☉ Basauri
Unai Medina: “Etxegarai sasoiko eskolen arteko pikeak oroitzen ditut”
Numantzia utzi eta Gijongo Sportingen ari da basauriarra. Bigarren mailan izango da datozen bi urtetan. Bost jardunaldi jokatuta, hamargarren dira sailkapenean.
Etxegarai ikastetxeko futbol taldean hasi zen Unai Medina (Basauri, 1990) futbolean jokatzen eta ordutik ez da gelditu. Gaur egun, bigarren mailako Gijongo Sporting taldean jokatzen du atzelari basauriarrak eta bertan emango ditu datozen bi denboraldiak. Lezaman hezia, Basconia, Bilbao Athletic, Barakaldo, Alaves eta Numantzia taldeetatik pasa ondoren iritsi da Sportingera Medina. Hirugarren, bigarren B eta bigarren mailetan jokatu du Medinak eta gaur egunera arte 290 partidu jokatu ditu eta 14 gol sartu ditu basauriarrak, horietako bat Numantzia lehenengo mailara igotzeko playoffetara eraman zuena.
Denboraldi berria, talde berria.
Bai, aurten Gijongo Sporting taldearekin sinatu dut bi denboralditarako (hirugarren bat sinatzeko aukerarekin) eta oso gogotsu nago. Ongi egokitu naiz bai taldera bai hirira. Taldeak ere gogoz hasi du denboraldia, eta dagoeneko lanean ari gara taldea gorenera eramateko.
Barakaldon egin zenuen denboraldiagatik (besteak beste, bost gol egin zenituen) fitxatu zintuen Alavesek, 2. mailan jokatzeko. Zelangoa izan zen saltoa?
Bigarren B mailatik 2. mailara arteko saltoa nabaria da. Jokalariak egokitu behar du nahi eta nahi ez. Maila baten eta bestearen artean desberdintasun asko daude. Barakaldon denboraldi borobila egin nuela esan daiteke bai, eta horri esker Alavesek nigan arreta jarri eta 2. mailan jokatzeko aukera eman zidan.
Maila batean edo bestean jokatzea desberdina dela aipatu duzu.
Hala da. Oso desberdina da 3. mailan jokatzea (Basconia), 2.B mailan jokatzea (Bilbao Athletic, Barakaldo) eta 2. mailan jokatzea (Alaves, Numantzia, Sporting). Mailaz maila zoazen neurrian, erritmoa handiagoa da. Kalitatea ere askoz handiagoa da maila batetik bestera. Bigarren mailan, esaterako, normala denez, taldeak askoz ere profesionalagoak dira eta lehiatzerako orduan izan ditzakezun zailtasunak nabaritzen dira.
Zelan definituko zenuke zure burua jokalari bezala?
Alboko atzelari nahiko erasotzailea naizela uste dut. Indartsua eta ibilbide luzea duena. Denboraren poderioz, defentsiboki hobetu dudala esan dezaket, baina oraindik hobetzen jarraitu nahi dut. Nire onen-onena emateko oraindik asko daukat hobetzeko.
Zure ibilbidean momentu onak eta ez hain onak biziko zenituen.
Bai. Beste edozein lanbidetan bezala, futbolean ere momentu onak zein txarrak bizi ditzakezu. Zoritxarrez nire kasuan, lesioengatik momentu latz asko pasa ditut, baina esan ohi denez, denetik ikasten da. Lesioek buruz indartsuago izatera behartzen zaituzte. Momentu onen artean daude, adibidez, benetan lagun dei ditzakedan adiskideak bidean topatzea, eta nabarmenduko nukeen beste momentu on bat litzateke Numantziarekin playoff-etara heldu ginenekoa. Ligako azken partiduan nik egindako gol batengatik sartu ginen playoff-etara! Inoiz ahaztuko ez ditudan uneak dira.
Hain zuzen, 2017/2018 denboraldiaren bukaeran mailaz igotzeko zorian izan zen Numantzia.
Bai. Denboraldi oso ona izan zen talde guztiarentzat. Denboraldi bikaina egin genuen eta lehenengo mailara igotzeko zorian egon ginen. Azkenengo txandan Valladolidek irabazi izan ez baligu…
Argazkia: Sporting
Sorian lau denboraldi eman zenituen eta urte horietan guztietan bi euskal entrenatzaile izan dituzu: Jagoba Arrasate eta Aritz Lopez Garai basauriarra.
Hala da. Egia esan, jokatu dudan talde guztietan izan ditut lankide euskaldunak. Zorionez Numantzian txapela kentzeko moduko bi entrenatzaile izan nituen. Begira orain non dagoen Jagoba, lehen mailan Osasunaren gidari. Eta, zer esan Aritzen inguruan! Duela gutxi hasi da entrenatzaile lanetan, baina urtez urte hazten doa eta seguru nago ibilbide oparoa izango duela entrenatzaile bezala.
Zelangoa da Lopez Garairekin duzun harremana?
Biak gara Basaurikoak. Aspalditik ezagutzen dugu elkar. Kategoria berean jokatu izan dugu, gainera. Gabonetan askotan egiten dugu topo herrian eta hitz egiteko tartea aurkitzen dugu beti. Gu bion arteko harremana oso ona da. Egia da Numantzian elkarrekin egon ginen aldian harremana bestelakoa izan zela: nire entrenatzailea zen eta nik horregatik, zuen karguagatik, errespetatu egiten nuen. Harreman profesionala zen, baina orain kirol eremuetatik kanpo, harremana pertsonalagoa da, hurbilagoa.
Numantzian beste basauriar batekin ere bat egin zenuten biok: Cristian Ganea.
Bai. Ezohiko egoera zirudien: Basauriko hiru herritar batera talde berean, non eta Sorian! Cristianekin dudan harremana ere oso ona da. Pertsona ona da eta zorterik onena opa diot. Athleticen minutuak izango dituela espero dut. Merezi du egiten duen lanagatik.
Egia esateko, Basauri askotan agertu da futbol munduan: Piru Gainza, Oscar Vales, Yeste, Lopez Garai, Joseba Garmendia, Ganea, Medina… Zergatik izango ote da?
Ez dago inolako zalantzarik: harrobi ona dago Basaurin! Hainbat futbol talde daude herrian eta hazten ari diren jokalari oso onak ere bai. Espero dut datozen urteotan herriko beste futbolari asko agertzea.
Noiz hasi zinen baloiari ostikoka?
Bada, txikitatik izan dut oso gustuko futbola eta ikastetxean hasi nintzen benetan jokatzen, Etxegaraiko futbol taldean. Lehen Eskola Kirola oraingoarekin alderatuta ezberdina zen. Ikastetxeko taldean jokatzen genuen eta gero etorriko ziren gerokoak. Etxegarain futbolean jokatzen nuen garaietatik gogoratzen dut oso ondo pasatzen genuela. Umea zarenean hori da benetan garrantzitsuena: edozein kirol praktikatuz ondo pasatzea. Lehiatzeko gero egongo dira aukerak. Hori bai, ikastetxeen arteko pikeak eta lehiakortasun puntu hori beti zegoen! (kar, kar, kar).
Egun Futbol Eskola dago Basaurin.
Bai. Kanpotik baino ez dut ezagutzen, baina uste dut umeen formaziorako ondo datorrela. Futbol Eskola bat herrian izateak lagundu egiten du futbolean ondo jokatzen ikasten, eta hori bertan dauden entrenatzaileei esker da.
Futbolari batek noiztik izaten du normalean agente bat?
Nire kasuan 17 urterekin hasi nintzen agentearekin, baina badakit gaur egun oso gaztetatik, 14 urtetik aurrera, dutela agentea batzuek. Normalean agentea bera jartzen da zurekin edo zure gurasoekin harremanetan, eta gero zuk erabakitzen duzu nor aukeratu. Zure ibilbidean lagunduko dizun norbait aukeratu behar duzu, konfiantzazko bat.
Zer esango zenioke futbolean hasten ari den ume bati?
Ume bati beti eman behar zaio gomendio bera: garrantzitsuena ondo pasatzea dela. Gustuko duenaz disfrutatu behar du hasieran, eta gero pixkana-pixkanaka ikasten joan, entrenatzailearen gomendioak jarraituta.
☉ Basauri
‘Emakumeak eta industria musikala’ solasaldia antolatu dute gaur Marienean, MAZ Basauri jaialdiaren baitan
Musikaren industriako emakumeek euren esperientziak partekatuko dituzte gaurko topaketan
Aurten, iaz bezala, hirugarren jardunaldi bat ere izango du MAZ Basauri jaialdiak bere 13. edizioan: azaroaren 6an, ostegunez, ‘Emakumeak eta industria musikala’ topaketaren bigarren edizioa antolatuko dute Rockeinek, MAZ Basaurik eta Marieneak elkarlanean.
Topaketa Marienea Basauriko Emakumeen Etxean izango da 18:00etan. Musikaren industriako emakumeen esperientziak beste emakume batzuekin partekatzea bilatzen du ekimenak, sektorean eta eszenatokietan emakumeen presentzia handiagoa sustatzeko helburuarekin.
Aurten, La Furia artista nafarra, Ibone Iza BIME Proko edukien arduraduna eta Maite Alaña MAZ Basauri eta Rockeineko zuzendaria izango dira protagonistak. Emilia Arias kazetari eta idazleak (TVE, Pikara Magazine) gidatuko du hitzaldia, eta doakoa izango da.
MAZ Basauri Basauriko Udalak sustatzen du. Aurtengoa 13. edizioa da eta aurreko hamabi edizioetan, udalerria erreferente musikal gisa kokatu du, eta Basauriko kultura-, merkataritza- eta ostalaritza-bizitzarako pizgarria izan da.
Basauritik mundura. Horrela definitu daiteke atzoko gaua St James’ Park estadioan, egun berean bi basauriarrek egin baitzuten debuta: Selton Sanchezek (18 urte) eta Asier Hierrok (20 urte). Ez zen debut gozoa izan, taldeak 2-0 galdu baitzuen, baina zalantzarik gabe ahaztuko ez duten eguna izango da bi lehoientzat.
Selton Sanchez, 18 urteko erdilaria da, bere irudimen eta maila teknikoagatik nabarmentzen dena. Durangon jaiotakoa den arren, Basaurin bizi da aspalditik. Asier Hierro, aldiz, 20 urteko aurrelaria, amaierako minutuetan atera zen eta gola bilatu zuen etengabe, ausardiaz eta lotsa izpirik gabe. Biek ibilbide luzea egin dute Lezaman, Hierroren kasuan kimua zenetik ari baita zurigorriekin.
Partidaren ondoren, Unai Simonek gazteen lana txalotu zuen: “Selton eta Hierro Txapeldunen Ligako mailan aritu dira”, adierazi zuen atezainak.
Basauriko bi futbolariek amets bat bete dute: Lezamako harrobia eta Basauriren izena Europako eszenatokirik handienetara eramatea.
☉ Basauri
68,8 milioi euroko aurrekontua kudeatuko du 2026an Basauriko Udalak
Gobernu taldeak aurrekontu proposamena aurkeztu du gaur eta oposizioak azaroaren 19ra arte dute zuzenketak aurkezteko epea zabalik
Basauriko udal gobernu taldeak 2026ko aurrekontu proposamena aurkeztu du gaur. Guztira 68,8 milioi euro kudeatuko ditu Udalak datorren urtean, aurten baino 3 milioi gehiago (% 4,6 gehiago).
Besteak beste, aurrekontua handitu da diru-sarrerak, oro har, handitu egingo direlako. Besteak beste, Udalkutxatik 36,1 milioi euro jasoko ditu Basauriko Udalak, aurten baino 2,1 milioi gehiago.
Inbertsioetara 2,7 milioi euro bideratuko ditu Udalak 2026an. Eta, inbertsioen arten bi narbamendu ditu gobernu taldeak. Alde batetik, haurreskola berria eraikitzea eta bestetik, hiri-ortuak sortzea.
Martxoan aurreratu bezala, haurreskola berria eraikiko dute herrian, Arizko Ikastolaren ondoan dagoen berdegune batean. Basauriko hirugarren haurreskola publikoa izango da, Basozelaikoaz eta San Migelekoaz gain. Gutxienez 42 plaza izango ditu eta 0-1 eta 1-2 urte bitartekoentzako lau gela izango ditu. 2026ko aurrekontuan milioi bat bideratuko du Basauriko Udalak haurreskola eraikitzeko.
Asier Iragorri alkateak eta Berta Montes Ogasun arloko zinegotziak aurkeztu dute gaur 2026ko aurrekontu proposamena // Geuria
Hiri-ortuei dagokienez, Iruaretxeta parkean jarriko du martxan proiektua Udalak datorren urtean. Aurreikuspenen arabera, 80 ortu inguru egokituko dituzte, bakoitza 35 eta 40 metro karratu arteko azalerarekin. Udalak 400.000 euro gordeko ditu aurrekontuan hiri-ortuak sortzeko.
Inbertsioen atalaren barruan, hezkuntza-zentroetan hobekuntza lanak egiteko 310.000 euro erabiliko ditu Udalak.
Eta, aurrekontu parte-hartzaileen prozesua ere inbertsioen baitan sartu du gobernu taldeak: hartara 400.000 euro zer egiteko erabakiko dute herritarrek. Irailean herritarrek euren proposamenak egiteko epea zabalik izan zuten eta laster bozkatzeko epea irekiko du Udalak.
Garapen jasangarrirantz
2026rako proposatutako kontuen ezaugarri azpimarragarrienetako bat da aurrekontuaren % 42 erabili nahi dutela 2030 Agendaren Garapen Jasangarrirako Helburuei (GJH) loturiko gastu sozialean, helburua izanik desberdinkeria murriztea eta herritar guztiei aukera ematea oinarrizko eskubideak baliatzeko: hezkuntza, osasuna, aukera-berdintasuna eta gizarte-babesa.
“Aurrekontuaren ia erdia GJHen gastu sozialean erabiltzeak agerian uzten du gure konpromisoa pertsonekin eta basauriarren bizi-kalitatea hobetzearekin. Inbertsioen helburua da inor ez uztea atzean, eta herritar denek eskubide eta aukera berberak izatea”, adierazi du Asier Iragorri Basauriko alkateak.
Helburu horietan giltzarri den Gizarte Zerbitzu eta Gizarte Sustapen Arloak “inoizko aurrekontu handiena” izango duela nabarmendu dute udal ordezkariek. Guztira, 10,8 milioi euro; aurten baino % 3,9 gehiago.
“Adinekoentzako aurrekontua % 4,9 handituko da, 5,1 milioi euroraino (2025ean, 4,8 milioi); eta Berdintasun aurrekontua % 4,5 haziko da (2025ean, 519.000 euro; 2026an, 540.000 euro). Hezkuntza Atalaren aurrekontua, berriz, % 151 igoko da (2025ean, 623.000 euro; 2026an, 1.564.000), haurreskola berrirako partida milioi batekoa izango delako”, azaldu du Berta Montes Ogasun arloko zinegotziak.
Zor publikoari dagokionez, 2026an 806.000 euroko zorra izatea aurreikusi du gobernu taldeak: “Doitasun eta gestio eraginkorreko politikak etengabe aplikatzeak maila ia sinbolikoan utziko du Udalaren zorra”, dio Montesek.
“2024. urtea amaitu genuen 1,6 milioi euroko zorrarekin, eta urte hau amaituko dugu 1,2 milioiko zorrarekin. 2026. urtean, 806.000 eurora murriztuko dugu; hau da, sarrera guztien % 1,2era. 2012an, Udalaren zorra 12 milioi eurokoa zen, eta horrek agerian uzten du egin dugun ahalegin handia, Basauriko bizilagunen euro bakoitza eraginkortasunez eta erantzukizunez administratzeko”, nabarmendu du Montesek.
Oposizioan dauden udaltaldeek azaroaren 19ra arte dute zuzenketak egiteko. Ondoren, asmoa da azaroko osoko bilkuran eztabaidatzea 2026ko aurrekontua.
☉ Basauri
Maialen Ibarra DA! PRO topaketan kontzertua emango du azaroan Durangon
Uxue Kerejeta abeslari gipuzkoarrak ere parte hartuko du topaketan: bere ‘Amaiera’ diskoan Beñat Armentia galdakoztarrak kolaboratu du teklatuan
DA! PRO topaketaren zazpigarren edizioa helduko da azaroaren 25ean eta 26an, Durangoko Azokaren atarian. Musika eta familia ikuskizunak antolatuko dituzte eta horien artean Maialen Ibarra sanmigeldarrak kontzertua emango du.
Maialenen kontzertua Durangoko Plateruena aretoan izango da azaroaren 26an, asteazkenez.
Era berean, Sueder, Sara Zozaya, Gartxot, Jonkass, Hondora, Ilargi, Euskal Barrok Ensemble, Maider eta Uxue Kerejeta arituko dira Plateruenan.
Aipatzearren, Uxue Kerejeta musikari zumarragarraren ‘Amaiera’ diskoan Beñat Armentia Arriandiaga galdakoztarrak kolaboratu du teklatuan.
Durangoko Azokako jarduna Azokako egunetatik haratago hedatzeko asmoz sortu zuen Gerediaga elkarteak DA! PRO topaketa.
☉ Basauri
Basauri Pintxo Festa antolatuko dute datozen bi asteburuetan: aurten 42 tabernak eman dute izena
Moluskuak, tomatea edota patata izango dira Basauri Pintxo Festako osagai protagonistak, azaroaren 14tik 16ra eta 21etik 23ra
Pintxoen hiriburu izango da Basauri azaroaren 14tik 16ra eta 21etik 23ra bitartean: Pintxo Festa antolatuko dute.
Aurten 42 tabernak hartuko dute parte, iaz baino bost gehiago. Horiek dira: Maybe, Valhalla, Edudoga, Luna, Bai Horixe, Coffee; El Cruce, Rymari, Toison de Oro, Nastase, Uribarri, Zutarri; Neure, Boxes, Dafne, Izarra Berria, Itxina Berria, La Zona, Berezi, Geltoki; Bonboi, Herriko Etxea, Arume, Haizebarri, Apolo XII, Erretoki Arin, New Magic; Nervion, Katilu, Irati, La Sede, Beitia Zaharra, 7 Calles, Galizia, Xuroi; Fission’s Berria, Ganeko, Thomas, Batzoki Central, Excelsior Berri, Nagusia eta Uribarri 22.
Horiek guztiek pintxo lehiaketan hartuko dute parte eta taberna bakoitzak bere miniaturazko jakia salgai jarriko du Pintxo Festa egingo den egun guztietan zehar. Pintxoek moluskuak, tomatea edota patata osagaiak izan behar dituzte.
Lehiaketan Urrezko Pintxoa, Zilarrezko Pintxoa, Brontzezko Pintxoa, Fusio-pintxoa, Soiltasuna eta Zaporea Pintxoa eta Pintxo Herrikoia sariak banatuko dituzte. Epaimahai profesional batek aukeratuko ditu irabazleak.
Urrezko Pintxoaren saria irabazten duenak 300 euroko txartela jasoko du, herriko hiru saltokitan, gehienez, gastatzeko. Zilarrezko Pintxoaren irabazleak 200 euroko txartela jasoko du, herriko bi saltokitan, gehienez, gastatzeko. Eta Brontzezko Pintxoari 100 euroko txartela emango diote, gehienez herriko bi dendatan gastatzeko.
Bestalde, bi lagunentzako bost menu zozkatuko dituzte pintxo gogokoena hautatzeko botoa eman, eta boto-paperean bost taberna desberdinen zigilua duten herritarren artean.
Pintxo Festa izango den bitartean kale animazioa egongo da Basauriko kaleetan: Etxebarria Aita-Seme Trikitilariak, Sama Siku fanfarrea, Danbayan batukada, Danbolin Txistulari Elkartea, Basauri Koral Elkartea eta Kilometrokantu.
Eta aurrekoetan bezala, Helmuga-Basauri-Pintxo Festa Gida publikatu eta banatuko du Udalak. Gida horrek pintxo lehiaketan parte hartuko duten 42 tabernaren izena, helbidea eta kokapen geografikoa jasoko ditu, eta kanpainan zehar kalea girotzeko egongo diren jardueren berri ere emango du.
Liburuxka parte hartuko duten tabernatan eta Basauriko erreferentziazko tokietan banatuko dute.
Usansoloko ikasleek Galdakaoko Elexalde Institutura joateko autobus-zerbitzua “laster” izango dutela dio Jaurlaritzak
Fernando Izagirrek ukatu egin du epaiketan DYAren dirua desbideratu izana
‘Emakumeak eta industria musikala’ solasaldia antolatu dute gaur Marienean, MAZ Basauri jaialdiaren baitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
