Sareak

☉ Basauri

Ioritz eta Pablo (Txarraska Gaztetxea): “Norberaren bizitzaren jabe izaten saiatzen gara”

23 urte bete ditu aurten Basauriko Txarraska gaztetxeak; hori dela-eta, hamaika ekintza antolatu dituzte, haien filosofiaren adierazkor direnak.

|

Alberto, Ioritz eta Pablo Txarraska Gaztetxeko sarreran // Geuria

“Gazteak elkartzeko eta haiek gustuko dituzten ekintzak egiteko etxea edo aretoa, gazteek berek kudeatzen dutena.” Hori da Euskaltzaindiak gaztetxeak definitzeko erabiltzen duen definizioa. Baina eremu sozial hauek hori baino askoz gehiago dira. 23 urte beteko ditu aurten Basauriko Txarraska gaztetxeak. 1997ko gaztetxearekiko ezberdintasunak nabariak dira. Adibidez, jada ez dute begirada gazteengan soilik jartzen, komunitate osoarengan baizik. Ioritz Aramendi (Basauri, 1989) eta Pablo Oliveros (Basauri, 1996) gazte asanbladako kideek argi dute filosofia berri hori. Gauzak horrela, zabalkunde hau argi adierazten duen ekintzez beteriko urteurrena antolatu dute.

Nola definituko zenukete Txarraskaren parte izatea eta zer dakar berarekin?
Ioritz Aramendi: Proiektu sozial, politiko, asanbleario eta autogestionatu baten parte izatea da, horrek dakartzan konpromiso guztiekin; hala nola, asanbladetan parte hartzea edo denon artean erabakiak hartzea. Honi esker, zure bizitzako arlo bat zuk zeuk kudeatu dezakezu zure parekoekin batera. Azken finean, zure bizitzaren jabe izatea da. Beste esparruetan (eskolan, lanean eta abar) ez gara beti gure bizitzaren jabe, eta espazio honetan hori lortzen saiatzen gara.
Pablo Oliveros: Bakoitzaren osasunean onurak dituela esango nuke baita ere. Komunitate baten baitan egoteak osasun mentalean eragin positiboa izan dezake. Gizartean normalean garatzen ez ditugun jarduteko erak gaztetxean topa daitezke. Nire ustez, hori da Txarraskaren parte izatearen atalik interesgarriena.

Zer ekintza eramaten dituzue aurrera zuen egunerokotasunean?
I.A.: Egunerokoan bizitza gehien dutenak dira rokodromoa, skatepark-a, musika lokalak, gimnasioa eta tailer ezberdinak, serigrafia tailerra edo bitxiak egiten ikastekoa, esaterako. Gainera, beste ekintza politikoago batzuk daude. Eskualdeko elkarlaguntza sareak bere espazioa du Txarraskan bertan. Horrez gain, egunerokotasunetik at, kontzertuak edo bakarrizketak bezalako ekitaldiak antolatzen ditugu.
P.O.: Bilbo Handiko zenbait mugimendurekin elkarlanean ekimen asko garatzen ditugu. Izan ere, gure ustez Txarraska ez da Basauriko testuinguruan bakarrik ulertu behar, inguruko herri eta mugimendu sozialekin bat baizik. Gizartean instituzioekin dugun bitartekaritza hurrengoa izaten da orokorrean: zuk eskatu eta haien erantzuna itxaron. Hemen ez. Gauzak zuzeneko era batean egiten saiatzen gara, inoren erantzunaren zain egon beharrik gabe.

Argazkia: Geuria

Zein esango zenukete dela gaztetxeen izateko arrazoia?
I.G.: Hasieran, gaztetxe mugimendua sortzen da gazte euskaldunek uste dutelako espazio bat behar dutela haien bizitzak aurrera eramateko; bai arlo kulturalean, baita arlo politikoan ere. Hori dela-eta, lehenengo okupazioak hasten dira. Halere, egia da gaur egun ‘gaztetxe’ izenak mantentzen diren arren, ez dugula gure burua gazteentzako toki baten modura soilik ikusten. Txarraskan ikasle mugimenduko gazteek zein pentsionistek dute haien lekua.

Esan liteke, beraz, gaztetxea herritar gehiagorengana iristen dela bi hamarkada hauen ostean?
P.O.: Lehen, aisialdira edo musikara zegoen bideratuago. Baina, duela bost urtetik hona inguru, ideia eta ikuspuntu berriak plazaratu izan dira asanbladan. Hortaz, askoz proiektu borobilagoa sortzea lortu dugu. Gizartearen bazterretan daudenei gure ateak zabaldu dizkiegu eta haiekin batera lan egiten saiatzen gara; hala nola, pertsona migratuak edo sexualitate ezberdinak. Jada ez dugu soilik gazteen ardatza.
I.G.: Txarraskan aldaketa oso nabaria izan da. Beste gaztetxeetan bezala, izaera politiko oso konkretua zuten gazteei bideratutako espazioa izatetik, autogestioan eta asanbladan sinisten duen edonorentzako lekua bihurtu da. Askoz proiektu zabalagoa da gaur egun duela 23 urte baino.

Azken aldian gaztetxetik kanpo begiratu nahi duzuela dirudi ekintza ezberdinak eginez. Zergatik?
P.O.: Bizi garen sisteman, eta pandemiarekin argi azaleratu da, beti botearen menpe egin behar da lan. Guk uste dugu, autogestioak testuinguru horretan asko lagundu dezakeela. Baina ez bakarrik gaztetxea bezala; ortuetan, umeekin (eta haien artean) dugun harremanean, heziketan edota bizikidetzan gune sozial batek, kasu honetan Txarraskak, asko lagundu dezake. Lehen kartzela baten moduan planteatzen ziren gaztetxeak: autogestioa lau hormen barruan egiten zen, kanpora irten gabe. Guk planteamendu hori apurtzea proposatzen dugu.
I.A.: Guretzat Txarrraska ez da soilik gazteen aisialdia antolatzeko leku bat. Beti egon da eztabaida ea gaztetxea helburua izan behar den edo tresna. Nire ustez, azken urteotan argi geratu da tresna bat izan behar dela: herrian edo inguruan dauden proiektu sozialei lekua eskaintzen dien tresna, hain zuzen.

Argazkia: Geuria

Gaztetxea lanabes bihurtzeko, zer ekintza eramaten dituzue aurrera?
P.O.: 2019ko greba oso adibide argia da. Guk lan gogorra egin genuen ez bakarrik gaztetxearen barruan, baizik eta herriko aktore ezberdinekin batzen, grebak eragin soziala izan zezan. Tubacexeko greban, adibidez, langileei lekua eskaini zitzaien eraikinean behar izanez gero.
Gaztetxea bera lanabesa izateaz gain, barnean tresnak ditugu baita ere. Tresna hauek gure ekintzen balioa handitzen dute, eraginkorragoak bihurtuz. Hau da, gure helburua da gai eta ekintza sozial ezberdinak indartzea.
I.A.: Hortaz gain, azken urteetan bai Basauriko eta bai auzo ezberdinetako jaietan parte hartu dugu ekintza kultural ezberdinak antolatuz edo txosnak jarriz. Gainera, Hego Uribeko eta Bilbo Handiko ekimen gehienetan parte hartzen saiatzen gara.

Txarrastxiki ekimena ere baduzue.
I.A.: Guk gaztetxea ulertzeko dugun eran, gizarte osoarentzako espazio bat izan behar du. Hortaz, haurrek haien lekua izan behar dute bertan. Hain ibilbide luzeak ahalbidetzen du orain Txarrastxikin dauden umeen gurasoak garai batean Txarraskako gazte asanbladan egon zirenak izatea. Pertsona batentzat antzina bera parte zen ekimen batean haien seme-alabak disfrutatzen ikustea oso hunkigarria da.
P.O.: Hogei urteko gazte bat zarenean, dituzun arazoak oso ezberdinak dira 30 urteko guraso batek eduki ditzakeenekin alderatuta. Lan munduak askotan arazoak sortzen ditu umeak zaintzeko orduan. Gure ustez, era komunitarioan topa dakieke konponbidea arazo horiei, beste heziketa mota batzuk garatuz. Azkenean, gaztetxearen irakurketa ezberdin honetan lekua egin behar diegu gizartean sortzen diren beharrei.
I.A.: Azkeneko greba orokorrean argi ikusi genuen langile askok arazoak zituztela haien seme-alaben zaintza zela-eta. Horregatik, Txarraskan erabaki zen espazio bat ahalbidetzea, gurasoak manifestazioan zeuden bitartean haurrak zaintzapean egon zitezen.

Zergatik da garrantzitsua urteurrena bezalako ekitaldi handiak antolatzea?
I.A.: Guretzat urteurrena garrantzi handia duen ekitaldia da; izan ere, Txarraska agenda mediatikoaren barruan sartzea ahalbidetzen digu. Urte osoan zehar ekimen solteak garatzen ditugu, baina horrelako gauza potente bat antolatzeak eta aurrera eramateak lan handia du bere atzetik. Baina balio du jendeak gure berri izateko. Hortaz merezi du, zalantzarik gabe.
Gainera, oso pozgarria da 23 urtez gaztetxea mantendu ahal izatea. Jakina denez, askotan horrelako proiektuek arazoak topatzen dituzte instituzioen aldetik. Beraz, oso polita da 23 urte bete ahal izatea.

Uste duzue estigmarik badagoela gaztetxearekiko?
I.A.: Egon badaude, baina esango nuke azken urteetan murriztu egin direla. Hainbat dinamikari esker gaztetxea herrira zabaltzen joan denez, herriak informazio gehiago izan du eta Txarraska hobeto eta era positiboagoan ezagutu du. Gainera, 23 urtetan jende asko pasa da gaztetxetik.
P.O.: Badakigu dena ez dela bikain egin; batez ere mantentze-lana, bereziki aurrealdea. Horrek Txarraskaren irudia desitxuratzen du. Norbait lehen aldiz datorrenean zur eta lur gelditzen da. Izan ere, barrutik kanpotik baino askoz txukunago dago.

Argazkia: Geuria

Etorkizunari begira, zer daukazue buruan?
P.O.: Azken urteetan aurrera eraman dugun dinamikarekin jarraitzea, Txarraska geroz eta proiektu zabalagoa bihurtzeko xedearekin. Gaztetxeaz harago doazen proiektuak aurrera eramatea gustatuko litzaiguke. Azkenean, guk gure etorkizuna zalantzan dugu beti. Izan ere, metroaren obra berriekin agian eraikina behera bota beharko da. Pena izango litzateke, inurri lan asko baitago hemen.
I.A.: Gure etorkizuna baino, eraikinaren etorkizuna da zalantzan dagoena. Baina, guk eraikina lanabes bezala ulertzen dugu; hortaz, hemen bada edo beste leku batean bada Txarraskarekin jarraituko dugu urte luzez, ez baitugu proiektua soilik eraikinari loturik ulertzen. Hala ere, garrantzitsua iruditzen zait jakitea Txarraskako gazte asanbladak akordio bat duela sinaturik Udalarekin esanez eraikin hau erabil dezakegula. Berez, Basauriko Udalak eraikina zerbaiterako behar izanez gero, konpromisoa hartzen du beste eraikin bat eskaintzeko.

Nola azalduko zeniokete gaztetxean inoiz egon ez den norbaiti nolakoa den bertako parte izatea?
I.A.: Gaztetxearen oinarria autogestioa eta asanblada dira. Guk erabakitzen dugu zer egin eta nola eraman aurrera, inoren laguntzarik gabe. Hala ere, azaldu baino, uste dut hobea dela bertaratzea eta haiek ikustea zer egiten dugun. Edonork ditu Txarraskako ateak zabalik etorri eta ezagutzeko.
P.O.: Zure egunerokotasunean erabilgarriak izan daitezkeen gauzak ikasteko lekua da hau. Zure ingurukoekin harremanak eraikitzeko tresnak ikas daitezke, edo entxufe bat nola jartzen den.
I.A.: Guztiz ados, horrelako proiektu batean parte hartzeak gauzak era ezberdin batera ikastea dakar. Eskolan eta lanean beti dago norbait ordutegiak eta gauzak egiteko erak ezartzen dizkizuna. Hemen aukera dago era kolektibo batean zure bizitzarekin zer egin nahi duzun erabakitzeko. Guztiz aberasgarria da.

☉ Basauri

Antón Ferrerori eta errepresio frankistako biktimei omenaldia egingo diete Basaurin martxoaren 9an

|

1976ko martxoaren 8an erail zuten indar errepresio frankistek Anton Ferrero basauriarra // Geuria

Indar errepresibo frankistek Vicente Anton Ferrero basauriarra hil zutenetik 48 urte beteko dira martxoaren 8an.

1976ko martxoaren 3an Gasteizen izan ziren erasoak eta erailketak salatzeko manifestazioan parte hartzen ari zen Anton Ferrero Basaurin eta poliziak tiroz hil zuen bere izena daraman kalearen ondoan 18 urte zituela.

Urtero bera eta diktadura eta errepresio frankistaren biktimak omentzeko ekitaldia deitzen du Ahaztuak elkarteak Basaurin. Aurten martxoaren 9n, larunbatez, izango da 13:00etan Bingen Anton Ferrero kalean.

Osorik irakurri

☉ Basauri

Emakumeek faxismoaren aurka egindako borroka azpimarratuko dute Basauriko M8 egitarauan

|

Martxoaren 8an elkarretaratzea egingo dute Basaurin, Azaroak 25 plazan // Geuria

Martxoa heldu da eta horrekin batera berdintasunaren eta emakumeen eskubideen aldeko aldarriak berriro mahai gainean jartzeko tartea.

Martxoaren 8a Emakumeen Nazioarteko Eguna da eta horren inguruan hamaika jarduera antolatu ditu Basaurin Berdintasun arloak. Eta ez bakarrik egun horretan; izan ere, egitaraua hilabete osoan zehar eta apirilean zehar luzatuko da.

Besteak beste, erakusketak, tailerrak, hitzaldiak eta Emakumeen Ahotsak zikloa antolatu dituzte Basaurin. Era berean, M8an elkarretaratzea ere deitu du Basauriko Asanblada Feministak, Berdintasun Kontseiluaren babesarekin.

M8ko elkarretaratzea 13:00etan izango da Azaroak 25 plazan, indarkeria matxistaren biktima diren eta bizirik atera diren emakumeen Memorialaren eta Eskarabileren estatuaren ondoan (San Pedro elizaren ondoko plaza).

“Aurten ere, emakumeen errealitatea hainbat ikuspegitatik landuko dugu; Martxoaren 8 honetan, bidegabekeria sozialen aurka emakumeek egin duten borroka historikoa ikusgai jartzearekin hasi, eta feminismoak adinik ez duelako aldarrikapenagaz amaituko dugu”, dio Isabel Cadaval Berdintasun arloko zinegotziak.

Emakume erresistenteak

Gatazka historikoaren barruan, emakumeek faxismoaren aurka egindako borroka nabarmendu nahi izan dute Basaurin, eta horretarako martxoaren 4tik apirilaren 26ra bitartean ‘Emakume erresistenteak’ erakusketa izango da Marienean.

Erakusketa hori Memoria Historikoa Berreskuratzeko Elkarteak antolatu du, emakumeek Espainiako Gerra zibilean eta Bigarren Mundu Gerran faxismoaren aurka egindako borroka ikusgai jartzeko asmoz.

Martxoaren 7an, 18:30ean izango da erakusketaren inaugurazio-ekitaldia, eta elkarteko ordezkari batek parte hartuko du bertan.

Mari Luz Esteban eta adineko emakumeak

‘Feminismoa dugu alternatiba!’ hitzaldi-zikloaren barruan, Mari Luz Esteban Galarza basauriarrak adineko emakumeen gaia ikuspegi feminista batetik landuko du. Hitzaldia Marienean izango da martxoaren 21ean 18:00etatik 20:30era.

Martxoaren 21ean ere Korrika igaroko da Basauritik eta hori aprobetxatuta, emakumeek presentzia izango dute kilometro batean, Azaroak 25 plazatik hasita. Aurten Kapritxosas taldeak eramango du lekukoa; izan ere, Basauriko emakumezko pailazo feministen taldeak hamahiru urte betetzen baititu.

Egitaraua / M8 Basaurin

Otsailak 20-Martxoak 5
‘Emakumeen erabakia: Guatemala’ argazki erakusketa Marienean

Martxoak 2-30
‘Emakumeen Ahotsak’ zikloa Social Antzokian: Limbo Cabaret, Sara Azurza, Eva Guerrero, Lolita Flores…

Martxoak 4-Apirilak 26
‘Emakume erresistenteak’ erakusketa (Memoria Historikoa Berreskuratzeko Elkartea)
Inaugurazio-ekintza: martxoaren 7an, 18:30ean

Martxoak 5, asteartea
19:00 Antzerki foro tailerra Marienean

Martxoak 8, ostirala
13:00 Elkarretaratzea Azaroak 25 plazan

Martxoak 21, osteguna
13:50 Korrika: Emakumeen kilometroa (Las Kapritxosas) Azaroak 25 plazatik
18:00-20:30 Hitzaldia Marienean: ‘Emakue zaharren gorputzean jokatzen ari da berdintasuna’ (Mari Luz Esteban Galarza, Emakume Feminista Zaharren taldearekin lankidetzan)

Osorik irakurri

☉ Basauri

Mikel Garcia Basauriko Javi Conde klubeko atleta munduko Short Track Virtus txapeldun da

|

Mikel Garcia Munduko Short Track Virtus Txapelketan, Reimsen (Frantzia) // Argazkia: Geoffrey Wahlen, FFSA

Javi Conde klubeko Mikel Garcia eta Ibai Magdaleno atleta paralinpikoek Munduko Short Track Virtus Txapelketan parte hartu zuten otsailaren 20tik 25era bitartean. Txapelketa Reimsen izan zen, Frantzian.

Lorpenei dagokienez, 800 metroko lasterketan munduko txapeldun da Mikel Garcia. Gainera, zilarrezko domina irabazi zuen 400 metrotan.

“Mikel sasoi bikainean iritsi zen txapelketara, Ciechanowen (Polonia) kros laburreko munduko txapelketan urrezko domina eskuratu ondoren”, dio Javi Conde entrenatzaileak, eta gaineratu du: “Mikelen bi dominek Down kirolarien aldarrikapena indartzen dute Joko Paralinpikoetan lehiatu ahal izateko”.

Hain zuzen ere, Joko Paralinpikoetan ez dago Down sindromedunentzako kategoriarik, eta duela urte batzuk Mikelen gurasoek Elvira Agirrezabal eta Gotzon Garcia‘Down Paris 2024’ ekimena martxan jarri zuten. Ekimen horren helburua da Joko Paralinpikoetan Down kategoria sortzea.

Podiumaren atarian

Bestetik, Ibai Magdalenoren kasuan, podiumaren atarian geratu zen. Magdalenok 3.000 metrotako lasterketan parte hartu zuen eta laugarren bukatu zuen.

Ibai Magdaleno Munduko Short Track Virtus Txapelketan, Reimsen (Frantzia) // Argazkia: Geoffrey Wahlen, FFSA

Era berean, 1.500 metrotako proba ere egin zuen Magdalenok eta zazpigarren sailkatu zen.

“Oso maila altuan lehiatu da Ibai. Lasterketa zailak izan ziren, eta pozik gaude lortu duen emaitzekin”, dio Condek.

Ekainean Javi Conde klubeko zenbait atletak Suedian jokatuko den aire zabaleko Europako Txapelketan parte hartuko dute.

Osorik irakurri

☉ Basauri

Kareaga eta Basozelai auzoetako irisgarritasuna hobetzea jasotzen du Basauriko Udal Gobernuaren planak

Udal ordezkariek azaldu dutenaren arabera “aginte-plana osatzen duten jarduera guztiak Nazio Batuak zehazten dituen Garapen Iraunkorreko Helburuekin lerratuta daude”

|

Basauriarrek merezi duten herria egiten jarraitzea. Hori da Udalak aurkeztu duen Gobernu Planaren helmuga. Horretarako, 6 arlo ezberdinetan antolatutako 79 neurri aurkeztu dituzte Asier Iragorri alkateak eta Isabel Cadaval PSEko bozeramaileak. Arloak honako hauek dira:

  • Basauri Soziala
  • Basauri enpleguarekin, garapen ekonomikoarekin eta tokiko merkataritzarekin
  • Basauri hezkuntzarekin eta gure gazteentzako aukerekin
  • Basauri bizigarria, jasangarria eta segurua
  • Basauri kulturarekin, kirolarekin eta euskararekin
  • Udal moderno eta irekia

Udal ordezkariek azaldu dutenaren arabera “aginte-plana osatzen duten jarduera guztiak Nazio Batuak zehazten dituen Garapen Iraunkorreko Helburuekin lerratuta daude”.  Helburua, Asier Iragorri alkatearen arabera, herritarren ongizatea bermatuko duen eta sozialki aurreratua izango den Basauri bat eraikitzen jarraitzea da. Horretarako, udalerri irisgarri eta seguruagoa eta jasangarriagoa sustatu nahi dute, enpresa eta enplegu aukerak sortzeko gai izango dena. “Denontzako Basauri plural eta euskaldun baten alde ere lan egingo dugu, bere nortasunari eutsiko diona eta kultura- eta aisialdi-eskaintza aberatsa izango duena. Azken finean, Udal moderno eta irekia, kalitate handiko zerbitzu publikoak eskainiko dituena” borobildu du Iragorrik.

Hirigintza protagonista

Neurri zehatzei dagokienez, arlo urbanistikoak pisu nabarmena izango du udal gobernuaren jardunean. Hori horrela, hainbat jarduera garatuko dira “Basauri bizigarria, jasangarria eta segurua” arloaren 26 neurrietan zehar. Horietako bat Kareaga Goikoaren hirigintza-garapena izango da, 1,3,5 eta 7. zenbakietan. Bestalde, Larrazabal eremuaren kasuan birgaitu daitezkeen hirigintza eremuetarako udalaz gaindiko baliabideak aztertzea eta eremu horietarako sarbidea erraztuko da, La Baskoniaren inguruko hirigintza- eta gizarte-garapenarekin batera.

Era berean, San Migelgo Renferen geltokiaren ondotik doan espaloia handitzea, Urbiko plazan hobekuntzak egitea eta Zumalakarregi kalearen hirigintza-berrikuntza integrala egitea aurreikusten da; izan ere, esku-hartze horrek 2024ko aurrekontuan partida ekonomiko bat esleituta dauka. Basauriko alkateak zehaztu du gobernu planean jasotako ekintza batzuk legegintzaldiko lehen hilabete hauetan jarriko direla martxan, eta beste batzuk pixkanaka definitzen edo gauzatzen joango direla. Arlo honen baitan kokatzen dira Basozelai eta El Kaleroko irisgarritasuna hobetzea, parkeak eta aisialdirako eremuak handitzea edo hiri-baratzeak sortzea.

Ongizate komunitarioa helburu

18 neurri jasotzen dira arlo honetan, besteak beste gizarte-bazterkeriako eta ahultasun ekonomikoko egoeren aurkako borroka,”Basauri lagunkoia adinekoekin” programan jasotako ekintzak garatzen jarraitzea, Adinekoentzako gizarte-zentro berria, nahi ez den bakardadearen aurkako programak edo  Sarratuko bizikidetza-unitatearen eta eguneko arreta-zentroaren proiektua garatzea.”Adinekoak gure kudeaketa politikoaren erdigunean daude, eta baliabideak bideratuko ditugu haien babesa eta bizi-kalitatea bermatzeko”, azpimarratu du Isabel Cadavalek.

Beste arloak ere ez ditu bazter utzi udal gobernuak, eta berdintasuna erdigunera ekarri dute. PSE-EEko bozeramaileak adierazi duenez, “Basauriko Indarkeria Matxistaren aurkako II. Planean jasotako neurriak ere ezarriko ditugu, eta indarkeria matxistaren biktimei eta mendekotasuna duten pertsonei laguntza juridikoa eta psikologikoa ematen jarraituko dugu; ezinbesteko zerbitzua da, eta oso beharrezkoa prozesu osoan laguntzeko”.

Enplegua eta tokiko merkataritza ere funtsezko elementuak dira Basauriren garapenerako, eta hori horrela, basauriarrei enplegu-aukerak eskainiko dizkieten enpresa berriak herrian kokatu daitezen lan egingo dutela iragarri dute udal ordezkariek, horretarako dauden guneak baliatuz, bereziki La Baskonia eta Mercabilbao kokatzen diren orubeetan.

Haurreskolen egoera ere kontutan hartu du udal gobernuak plan osatzerako orduan: “agintaldiaren hasieran iragarri genuenez, uztailean, gobernu-akordioa aurkeztu genuenean, udalerrian 0 eta 2 urte bitarteko haurren eskolatze-beharrak aztertzen ari gara, eta, plazarik ez dagoela ikusiz gero, Haurreskolen Partzuergoari eskatuko diogu familiei zerbitzu hori eskaintzeko gune berriak sortzea, Basaurin antzemandako eskaerari erantzuteko”, gogorarazi du Cadavalek.

Kulturari, kirolari eta euskarari dagokienez, kultura-ekipamendu berri bat izateko helburuan aurrera egingo da, Baskoniaren nabe zaharraren birgaitzearekin, eta Euskara Sustatzeko Plana ere garatuko da, prozesu parte hartzaile baten bidez.

Bukatzeko, beste helburu nagusi bat ere badu planak, udal eredu  “modernoago, parte-hartzaileago eta irekiago” baten arrastoan.

Osorik irakurri

☉ Basauri

Jantokiaren kalitatea bermatzeko “aktiboki lan” egingo duela ziurtatu die Basauriko Udalak Guraso Elkarteei

Eusko Jaurlaritzak Basauriko Udalari azaldu dio egungo jantoki-zerbitzurako alternatiba ezberdinak lantzen ari dela, eta litekeena dela Basauri izatea horrelako esperientzia bat martxan jartzeko aukeratuko duten lehen herrietako bat

|

San Migelgo Sofia Taramona ikastetxeko jantokia / Sofia Taramona

Hilabete hasieran Basauriko IGE taldeak ( Ikasleen Guraso Taldeak) gutuna igorri zien ikastetxe publikoetako gurasoei, otsaileko Osoko Bilkurara eraman behar zuten aldarrikapen eta eskariaren berri emateko: udal sukalde baten sorrera herrian, “eskolak eta interesa duten beste zentro batzuk hornitu ahal izango duena, enplegua udalerrian eskainiz eta bertako merkataritzan oinarritutako kalitatezko janaria eskaintzen duena”. Hori bakarrik ez, bihar 18:00etan ospatuko den Osoko Bilkurara hurbiltzeko gonbidapena luzatu zieten gurasoei.

Eskari hau ez da Guraso Taldetik egiten duten lehena, aurretik ere hainbat proposamen egin baitituzte, gutunean bertan zehazten dituztenak, betiere, “gure zentroetan elikadura egoki baten alde” lan egiteko helburuarekin : “lehenik eta behin, garraiatutako catering-zerbitzuak sinatutako agirien zehaztapenak bete daitezen borroka egin genuen (gutxiegitzat jotzen ditugun dokumentuak), eta gure zentro gehienetan tokian tokiko sukaldaritza ere eskatu dugu (guztietan bideraezina ikusten duguna eta denbora asko behar izango da aldaketa lortzeko)”.

Proposamen honen harira, Basauriko Udalak bilera egin du guraso-elkarteetako ordezkariekin, eta bertan hainbat konpromiso hartu ditu, “ikastetxe horietako ikasleek kalitatezko jantoki-zerbitzua jaso dezaten, betiere bere eskumenen esparruan”. Hasteko, udal arduradunek zera zehaztu dute: “Basauriko Udalak udalerriko eskola-jantokien egoerari buruzko informazioa bildu eta kontrastatu du zenbait iturritatik, besteak beste, Eusko Jaurlaritzaren Hezkuntza Saila eta guraso-elkarteak, zerbitzuaren diagnostikoa egin, eta horrela, Eusko Jaurlaritzari Basauriko familien kezkak eta proposamenak helarazi ahal izateko”.

Helburu horrekin, Eusko Jaurlaritzaren Hezkuntza Saileko arduradunekin harremanetan egon da etengabe Udala, guraso-elkarteen iritziak eta gogoetak helarazteko eta egungo zerbitzua hobetzeko konponbideak bilatzeko deia egiteko; izan ere, jantoki-zerbitzua Basauriko Udalaren eskumena ez den arren, arazoak udalerriko familia askori eragiten die

Eusko Jaurlaritzarekin izandako hartu eman horren harira, udalak jakin ahal izan du Eusko Jaurlaritza “beste alternatiba batzuk” baloratzen ari dela jantoki-zerbitzurako, eta horietako baten bat gauzatu balitz “litekeena dela” Basauri izatea horrelako esperientzia bat martxan jartzeko aukeratuko duten lehen udalerrietako bat.

Bukatzeko, Udalak adierazi du  “eskumena duen Eusko Jaurlaritzarekin batera, ikuspegi juridiko, tekniko eta ekonomikotik bideragarria den edozein aukera aztertuko” duela, “baldin eta gure ikasleei emandako jantoki-zerbitzuaren kalitatea hobetzeko bada”. Helburu hori lortze aldera, “udal-azpiegiturak Eusko Jaurlaritzaren esku jartzeko prest dago Basauriko Udala, xede horretarako erabil ditzaten, bai eta eskumena partekatzeko prest ere, lankidetza-hitzarmenen bidez edo bestelako bideetatik, horretarako beharko litzatekeen finantzaketarekin”.

Begiraleen artean euskara sustatzea helburu

Beste alde batetik, Udalak jakinarazi du jantokiko eta jolastokiko begiraleekin lan egingo duela,  “enpresa esleipendunaren betebeharra” den arren. “Basauriko Udalak”,  borobildu dute  ” bere kudeaketaren lehentasunezko arloetako bat euskararen erabilera sustatzea denez, zenbait aukera, baliabide eta ekintza baloratzeko konpromisoa hartu du, guraso- elkarteekin lankidetzan gune horietan euskararen erabilera sustatzeko helburuarekin”.

Osorik irakurri