Sareak

☉ Basauri

Basconiako jarduera ekonomikoetan “Basaurik erabakitzeko ahalmenik ez izatea” kezkatzen du EH Bilduk

|

Basconia lursaila 2015ean / Basauriko Udala

2009an alderdi sozialistak eta popularra egin bezala, orain gobernu talde jeltzaleak eta sozialistak SEPESerekin adostu du La Basconiaren lur eremua irekitzea asmo duen hitzarmena.

Basauri herria garatzeko lur eremu handiaren aukera, ostera, ez du begi onez ikusi EH Bildu oposizio buruak. “Beti defendatu izan du lurrak Udalari lagatzea, udal interesa beste erakunde batzuen interes ekonomikoen gainetik jarriz, eta hitzarmen honen idazketa ez doa ildo horretan, argitu beharreko zalantzak sortuz. Lurralde Politikako Batzordean informazio gehiago eskatuko dugu”, adierazi du Exabier Arrieta zinegotziak.

Elkarrekin Podemosek, halaber, zuhurtziaz jaso du berria eta tentuz jarraituko du gaiaren bide administratiboa. Oraingoz, Bozeramaileen Batzordean hitzarmenaren oinarrizko ezaugarri teknikoak aurkeztu ditu gobernu taldeak, baina bertan ez zen izan alderdien zalantzak argituko lituzkeen udal langile teknikorik. Prozedura administratiboa, ordea, ahalik eta arinen jarri da martxan, alegia, alkatearen dekretu bidez.

Hitzarmen berriaren arabera, Basconiako lursaila bi eremutan banatzen da: batetik, ‘ipar-mendebaldea’, hirugarren sektoreko eta industria-erabilerako 74.845 m²-ko azalerako eremua; bestetik, ‘ipar-ekialdea’, bizitegi-erabilerako 62.455 m²-ko azalerako eremua, non 398 etxebizitza eraiki ahalko diren.

“Ipar-mendebaldeko lursaila SEPESek askatasunez erabiltzeko aukera izango du, baldin eta eremu horietako jarduketen ondoriozko diru-sarrerek ez badituzte betetzen eragiketaren itzulera ekonomikorako dituzten itxaropenak”. Kezka adierazi du Exabier Arrietak, baita harridura ere, horren atzean egon daitezkeen asmoak herritarrei ostontzen zaizkiolako eta Udalak ez duelako erabaki ahalmenik jarduera ekonomiko pribatuaren aurrean.

“Eremu hori funtsezkoa da etorkizuneko Basauri diseinatzeko, bai herriarentzako ekipamendu publikoei dagokienez, bai kalitatezko enplegua eta herriaren ongizatea ekar dezaketen jarduera ekonomiko potentzialak martxan jartzeko”, azaldu du EH Bilduko zinegotziak: “Udalak espazio horren diseinuan erabakitzeko ahalmena izan beharko lukeela uste dugu, eta hori ez dago batere argi”.

INDUSTRIA-NABEEN ETORKIZUNA. Basconiako lur eremuan dauden interes kulturaleko ondasun gisako industria eraikinen afera oraingoz ez du zehaztu Udalak. Horiek babesteko eta birgaitzeko konpromisoa hartu zuten 2009an SEPESek eta Udalak.

“Basconiako industria-nabeak udalerriari itzultzea babesten dugu”, adierazi du EH Bilduko Exabier Arrietak: “Baina gai arestian esan bezala, zehaztasun falta honetan ere: batetik, inbertsio handia beharko da horiek birgaitzeko eta egokitzeko, baina ez dakigu nork hartu duen bere gain; bestetik, oraindik zehaztu gabe dauden higiezin horiei eman nahi zaizkien erabilerei begira”.

NOLAKO ETXEBIZITZAK. Lehen hitzarmenak gutxienez 1.000 etxebizitza eraikitzea jasotzen zuen. Orain, ostera, 398 etxebizitza eraikiko direla zehazten du. Kopurua bai, baina etxebizitzen tipologia ez du zehazten Udalak.

“Alokairu hizatren aipamen lausoetatik harago, ez da ezer zehazten. Horrez gain, gune horretan dagoen eta sortuko den komunikazio-korapiloa -karga handiko kamioiak, auzoak bitan banatzen dituen trenbidea… Basauriko hirigintza-eraldaketarako gune nagusietako bati buruz aru gara, baina hauei guztiei buruz ez da berba egiten”, azaldu du EH Bilduko zinegoztiak.

☉ Basauri

Bideoa / San Juan gaua San Migelen, Basaurin

|

San Juan bezperan sua piztu dute San Migelen, Basaurin. Mikelats Kultur Elkarteak irudiak bidali dizkigu.

Osorik irakurri

☉ Basauri

Argazkiak / San Juan bezperako sua piztu dute Basauriko Pozokoetxen, euripean izan bada ere

|

Ekainak 23 ditu gaur, San Juan bezpera. Ohiturak jarraituta, sua piztu dute Basauriko hainbat tokitan, Pozokoetxen esaterako. Euritakoen azpian ikusi dute auzotarrek Basauritar Dantza Taldearen emanaldia eta San Juan bezperako sua.

Osorik irakurri

☉ Basauri

Espetxeratu dute droga-trafikoa leporatuta Basaurin atxilotu zuten ertzaina

Basaurin atxilotutako ertzainaz gain, beste bederatzi pertsona espetxeratu dituzte. Droga-trafikoa eta erakunde kriminaleko kide izatea egotzi diete

|

Behin-behineko espetxealdia ezarri diete hamar atxilotuei // Irekia

Guardia Zibilak eta Ertzaintzak hamar pertsona atxilotu zituzten duela hiru egun Bizkaian eta Kantabrian, droga-trafikoaren aurkako ‘Tahocei-Lizar’ operazioaren barruan.

Atxilotutakoen artean Basaurin atxilotu zuten 31 urteko ertzain bat. Polizia-eginbideak amaitu ondoren, atzo, larunbata, atxilotuak epailearen esku utzi zituzten, eta guztiak espetxeratzeko agindua eman zuen.

Droga-trafikoa, sare elektrikoan iruzurra egitea, sekretuak ezagutaraztea eta erakunde kriminal bateko parte parte izatea egotzi dizkiete.

Behin-behineko espetxealdia ezarri diete, epaiketa egin bitartean. Zigor-zuzenbidean, orohar, errugabetasun-presuntzioa nagusitzen da beti epaiketa egin bitartean, eta epaileak salbuespenezko neurri moduan soilik agintzen du behin-behineko espetxealdia; ihes egiteko arriskua dagoenean, edo frogak suntsitu daitezkeenean.

Operatiboan parte hartu zuten agenteek 78.840 euro konfiskatu zituzten eskudirutan. Substantzia estupefazienteei dagokienez, 19.592 gramo haxix, 22.973 gramo marihuana-kukulu, 10 kilogramo marihuana-ziztada, 1.300 gramo kokaina, 40 gramo MDMA eta 900 gramo ebaketa-substantzia atzeman zituzten.

Era berean, lau marihuana indoor landaketa desegin zituzten, hazkuntza fase desberdinetan zeuden 5.273 landarerekin. Landare horiek sareari legez kanpo lotutako elektrizitatea erabiltzen zuten. Gainera, atxilotuek erabilitako 14 telefono mugikor eta 6 ibilgailu okupatu zituzten.

Ikerketa Sestaoko ertzain-etxeko agenteek hasi zuten, zenbait pertsona beren mugapeko zenbait tokitan marihuana lantzen eta trafikatzen ari zirela ikusi zutenean.

Terrorismoaren eta Krimen Antolatuaren aurkako Inteligentzia Zentroaren (CITCO) bidez ezarritako koordinazio-esparruaren barruan, egiaztatu zen Guardia Zibilak susmagarrietako bati buruzko ikerketa bat irekita zuela, eta erabaki zuten elkarrekin operazio bat martxan jartzea.

Bi polizia-kidegoek droga-trafikoan aritzen zen erakunde kriminala zegoela egiaztatu ondoren, joan den ostegunean, ekainak 20, operatiboaren ustiapen-fasea garatu zuten.

Miaketak Basaurin, Abanto-Zierbenan, Alonsotegin, Barakaldon, Bilbon, Erandion, Leioan, Portugaleten, Sestaon eta Castro Urdialesen egin zituzten.

Osorik irakurri

☉ Basauri

Denac industrialdea hobetzeko hitzarmena sinatu dute Basauriko Udalak eta Aldundiak

|

Hitzarmenak enplegua sortzen eta mantentzen lagunduko du // Google

Cervantes etorbidean dagoen Denac industrialgunea hobetu eta enpresen lehiakortasuna handituko dute. Horretarako hitzarmena sinatu dute enpresa zentroak eta Basauriko Udalak, eta akordioari esker, Bizkaiko Foru Aldundiak hobekuntza-prozesua finantzatuko du. Hitzarmenak enplegua sortzen eta mantentzen lagunduko du.

Alde batetik, Basauriko Udalak beharrezkoak diren izapideak erraztu eta arinduko ditu eta Denacekin lankidetzan arituko da udal eskumenei eragiten dieten jarduerak diseinatzen, hala nola, urbanizazioa, estolderia edota argiteria publikoa.

Bestetik, Denac enpresa zentroak bi plan idatziko ditu: bata kudeaketakoa eta bestea jardutekoa. Gainera, bi planetan jasotzen diren jarduketak kontratatu eta finantzatu egingo ditu, Aldundiaren diru-laguntzarekin.

Osorik irakurri

☉ Basauri

Basaurin ertzain bat atxilotu dute droga trafikoa leporatuta

|

Ertzaintzak eta Guardia Zibilak droga-trafikoaren aurkako polizia-operazioa martxan jarri dute gaur Bizkaian eta Kantabrian, eta hainbat atxiloketa eta miaketa egin dituzte.

Besteak beste, Basaurin pertsona bat atxilotu dute. Zenbait komunikabidek publikatu dutenez ertzain bat da Basaurin atxilotutakoa, 24. promoziokoa, eta substantzia estupefazienteen banaketan parte hartzea egotzi diote.

Miaketak, Basaurin, Bilbon, Barakaldon, Leioan eta Kantabriako herri batean egiten ari dira.

Osorik irakurri