Sareak

☉ Basauri

Basauriko Udalak lanean dihardu Edesaren ekoizpena herrian mantentzeko

|

basauri edesa lantegia 2014

Alderdi politiko guztietako ordezkariek Cata enpresako zuzendaritza kideekin bilera izan zuten atzo. Edesako ekoizpena martxan jarriko da berriro, baina iraungitze data izango du Basaurin.

Edesak ateak berriro irekiko zituela adierazi zuen atzo CNA Fagor Etxetresnen jabe berriak. Hala ere, 2015. urtea amaitzerako Basauriko jarduera Euskal Herriko beste lantegiren batera eramango duela iragarri zuen. Egoera berri honen ondorioz, Basauriko Udaleko alderdi politiko guztietako ordezkariak (EAJ, PSE, BILDU eta PP), Cata enpresako zuzendaritza kideekin bildu ziren atzo. “Gure haserrea agertu nahi dugu, etorkizunean Basaurin ekoizteko aukerari ateak itxi zaizkiolako“, diote ordezkari guztiek. Udal ordezkariek ez dute CNAren erabakia ulertzen, “Basauriko lantokiak badituelako langile konprometituak, eta makineria; gurea, industriagintzan sustraitutako herria delako, ezin hobeto komunikatuta dagoelako; eta herriko, eskualdeko eta Bizkaiko erakunde eta alderdiok erabat inplikatuta gaudelako“.

Atzoko bileran Edesaren bideragarritasun plana mahai gainean jarri zuen Basauriko Udalak: “Langile ohiek egindako plana da eta gainera, Bizkaiko Foru Aldundiak babestu eta positiboki baloratu du. Catari eskatzen diogu plan hori aintzat hartzeko eta berriro heltzeko“. “Lanean jarraituko dugu, gure esku dagoena egingo dugu, etorkizunean ere ekoizpena gure herrian mantendu dadin“, diote ordezkariek. Era berean, Basauriko Udalak gogorarazi du konkurtsoko epailearen aurrean hartu zuela Catak Edesa berriro irekitzeko konpromisoa: “Catari dagokio konkurtsoan bere gain hartutako obligazioak betetzea, ez beste inori, eta gu horren zelatan egongo gara“.

IREKIERA ETA LEKUALDATZEA 

2015eko lehen hiruhilekoan termoen ekoizpena abiatuko du talde katalanak Basaurin, baina urtea amaitu aurretik, jarduera hori Gipuzkoara lekualdatuko duela adierazi du. “Pozgarria da jakitea, aldi baterako bada ere, ekoizpena berriro hasi eta lanpostuak sortuko direla. Halaber, positiboa iruditzen zaigu enpresak agertutako borondatea, hain zuzen ere, Edesako langileak Fagorren gainontzeko langileen maila berean jartzeari buruzkoa, lanpostu berriak emateari dagokionez“, diote Basauriko Udaleko alderdi guztietako ordezkariek.

☉ Basauri

Bideoa / San Juan gaua San Migelen, Basaurin

|

San Juan bezperan sua piztu dute San Migelen, Basaurin. Mikelats Kultur Elkarteak irudiak bidali dizkigu.

Osorik irakurri

☉ Basauri

Argazkiak / San Juan bezperako sua piztu dute Basauriko Pozokoetxen, euripean izan bada ere

|

Ekainak 23 ditu gaur, San Juan bezpera. Ohiturak jarraituta, sua piztu dute Basauriko hainbat tokitan, Pozokoetxen esaterako. Euritakoen azpian ikusi dute auzotarrek Basauritar Dantza Taldearen emanaldia eta San Juan bezperako sua.

Osorik irakurri

☉ Basauri

Espetxeratu dute droga-trafikoa leporatuta Basaurin atxilotu zuten ertzaina

Basaurin atxilotutako ertzainaz gain, beste bederatzi pertsona espetxeratu dituzte. Droga-trafikoa eta erakunde kriminaleko kide izatea egotzi diete

|

Behin-behineko espetxealdia ezarri diete hamar atxilotuei // Irekia

Guardia Zibilak eta Ertzaintzak hamar pertsona atxilotu zituzten duela hiru egun Bizkaian eta Kantabrian, droga-trafikoaren aurkako ‘Tahocei-Lizar’ operazioaren barruan.

Atxilotutakoen artean Basaurin atxilotu zuten 31 urteko ertzain bat. Polizia-eginbideak amaitu ondoren, atzo, larunbata, atxilotuak epailearen esku utzi zituzten, eta guztiak espetxeratzeko agindua eman zuen.

Droga-trafikoa, sare elektrikoan iruzurra egitea, sekretuak ezagutaraztea eta erakunde kriminal bateko parte parte izatea egotzi dizkiete.

Behin-behineko espetxealdia ezarri diete, epaiketa egin bitartean. Zigor-zuzenbidean, orohar, errugabetasun-presuntzioa nagusitzen da beti epaiketa egin bitartean, eta epaileak salbuespenezko neurri moduan soilik agintzen du behin-behineko espetxealdia; ihes egiteko arriskua dagoenean, edo frogak suntsitu daitezkeenean.

Operatiboan parte hartu zuten agenteek 78.840 euro konfiskatu zituzten eskudirutan. Substantzia estupefazienteei dagokienez, 19.592 gramo haxix, 22.973 gramo marihuana-kukulu, 10 kilogramo marihuana-ziztada, 1.300 gramo kokaina, 40 gramo MDMA eta 900 gramo ebaketa-substantzia atzeman zituzten.

Era berean, lau marihuana indoor landaketa desegin zituzten, hazkuntza fase desberdinetan zeuden 5.273 landarerekin. Landare horiek sareari legez kanpo lotutako elektrizitatea erabiltzen zuten. Gainera, atxilotuek erabilitako 14 telefono mugikor eta 6 ibilgailu okupatu zituzten.

Ikerketa Sestaoko ertzain-etxeko agenteek hasi zuten, zenbait pertsona beren mugapeko zenbait tokitan marihuana lantzen eta trafikatzen ari zirela ikusi zutenean.

Terrorismoaren eta Krimen Antolatuaren aurkako Inteligentzia Zentroaren (CITCO) bidez ezarritako koordinazio-esparruaren barruan, egiaztatu zen Guardia Zibilak susmagarrietako bati buruzko ikerketa bat irekita zuela, eta erabaki zuten elkarrekin operazio bat martxan jartzea.

Bi polizia-kidegoek droga-trafikoan aritzen zen erakunde kriminala zegoela egiaztatu ondoren, joan den ostegunean, ekainak 20, operatiboaren ustiapen-fasea garatu zuten.

Miaketak Basaurin, Abanto-Zierbenan, Alonsotegin, Barakaldon, Bilbon, Erandion, Leioan, Portugaleten, Sestaon eta Castro Urdialesen egin zituzten.

Osorik irakurri

☉ Basauri

Denac industrialdea hobetzeko hitzarmena sinatu dute Basauriko Udalak eta Aldundiak

|

Hitzarmenak enplegua sortzen eta mantentzen lagunduko du // Google

Cervantes etorbidean dagoen Denac industrialgunea hobetu eta enpresen lehiakortasuna handituko dute. Horretarako hitzarmena sinatu dute enpresa zentroak eta Basauriko Udalak, eta akordioari esker, Bizkaiko Foru Aldundiak hobekuntza-prozesua finantzatuko du. Hitzarmenak enplegua sortzen eta mantentzen lagunduko du.

Alde batetik, Basauriko Udalak beharrezkoak diren izapideak erraztu eta arinduko ditu eta Denacekin lankidetzan arituko da udal eskumenei eragiten dieten jarduerak diseinatzen, hala nola, urbanizazioa, estolderia edota argiteria publikoa.

Bestetik, Denac enpresa zentroak bi plan idatziko ditu: bata kudeaketakoa eta bestea jardutekoa. Gainera, bi planetan jasotzen diren jarduketak kontratatu eta finantzatu egingo ditu, Aldundiaren diru-laguntzarekin.

Osorik irakurri

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri