☉ Basauri
Basauriko EAJ, PSE eta PP alderdiek bermatu egiten dute Sustraiak Fundazioaren lana
Kudeaketaren Jarraipena egiteko Batzordean hiru alderdi politikoek bat egin dute “jardueren gaineko kontrol ekonomikoa, ikuskaritza eta jarraipena” burutu egin dela, “maila politikoan zein teknikoan”.
Gobernu-organoen Kudeaketaren Jarraipena egiteko Batzordean, Sustraiak Fundazioarii buruz aurreikusitako agerraldiak eta ondorioetarako saioak egin eta gero, Batzordeak hainbat ondorio atera ditu EAJren, PSEren eta PPren aldeko botoekin. Onetsitako ebazpenari dagokionez, “aurreikusitako jardueren gaineko kontrol ekonomikoa, ikuskaritza eta jarraipena, maila politikoan zein teknikoan, une oro egin da. Dagozkion fakturak ordaintzean egindako udal-ekarpenen gaineko kontrola, berriz, Udal barruan egin da lehenik eta behin, dagokion ataleko teknikariek egindako jarraipenaren bitartez“, azaldu dute hiru alderdi politikoek, EH Bilduren zalantzen erantzun gisa.
Era berean, EAJren, PSEren eta PPren ordezkari politikoek honakoa adierazi dute: “Kanpoko ikuskaritza-enpresak kontuak gainbegiratu, eta ondorioztatu du dirua modu egokian erabili dela, aurreikusitako xederako, eta ez dela erabilera okerrik egin“.
SUSTRAIAKEN KUDEAKETAREN JARRAIPENA – PUNTUZ PUNTU
Sustraiak Fundazioaren Kudeaketaren Jarraipena egiteko Batzordean honakoa ebatzi dute, EAJ, PSE eta PP alderdien aldeko botoekin:
– Fundazioa sortu, zein egindako hitzarmenak sinatzeko erabakiak, gehiengo politiko handiz hartu ziren: Fundazioa sortzeko Udalbatzaren erabakian (2008.12.22koa), aldeko 18 boto egon ziren (PSE-EEren 9; EAJ-PNVren 7; eta PPren 2), kontrako botorik ez zen egon, eta abstentzio bakarra (EB-Berdeak) egon zen. Emaitza, berbera izan zen 2009.04.30ean, Udalbatzak lehen hitzarmena onetsi zuenean. Horren osteko hitzarmenak ere, indar politiko guztien adostasunarekin onetsi dira (agiri-sorta; Fundazioko lehendakaritza; eta Fundazioko kideak).
– Zenbait txosten teknikok, babestu egin dituzte modu zilegi eta demokratikoan hartutako erabaki horiek, bai Basauriko Udalak Sustraiak-ekin izan behar zuen harreman-motari buruzkoak, baita sinatutako hitzarmen bakoitzera bideratu beharreko zenbatekoei buruzkoak ere. Txosten horietatik ondorioztatzen da harreman hura, onuragarria eta errentagarria zela udalerriarentzat, eta legearekin bat zetorrela, ekonomikoki zein juridikoki (agirien artean daude eragozpenik gabeko txostenak, eta elkarlanaren formularen aldeko testigantzak, hainbat politikari eta teknikarirenak).
– Sustraiak Fundazioak euskal kulturaren alde egindako lana oso positiboa izan da. Elkartea oso errotua dago Basauriko herri-kulturan, eta herriko ondarearen parte izatera igaro da. Egindako jarduerek, gainera, herritarren parte-hartze handia izan dute (Fundazioko kideen, eta teknikarien testigantzak).
– Une oro egin da hitzarmenetan aurreikusitako jardueren gaineko kontrol ekonomikoa, ikuskaritza eta jarraipena, maila politikoan zein teknikoan. Dagozkion fakturak ordaintzean egindako udal-ekarpenen gaineko kontrola, berriz, Udal barruan egin da lehenik eta behin, dagokion ataleko teknikariek egindako jarraipenaren bitartez.
– Kanpotik, berriz, ikuskaritza-enpresa batek egin du Fundazioaren kontuen gainbegiratzea, eta egiaztatu du Udalaren ekarpenak egokiro erabili zirela. Hitzarmenek hasiera-hasieratik aurreikusten zituzten horrelako ikuskaritzak, hain zuzen ere, hitzarmenon kudeaketaren gardentasuna bermatzeko. Aurreko gobernu taldeak eta oraingoak, biek izan dute horrela jarduteko asmoa.
– Kanpoko ikuskaritza-enpresak kontuak gainbegiratu, eta ondorioztatu du dirua modu egokian erabili dela, aurreikusitako xederako, eta ez dela erabilera okerrik egin. Era berean, enpresak ebatzi du Fundazioaren gastuak behar bezala zurituta daudela, dagozkion agiri bidez (fakturak; dietak jaso izanaren egiaztagiriak; boluntariotza kontratuak; eta abar); hor sartuta daude gainbegiratze, kudeaketa eta administrazio lanei dagozkien gastuak ere (laguntza teknikoa; kudeaketa administratiboa; boluntarioen mantenu eta bidaien dietak; eta abar). Beraz, argi geratu da Fundazioak onetsitako gastu horiek guztiak legezkoak direla (kanpoko ikuskaritza-enpresa). Sinatzaileek uste dute horrek ez lukeela Fundazioaren kudeaketa zintzoa ilundu behar.
– Horrez gain, kontuak Fundazioen Erregistroan gordailatu dira, Eusko Jaurlaritzaren organo eskudunaren (Babeslaritza) aurrean, eta hala egiaztatu da.
– Hitzarmenean aurreikusitako jardueren jarraipena etengabea izan da, bai maila politikoan, bai teknikoan. Batzar ugari egin dira, hitzarmenean aurreikusitako jarraipen batzordean bertan, zein modu informalean, dagozkion arduradunen artean: politikari edo/eta teknikarien artean, batetik; eta Sustraiak Fundazioko kideen artean, bestetik (agiri-sorta; aktak; aurreko eta oraingo agintari politikoen, arduradun teknikoen eta Fundazioko kideen testigantzak; eta abar).
– Oinarririk gabeko zenbait jarrerak eta adierazpenek, okertu egin dute memoria ekonomikoa eta jardueren memoria gainbegiratzeko prozesu normalizatua, baita Euskara Batzordeari horien berri emateko izapidea ere, eta, horren eraginez, geldotu egin da guztia. Jarrera eta adierazpen horiek, gainera, zalantzak eragin dituzte SUSTRAIAKen eta bere kudeatzaileen lanaren inguruan; pertsona horietako batzuek, ordea, hamarkadak daramatzate euskararen eta euskal kulturaren alde lanean, eta, gertatutakoa, Basaurin duten ospe onaren kaltetan izango da (Fundazioko lehendakariaren testigantza), nekez konpon daitekeen kaltea izan ere. Uste dugu Batzordearen lana aski dela, bere zereginen inguruko edozein zalantza argitzeko; era berean, ikusten dugu aldarrikatu eta azpimarratu beharra dagoela Sustraiak Fundazioaren lanak, haren ibilbideak, eta bere kideenak, duen balioa.
☉ Basauri
Basauriko EH Bilduk osoko zuzenketa aurkeztu dio udal gobernu taldearen aurrekontu proposamenari
Basauriko udal gobernu taldeak 2025eko aurrekontu proposamena aurkeztu zuen azaroaren 21ean: guztira 65,8 milioi euro kudeatuko ditu Basauriko Udalak, aurten baino 3 milioi gehiago (% 5,3 gehiago).
Oposizioak gaur arte du epea proposamenari zuzenketak aurkezteko, eta Basauriko EH Bildutik jakinarazi dutenez, osoko zuzenketa bat aurkeztuko dute.
“Kontu horiek ia 66 milioira iristen dira, eta kopuru horren % 3,7 baino ez da inbertsioetarako. Kopuru hori urte askotan geldirik egon da, eta, adibidez, aurreko urtearekin alderatuta, % 13 jaitsi da, eta hori larria iruditzen zaigu hainbat arrazoirengatik. Gure ustez, jaitsiera hori gastu arrunten gorakadaren ondorioa da, diru-sarrera propioak erruz agortzen baitituzte”, diote koalizio ezkertiarretik.
Inbertsio-proposamenek “aldaketa sakonik ez” dakartela salatu dute: “Esate baterako, gure enpresa aukeraguneen garapena edo pertsona ahulenen gizarte-babesean sakontzea. Adibide gisa, Arizko zubi bat edo eserlekuak dituzten estalitako eremuak sortzea proposatzen da, ekitaldian zehar partidak egiteko egokiagoak direnak”.
“Inkoherentziak” daudela ere adierazi du EH Bilduk: “Adibide gisa, gehiago bideratzen da prentsa eta aldizkarietara etxerik gabeko pertsonei edo Janabideri laguntzera eta pertsona ahulei elikagaiak banatzera baino”.
“Maniobra tarte txikia”
“Agerikoa da oposizioa osatzen duten alderdiei maniobra tarte txikia uzten zaiela, aurrekontua oso doitua dagoelako. Baina horren bueltan, eta diru erabilgarria azaleratzen den neurrian, orduantxe heltzen zaie Udalaren beharrei. Hori bai, gainerako alderdi politikoak kontuan hartu gabe, aldez aurretik horiei beren proposamenei uko egin dietelako”, diote.
Oposizioaren proposamenik sartu nahi ez izatea salatu dute EH Bildutik: “Gobernu-taldeak benetan proposamenak sartu nahi izan balitu, formulak egon badaude. Hala nola, zirriborroa itxi baino lehen, gainerako udal taldeekin hitz egin; partida bat alderdientzat eurentzat gorde, aurrekontu partehartzaileetarako 400.000 euro gordetzen dituen bezala, edo akordio politiko bat lortu, urtean zehar gure ideiak txertatzeko aukera emango diguna, beraiek beraien proposamenekin egiten duten bezala. Baina uko egiten die, gehiengo absolutuak ematen dion lasaitasunagatik, beharbada”.
“Horregatik, oraingoan, eta hainbat urtez gure proposamenak sartzen saiatu ondoren, ez dugu parte hartuko “iragarritako heriotza” honetan, eta osoko zuzenketa hau aurkeztuko dugu kontuak itzultzeko eskatuz”, diote.
Hala eta guztiz ere, adostasunetara heltzeko “prest” daudela adierazi dute koalizio ezkertiarretik: “Osoko zuzenketa hau erretiratu dezakegu eta aurrekontuari aurka ez egitea eskaini dezakegu, akordio baten truke, non, modu eraikitzailean, gure ideiak eman ahal izango ditugun diruzaintzako geldikinen erabilgarritasunean oinarrituta. Beraz, badaude formulak, espero dezagun borondatea ere egotea”.
Auto batek istripua izan du Basauriko sarreran, Arizko zubiaren ondoan. Taberna baten ondoan dagoen barandaren kontra jo du eta bertan dagoen banku bat hondatu du.
Hala ere, Udaltzaingoak GEURIAri baieztatu dionez ez da zauriturik egon. Autoaren gidaria anbulatoriora eraman dute.
Auto pilaketak izan dira Basaurira sartzeko, baina dagoeneko trafikoa arina da. Udaltzainak trafikoa zuzentzen egon dira.
Basauriko Kultur Etxeak 4 eta 6 urte bitarteko umeei zuzendutako Gabonetako Ludoteka zerbitzua eskainiko du abenduaren 23an, 26an, 27an eta 30ean eta urtarrilaren 2an eta 3an.
Zehazki, zerbitzua San Migel, Ibaigane eta Pozokoetxeko Kultur Etxean eta Basozelai eta Kareaga Gizarte Etxeetan garatuko da goizetan, 10:00etatik 13:00etara bitartean.
Eskaintza 2018 eta 2020 bitartean jaiotako haurrei dago zuzenduta, eta izena emateko epea zabalik dago abenduaren 13ra bitartean.
Guztira 60 plaza eskainiko dituzte, eta zozketa bidez esleituko dituzte. “2024-2025 ikasturtean Basauriko ludoteka zerbitzua erabiltzen duten familiek izango dute lehentasuna”, zehaztu dute Kultur Etxeko ordezkariek. Onartutakoen zerrenda abenduaren 18an argitaratuko du Kultur Etxeak.
Gabonetako Ludoteka zerbitzuko prezioa 25 eurokoa da. “Beherapenak ere egongo dira DSBE edo GGI jasotzen duten familientzat: % 75eko deskontua aplikatuko zaie, alegia”, diote. Era berean, hiru seme-alaba dituzten familia ugariei % 25eko deskontua ezarriko diete, eta lau seme-alaba edo gehiago dituzten familiei % 40koa.
☉ Basauri
Jon Arretxe basauriarrak Touré detektibearen hamaikagarren liburua aurkeztu du: ‘Zenbaki gorriak’
Durangoko Azokan aurkeztuko du bere azken nobela Arretxek. Gainera, liburuak sinatzen ere ibiliko da idazle basauriarra
Jon Arretxe idazle basauriarrak argitaratu du Touré detektibearen hamaikagarren nobela: ‘Zenbaki gorriak’ (Erein, 2024).
Azaroaren 28an aurkeztu zuen liburu berria Arretxek Donostiako udal liburutegian eta Durangoko Azokan ere aurkezpena egingo du: abenduaren 6an, ostiralez, izango da 19:30etik 20:00etara Ahotsenean.
Liburu berria aurkezteaz gain, liburuak sinatzen ere ibiliko da Arretxe Durangoko Azokan, Erein argitaletxearen standean: abenduaren 5ean, 6an, 7an eta 8an, 11:00etatik 14:00etara eta 16:30etik 20:00etara.
Touré detektibearen sagan hauek dira idazle basauriarrak publikatu dituen nobelak: ‘19 kamera’ (Erein, 2012), ‘612 euro’ (Erein, 2013), ‘Hutsaren itzalak’ (Erein, 2014), ‘Estolda jolasak’ (Erein, 2015) ‘Sator lokatzak’ (Erein, 2016), ‘Ez erran deus’ (Erein, 2018), ‘Mesfidatu hitzez’ (Erein, 2019), ‘Dortokaren begirada’ (Erein, 2021), ‘Lyrica Garaia’ (Erein, 2022), ‘Musker amarruak’ (Erein, 2023) eta azkena ‘Zenbaki gorriak’ (Erein, 2024).
11 liburu, 12 urte
Hau da ‘Zenbaki gorriak’ liburuaren sinopsia:
Hamabi urte igaro dira Mahamoud Touré Bilboko Afrika Txikira heldu zenetik, familia Burkina Fason utzita eta amets berrien alde borrokatzeko prest. Horretarako Saharako basamortua zeharkatu behar izan zuen, eta Gibraltarko itsasartea igaro. Baina denboraren poderioz, emaztea eta seme-alabak, etorkizun oparoko promesa hutsalez nazkaturik, ahaztu egin ziren Touréz, eta burkinarra zurrunbilo iraunkor batean sartu zen non ilunak askoz gehiago diren argiak baino.
Aurreko nobelan Las Palmasen egon ondoren, oraingo honetan patuak Bartzelonara darama Touré. Hor, denbora soberan izango du ihesaldi etengabea bilakatu zaion bizitzaz hausnartzeko, bizi izandako esperientzia gogorrak eta egindako okerrak mamurtzeko, eta inoiz baino astunago sentituko du bakardadearen pisua. Bere lagun leial Osman, Xihab eta Kristina (Sa Kené) jada ez dauzka ondoan, eta inoiz imajinatuko ez zituen gauzak egin beharko ditu bizirik irauteko, degradazio-maila beherenera iristeraino.
Jon Arretxek argazki gordina eskaintzen digu Zenbaki gorriaken Bartzelonako turismo-leku ederren azpian gordetzen den errealitatearena, eta agerian uzten digu paperik gabeko etorkinek, etxebakoek, txiroenek… non bilatzen duten babesa. Eleberri bizigarri bezain gogorra da Touréren hamaikagarrena, estilo zintzokoa, sagako besteetan bezala Europa diruduneko baztertuen azpi mundua erakusten duena.
Solobarriako plazako karpak 100 lagun baino gehiago elkartu ditu gaur goizean, Euskararen Eguna dela eta antolatutako Mintzodromoan. Bertan izan dira Euskaltegiko ikasle eta irakasleak, Berbalagunak, Basauri ikastetxeko ikasle eta irakasleak eta udal ordezkariak, hiru mintzagaien inguruan berba egiten: gaur egungo bizitzaren erritmo azkarraz, urak har ditzakeen eremuetan eraikitzeaz eta fake news fenomenoaren inguruan.
Euskararen egunak giro ederra ekarri du Solobarriako Mintzodromora eta bertako partaideak gogoz aritu dira istorioak euskara hutsean elkarbanatuz.
Hego Uribeko eta Kurdistango musikariek emanaldia eskainiko dute Durangoko Azokan
‘Txapel’ek ‘Izarrak eta Haitzak’ liburua aurkeztuko du Pou anaiekin, Durangon
Arrigorriagako Gazteguneak Gabonetako irteera antolatu du Donostiako izotz pista eta ihes gelara
Argazkiak / Euskara ahoan, 120 lagunek hartu dute parte Galdakaoko Mintzodromoan
Argazkiak / Tortilla, indabak eta giro bikaina Usansoloko jaietako herri bazkarian
Argazkiak / ‘Konponbidea ez bazara, arazoa zara’ lemapean manifestazioa egin dute A25ean Galdakaon
Bideoa / Zein da euskarak duen hitzik politena? Galdakaon erantzun dute!
Bideoa / Olentzeroren eta Mari Domingiren etxea zabalik dago jada Basaurin!
