☉ Basauri
Bideoa / Metroa, Euskotren eta Ospitalea lotuta geratuko dira Sarratuko geltoki berrian, Basaurin
Galdakaoko 5. linearen proiektuak zalantza asko sortu ditu herritarren artean. Batez ere Basauriko eta Galdakaoko herritarren artean. Urrian hasiko dituzte lanak Eusko Jaurlaritzak eta Bizkaiko Foru Aldundiak, eta bost geltoki berri eraikiko dituzte: Sarratu, Aperribai, Bengoetxe, Galdakao eta Usansoloko Ospitalea. Basauriri eta Sarratuko geltoki berriari dagokionez, zalantzak argitzeko asmoz, Nerea Renteria Basauriko Udaleko Hirigintza arloko zinegotziarekin batu gara gaur GEURIAn.
Sarratuko geltokia nolakoa izango den galdetuta, bertara Metro Bilbao eta Euskotren helduko direla adierazi du Renteriak: “Sarratuko geltokian Metroa (1. linea) eta Euskotrenen egungo linea (3. linea) elkartuko dira. Puntu horretatik aurrera, 3. linea 5. linea bihurtuko da”, dio Renteriak: “Basaurin gaur egun Metroaren 2. linea soilik dago (Basauri-Kabiezes), eta etorkizunean honakoa izango dugu: Etxebarritik Sarraturaino Metroaren 1. linea zabalduko da (Plentzia-Etxebarri). Gaur egun, Basaurikook Plentziara joan nahi badugu, trenez aldatu behar dugu, baina Sarratuko geltoki berriarekin Metro Bilbaoko 1. linea hartuko dugu, aldaketarik egin gabe; Sarratutik Galdakao-Usansolo Ospitalera joan gaitezke (5. linea); Txorierrira joan gaitezke; baira Bermeora edo Donostiara ere”.
Galdakao-Usansolo ospitalera joateko basauriarrek tren-aldaketarik egin behar ez dutela zehaztu du Renteriak: “Sarratun hartuko genuke trena eta zuzenean joango ginateke Galdakao-Usansolo ospitalera. Ez genuke Zazpi Kaleetara joan beharko”. Metroaren 1. eta 2. lineen arteko kota-aldea 25 metrokoa da, eta horrek teknikoki bideraezina egin du Sarratuko geltoki berrian bi lineek bat egitea. Hortaz, Basauri eta Arizko Metro geltokietatik Galdakao-Usansolo Ospitalera joateko herritarrek trenez aldatu beharko dute. Adibidez, Metroaren 2. linea har dezakete, Etxebarrin gelditu, bertan Sarraturako Metroa hartu eta bertan 5. linea hartu. “Hala ere, ETSrekin izan genuen bileran azaletik aztertu genuen aukera bat aztertzea proposatuko dugu: Unamunon (Bilbo) dauden bezalako arrapala mekanikoak jartzeko aukera Arizko Metro geltokitik Sarratukoraino. ETSk aztertu beharko luke hori posible den ala ez”.
Espazio berria Sarratun
Sarratuko geltoki berriarekin espazio berri bat sortuko litzateke hor inguruan. “Gaur egun dauden trenbideen zati bat estaliko litzateke. Azalera handia irabaziko dugu. Larrazabaleko errepideraino estaldura erabatekoa izatea lortu nahi dugu, eta hori bultzatuko dugu. ETSri transmititu diogun zerbait da”, dio Renteriak. Sarratuko geltokirako sarrera Azbarren aldean izango litzateke, estazio elektrikoaren ondoan gutxi gorabehera.
Arizko geltokia desagertuko da
Arizko egungo Euskotreneko geltokia Sarratura eramango dute. “Alde batetik, Arizko bizilagunei urrutiago geratuko zaie geltokia, baina, bestetik, Sarratu, gainontzeko udalerriari begira, hurbilago egongo da”, dio Reneteriak: “Gainera, ez dezagun ahaztu Sarratun garapen urbanistiko handia egiten ari garela eta orain Azbarrenekin hasi behar dugula. Azbarren, Sarratu eta Larrazabalen artean mila etxebizitza berri baino gehiago izango dira geltoki berriaren inguruan”.
Arizko geltokitik merkantziak bakarrik igaroko lirateke: “Egungo bidaiari-trafikoa ezabatuko dugu Arizko geltokitik, eta merkantzien trafikoa baino ez litzateke egongo, askoz ere gutxiago”, dio Renteriak.
Korrikaren aldeko jaia ari dira ospatzen San Migelen. Eta, euria ari duen arren, giro bikaina dago: pankarta pintaketa, San Migel Kantari, kuestazio mahaia eta Korrika materiala erosteko mahaia eta bazkaria antolatu dituzte goizean frontoiaren inguruetan.
Arratsaldean, 18:00etatik aurrera, umeen pilota partidak eta Bertso Pilota Jaialdia izango dira pilotalekuan, eta 20:00etan gurdi-poteoa dago aurreikusita Elexalde tabernatik.
Hauek Mikel Iturbek bidalitako argazkiak:
Mikel Rodriguez Basauriko Selekzioko gizonezkoen futbol entrenatzaileak hautatu ditu dagoeneko aurtengo jokalariak. Guztira 22 jokalari hautatu ditu Rodriguezek.
Asier Iragorri alkateak eta Jon Zugazagoitia Kirol arloko zinegotziak etapa honetaz “ahalik eta gehien gozatzea eta Basauri harrotasunez ordezkatzea” animatu dituzte jokalariak.
Jokalari hauek osatzen dute 2026ko Basauriko Selekzioa: Alvaro Alonso, Markel Gomez, Jaider Felipe Cano, Mohamed Yaraahallah Salek, Eder Ribote, Enaitz Alejo, Ibai Cobelo, Alex Molina, Endika Charterina, Aratz Carromero, Markel Carazo, Asier De La Fuente, Markel Gomez, Kepa Perez, Erik Del Rio, Ander Azkueta, Mikel Llano, Julen Etxebarria, Julen Vargas, Iker Navaridas, Alex Moreno eta Oier Barrero.
☉ Basauri
Korrika jaia antolatu dute martxoaren 14an San Migelen, Basaurin
Pankarta pintaketa, San Migel Kantari, bazkaria, pilota partidak, Bertso Pilota eta gurdi-poteoa antolatu dituzte
Martxoaren 14an, larunbatez, Korrika jaia antolatuko dute San Migelen, Basaurin. Otsailean GEURIAn aurreratu bezala, Korrikaren aldeko bazkaria izango da Sofia Taramona ikastetxeko jolastokian, baina ez da ekitaldi bakarra izango.
Egunari hasiera emango diote 12:00etan umeen pankarta pintaketarekin eta korrikaldi txikiarekin. Ondoren, San Migel Kantari taldearekin tabernaz taberna kalejira antolatu dute.
Eguerdian, kuestazio mahaia jarriko dute eta herritarrek Korrika materiala erosteko aukera izango dute.
Bazkaria eta gero, umeen pilota partidak izango dira frontoian, eta horien ostean, Bertso Pilota izango da Lizaso, Erasun, Goñi eta Urruzola pilotariekin eta Arkaitz Estiballes eta Nerea Elustondo bertsolariekin.
Eta gauari hasiera emateko, gurdi-poteoa antolatu dute herriko kaleetatik.
Egitaraua | Korrika Kulturala San Migelen
Martxoak 14, larunbata
12:00 Umeen pakarta pintaketa eta korrikaldia Ixatxak parkean
12:30 San Migel Kantari Elexalde tabernan
13:30 Kuestazio mahaia eta Korrika materiala Laboral zaharrean
14:30 Korrika bazkaria Sofia Taramona ikastetxean
18:00 Umeen pilota partidak frontoian
18:30 Bertso Pilota: Lizaso-Erasun vs Goñi-Urruzola. Arkaitz Estiballes-Nerea Elustondo
20:00 Gurdi-poteoa Elexalde tabernatik
☉ Basauri
Basaurin eskola-sukaldea jartzeko kudeaketa “bizkortzea” eskatu die EH Bilduk Eusko Jaurlaritzari eta Udalari
Iazko ekainean Eusko Jaurlaritzako Hezkuntza Sailak iragarri zuen eskola-sukalde bat jarriko zuela martxan Basaurin 2025-2026 ikasturtean, inguruko bederatzi ikastetxe publikori zerbitzu emateko.
Basauriko ikastetxeetako Guraso Elkarteen urteetako aldarrikapena da, baina oraindik horren berririk ez dutela salatu dute. “Eta, gainera, azaroan eta abenduan zomorroak agertu ziren ikasleen plateretan”, salatu zuten Basauriko familiek martxoaren 4an Ibaigane Kultur Etxean egin zuten bileran.
Guraso Elkarteek eskatzen dute ikastetxe publiko bakoitzean bazkariak sukaldatzeko sukaldeak egokitzea, baina Eusko Jaurlaritzak zonaldekoaren alde egiten badu, kalitatea handitzea eskatzen dute: “Hala ere, susmoa daukagu zonaldeko sukaldea eraiki arren, bertan esleituko duten zerbitzua kateringa izango dela berriro”.
Marko horretan, Basauriko EH Bilduk eskola-sukalde zentralaren ezarpenaren atzerapena salatu du.
“EH Bilduren ustez bereziki larria da Guraso Elkarteek berriro ere gurasoekin bilerak planteatu behar izatea eta Hezkuntza Sailaren jardun faltaren aurrean kexa publikoak egitea; izan ere, iragarpenak egiten jarraitzen du baina ez du inolako zehaztasunik aurkezten”, diote talde subiranistatik.
Ildo horretan, EH Bilduk Eusko Jaurlaritzari eta Basauriko Udalari eskatu die beharrezko kudeaketak “bizkortzea”, “2026-2027 ikasturtearen hasieran sukaldea ikastetxeetan errealitate izan dadin”, diote.
Marina Landa buru duen Aria taldeak kontzertua emango du martxoaren 12an, ostegunez, 20:00etan Social Antzokian.
Taldearen azken diskoak aurrera begiratzeko beharra islatzen du.
Sarrerak salgai daude 6 euroan, eta Social Antzokiko bazkideek doan gozatu ahalko dute kontzertuaz.
Argazkiak | Euriak ez du zapuztu Korrika Jaia gaur San Migelen
Garbiñe Martin bigarren sailkatu da ‘Talentos by Abril’ gastronomia lehiaketan
Adiskide Pilota Elkarteak txapelketa berezia martxan jarriko du Galdakaon: 14 eta 99 urte bitarteko jokalariak gonbidatu ditu
Argazkiak | Euriak ez du zapuztu Korrika Jaia gaur San Migelen
Argazkiak | Emakume Ekoizleen Nekazaritza Azokak ehunka lagun elkartu ditu Ugaoko kaleetan
Argazkiak | Ekain Perrino herrikideari babesa adierazteko elkarretaratzea egin dute Basaurin
“Oso eskertuta gaude eskualde honetan Errigorak bere tokitxoa izatea GEURIAri esker”
Bideoa | Besopean Guraso Elkartea: «Herri kirolekin haurren arteko aurrez aurreko harremanak sustatzen ditugu»
