Sareak

☉ Basauri

Argazkiak / Osakidetzako Etengabeko Arretako Guneen egoera salatzeko elkarretaratzea, Basaurin

Martxoaren 7an, ostegunez, manifestazioa deitu dute SATSE, ELA, LAB, CCOO, UGT eta ESK sindikatuek Basaurin

|

Kontzentrazioan izan dira sindikatuetako ordezkariek, langileak eta herritarrak // Geuria

Osakidetzako lehen arreta indartzeko eta Etengabeko Arretako Guneen (EAG) egoera salatzeko elkarretaratzea egin dute gaur arratsaldean Basauri-Ariz anbulatorioko sarreran, GEURIAn aurreratu genuen bezala. Kontzentrazioan izan dira sindikatuetako ordezkariek, langileak eta herritarrak.

SATSE, ELA, LAB, CCOO, UGT eta ESK sindikatuek salatu dutenez, “Barrualde-Galdakao ESIak dokumentu bat egin du zenbait EAGek fakultatiborik gabe ireki ahal izatea aurreikusten duena, eta hortaz, lantaldea osatu gabe utziz”, diote.

“Hori dela eta, langileek lan-gainkarga eta premiarik gabeko estres-egoera bat hartu behar dute beren gain, baliabiderik ez dutelako eta arrisku psikosozialak kolokan jartzen dituztelako. Eskualdean herritarrek jasotzen duten zerbitzuak ere izango luke eragina”, diote.

Osakidetzak egindako Kontingentzia Plana aplikatuz gero, EAGak “behar baino baliabide gutxiagorekin irekitzea sendotuko” litzatekeela adierazi dute sindikatuek; “hau da, murrizketa bat finkatuko litzateke”, diote.

“Planteamendu hori bereziki larria da, kontuan hartzen badugu 2022an ESIko zentroek 241.806 kontsulta baino gehiago artatu zituztela; horietatik 136.844 kontsulta medikoak izan ziren eta 104.962 erizaintzako kontsultak baino gehiago”, azaldu dute sindikatuek.

Ildo horretan, 2022an Gotzone Sagardui Osasun arloko sailburuak egoera hori aurreratu zuela salatu dute sindikatuek: “Osakidetzaren etorkizunaz hitz egitean, azaldu zuen erizainek artatutako zentroak izango ditugula, eta herritarrek joan-etorriak egin beharko lituzketela arreta jasotzeko. Bada, errealitate hori iritsi da”.

“SATSE, ELA, LAB, CCOO, UGT eta ESK sindikatuek aurrez aurre arbuiatzen dugu Kontingentzia Plana, medikuen, erizainen eta zeladoreen lan-baldintzak prekarizatzen dituelako, eta Etengabeko Arretako Puntuetan baliabide guztien egonkortasuna bermatzeko beharrezko neurri guztiak hartzea eskatzen dugu”.

Martxoaren 7an, ostegunez, manifestazioa deitu dute sindikatuek Basaurin. Manifestazioa 11:00etan hasiko da Basauriko udaletxetik eta Arizko anbulatorioan bukatuko da. Amaieran elkarretaratzea egingo dutela zehaztu dute sindikatuetako ordezkariek.

“Lan-eskubideak prekarizatzea”

Otsailaren 27ko elkarretaratzean hitza hartu dute sindikatuetako ordezkariek, eta Osakidetzak eta Barrualde-Galdakao ESIko arduradunek EAGetarako duten planek EAGetako oinarrizko lantaldea ziurtatzen ez dutela arbuiatu dute: “Ez dute ziurtatzen EAGetako oinarrizko lantaldea diren mediku, erizain eta zeladorekin irekiko direnik”.

“Horrez gain, langileen lan eskubideak are gehiago prekarizatuko dituen neurriak biltzen ditu plan honek. Kontuan hartzekoa da, egun, lehen arretak asumitu ezin dezakeen guztia asumitu behar dutela EAGek”, diote: “Eta honek guztiak herritarrok jasoko dugun arreta kalitatearen ondorio lazgarriak edukiko ditu”.

Zentzu horretan, langile eta herritarren osasuna bermatzeko behar besteko baliabideak jar ditzala eskatu diote Osakidetzari: “Horretarako, lehen arreta indartu behar dute, lantalde osoak bermatu behar dituzte, arreta eskaerari erantzuteko profesional kopurua bermatu behar dute, eta langileak zaindu behar dituzte, baldintza duinetan lan egiteko baliabideak jarriz”.

☉ Basauri

Basauriko Mecanizados Inde enpresako bost langileak kaleratu nahi dituztela salatu du ELAk

|

Mecanizados Inde enpresako bost langileak kaleratu nahi dituztela salatu du ELA sindikatuak // ELA sindikatua

Basauriko Mecanizados Inde enpresako langileek greba hasi dute, enpresak martxan jarri duen lan-erregulazio espedientearen kontra. ELA sindikatuak salatu duenez, enpresak bost langile ditu eta guztiak kaleratu nahi ditu zuzendaritzak.

Lan-baldintzak hobetuko dituen hitzarmen propioa negoziatzeko eskaera egin zioten langileek zuzendaritzari, eta ostean jaso dute enplegu erregulazioko espedientea. “Errepresalia argia eta askatasun sindikalaren aurkako erasoa da”, salatu dute ELAtik. Uztailean zehar protesta gehiago egingo dituzte.

Mecanizados Inde Basauriko metalurgia enpresa bat da, Cervantes hiribidean kokatuta, eta Lantegi Batuakentzat lan esklusiboak egiten ditu.

Osorik irakurri

☉ Basauri

Gozategi, Kaotiko eta La Regadera dira Basauriko Jaietako kontzertuak 2024an

|

Gozategi, Kaotiko, La Regadera eta Cherry and The Ladies taldeez gain, Mi Gran Noche eta Urrats Erromeria izango dira Basauriko sanfaustoetan // Geuria

Azken urteotan ohitura bihurtu da uztailean Basauriko sanfaustoen kontzertuen zerrenda osoa herritarrei jakinaraztea. Hala egiten du Herriko Taldeakek.

Jakina da Herriko Taldeak osatzen duten hamasei kuadrillek musika taldeekin osatutako pack ezberdinen artean erabaki behar dutela eta hala egin dute. Honakoak dira aurtengo sanfaustoen kontzertu nagusiak:

 

Sanfaustoak 2024. Kontzertuak

  • Urriak 11, ostirala: La Regadera
  • Urriak 12, larunbata: Gozategi
  • Urriak 15, asteartea: Mi Gran Noche
  • Urriak 16, asteazkena: Urrats Erromeria
  • Urriak 17, osteguna: Cherry & The Ladies
  • Urriak 19, larunbata: Kaotiko
Osorik irakurri

☉ Basauri

Igor Oca basauriarrak ez du Ekuadorko Deportivo Cuencan entrenatzaile moduan jarraituko

Ekuadorko lehen mailan ari zen lanean Igor Oca. Ligaren lehen itzulian taldea jaitsiera postuetan hartu zuten, eta hamargarren utzi du

|

Igor Oca Deportivo Cuenca taldearen entrenamendu batean // Utzitakoa

Igor Oca futbol entrenatzaile basauriarraren Ekuadorko hirugarren esperientzia uste eta nahi baino lehenago bukatu da. Liga Proko (bertako lehen maila) Deportivo Cuenca taldean zebilen Oca, eta atzo klubak berak jakinarazi zuen ez zuela taldean jarraituko.

Ekuadorko futbol txapelketa bi txanpa ezberdinetan banatzen da, eta 43 urteko basauriarra apirilaren 22an heldu zen Deportivo Cuenca taldera, herrialde bereko Unibertsitate Katolikotik irten ostean. LigaPro mailan sei partida gidatu ditu, hiru garaipen, bi berdinketa eta porrot bat pilatuz.

Taldearen egoera nabarmen hobetu da Oca heldu zenetik, jaitsiera postuetan hartu eta 10.postuan utzi baitu. Egun txapelketako bigarren fasea prestatzen ari ziren, baina jabetza eta klubeko arduradunen arteko arazoek ez dute etenik izan.

Bere erabakia azaltzeko prentsaurrekoan aho bizarrik gabe aritu da Oca: “Argi eta argi identifikatu dugu ezin genuela baldintza hauetan jarraitu”. Ideia horretan sakonduz azaldu du “entrenamenduan eta lehiaketan eragina duten hainbat kontu gure kontroletik at zeuden, hala nola jokalarien fitxaketa edo irteerak, edo eguneroko beste hainbat kontu”

Osorik irakurri

☉ Basauri

Basaurin 32 urteko gizon bat atxilotu dute, hautsitako botila batekin beste pertsona bat erasotzeagatik

|

Basauriko Udaltzaingoaren autoa // @BasauriPolizia

Basauriko Udaltzaingoak 32 urteko gizon bat atxilotu du, hautsitako botila batekin beste gizon bat erasotzea leporatuta, “eta hainbat mailatako lesioak egitea” egotzita.

Atxilotutako gizona epailearen esku dago.

Osorik irakurri

☉ Basauri

Arinette Ngole basauriarrak disko jaurtiketan Bizkaiko errekor absolutua hautsi du

Pasa den astean hautsi zuen Bizkaiko errekorra Espainiako 18 urtez azpiko txapelketan, zeinetan txapeldunorde izan zen

|

Arinette Ngole Artunduaga klubeko atleta Espainiako txapeldunorde da, 18 urtez azpiko kategorian // Artunduaga Atletismo Taldea

Arinette Ngole Artunduaga klubeko atleta Espainiako txapeldunorde da disko jaurtiketan, 18 urtetik azpiko kategorian. Txapelketa Malagan jokatu zen uztailaren 6an eta 7an.

Ngolek 43,50 metrora jaurti zuen diskoa, eta txapeldunak, Kantabriako Pielagos klubeko Andrea Njimi Tankeuk, 51,85 metrora.

Ngolek bere markarik onena (42,86) hobetu du. Gainera, Espainiako txapeldunorde izateaz gain, txapelketa berean Bizkaiko errekorra hautsi du Ngolek: aurreko errekorra 43,44 metroan zegoen. “Bizkaiko aurreko errekorra (43,44) 1998koa zen!”, adierazi diote GEURIAri Artunduaga klubetik.

Arinette Ngole, Juanjo De Campos bere entrenatzailearekin (Artunduaga Atletismo Klubeko presidentea ere bada) // Artunduaga AT

Europako txapelketarako sailkatzeko 44 metro egin behar zituen Ngolek, “baina gutxigatik ez du lortu”, diote Artunduaga klubetik.

Osorik irakurri