Sareak

☉ Basauri

Umeentzako 24 jarduera antolatu dituzte Basaurin, euskaraz eta doan

|

Besteak beste, familia giroan sormen esperientziak antolatu dituzte // Argazkia: Mama Crea

‘Olgetan Udaberria’ umeei zuzendutako programari hasiera eman diote Basauriko kultur eta gizarte etxeetan.

Programaren helburua da umeek aisialdian ondo pasatzeaz gain, euskaraz ere jardutea, eta horretarako 24 jarduera prestatu dituzte doan 0 eta 12 urte bitartekoentzat.

Hala nola, tailerrak, sormen esperientziak, antzerkia eta ipuin kontalaria izango dira maiatzera bitartean. Egitaraua albistearen amaieran topatuko duzu.

Emanaldiak Basozelai Gizarte Etxean, Kareaga Gizarte Etxean, Pozokoetxe Kultur Etxean eta San Migelgo Taberna Nagusian egingo dira, martxotik maiatzera.

Toki kopurua mugatua da eta parte hartzea, doakoa. Hala ere, izena eman beharko dute interesdunek; antolakuntzak eskaintza bakoitza hasi baino hamar egun lehenago zabalduko du izen-emate prozesua, eta interesdunek zerrendan egoteko dagokion zentroarekin jarri beharko dira harremanetan.

Egitaraua / Olgetan Udaberria 2024

Martxoak 5, asteartea
Tailerra: Ipuin musikatua familian (1-6 urte). Musicology
17:30-18:30 Pozokoetxe Kultur Etxea

Martxoak 12, asteartea
Tailerra: Ipuin musikatua familian (1-6 urte). Musicology
17:30-18:30 Kareaga Gizarte Etxea

Martxoak 13, asteazkena
Ipuin kontaketa: ‘Kontaketa bat basamortuan’ (+4 urte). Mikel Susperregi
17:30-18:30 Taberna Nagusia

Martxoak 18, astelehena
Tailerra: Sormen esperientziak familia giroan (+0 urte). Mama Espacio Creativo
17:30-18:30 Basozelai Gizarte Etxea

Martxoak 19, asteartea
Tailerra: Ipuin musikatua familian (1-6 urte). Musicology
17:30-18:30 Pozokoetxe Kultur Etxea

Apirilak 9, asteartea
Tailerra: Ipuin musikatua familian (1-6 urte). Musicology
17:30-18:30 Pozokoetxe Kultur Etxea

Apirilak 10, asteazkena
Tailerra: Ipuin musikatua familian (1-6 urte). Musicology
17:30-18:30 Taberna Nagusia

Apirilak 15, astelehena
Tailerra: Sormen esperientziak familia giroan (+0 urte). Mama Espacio Creativo
17:30-18:30 Basozelai Gizarte Etxea

Apirilak 16, asteartea
Tailerra: Ipuin musikatua familian (1-6 urte). Musicology
17:30-18:30 Kareaga Gizarte Etxea

Apirilak 17, asteazkena
Ipuin kontaketa: ‘Katiluen kontua’ (+4 urte). Aitziber Izquierdo eta Dani Carsi
17:30-18:30 Taberna Nagusia

Apirilak 23, asteartea
Tailerra: Ipuin musikatua familian (1-6 urte). Musicology
17:30-18:30 Pozokoetxe Kultur Etxea

Apirilak 24, asteazkena
Tailerra: Ipuin musikatua familian (1-6 urte). Musicology
17:30-18:30 Taberna Nagusia

Apirilak 24, asteazkena
Tailerra: ‘Matraka ma non troppo’ (+1 urte). Trakamatraka
17:30-18:30 Pozokoetxe Kultur Etxea

Maiatzak 4, larunbata
Antzerkia: ‘Urpekariak’ (+4 urte). Lanku Bertso Zerbitzuak
12:00-13:00 Pozokoetxe Kultur Etxea

Maiatzak 6, astelehena
Ipuin kontaketa musikatua: ‘Ezberdin bezain eder’ (3-8 urte). Naita Produkzioak
17:30-18:30 Basozelai Gizarte Etxea

Maiatzak 7, asteartea
Tailerra: Ipuin musikatua familian (1-6 urte). Musicology
17:30-18:30 Pozokoetxe Kultur Etxea

Maiatzak 8, asteazkena
Tailerra: Antzerki musikala (6-12 urte). Musicology
17:30-18:30 Taberna Nagusia

Ipuin kontaketa: ‘Uxa, uxa beldurra’ (4-8 urte). Nerea Ariznabarreta eta Mariano Hurtado
17:30-18:30 Kareaga Gizarte Etxea

Maiatzak 15, asteazkena
Antzerkia: ‘Txuri-beltza da ta!’ (+4 urte). Xabier Lizaso
17:30-18:30 Taberna Nagusia

Maiatzak 17,ostirala
Antzerkia: ‘Txuri-beltza da ta!’ (+4 urte). Xabier Lizaso
17:30-18:30 Kareaga Gizarte Etxea

Maiatzak 21, asteartea
Tailerra: Ipuin musikatua familian (1-6 urte). Musicology
17:30-18:30 Pozokoetxe Kultur Etxea

Maiatzak 22, asteazkena
Tailerra: Antzerki musikala (6-12 urte). Musicology
17:30-18:30 Taberna Nagusia

Maiatzak 24, ostirala
Pailazoak: Monda eta Lironda pailazoak, ‘Desioak’ (3-8 urte)
18:00-19:00 Basozelai Gizarte Etxea

Maiatzak 29, asteazkena
Ipuin kontaketa: ‘Ipuinak jo eta musika kontatu’ (+4 urte). Badut
17:30-18:30 Taberna Nagusia

☉ Basauri

Emakumeen Basauriko futbol selekzioa sortu dute 17 jokalarirekin

|

Basauriko emakumezkoen lehen futbol selekzioaren jokalariak aurkeztu dituzte gaur Soloarten // Geuria

Emakumeen Basauriko futbol selekzioa sortu dute aurten lehen aldiz. Sheila Garciaren gidaritzapean 17 jokalari deitu dituzte Basauriko selekzioarekin jokatzeko: lehen partidua ekainaren 1ean izango dute SD San Inazioren kontra Solorten, 17:00etan.

“Bazen garaia emakumezkoen senior mailako futbol selekzioaren sorrera bultzatzeko. Urteak eman ditugu lanean, eta azkenean errealitate bihurtu dugu”, dio Asier Iragorri alkateak.

Selekzioaren aurkezpena gaur arratsaldean egin dute Soloarteko zelaian. Gaur izan dute lehen entrenamendua.

“Emakumeen kirola sustatzea eta babestea da gure lehentasunetako bat, eta hainbat ekintzatan islatzen da, besteak beste, selekzio hau bultzazea, aspalditik errealitate bihurtu nahi genuena, edo duela pare bat aste Women Itzulia egin genuenean”, gogorarazi du Iragorrik.

Jon Zugazagoitia Basauriko Udaleko Kirol arloko zinegotzia “harro eta pozik” agertu da emakumezkoen selekzioaren sorrerarekin: “Basauriren koloreak harrotasunez eraman behar dituzue, eta bideaz disfrutatu”, esan die jokalariei.

Ekainaren 1ean lehen partidua jokatuko du emakumezkoen Basauriko selekzioak, baina uda ostean berriro batuko dira partidu gehiago jokatzeko: “Hemendik aurrera ez du etenik izango emakumeen Basauriko futbol selekzioak”, dio Zugazagoitiak.

Jokalari hauek osatzen dute 2024ko emakumezkoen Basauriko selekzioa:

Indartsu Club
Carlota Corada
Mariñe Intxaurbe
Nagore Aberasturi
Paula Plá

SD Ariz
Ruth González

CD Ugao
Saioa Notario

Basauriko Kimuak
Andrea Bañuelos
Haizeder Ortiz
Izaro Martínez
Leire Penas
María García
Nagore Burgoa
Naia Cao
Oihane Soto
Teresa Ortiz

San Ignacio
Ane Amabizka
Nerea Prieto

Osorik irakurri

☉ Basauri

Lova Lois: “Rockein lehiaketak asko lagundu dit nire lehen EPa kaleratzen”

|

Lova Lois astrabuduarrak iaz irabazi zuen Rockeineko sari nagusia eta gaur bere lehen EParen bideoklipa aurkeztu du // Geuria

Rockein lehiaketako 12. edizioa martxan da. Gaur bertan ireki dute epea Hego Euskal Herriko taldeek eta bakarlariek izena emateko epea.

Euskadiko eta Nafarroako talde edo bakarlari interesdunek izena eman dezakete gaurtik uztailaren 11ra arte, eta ondoren, epaimahai profesional batek sei finalista aukeratuko ditu azaroaren 16an izango den finalean Basauriko Social Antzokian jotzeko.

Aurten nobedadeekin dator lehiaketa. Lehiaketaren tokiko kategoriak Hego Uribe eskualde osoko musika proposamenetara zabaldu du bere estaldura-eremua. Basaurin, Arrigorriagan, Etxebarrin, Galdakaon, Ugaon, Usansolon edo Zaratamon erroldatutako pertsona bat gutxienez duten taldeek edo bakarlariek kategoria horretako saria eskuratu ahal izango dute. Gainera, beste berrikuntza bat da tokiko taldeak bideoklip bat grabatuko duela.

Iaz Lova Lois astrabuduarrak irabazi zuen lehiaketako sari nagusia eta horri esker bost abestiz osatutako EPa kaleratu du: ‘Todo son señales’. Gaur Rockeinen 12. edizioaren prentsaurrekoa izan da Lova eta bere lehehengo EParen bideoklipa aurkeztu du:

“Ikaragarria izan zen iaz lehiaketa irabaztea. Sekulakoa da eta beharrezkoa da horrelako lehiaketak martxan egotea. Amets bat egi bihurtu dut. Disko propioa kaleratu nahi nuen, baina ez nuen baliabiderik horretarako. Orduan, Rockeinek laguntza handia eman dit horretan. Oso eskertuta nago lehiaketari”, adierazi du Lovak GEURIAk galdetu dionean zer suposatzen duen Rockein bezalako lehiaketa batek bere ibilbidean. Hain zuzen ere, GEURIA Rockeinen komunikabide ofiziala izango da hemendik aurrera, aurreko urteetan eman zaion babesa indartuz, lehiaketak eskualde osoaren aldeko apustua egin eta gero.

Iazko finalak “zapore oso ona” utzi zion Lovari: “Ikaragarria izan zen publikoaren berotasuna sentitzea eszenatokitik. Asko gustatu zitzaion publikoari nire musika eta horrek pozez betetzen nau”.

Estilo desberdinak nahasten ditu Lovak: “Abesti asko nituen idatzita eta Jon Agirrezabalaga Bilboko El Tigre estudioko ekoizlearen laguntzarekin lortu dut EPari forma ematea. Oso garrantzitsua da ekoizlearen figura. Jon oso profesionala da eta asko lagundu dit”.

“Nire abestiekin transmititzea gustatzen zait. Estiloak ez dit inporta: transmititu besterik ez dut egin nahi. Poesia idazten hasi nintzen mundua aldatu nahi nuelako. Eta orain, poesia idazten jarraitzen dut, baina erritmoa jartzen diot. Horrela egiten dut musika”, dio Lovak.

Osorik irakurri

☉ Basauri

Palestinaren alde 300 zapata pare biltzeko erronka solidarioa antolatu dute Basauriko Urbi Institutuko gurasoek

Maiatzaren 21etik 30era bitartean zapata bilketa egingo dute Institutuan eta hilaren 31n salaketa-ekitaldia antolatu dute Azaroak 25 plazan

|

Salaketa ekitaldia maiatzaren 31an izango da // Argazkia: Olivier Matthys (Avaaz)

‘Sos Palestina’ lemapean ekimen solidarioa martxan jarri du Basauriko Urbi Institutuko guraso elkarteak: Zapaten ekimena, alegia.

“Palestinako herria jasaten ari den genozidioaren aurka eta hildako palestinarren omenez, Zapaten ekimena salaketa-ekitaldia antolatu dugu. Zapatak genozidioaren lekuko mutuak izango dira”, diote.

Maiatzaren 21etik 30era bitartean zapata bilketa antolatu dute Institutuan: “Gure helburua 300 zapata pare inguru biltzea da. Horretarako, maiatzaren 21etik 30era erabiltzen ez dituzun zapatak ekar ditzakezu eskolara”, diote.

Salaketa-ekitaldia maiatzaren 31n, ostiralez, izango da Basauriko Azaroak 25 plazan (San Pedro elizaren ondoko plaza), 18:30etik 19:30era bitartean.

Osorik irakurri

☉ Basauri

Basauriko Euskara Plana diseinatzeko topaketa irekia antolatu dute ekainean

|

Topaketa irekia Solobarria plazan izango da ekainaren 1ean eta prozesu osoaren laburpena egingo dute // Geuria

Euskararen Plan Estrategikoa diseinatzen ari da Basauriko Udala datozen bost urteetarako. Otsailean hasi zen plan berria diseinatzen eta horretarako herritarren eta herriko eragileen laguntza izan dute.

Lehen fasean galdetegi bat prestatu zuen Udalak euskararen egoeraren diagnostikoa egiten hasteko, eta apirilean eta maiatzean lan-mahaiak antolatu zituen (GEURIAk ere bertan parte hartu du, Galdakaon bezala). Gainera, institutuen laguntzarekin gazteen iritzia ere jaso du Udalak.

“Galdetegiari dagokionez, 65 erantzun jaso genituen, lan-mahaietan 40 lagunek parte hartu zuten eta 200 gazte baino gehiagok eman dute beren iritzia”, adierazi dute udal arduradunek.

Halaber, datu bilketa honekin amaitzeko, Basauriko Udalak elkarrizketak egingo dizkie udalerriko hamar pertsona adierazgarriri, haien iritzia jakiteko.

Behin parte-hartze prozesua amaituta, iritzi guztiak sailkatu eta ekainaren 1ean, larunbatez, topaketa ireki bat antolatu du Udalak Solobarria plazan, 10:30etik 13:30era. Bertan izango da Isaac Amezaga Bizkaiko Foru Aldundiko Euskara zuzendaria.

“Topaketa irekia herritar guztiei dago zuzenduta, eta bertan prozesu osoaren laburpena egingo da. Aurreko lan-mahaietan ‘Nondik gatoz?’ galderari erantzuten saiatu ginen. Oraingoan, ‘Nora goaz?’, ‘Euskara eta Basauri’ eta ‘Non egon nahi dugu 5 urte barru?’ galderak erantzuten saiatuko gara”, diote udal ordezkariek.

Topaketa irekian parte hartzeko izena eman behar dute interesdunek esteka honen bitartez edo euskara@basauri.eus helbide elektronikora mezua idatziz.

“Nahi duten guztiek parte hartzea nahiko genuke, lan-mahaietara joan ala ez, edo galdetegia erantzun ala ez, garrantzitsua da ahalik eta basauriar gehienen iritzia izatea”, azaldu du María Fernández Basauriko Udaleko Euskara zinegotziak, eta parte-hartzaile guztiek egun horren oroigarri bat jasoko dutela gaineratu du, inplikazioa eta partehartzea eskertzeko.

Osorik irakurri

☉ Basauri

Emigrazioari buruzko eTwinning proiektua gauzatu dute Basauriko Urbi Institutuko ikasleek

Emigrazioari buruzko eTwinning Exodos proiektuari esker elkartrukeak egin dituzte Urbiko ikasleek Baigorriko eta La Reunion uhartekoekin

|

Urbi Institutuak elkartrukeak egin ditu aurten Baigorriko eta La Reunion uharteko ikasleekin // Urbi Institutua

Basauriko Urbi Institutuak jarraitzen du Europako proiektuetan murgilduta. Ikasturte honetan emigrazioari buruzko eTwinning Exodos proiektuan lan egin dute Urbiko ikasleek, La Reunion uharteko Lycée Jean Hinglo, Iparraldeko Baigorriko Collége Jean Pujo, Asturiasko Sanchez Lastra, Txekiako Gymnázium Lud’ka Pika, Italiako Liceo Gargallo; eta Greziako Geniko Lykeio Akrotiriou ikastetxeekin.

Proiektuari esker elkartrukea egin ahal izan dute Basauriko ikasleek: urtarrilean Baigorri bisitatu zuten 20 ikaslek, eta martxoan La Reunion uhartera bidaiatu zuten zortzi ikaslek. “Esperientzia zoragarria izan zen, ikasleentzat ahaztezina”, diote Urbiko Erasmus proiektuko arduradunek.

“Urbiko ikasleek, proiektu komunean lan egiteaz gain, hain gertu dagoen Iparraldeko eta hain urrun dagoen La Reunion irlaren ohiturak, geografia, kultura, hizkuntza, monumentu enblematikoak eta altxorrak ezagutu ahal izan dituzte”, diote.

La Reunion uharteko eta Baigorriko ikastetxeekin harremana “indartu” dela diote Urbiko arduradunek, “eta beste proiektu eta bidaia gehiago egiteko aukera sendotu egin da”, diote.

Osorik irakurri