☉ Basauri
Sagarrak taldeak “ingurumenarekiko arduragabekeriagatik” salatuko du Basauriko Udala
Gaur egun, edozein pertsonak erabili dezake edukiontzi marroia Basaurin, eta bertan konpostagarriak ez diren hondakinak botatzeko aukera dago
Basauriko Sagarrak Ekologista Taldeak Udala salatuko du Eusko Jaurlaritza Sailan, antza, “ingurumenarekiko arduragabekeriagatik”. Gaur egun, materia organikoa birziklatzeko edukiontziak irekita daudela gogorarazi dute Basauriko ekologisten taldetik. Ondorio modura, edozein pertsonak erabili dezake edukiontzi marroia Basaurin, eta bertan konpostagarriak ez diren hondakinak botatzeko aukera dago.
“Ekainaren amaieran bi urte beteko dira materia organikorako edukiontziak irekita daudela”, azaldu dute Sagarraketik. “Giltza bidez irekitzeko sistema kentzeko arrazoia edukiontzi horietako erabiltzailearen kontrol digitala da. 2021eko udazkenerako martxan egon behar zuen kudeaketa-aldaketak oraindik egiteke dago. Denbora luze horretan, edukiontziak irekita egon dira eta mota guztietako hondakinak jaso ahal izan dituzte”, kexatu dira.
Sagarrak Ekologista Taldeko ordezkarien datuen arabera, 2021eko ekainetik 2021eko abendura, 2020an baino 83 tona gehiago bildu ziren edukiontzi marroietan. “Igoera hori ez dago justifikatuta parte hartzen duten familien gorakadarekin”, adierazi dute. “Urte horretan 66 familia gehiagok baino ez zuten izena eman bilketa-sistema horretan parte-hartzeko. Baina 2022ko datuak kezkagarriagoak dira: familia parte-hartzaileen igoera txikiagoa izanda (berrogeita lau familia gehiago) 2021ean baino 100 tona gehiago bildu dira edukiontzi horietan”.
“2021eko ekainetik 2021eko abendura, 2020an baino 83 tona gehiago bildu ziren edukiontzi marroietan”
Ekologistek “larria” bezala definitu dute egoera eta konponbideen bila jo dute Basauriko udalera auzo-elkarteetako ordezkariekin batera: “Denbora sobera egon da sortutako arazoa konpontzeko edo konpontzeko aldi baterako neurriak hartzeko. Gure ustez, administrazioak ez du, egin behar zuen bezala, dagokion erantzukizuna bete”.
Hondakin konpostagarriak, Bizkaiko Konpostegian // Jon Goikouria Larrabeiti
“Aitzindariak” hondakin organikoak birziklatzen
Basauriko Udalak “aitzindari” bezala definitu du bere burua hondakin organikoak birziklatzearen esparruan: “Legezko agindua baino askoz lehenago 5. edukiontzia ezarri zen, 2014an, legezko betebeharra 2022ko ekainaren 30a baino lehen edukitzea zenean. Hau da, 8 urte lehenago egin zen”, arrazoitu dute udal ordezkariek eta gaur egun arte “arau-urratzerik egon ez dela” ziurtatu dute: “Araudiak ez du behartzen edukiontziak itxita edukitzera; bilketa-eredu eraginkorrenak lehenetsi behar direla esaten da. Baina etorkizunean lortu beharreko helburua izanik, ez da betebehar zehatzik ezartzen epe jakin batekin”, jakinarazi diote udal informazio iturriek GEURIA komunikabideari.
2021ean arrain eta haragi hondakinak edukiontzi marroian botatzeko aukera ahalbidetu zuten eta Basauriko Udalaren arabera, hori izan daiteke edukiontzi marroietan izandako gorakadaren arrazoia: “Gerta liteke edukiontzi marroian bilketa-bolumen handiena 2021ean haragia eta arraina sartu zirelako edo beste faktore batzuengatik izatea”, adierazi dute, eta hondakin horien gehikuntza txartelen banaketarekin saihesten ez dela jakinarazi dute: “Txartelen erabilera okerra egin daiteke ere”. Basauriko Udalaren arabera, edukiontzi marroian hondakin desegokien % 20 ez gainditzeko helburua bete ez den konstantziarik ez dute: “Ez dugu horri buruzko oharrik jaso Artigasen aldetik”.
“Edukiontzi marroietan izandako gorakadaren arrazoia txartelen erabilera okerragatik egin daiteke ere”
Sagarrak Ekologista Taldeak Eusko Jaurlaritzako Ingurumen Sailak bere zehapen-eskumenak erabiltzea eta arazo hori behin betiko ebatzi bitartean hartu beharreko behin-behineko neurriak hartzea eskatu du. Gainera, Ingurumen Sailak Basauriko Udalari materia organikoa berreskuratzeagatiko zabor-tasen hobariei buruz osoko bilkuran hartutako erabakia bete dezala eskatu diote Sagarraketik: “Akordio hori 2022an sartu behar zen indarrean. Horrela, familia horiek birziklatzearekin eta ingurumena zaintzearekin duten konpromisoa aitortzen da”.
☉ Basauri
Etxe Maitiako EPE azterketa egiteko aukera emango diote proba egunean erditu zuen emakume basauriarrari
Basauriko Etxe Maitia Udal Egoitzako Erizaintzako Laguntzaile lanposturako EPErako azterketa erditze egunean egitea beste aukerarik eman ez ziotela salatu zuen duela aste batzuk basauriar batek LABen bitartez, eta kexa Arartekoari aurkeztu zion sindikatuak.
GEURIArekin harremanetan jarri ziren emakumea eta bere bikotea eta gertatutakoaren berri eman zuten. “Zuzeneko diskriminazio” kasu bat izan zela adierazi zuten sindikatutik, sexuarekin zuzenean lotutako arrazoiengatik, hala nola, haurdunaldiagatik edo amatasunagatik, Emakumeen eta Gizonen Berdintasunerako eta Emakumeen aurkako Indarkeria Matxistarik Gabeko Bizitzetarako 1/2023 Legeak jasotzen duen bezala.
Basauriko Udalak esan zuen prozesu horren azterketa “deialdi bakar gisa” tipifikatuta dagoela, baina orain LABek jakinarazi duenez, azterketa beste egun batean egiteko aukera eman diote Z.G.G. basauriarrari: “LAB sindikatuak Arartekoari aurkeztutako kexaren ondoren, Basauriko Etxe Maitia egoitzak aukera emango dio kaltetutako emakumeari, erditzeko programatutako egunean enplegua egonkortzeko hautaketa-prozesuan azterketarekin bat zetorren proba beste data batzuetan egiteko”. Azterketa urriaren 21ean egingo du basauriarrak Basauriko udaletxean.
“Pozik gaude, alde batetik, Arartekoak azkar aztertu duelako kasua eta bere gomendioa egin duelako. Bestalde, sindikatu hau pozik agertzen da ere Basauriko Etxe Maitia Udal Egoitzako aldi baterako enplegua egonkortzeko prozesuaren Epaimahai Kalifikatzaileak hartutako erabaki berriagatik; izan ere, Arartekoak egindako gomendioa onartu duenez, oposizio-aldiko ariketako bi probak urrian bertan egiteko aukera emango dio kaltetutako emakumeari. Era berean, Z.G.G izangaiari edoskitzea egin ahal izateko beharrezko espazioa eta denbora emango diote proba egin bitartean”, adierazi dute LABetik.
☉ Basauri
Gizon bat atxilotu dute Basauriko Urbi auzoan, polizia-agenteei heriotza-mehatxuak egitea leporatuta
Ertzaintzak 50 urteko gizon bat atxilotu du Basaurin, bere etxean indarrez gotortu eta etxebizitza-bloke berean sutea eragitea egotzita. Gainera, polizia-agenteei heriotza-mehatxuak egitea leporatu diote
Ertzaintzak 50 urteko gizon bat atxilotu du Basaurin, bere etxean indarrez gotortu eta etxebizitza-bloke berean sutea eragitea egotzita. Gainera, polizia-agenteei heriotza-mehatxuak egitea leporatu diote.
Gertaerak atzo, urriak 13, jazo ziren Urbi auzoan 20:30ak aldera. Herritar batzuek jakinarazi zioten Ertzaintzari gizon bat zegoela bere etxebizitza barrutik objektuak bide publikora jaurtitzen.
Segurtasun Sailetik adierazi dutenez, gizona bere etxean gotortuta zegoen, eta, “bere onetik aterata, oso aztoratuta eta oihuka”. Ertzainak iritsi zirenean, irainka eta mehatxuka hartu zituen, eta leihotik kristalak eta altzariak jaurtitzen hasi zitzaien.
Berehalako Erantzuneko (PRI) patruilak bertaratu ziren eta negoziazio-taldea behin baino gehiagotan saiatu zen pertsona hori lasaitzen, baina ezin izan zuten ulertu gizona zein egoera psikofisikotan zegoen. Jarraian, ertzainek kea antzeman zuten eskaileran, eta gotortutakoak etxean sutea eragin zezakeelakoan, Larrialdi Zerbitzuek prebentzio-gisa etxebizitzen blokea hustu zuten, baina inor ez zen kaltetu eta ez zuten artatu behar izan.
Ondoren, Ertzaintzaren, Udaltzaingoaren eta Bizkaiko suhiltzaileen arteko elkarlanaren ondoren, PRIko patruila bat etxe barrura sartu zen, eta sarreran eraso egin zien gizonak, objektuak eta arma zuriak botata. “Berehala neutralizatu zuten”, diote.
Akusatua osasun-langileek artatu zuten, eta, ondoren, atxilotu gisa, Usansoloko Ospitalera eraman zuten; izan ere, zauri larriak zituen, kasu honetan, berak eragindako autolesioak.
Atxilotuak jarrera bera izan du beste batzuetan, eta oraingoan ustezko atentatu-delitu bat eta agintaritza-agenteei heriotza-mehatxuak egitea leporatu diote. Epailearen esku jarriko dute dagozkion eginbideak amaituta ostean.
Sokatira lehiaketa izan zen atzo, San Fausto egunean, Basauriko jaietan. Aurten Laguntasuna izan da garaile emakumezkoetan eta gizonezkoetan Ontzakek irabazi zuen.
Hala eta guztiz ere, airean dago mozoloen garaipena; izan ere, emakumezkoen finala baino lehen, Ontzaken gizonezkoen garaipena ospatzeko sokatira-esparrua inbaditu zuten kuadrillako kideek, emakumezkoen soka eta zorua erabat bustiz.
Txapeldunorde izan dira aurten Mozkorrak emakumezkoetan eta Urbiko Lagunak gizonezkoetan.
☉ Basauri
Argazkiak / Jo eta su aritu dira herriko taldeak sanfaustoetako sokatira txapelketan
Aurten espazio txikiagoa, jendea inoiz baino gertuago eta berotasuna eta tentsioa, inoiz baino handiagoak izan dira soka artean
Atzo bertan jokatu zuten Basauriko sanfaustoetako sokatira txapelketa, kuadrillen bazkaria eta irrintzi txapelketaren ostean. Aurten, trintxeretako obrak direla eta, jarduera Arizgoiti plazara lekualdatu dute eta jaietako txapelketa mitiko honen paisaia erabat aldatu du: espazio txikiagoa, jendea inoiz baino gertuago eta berotasuna eta tentsioa, inoiz baino handiagoa soka artean.
Plazaren bihotzean izan gara eta gertutik bizi izan ditugu aurtengo momentu erabakigarrienak.
☉ Basauri
Argazkiak / 4.600 lagun elkartu dira Basauriko kuadrillen bazkarian, eguzkipean
Herritarrek aterkinak, eguzkitakoak eta pergolak erabili dituzte eguerdiko 28ºetatik ihes egiteko
Aurten inoiz baino jende gehiago elkartu da Basauriko jaietako kuadrillen bazkarian. Guztira 4.600 pertsonek bazkaldu dute Bizkotxalde parkean 28ºko tenperaturarekin. Udako azken eguna eman du gaurkoak eta herritarrek aterkinak, eguzkitakoak eta pergolak erabili dituzte eguzki izpietatik ihes egiteko, baita ur pistolak ere.
Bazkaltzen egon zara bertan?
Danel Elezkano zaratamarrak esku pilota utziko du lesioak direla eta
Tokiko produktuak goi-mailako sukaldaritzara eramateko jardunaldiak antolatu dituzte Galdakaon
