Jose Angel Labrador, Felix Soto eta Tatxo Aberasturi, Jon Zugazagoitia Basauriko Udaleko Kirol zinegotziarekin batera // Jon Zugazagoitia

Bizkaiko Futbol Federazioak lau urrezko intsignia banatu die lau basauriarrei. Eta horiek dira: Tatxo Aberasturi, Félix Soto, Francisco Javier González ‘Arija’ eta José Ángel Labrador.

Zuzendaritza postuetan 25 urte baino gehiago eman dituzte: Tatxo Aberasturik eta Felix Sotok UD San Miguelen, Francisco Javier Gonzalez ‘Arija’k Indartsu Clubean eta Jose Angel Labrador Bizkaiko Futbol Federazioan lehendari orde bezala.

Lau basauriarrez gain, beste hamar presidenteren lana aitortu du Federazioak. Omenaldian Iñaki Gómez Mardones presidentea, Carlos Sergio Kiroletako Foru Zuzendaria eta Angel María Villar izan dira.

Osorik irakurri