☉ Basauri
Basauriko alkateak eta liberatuek orain arteko soldatak mantenduko dituzte
Ardunaldi partziala eta esklusiboa izango duten kargudunen kopurua zehaztu dute gaur Basauriko osoko bilkuran, baita udalbatzako kideen ordainsariak ere.
EAJk eta PSEk gobernu akordioa erdietsi ondoren, legegintzaldiko lehen osoko bilkura egin dute gaur, uztailak 24, Basaurin. Besteak beste, ardunaldi partziala eta esklusiboa izango duten kargudunen kopurua zehaztu dute gaur, baita udalbatzako kideen ordainsariak ere.
Asier Iragorri alkatea (EAJ), Maria Larrinaga (EAJ), Nerea Renteria (EAJ), Berta Montes (EAJ) eta Isabel Cadaval (PSE) % 100ean egongo dira liberatuta, eta Txomin Carro (EAJ) eta Idoia Ortego (PSE) % 50ean. Era berean, oposizioko zinegotzia bat % 100ean liberatuta egoteko aukera dago. Kasu honetan, EH Bilduko ordezkari bati dagokio liberatuta egotea. “Euskadiko Toki Erakundeei buruzko Legeari dagokionez, 33. artikuluak dio 10.000 biztanle baino gehiagoko udalerri bateko oposizioko kide bat gutxienez ardunaldi eskluboan jardun dezake, eta kasu honetan EH Bilduri dagokio”, diote Udaletik. Exabier Arrieta (EH Bildu) izango da oposizioko zinegotzia liberatua, % 100ean.
Gauzak horrela, zazpi zinegotzi egongo dira guztira liberatuta (sei % 100ean eta bi % 50ean), aurreko legegintzaldian baino bat gehiago. “Legearen arabera, udaletxe honetan 11 zinegotzi liberatu izatera pasa gintezke”, dio Asier Iragorri alkateak.
Soldatak bere horretan mantendu
Asier Iragorri alkateak 78.420,50 euroko soldata gordina jasoko du urtean, Andoni Busquet aurreko alkateak kobratzen zuen bezala. Era berean, bere horretan mantendu dituzte gainontzeko liberatuen soldatak: % 100ean dauden hiru alkateordeek (Maria Larrinaga, Nerea Renteria eta Berta Montes) 70.578,45 euro irabaziko dituzte urtean, % 100ean dagoen beste zinegotziak (Isabel Cadaval) 66.657,42 euro jasoko ditu, % 50ean dauden bi zinegotziek (Txomin Carro eta Idoia Ortego) 33.328,71 euro, eta oposizioko buruak (EH Bildu) 59.991,38 euro. Guztira, 483.462,07 euro bideratuko ditu urtean Basauriko Udalak soldata horietan.
Iazko datuak kontuan hartuta, aurreko oposizioko buruak (PSE) 59.991,38 soldata zuen: “Gure kasuan, EH Bildutik zehaztuko digute kopuru horretatik zenbateko soldata izango duen gure liberatuak”, diote Basauriko EH Bildutik.
EH Bildu eta Podemos alderdien proposamenei ezezkoa
EH Bildu eta Elkarrekin Podemos alderdiek emendakinak aurkeztu dituzte uztaileko osoko bilkura berezian, besteak beste, soldaten inguruan. EH Bilduren proposamenei dagokienez, aipatzekoak dira: alkatearen, alkateordeen eta zinegoztzigoen ordainsariak % 20an murriztea, baita % 20an murriztea ere organo kolegiatuetarako, dieten eta talde politikoen ordainsariak. “Agerikoa da ardura bat ordaindua izan behar dela, baina ez dugu ondo ikusten Eudelek markatutako topean mantentzea soldata horiek. Basaurin indarrean dauden soldatak probintziako hiriburuen alkateen edo ministroen soldaten parean daude, eta gure ustez gehigizkoak dira. Gainontzeko udalerrietan EH Bilduk proposatu bezala, guk ere Basaurin % 20ko murrizketa proposatzen dugu liberatu guztien soldatetan”, dio Exabier Arrieta EH Bilduko bozeramaileak.
Elkarrekin Podemosen emendakinei dagokienez, kargu hautetsien ordainsariak % 30ean murriztea proposatu du, baita batzordeetara joateko dietak eta organo kolegiatuetarako dietak beste % 30 murriztea ere. Era berean, liberatu kopurua aurreko legegintzaldiko bera izatea proposatu du talde moreak, hau da, oposizioko ordezkariaren liberazioa kentzea. “Indarrean dauden soldatak legalak direla eta Eudelek proposatzen duen kopuruen barruan daudela erantzun diguzue. Hori egia da, baina bitxia da kopuru hauek Eudelek proposatutakoen tope gorenean daudela. Adierazgarria da ministro batek 73.210 euro irabazten dituela; gure alkateak baino gutxiago. Gure proposamenaren arabera, 176.000 euro aurreztuko genituzte beste gauza batzuetara bideratzeko”, dio Maria Angeles Cantero Elkarrekin Podemoseko ordezkariak.
Hala eta guztiz ere, udalbatzak ez du onartu aurkeztutako emendakinik, EAJren eta PSEren kontrako botoekin.
Gobernu ardurak, adostuta
EAJk eta PSEk gobernu-ardura bakoitza nork kudeatuko duen ere zehaztu dute. Zortzi batzorde izango ditu Udalak: Lurralde politika eta Kontratazioa; Gizarte politika; Enplegua, Berdintasuna eta Kooperazioa; Berrikuntza, Gobernu irekia eta Parte-hartzea; Ogasuna, Ondasuna, Sustapen ekonomikoa eta Merkataritza; Euskara, Kultura eta Hezkuntza; eta Gazteria, Jaiak eta Kirola.
Gobernuaren antolaketari dagokionean, honakoak dira arloetako buruak: Maria Larrinaga (Gizarte politika eta Kultura), Nerea Renteria (Lurralde politika eta Kontratazioa), Berta Montes (Ogasuna, Berrikuntza, Gobernu irekia, Parte-hartzea eta Jaiak), Txomin Carro (Giza-baliabideak), Agurtzane Cebrecos (Udaltzaingoa), Nora Pereda (Euskera), José Ramón Suárez (Ondasuna), Marieli de Pedro (Merkataritza eta Sustapen ekonomikoa), eta Jon Zugazagoitia (Kirolak, Gazteria eta Informatika). Isabel Cadaval sozialisten burua Enplegu, Berdintasun eta Lankidetza arloen arduraduna izango da. Idoia Ortego sozialistak, halaber, Hezkuntza, Osasuna eta Kontsumoa sailak kudeatuko ditu.
Batzorde informatiboei dagokienez, honakoa izango da osaketa: EAJko 4 zinegotzia, PSEko 2, EH Bilduko 1, Elkarrekin Podemoseko 1 eta PPko 1.
Osoko bilkurak hilero izango dira, azken ostegunetan, 18:00etan.
☉ Basauri
‘Emakumeak eta industria musikala’ solasaldia antolatu dute gaur Marienean, MAZ Basauri jaialdiaren baitan
Musikaren industriako emakumeek euren esperientziak partekatuko dituzte gaurko topaketan
Aurten, iaz bezala, hirugarren jardunaldi bat ere izango du MAZ Basauri jaialdiak bere 13. edizioan: azaroaren 6an, ostegunez, ‘Emakumeak eta industria musikala’ topaketaren bigarren edizioa antolatuko dute Rockeinek, MAZ Basaurik eta Marieneak elkarlanean.
Topaketa Marienea Basauriko Emakumeen Etxean izango da 18:00etan. Musikaren industriako emakumeen esperientziak beste emakume batzuekin partekatzea bilatzen du ekimenak, sektorean eta eszenatokietan emakumeen presentzia handiagoa sustatzeko helburuarekin.
Aurten, La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira protagonistak. Emilia Arias kazetari eta idazleak (TVE, Pikara Magazine) gidatuko du hitzaldia, eta doakoa izango da.
MAZ Basauri Basauriko Udalak sustatzen du. Aurtengoa 13. edizioa da eta aurreko hamabi edizioetan, udalerria erreferente musikal gisa kokatu du, eta Basauriko kultura-, merkataritza- eta ostalaritza-bizitzarako pizgarria izan da.
Basauritik mundura. Horrela definitu daiteke atzoko gaua St James’ Park estadioan, egun berean bi basauriarrek egin baitzuten debuta: Selton Sanchezek (18 urte) eta Asier Hierrok (20 urte). Ez zen debut gozoa izan, taldeak 2-0 galdu baitzuen, baina zalantzarik gabe ahaztuko ez duten eguna izango da bi lehoientzat.
Selton Sanchez, 18 urteko erdilaria da, bere irudimen eta maila teknikoagatik nabarmentzen dena. Durangon jaiotakoa den arren, Basaurin bizi da aspalditik. Asier Hierro, aldiz, 20 urteko aurrelaria, amaierako minutuetan atera zen eta gola bilatu zuen etengabe, ausardiaz eta lotsa izpirik gabe. Biek ibilbide luzea egin dute Lezaman, Hierroren kasuan kimua zenetik ari baita zurigorriekin.
Partidaren ondoren, Unai Simonek gazteen lana txalotu zuen: “Selton eta Hierro Txapeldunen Ligako mailan aritu dira”, adierazi zuen atezainak.
Basauriko bi futbolariek amets bat bete dute: Lezamako harrobia eta Basauriren izena Europako eszenatokirik handienetara eramatea.
☉ Basauri
68,8 milioi euroko aurrekontua kudeatuko du 2026an Basauriko Udalak
Gobernu taldeak aurrekontu proposamena aurkeztu du gaur eta oposizioak azaroaren 19ra arte dute zuzenketak aurkezteko epea zabalik
Basauriko udal gobernu taldeak 2026ko aurrekontu proposamena aurkeztu du gaur. Guztira 68,8 milioi euro kudeatuko ditu Udalak datorren urtean, aurten baino 3 milioi gehiago (% 4,6 gehiago).
Besteak beste, aurrekontua handitu da diru-sarrerak, oro har, handitu egingo direlako. Besteak beste, Udalkutxatik 36,1 milioi euro jasoko ditu Basauriko Udalak, aurten baino 2,1 milioi gehiago.
Inbertsioetara 2,7 milioi euro bideratuko ditu Udalak 2026an. Eta, inbertsioen arten bi narbamendu ditu gobernu taldeak. Alde batetik, haurreskola berria eraikitzea eta bestetik, hiri-ortuak sortzea.
Martxoan aurreratu bezala, haurreskola berria eraikiko dute herrian, Arizko Ikastolaren ondoan dagoen berdegune batean. Basauriko hirugarren haurreskola publikoa izango da, Basozelaikoaz eta San Migelekoaz gain. Gutxienez 42 plaza izango ditu eta 0-1 eta 1-2 urte bitartekoentzako lau gela izango ditu. 2026ko aurrekontuan milioi bat bideratuko du Basauriko Udalak haurreskola eraikitzeko.
Asier Iragorri alkateak eta Berta Montes Ogasun arloko zinegotziak aurkeztu dute gaur 2026ko aurrekontu proposamena // Geuria
Hiri-ortuei dagokienez, Iruaretxeta parkean jarriko du martxan proiektua Udalak datorren urtean. Aurreikuspenen arabera, 80 ortu inguru egokituko dituzte, bakoitza 35 eta 40 metro karratu arteko azalerarekin. Udalak 400.000 euro gordeko ditu aurrekontuan hiri-ortuak sortzeko.
Inbertsioen atalaren barruan, hezkuntza-zentroetan hobekuntza lanak egiteko 310.000 euro erabiliko ditu Udalak.
Eta, aurrekontu parte-hartzaileen prozesua ere inbertsioen baitan sartu du gobernu taldeak: hartara 400.000 euro zer egiteko erabakiko dute herritarrek. Irailean herritarrek euren proposamenak egiteko epea zabalik izan zuten eta laster bozkatzeko epea irekiko du Udalak.
Garapen jasangarrirantz
2026rako proposatutako kontuen ezaugarri azpimarragarrienetako bat da aurrekontuaren % 42 erabili nahi dutela 2030 Agendaren Garapen Jasangarrirako Helburuei (GJH) loturiko gastu sozialean, helburua izanik desberdinkeria murriztea eta herritar guztiei aukera ematea oinarrizko eskubideak baliatzeko: hezkuntza, osasuna, aukera-berdintasuna eta gizarte-babesa.
“Aurrekontuaren ia erdia GJHen gastu sozialean erabiltzeak agerian uzten du gure konpromisoa pertsonekin eta basauriarren bizi-kalitatea hobetzearekin. Inbertsioen helburua da inor ez uztea atzean, eta herritar denek eskubide eta aukera berberak izatea”, adierazi du Asier Iragorri Basauriko alkateak.
Helburu horietan giltzarri den Gizarte Zerbitzu eta Gizarte Sustapen Arloak “inoizko aurrekontu handiena” izango duela nabarmendu dute udal ordezkariek. Guztira, 10,8 milioi euro; aurten baino % 3,9 gehiago.
“Adinekoentzako aurrekontua % 4,9 handituko da, 5,1 milioi euroraino (2025ean, 4,8 milioi); eta Berdintasun aurrekontua % 4,5 haziko da (2025ean, 519.000 euro; 2026an, 540.000 euro). Hezkuntza Atalaren aurrekontua, berriz, % 151 igoko da (2025ean, 623.000 euro; 2026an, 1.564.000), haurreskola berrirako partida milioi batekoa izango delako”, azaldu du Berta Montes Ogasun arloko zinegotziak.
Zor publikoari dagokionez, 2026an 806.000 euroko zorra izatea aurreikusi du gobernu taldeak: “Doitasun eta gestio eraginkorreko politikak etengabe aplikatzeak maila ia sinbolikoan utziko du Udalaren zorra”, dio Montesek.
“2024. urtea amaitu genuen 1,6 milioi euroko zorrarekin, eta urte hau amaituko dugu 1,2 milioiko zorrarekin. 2026. urtean, 806.000 eurora murriztuko dugu; hau da, sarrera guztien % 1,2era. 2012an, Udalaren zorra 12 milioi eurokoa zen, eta horrek agerian uzten du egin dugun ahalegin handia, Basauriko bizilagunen euro bakoitza eraginkortasunez eta erantzukizunez administratzeko”, nabarmendu du Montesek.
Oposizioan dauden udaltaldeek azaroaren 19ra arte dute zuzenketak egiteko. Ondoren, asmoa da azaroko osoko bilkuran eztabaidatzea 2026ko aurrekontua.
☉ Basauri
Maialen Ibarra DA! PRO topaketan kontzertua emango du azaroan Durangon
Uxue Kerejeta abeslari gipuzkoarrak ere parte hartuko du topaketan: bere ‘Amaiera’ diskoan Beñat Armentia galdakoztarrak kolaboratu du teklatuan
DA! PRO topaketaren zazpigarren edizioa helduko da azaroaren 25ean eta 26an, Durangoko Azokaren atarian. Musika eta familia ikuskizunak antolatuko dituzte eta horien artean Maialen Ibarra sanmigeldarrak kontzertua emango du.
Maialenen kontzertua Durangoko Plateruena aretoan izango da azaroaren 26an, asteazkenez.
Era berean, Sueder, Sara Zozaya, Gartxot, Jonkass, Hondora, Ilargi, Euskal Barrok Ensemble, Maider eta Uxue Kerejeta arituko dira Plateruenan.
Aipatzearren, Uxue Kerejeta musikari zumarragarraren ‘Amaiera’ diskoan Beñat Armentia Arriandiaga galdakoztarrak kolaboratu du teklatuan.
Durangoko Azokako jarduna Azokako egunetatik haratago hedatzeko asmoz sortu zuen Gerediaga elkarteak DA! PRO topaketa.
☉ Basauri
Basauri Pintxo Festa antolatuko dute datozen bi asteburuetan: aurten 42 tabernak eman dute izena
Moluskuak, tomatea edota patata izango dira Basauri Pintxo Festako osagai protagonistak, azaroaren 14tik 16ra eta 21etik 23ra
Pintxoen hiriburu izango da Basauri azaroaren 14tik 16ra eta 21etik 23ra bitartean: Pintxo Festa antolatuko dute.
Aurten 42 tabernak hartuko dute parte, iaz baino bost gehiago. Horiek dira: Maybe, Valhalla, Edudoga, Luna, Bai Horixe, Coffee; El Cruce, Rymari, Toison de Oro, Nastase, Uribarri, Zutarri; Neure, Boxes, Dafne, Izarra Berria, Itxina Berria, La Zona, Berezi, Geltoki; Bonboi, Herriko Etxea, Arume, Haizebarri, Apolo XII, Erretoki Arin, New Magic; Nervion, Katilu, Irati, La Sede, Beitia Zaharra, 7 Calles, Galizia, Xuroi; Fission’s Berria, Ganeko, Thomas, Batzoki Central, Excelsior Berri, Nagusia eta Uribarri 22.
Horiek guztiek pintxo lehiaketan hartuko dute parte eta taberna bakoitzak bere miniaturazko jakia salgai jarriko du Pintxo Festa egingo den egun guztietan zehar. Pintxoek moluskuak, tomatea edota patata osagaiak izan behar dituzte.
Lehiaketan Urrezko Pintxoa, Zilarrezko Pintxoa, Brontzezko Pintxoa, Fusio-pintxoa, Soiltasuna eta Zaporea Pintxoa eta Pintxo Herrikoia sariak banatuko dituzte. Epaimahai profesional batek aukeratuko ditu irabazleak.
Urrezko Pintxoaren saria irabazten duenak 300 euroko txartela jasoko du, herriko hiru saltokitan, gehienez, gastatzeko. Zilarrezko Pintxoaren irabazleak 200 euroko txartela jasoko du, herriko bi saltokitan, gehienez, gastatzeko. Eta Brontzezko Pintxoari 100 euroko txartela emango diote, gehienez herriko bi dendatan gastatzeko.
Bestalde, bi lagunentzako bost menu zozkatuko dituzte pintxo gogokoena hautatzeko botoa eman, eta boto-paperean bost taberna desberdinen zigilua duten herritarren artean.
Pintxo Festa izango den bitartean kale animazioa egongo da Basauriko kaleetan: Etxebarria Aita-Seme Trikitilariak, Sama Siku fanfarrea, Danbayan batukada, Danbolin Txistulari Elkartea, Basauri Koral Elkartea eta Kilometrokantu.
Eta aurrekoetan bezala, Helmuga-Basauri-Pintxo Festa Gida publikatu eta banatuko du Udalak. Gida horrek pintxo lehiaketan parte hartuko duten 42 tabernaren izena, helbidea eta kokapen geografikoa jasoko ditu, eta kanpainan zehar kalea girotzeko egongo diren jardueren berri ere emango du.
Liburuxka parte hartuko duten tabernatan eta Basauriko erreferentziazko tokietan banatuko dute.
Galdakaoko Adiskide Pilota Elkarteak 50 urteko ibilbidea ospatuko du jai giroan igandean
Emakumeak ahalduntzeko tailerra antolatu dute Ugaon
Auzolana eta musika oinarri, Galdakaoko Elkarlaguntza Sareak jaialdia antolatu du Basauriko Txarraska Gaztetxean
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
