San Migeleko anbulatorioan lan egiten duen pediatrak erretiroa hartu berri du, eta horrek herriko pediatria zerbitzuan eragina izango duelakoan ezinegona sortu da bizilagunen artean; batez ere San Migeleko, Kareagako, Basozelaiko eta Bidebietako herritarren artean. Pediatria zerbitzuan “murrizketak” egongo direla salatu dute, eta lehen protesta irailaren 28an egin zuten, San Migeleko Taberna Nagusiaren aurrean, osoko bilkura bertan ospatu baitzen (San Migeleko jaiak direla eta).

Orain arte hiru pediatra zeuden lanaldi osoan San Migeleko eta Kareagako osasun zentroetan: bat San Migelen eta bi Kareagan. Eta orain, San Migeleko pediatrak erretiroa hartu eta gero, horrela eskaintzen ari dira zerbitzua bi anbulatorioetan: pediatra bat lanaldi osoan dago Kareagako zentroan eta beste pediatra batek jardunaldia erdibituta izango du Kareaga eta San Migel artean: 08:00etatik 10:30era Kareagan eta 11:00etatik 15:00etara San Migelen. “San Migeleko eta Kareagako osasun-zentroetako pediatria zerbitzu publikoan kalitate-galera larria dakar egoera horrek. Salatu nahi dugu plantillaren murrizketa dakarrela bi osasun-zentroetako pediatria zerbitzuan: lanaldi osoan zeuden hiru pediatra izatetik (bi Kareagan eta bat San Migelen) bi pediatra bakarrik geratuko lirateke (bat Kareagan lanaldi osoan eta bestea bi osasun-zentroen arteko lanaldi zatituan)”, salatu dute San Migeleko, Kareagako, Basozelaiko eta Bidebietako auzotarrek.

Udalak Osakidetzan “egin beharreko kudeaketak” egin ditzala eskatu dute auzotarrek, “San Migeleko eta Kareagako anbulatorioetako pediatria zerbitzuak aurrerantzean ere orain arteko kalitate-baldintzetan mantenduko direla berma dezan, plantilla- eta ordutegi-murrizketarik gabe eta oporretako murrizketarik gabe”, diote. “Asier Iragorri alkateari eskatzen diogu, basauriar guztien ordezkari instituzional gorena den aldetik, defenda dezala Osakidetzak udalerriko osasun-zentroetan ematen duen pediatria zerbitzua, zerbitzu publiko horren kalitatean atzerapausorik onartu gabe”, diote.

“Kalitatea bermatuta”

Basauriko Udala San Migeleko Auzo Elkarteko ordezkari batzuekin batu zen ekainean eta Osakidetzak pediatria-zerbitzua egunero berma dezala eskatu zuen. Barrualde-Galdakao ESIko ordezkariek Udalaren eskaera kontuan hartu zuten, eta udal ordezkariek argitu dutenez, “San Migeleko anbulatorioak pediatria zerbitzu iraunkorra izango du 11:00etatik 15:00etara, egun dagoen pediatra jubilatu eta gero”. Udal arduradunek zehaztu dutenez, pediatra bat izango da San Migeleko anbulatorioan lanaldiaren bi herenetan. Guztira 508 haur artatuko ditu San Migeleko pediatrak.

Bestetik, Kareagako anbulatorioan 1.073 haur artatzen dituzte pediatria zerbitzuan: “Lanaldi osoan dagoenak 817 haur artatuko ditu eta lanaldiaren herena duen pediatrak 256 umeri emango dio zerbitzu”, diote udal ordezkariek. “Osakidetzak ezarritako pediatra bakoitzeko haurren ratioa 800 eta 1.000 artekoa da Euskal Autonomia Erkidegoan. Bai Kareagan bai San Migelen pediatra-haur ratioak Osakidetzako batez bestekoaren azpitik daude, eta horrela jarraituko dute”, diote udal ordezkariek, eta gaineratu dute bi osasun-zentroetan etengabeko erizaintza-zerbitzua egongo dela.

“San Migeleko eta Kareagako haurrek egunero izango dute arreta pediatrikoa, astelehenetik ostiralera, eta kalitate parametro berberetan bermatuta jarraituko du, pediatra bakoitzak artatuko duen haur kopurua EAEko batez bestekoa baino txikiagoa izango baita”, diote Udaletik. Jaiegunetan eta oporraldi garaietan San Migeleko haurrentzako arreta Arizko anbulatorioan eskainiko da; orain arte Kareagako osasun zentrora jo behar zuten. Kareagako haurren kasuan, jaiegunetan eta oporraldietan euren osasun zentroan artatuko dituzte.

Eztabaida osoko bilkuran

Irailaren 28an osoko bilkura ospatu zen San Migeleko Taberna Nagusian. EH Bilduk pediatria zerbitzuari buruzko mozioa aurkeztu zuen: “Ratioei buruz hitz egiten denean, uste dugu badaudela planteatu behar diren beste faktore batzuk, hala nola, desplazamenduaren faktorea edo egongo den lan-gainkarga faktorea, ez baitira bi anbulatorio horiek bakarrik: Arizko anbulatorioa ere sartzen da jokoan”, aipatu zuen Exabier Arrieta EH Bilduko ordezkariak: “Ez dugu uste onargarria denik zerbitzu publikoaren kalitatean atzerapausoak onartzea”.

“Gaia korapilatsuagoa” dela zioen Marian Cantero Elkarrekin Podemoseko ordezkariak. “Auzo gehiagori eragiten die, hala nola, Basozelairi, Kareagari eta Bidebietari. Ez dira kontuan hartu ez guraso-elkarteak ez auzo-elkarteak. Guztiok ari gara Osakidetzaren murrizketak jasaten: lehen mailako asistentzia egoera prekarioan dago, betetzen ez diren bajak eta oporrak, onartu behar ez genituzkeen itxaron-zerrendak… Gaiak beste dimentsio bat du, handiagoa”.

Isabel Cadaval PSEko bozeramaileak adierazi zuen basauriarren interesak “defendatu” direla Osakidetzaren aurrean: “Zalantzarik gabe, udal honek erne jarraituko du Osakidetzak esan diguna betetzen ote duen jakiteko”. Eta Maria Larrinaga EAJko bozeramaileak honakoa azaldu zuen: “Barrualde-Galdakao ESIak hiru proposamen egin zizkigun San Migelen eman beharreko pediatria zerbitzuaren inguruan, eta proposamen horiek San Migeleko Auzo Elkartearekin partekatu genituen, Sofia Taramona Guraso Elkarteari helarazteko. Bai Udala eta bai Auzo Elkartea ados geunden proposamen batekin: ume guztiak egunero artatzea bermatzen zuenarekin, hain zuzen ere. Onartu egiten dugu gure akatsa: gainontzeko auzo elkarteekin hitz egin ez izana. Elkarte guztiekin hitz egitea izango da gure konpromisoa. Momentuz daukagun informazio guztia eman dugu, eta berririk balego, hura ere jakinaraziko dugu”.