☉ Basauri
Yeray Gonzalez: «Ezagutzen dudan herririk solidarioena da Basauri; oso harro nago pregoilaria izateaz»
Sanfaustoei hasiera emateko ardura izango du larunbatean Yeray Gonzalezek. Bera da aurtengo pregoilaria, Herriko Taldeakeko kuadrillek bozkatuta. Berarekin hitz egin dugu jaien eta bere erronka solidarioaren azken maratoiaren atarian
Sanfaustoei hasiera emango dio bere pregoiarekin Yeray Gonzalez Gutierrez (Galdakao, 1988) basauriarrak. Urriaren 11n udaletxeko balkoitik biziko duen momentua berarentzat “ohore handia” dela esan dio GEURIAri, baina ez da jai hauetan biziko duen unerik gogoangarriena: ’12 hilabete 12 maratoi’ erronka solidarioari amaiera emango dio urriaren 12an, igandez. Erronkaren azken maratoia etxean egingo du, lagunez, familiaz, Herriko Taldeakeko kuadrillez eta CTNNB1 elkarteko familiez inguratuta. Urtebete ondoren, berriro berba egin dugu Yerayrekin.
Basauriko jaiak ate joka, zu izango zara pregoilaria, Yeray! Bai! Gogo handiak ditut! Oso harro nago eta ardura ilusio eta errespetu handiz hartu dut. Basauriko kuadrillek momentu zoragarri hau bizitzeko aukera eman didate eta niretzat ohore handia da. Ez dut inoiz ez ahaztuko!
Zer suposatzen du zuretzat sanfaustoetako pregoilari izateak? Batez ere ardura, CTNNB1 gaixotasunari buruz eman nahi dudan mezua argi helaraztea espero dut.
Mezua aipatzen duzula, prest izango duzu dagoeneko, ezta? Noski baietz! Gaixotasun arraroei buruz hitz egingo dut eta niretzat erronka honek suposatu duenari buruz. Oso garrantzitsua da elkartearentzat beraien seme-alaben gaixotasunari buruzko informazioa zabaltzea.
“Artunduagako pistari ehun buelta ematea lan gogorra izango da, baina ondoan izango ditut Herriko Taldeakeko kuadrillak eta CTNNB1 elkarteko familiak”
Duela urtebete hasi zenuen ‘12 hilabete, 12 maratoi’ erronka CTNNB1 sindromea ikusarazteko eta ikerketarako dirua biltzeko. Zein balorazio egiten duzu, azken maratoia faltan? Balorazioa oso positiboa izan da. Helburu batekin hasi nintzen, dirua eta ikusgarritasuna lortzea eta nik uste dut hori lortu dudala. 2024ko apirilean hasi nintzen erronka prestatzen eta bide gogorra bezain polita izan da. Familiak ezagutzea izan da erronka honen gauzarik politena. Eskerrak eman behar dizkiet hiri guztietan eman didaten babesagatik.
Eta azken maratoia Basauriko jaietan egingo duzu! Urriaren 12an, Artunduagako pistan! Hala da! Gogotsu nago. Entrenamenduetan saiatzen ari naiz gorputza prest izaten, baina batez ere burua. Ehun buelta ematea lan gogorra izango da. Gainera, azken maratoi honen prestaketak ni antolatzen ari naiz, beraz oraingoa erronka bikoitza da.
Nolakoa izango da urriaren 12ko maratoia? Goizeko 09:30ean hasiko da eta nahi duenak nirekin batera korrika egiteko aukera izango du 13:30ak arte gutxi gorabehera. Korrika egitea dohainik izango da eta elkartea lagundu nahi izanez gero, 3 euroan zozketa batean parte hartzeko txartelak salduko ditugu. Horrez gain, 10 euro edo gehiagoko dohaintzak opari berezia jasoko dute!
Herriko Taldeakeko kuadrillek eta CTNNB1 elkarteko familiek ere parte hartuko dute erronkan. Bai. Azken birak kuadrilla eta Eskarabilerarentzat gorde ditugu. Herriko Taldeakekin elkarrekin sortutako ideia izan zen. Mundu guztia parte hartzea nahi nuen eta komentatu genuen oso polita izango zela kuadrilla bakoitzeko partaideak nirekin buelta batzuk ematea. Erronkari amaiera emango dion bira CTNNB1 familientzat izango da.
Azken maratoian zurekin batera korrika egingo dutenei zer esango zenieke? Batez ere, goza dezatela. Erronka solidario honetan parte hartzea oso inportantea da ikusgarritasunaren aldetik. Hemendik jendea animatzen dut Artunduagatik pasatzera, giroa ikustera eta nahi izanez gero, korrika egitera. Edozein erritmo eraman dezakete. Pistako kaleak bitan banatuko dira, alde bat nire erritmora (5:15/5:30) korrika egingo dutenentzat eta beste aldea beste erritmo batera joango direnentzat.
Sanfaustoak jaiak dira, baina baita elkartasuna ere. Uste duzu kirolak, solidaritateak eta kuadrillek Basauriko esentzia direla? Zalantzarik gabe! Nik ezagutzen dudan herririk solidarioena da Basauri, eta jaietan ekitaldi solidario asko egiten dira.
Matatoiaz gain, zein plan dituzu jaietan? Familiarekin eta lagunekin disfrutatzea. Azkenean, Sanfaustoetan denok egoten gara kalean, eta hori da politena: elkar ikustea eta elkarrekin ospatzea.
Eta jaiak bukatuta, zer? Erronka berririk duzu buruan CTNNB1 laguntzen jarraitzeko? Orain atsedena behar dut gorputza errekuperatzeko. CTNNB1 sindromea ikusarazten jarraituko dut, hurrengo lasterketetan elkartearen kamiseta janzten jarraituko dut. Erronka urriaren 12an bukatzen den arren, erakundearekin eta batez ere Basauriko familiekin harremana izaten jarraituko dut.
☉ Basauri
Abaroa-San Migel tren geltokiko igogailua konponduta dagoela dio Renfek, “baina telefono-linearen zain”
Iaztik funtzionatu gabe daramala salatu dute askotan auzotarrek. Igogailua martxan jartzeko nahitaezko telefono-linea aktibatzea baino ez dela falta esan diete Renfetik Basauriko udal ordezkariei
Hilabeteak daramate San Migeleko auzotarrek Abaroa-San Migel tren geltokiko bi igogailuetako bat erabili ezinik.
Iazko abuztuan —2024ko martxoan, ekainean eta uztailean matxura izan ostean— funtzionatzeari utzi zion, eta ordutik herritarrek Renferi konpondu dezan eskatu diote hainbatetan.
Renfek aurtengo martxoan jakinarazi zien auzotarrei “egun gutxi barru” konponduko zuela matxura, baina oraindik zain daude.
Egoera hori aintzat hartuta, azken hilabeteetan Basauriko Udalak hainbat errekerimendu egin dizkio Renferi tren geltokiko igogailua konpondu dezala eskatzeko. “Azkena azaroaren 27an”, diote udal ordezkariek.
“Gaur bertan, tren-garraioko enpresa publikoak Basauriko Udalari jakinarazi dio igogailuaren konponketa teknikoa arrakastaz burutu dela, eta igogailua martxan jartzea zerbitzu egokia bermatzeko nahitaezko telefono-linea aktibatzearen mende dagoela soilik”, diote udal arduradunek.
Renfek Udalari emandako erantzunean adierazi duenez, “lehentasunez” ari dira lanean dagokion hornitzailearekin kudeaketa hori arintzeko, “eta ahalik eta epe laburrenean” konpontzea espero dutela adierazi diote Udalari.
“Gobernu taldeak prozesuaren zain jarraituko du, igogailua lehenbailehen martxan egon dadin”, diote.
☉ Basauri
Olentzero eta Mari Domingi abenduaren 14an helduko dira Basozelaira, Basaurin
Txu-txu trenean helduko dira Olentzero eta Mari Domingi Zortziko plazara. Gainera, asteburuan zehar hamaika jarduera antolatu ditu Basozelaiko Auzokideen Elkarteak
Olentzero eta Mari Domingi hasi dira txikien eta helduen gutunak jasotzen.
Eta abenduaren 24ra bitartean euren bisitak izango ditugu Hego Uribe eskualdean.
Basaurin, Basozelain izango dira Olentzero eta Mari Domingi abenduaren 14an, igandez.
Txu-txu trenean helduko dira Zortziko plazara eta umeekin eta helduekin elkartzeko tartea izango dute.
El Maño Basozelaiko Auzokideen Elkartearen eskutik iritsiko dira Olentzero eta Mari Domingi auzora, baina ez da asteburuan antolatuko duten jarduera bakarra.
Belaunaldien arteko joko didaktikoak, SantoBasozelai, Euskal Jaia, Gabonetako arratsalde-pasa, Gabonetako bingoak, tailerrak eta kontzertuak antolatu dituzte abenduaren 13an eta 14an Zortziko plazan.
Egitaraua | Olentzero eta Mari Domingi Basozelain
Abenduak 13, larunbata
11:00 Belaunaldien arteko joko didaktikoak
12:00 SantoBasozelai: taloak eta sagardo eta txakoli dasteketa
13:00 Euskal Jaia ikuskizun musikala
17:00 Gabonetako arratsalde-pasa
19:00 SantoBasozelai: taloak eta sagardo eta txakoli dasteketa
20:00 Gabonetako I. Bingoa. Saria: urdaiazpikoa, gazta, ardo lotea eta Gabonetako dezimoa
21:00 Kontzertua: Txapela Brava
22:30 Gabonetako II. Bingoa. Saria: urdaiazpikoa, gazta, ardo lotea eta Gabonetako dezimoa
Abenduak 14, igandea
11:00 Gabonetako tailerrak: desioen zuhaitza, postalak eta apaingarriak
11:30 Olentzero eta Mari Domingi
11:30 Txu-txu trena Basozelaitik
12:00 SantoBasozelai: taloak eta sagardo eta txakoli dasteketa
12:00 Trikipoteoa Etxebarria Aita-Seme Trikitilariekin
14:30 Gabonetako III. Bingoa. Sari berezia: Gabonetako kutxa eta Gabonetako dezimoa
☉ Basauri
Hidrogeno berdea probatu dute Basauriko Sidenor fabrikan altzairua ekoizteko
Sidenorreko arduradunek adierazi dutenez, proba horiei esker egiaztatu ahal izan dute erregai gisa gas naturala erabili ordez, hidrogenoa erabili daitekeela
Hidrogeno berdea probatu dute Basauriko Sidenor fabrikan. Zehazki, altzairuaren ekoizpeneko berotze-zalian erabili dute lehen aldiz hidrogeno berriztagarria.
Altzairutegiko erregailu konbentzionala hidrogenoa erabiltzen duen oxi-errekuntzako erregailu batekin ordezkatu dute. Horri esker, zaliaren berotze-ziklo osoa osatu ahal izan dute, beharrezko funtzionamendu-tenperaturak lortuz.
Sidenorreko arduradunek adierazi dutenez, proba horiei esker egiaztatu ahal izan dute erregai gisa gas naturala erabili ordez, hidrogenoa erabili daitekeela.
Hidrogeno berdearekin egindako proba horiek mugarri garrantzitsua izan direla adierazi dute enpresatik, tenperatura altua behar duten eta elektrifikatzen zailak diren prozesu termikoetan erabili baitu Basauriko lantegiak.
“Sidenor ingurumenarekin eta jasangarritasunarekin konprometitutako enpresa da, eta, horregatik, etengabe ikertzen eta inbertitzen ari da bere produkzio-prozesuen deskarbonizazio-prozesuan aurrera egiteko formulak bilatzeko”, esan dute enpresako arduradunek.
☉ Basauri
Olentzeroren eta Mari Domingiren Etxea zabalik dago dagoeneko Basaurin
Abenduaren 23ra arte txikien eta helduen gutunak jasoko dituzte Olentzerok eta Mari Domingik euren Basauriko etxean
Abendua da eta dagoeneko gabon gutunak idazteari ekin diogu herritarrok.
GEURIAn gutun berria publikatu dugu [hemen duzu!], oraindik ere idatzi ez dutenek erabili dezaken eta Olentzerori eta Mari Domingiri helarazi diezaioten.
Eta, eurei bidaltzeko hainbat bide dauden arren, Basaurin Olentzeroren eta Mari Domingiren Etxea zabaldu dute aurten ere.
Antonio Fernandez kaleko 17. zenbakian dago Etxea abenduaren 23ra arte, astelehenetik ostiralera 16:30etik 20:30era eta larunbatetan eta igandetan 12:00etatik 15:00etara.
“Bertara bazoaz, selfi bat egiten baduzu eta zure Instagrameko edo Facebookeko horman argitaratzen baduzu, abenduaren 2tik 23ra, @basauricomercio elkartea etiketatuz, Basauriko Social Antzokiara joateko bi zinema sarrera emango ditugu opari, sarrerak agortu arte”, diote Basauri Merkatari Elkartetik.
Hain zuzen ere, Basauri Merkatari Elkarteak jartzen du urtero Olentzeroren eta Mari Domingiren Etxea: “Urtero bezala gune magiko bat sortu dugu txikienek Olentzerori eta Mari Domingiri gutunak pertsonalki eman ahal izateko”.
☉ Basauri
Leganesen lehen taldearen ardura hartuko du Igor Oca basauriarrak, behin-behinean
Bigarren Mailako taldearen gidaritza hartu du Ocak, orain arte filialean aritu ondoren. Bihar egingo du debuta, Cordobaren aurka
Igor Oca Pulido basauriarrak C.D. Leganeseko lehen taldea zuzentzeko ardura hartu du, behin-behinean, klubak Paco Lopez kaleratu ostean.
Orain arte bigarren taldeko entrenatzailea zen Oca, baina igande honetan lehen taldeak Cordobaren aurka jokatuko duen partida berak zuzenduko du, eta ez da baztertzen, emaitzak eta jokoa alde izanez gero, denboraldia berak osatzea.
Oca 2025/2026 denboraldirako iritsi zen Leganesen egiturara, Sestao River Clubetik etorrita.
Historia eta Arkeologia baloirengatik aldatu zituen Basauriarra
44 urteko Ocak ibilbide luzea du aulkian. Euskal Herrian, Sestao River Cluben eta Deportivo Alavés-en aritu da, besteak beste. Profil ezohikoa da berea futbolaren munduan, Historian lizentziatua eta Arkeologian espezializatua baita.
Bere ibilbidearen zati handiena Hego Amerikan garatu du: Ekuadorren (Universidad Catolica, Independiente Juniors eta Independiente del Valle), Txilen (Huachipato) eta Mexikon (Atletico San Luis) lan egin du.
Ibilbide horren berri eman zion Ocak GEURIAri Arkeologia baloirengatik aldatu zuen basauriarra izeneko erreportajean, eta bertan Espainiako Ligako bigarren mailan lan egiteko aukeraz hitz egiten zuen:“Azken aldian Bigarren Mailan nirearekin alderatu daitezkeen profilak daude, Andorraren entrenatzaile berria edo Albaceterena, bi adibide aipatzearren”.
Behin-behineko ardura bada ere, Leganesen lehen taldearen gidaritza hartzea urrats garrantzitsua da Oca-rentzat, bere gaitasuna LaLiga Hypermotionen erakusteko aukera baita.
Erreportajea | Kontxako bandera irabazi zuen arraunlari ‘atzerritarra’
Abaroa-San Migel tren geltokiko igogailua konponduta dagoela dio Renfek, “baina telefono-linearen zain”
Olentzero eta Mari Domingi abenduaren 14an helduko dira Basozelaira, Basaurin
Argazkiak | Galdakaoko Mintzodromoak 120 lagun batu ditu gaur Kurtzeko frontoian
Argazkiak | Gatibuko Alex Sardui eta Mirua taldeko Maitane Iruiñ Basauriko Musika Eskolaren ekitaldian izan dira
