Sareak

☉ Basauri

Basaurin ere badira pilotariak

|

Julen Maillo eta Oier Elorz bikote basauriarrak irabazi zuen Arratia-Nerbioi eskualdeko umeen pilota txapelketa joan den urtarrilaren 9an

80ko hamarkadan sortu zen Bidebieta Klub Pelotazalea Basaurin. Esku-pilotan eta palan erakusten dute klubean, batik bat umeei zuzendutako eskoletan. Egun 45 neska-mutil daude pilota eskolan. Artunduagako eta San Migelgo frontoiak dira eskolaren egoitzak: “Bakoitzean entenatzaile nagusi bat dugu eta hiru laguntzaile: Artunduagan bi eta San Migelen bakarra”, dio Mikel Karrillo Artunduagako entrenatzaileak.

Basauriko umeak ez ezik, Arrigorriagako eta Aperribaiko gaztetxoak ere hartzen ditu Bidebieta Pilota Eskolak, “nahiz eta gehiengoa basauriarrak eta San Migelgoak izan”. Entrenatzaileak adierazi duenez, genero berdintasuna gero eta nabariagoa da pilotan, batez ere, umeen artean. “Egun bi neska ditugu gazteen taldean: bata txikitxua, eta bestea 13-14 urtekoa. Azken honek kimuen mailan jokatzen du, nahiz eta adinagatik infantiletan jokatu beharko lukeen. Haurren kategorian pilota askoz gogorragoa da”. Kategoriaren kontua ez da oztopo, “azken finean guri interesatzen zaiguna umeek jokatzea da. Berdin du adinak eta kategoriak bat datozen edo ez. Garrantzitsuena pilotaz disfrutatzea da”, dio Karrillok.

Emakumeena ere martxan

Aurten ama batek izena eman du Bidebieta Pilota Eskolan: “Larrabetzun badago pilota-eskola bat neskena bakarrik dena eta horregatik, sortu nahi izan dugu guk, baina momenuz ama bat bakarrik animatu da”.
Entrenamenduetan arlo fisikoa eta teknikoa lantzen dituzte: “Fisikoarekin hasi, umeek jolasen bidez egiten dute korrika. Teknika hobetzeko ere saioak egiten ditugu eta partida batzuk prestatzen ditugu haiek ere ondo pasa dezaten”.

Astelehenetik ostegunera 17:00etatik 19:00ak bitartean Artunduaga kiroldegian entrenatzen dute, “bi egun gazteek eta beste bi egun haurrek”. San Migelen, ostera, astearteetan eta ostegunetan 18:30etatik 20:30etara: “Iraileko bigarren astean hasten gara entrenatzen eta ekainaren 30ean bukatzen dugu”.

Lortutako txapelak, eskualdekoak

Batik bat, Usansolok, Arrigorriagak eta Zaratamok deitzen dituzten torneoetan parte hartzen du Bidebieta Pilota Eskolak, baita Arratia-Nerbioiko Txapelketan ere. “Umeek maila ona baldin badute, Bizkaiko Txapelketan jokatzeko aukera izaten dute, baita Euskal Herrikoan ere. Bizkaikoan bai, baina Euskal Herrikoan ez dugu umerik sailkatzea lortu, oraingoz”, dio Mikel Karrillok.

Denboraldi profesionalaren hasiera San Migelgo edo Basauriko jaiekin bat dator, urriko lehenengo hamabostaldiarekin, eta amaiera uda hasieran. Ikasturte amaierako txapelketa propioa antolatzen du Bidebieta Pilota Eskolak.

Gutxi badira ere, Klubak txapelaren bat lortu duela dio Karrillok: “Azkena, orain dela egun batzuk lortu dugu, urtarrilaren 9an: Arratia-Nerbioiko Txapelketan. Egia esan, irabazi dugun zailenetarikoa izan da, eta horregatik oso berezia”.

Aurrean finalista guztiak eta atzean klub desberdinetako ordezkariak familia argazkian

Julen Maillo eta Oier Elorz bikote basauriarra bigarren ilaran eskubian :: Bidebieta Klub Pelotazalea

Kolokan izan da eskola

Azken urteetan kartelak pegatu behar izan dituzte kaleetan umeak eta gurasoak erakartzeko. Horri esker, desagertzetik libratu direla dio Karrillok: “Iaz hamazortzi ume izan genituen, baina lauk ez zuten jarraitu. Hamalau oso gutxi dira eskolarekin aurrera egiteko. Kartelei esker, hamabi lagunek eman dute izena”.

Gaur egun esku-pilotak indar handia du gure eskualdean, eta goranzko joeran dagoela esango nuke, baina oraindik ere oso zaila da futbolari aurre egitea”, dio Mikelek: “Basauriren kasuan, bost futbol talde ezberdin daude, baita futbol eskola ere, eta horrekin lehiatzea benetan zaila da”. Entrenatzaileak adierazi duenez, “futbolean ez bazara trebea, adin batetik aurrera ez duzu jokatuko. Pilotan, ordea, beti jokatzeko aukera egongo da eta normalean, arrazoi horrengatik aukeratzen dute pilota. Aurten Bidebieta Pilota Eskolan inskripzio kopurua igotzea lortu dugu, azken bi urteetan galdutakoa berreskuratuz” dio pozez.

☉ Basauri

Bideoa / San Juan gaua San Migelen, Basaurin

|

San Juan bezperan sua piztu dute San Migelen, Basaurin. Mikelats Kultur Elkarteak irudiak bidali dizkigu.

Osorik irakurri

☉ Basauri

Argazkiak / San Juan bezperako sua piztu dute Basauriko Pozokoetxen, euripean izan bada ere

|

Ekainak 23 ditu gaur, San Juan bezpera. Ohiturak jarraituta, sua piztu dute Basauriko hainbat tokitan, Pozokoetxen esaterako. Euritakoen azpian ikusi dute auzotarrek Basauritar Dantza Taldearen emanaldia eta San Juan bezperako sua.

Osorik irakurri

☉ Basauri

Espetxeratu dute droga-trafikoa leporatuta Basaurin atxilotu zuten ertzaina

Basaurin atxilotutako ertzainaz gain, beste bederatzi pertsona espetxeratu dituzte. Droga-trafikoa eta erakunde kriminaleko kide izatea egotzi diete

|

Behin-behineko espetxealdia ezarri diete hamar atxilotuei // Irekia

Guardia Zibilak eta Ertzaintzak hamar pertsona atxilotu zituzten duela hiru egun Bizkaian eta Kantabrian, droga-trafikoaren aurkako ‘Tahocei-Lizar’ operazioaren barruan.

Atxilotutakoen artean Basaurin atxilotu zuten 31 urteko ertzain bat. Polizia-eginbideak amaitu ondoren, atzo, larunbata, atxilotuak epailearen esku utzi zituzten, eta guztiak espetxeratzeko agindua eman zuen.

Droga-trafikoa, sare elektrikoan iruzurra egitea, sekretuak ezagutaraztea eta erakunde kriminal bateko parte parte izatea egotzi dizkiete.

Behin-behineko espetxealdia ezarri diete, epaiketa egin bitartean. Zigor-zuzenbidean, orohar, errugabetasun-presuntzioa nagusitzen da beti epaiketa egin bitartean, eta epaileak salbuespenezko neurri moduan soilik agintzen du behin-behineko espetxealdia; ihes egiteko arriskua dagoenean, edo frogak suntsitu daitezkeenean.

Operatiboan parte hartu zuten agenteek 78.840 euro konfiskatu zituzten eskudirutan. Substantzia estupefazienteei dagokienez, 19.592 gramo haxix, 22.973 gramo marihuana-kukulu, 10 kilogramo marihuana-ziztada, 1.300 gramo kokaina, 40 gramo MDMA eta 900 gramo ebaketa-substantzia atzeman zituzten.

Era berean, lau marihuana indoor landaketa desegin zituzten, hazkuntza fase desberdinetan zeuden 5.273 landarerekin. Landare horiek sareari legez kanpo lotutako elektrizitatea erabiltzen zuten. Gainera, atxilotuek erabilitako 14 telefono mugikor eta 6 ibilgailu okupatu zituzten.

Ikerketa Sestaoko ertzain-etxeko agenteek hasi zuten, zenbait pertsona beren mugapeko zenbait tokitan marihuana lantzen eta trafikatzen ari zirela ikusi zutenean.

Terrorismoaren eta Krimen Antolatuaren aurkako Inteligentzia Zentroaren (CITCO) bidez ezarritako koordinazio-esparruaren barruan, egiaztatu zen Guardia Zibilak susmagarrietako bati buruzko ikerketa bat irekita zuela, eta erabaki zuten elkarrekin operazio bat martxan jartzea.

Bi polizia-kidegoek droga-trafikoan aritzen zen erakunde kriminala zegoela egiaztatu ondoren, joan den ostegunean, ekainak 20, operatiboaren ustiapen-fasea garatu zuten.

Miaketak Basaurin, Abanto-Zierbenan, Alonsotegin, Barakaldon, Bilbon, Erandion, Leioan, Portugaleten, Sestaon eta Castro Urdialesen egin zituzten.

Osorik irakurri

☉ Basauri

Denac industrialdea hobetzeko hitzarmena sinatu dute Basauriko Udalak eta Aldundiak

|

Hitzarmenak enplegua sortzen eta mantentzen lagunduko du // Google

Cervantes etorbidean dagoen Denac industrialgunea hobetu eta enpresen lehiakortasuna handituko dute. Horretarako hitzarmena sinatu dute enpresa zentroak eta Basauriko Udalak, eta akordioari esker, Bizkaiko Foru Aldundiak hobekuntza-prozesua finantzatuko du. Hitzarmenak enplegua sortzen eta mantentzen lagunduko du.

Alde batetik, Basauriko Udalak beharrezkoak diren izapideak erraztu eta arinduko ditu eta Denacekin lankidetzan arituko da udal eskumenei eragiten dieten jarduerak diseinatzen, hala nola, urbanizazioa, estolderia edota argiteria publikoa.

Bestetik, Denac enpresa zentroak bi plan idatziko ditu: bata kudeaketakoa eta bestea jardutekoa. Gainera, bi planetan jasotzen diren jarduketak kontratatu eta finantzatu egingo ditu, Aldundiaren diru-laguntzarekin.

Osorik irakurri

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri