☉ Arrigorriaga
Beldur Barik lehiaketa, sexismoaren inguruan kontzientziatzeko
Indarkeria sexistaren aurkako Beldur Barik lehiaketan parte hartzeko epea zabalik dago azaroaren 11ra arte. Iaz Arrigorriagako eta Basauriko lehiaketa irabazi zutenekin izan da GEURIA bizi izandako esperientzia kontatzeko.
Beldur Barik programaren seigarren edizioa ospatuko da aurten. Indarkeria sexista identifikatzea, saihestea eta horri aurre egitea da programa honen helburua.
Ekimenaren baitan, Hego Uriben tokian tokiko lehiaketak antolatzen dituzte bertako zenbait Udalek. Ikus-entzunezko txapelketa honek gazteen proposamenak jasotzen ditu; lanak aurkezteko epea zabalik dago azaroaren 11ra arte.
Beldur Barik Basauri :: Markel Serrano, Paula Rodriguez, Lander Luna, Julen Sainz eta Estitxu Telleria
“Marienearen bitartez izan genuen Beldur Barik lehiaketaren berri eta proposamen interesagarria iruditu zitzaigun sexismoari aurre egiteko”, dio Markel Serrano Basauriko parte-hartzaileak. Berarekin batera parte hartu zuten Paula Rodriguezek, Lander Lunak, Julen Sainzek eta Estitxu Telleriak, eta elkarrekin Kale Gorritan ikus-entzunezkoa sortu zuten. 12 eta 17 urte bitartekoen kategorian Basauriko lan onenaren saria irabazi eta 500 euro jaso zituzten.
Kategoria berean parte hartu zuten Arrigorriagako bost gazte hauek: Izarra Moreno, Imanol Gonzalez, Uxue Veganzonez, Maialen Goti eta Batirtze Martinez. “Eskolan izan genuen Beldur Barik lehiaketaren berri eta izena ematea erabaki genuen, gehienbat, ondo pasatzeko eta ikasteko”, dio Morenok.
Beldur Barik Arrigorriaga :: Izarra Moreno, Imanol Gonzalez, Uxue Veganzonez, Maialen Goti eta Batirtze Martinez
Hilabeteko lana egin zuen talde bakoitzak: “Lehenengo gidoia asmatu, gero bideoan grabatu eta azkenik edizioa egiten da”, azaldu dute. Basauriko taldeak jendearen pentsamoldea hartu zuen hizpide, “sexismoa arazo larria dela erakusteko. Izan ere, jendeak nahi gabe pentsatzen du neskak modeloak izan behar direla eta mutilak, berriz, suhiltzaileak”, dio Serranok.
KONTZIENTZIA PIZTEA
Basauriko taldeak argi dauka indarkeria sexista gaitzesteko ezinbestekoa dela “jendea kontzientziatzea. Are gehiago, nerabeei azaldu behar zaie sexismoarekin bukatu behar dela”, dio Markel Serranok. “Indarkeria sexistarik ezin da inolaz ere onartu. Denok batera bide berdina jarraitu behar dugu emakumeen kontrako indarkeria desager dadin”, aldarrikatu du Izarra Morenok. Ildo horretan, sexismoak dakartzan arazoez ohartzea bilatzen du Beldur Barik lehiaketak.
“Nire ustez, gero eta gehiago gara matxismoaren kontra gaudenak, baina egia da oraindik lan handia egin behar dugula guztion artean”, gaineratu du Serranok. Morenoren iritziz, “gaur egun, tratu txarren zenbatekoa ez da gutxitu. Are gehiago, emakume asko erail dituzte aurten eta gurean ere eraso sexistak izan dira uda honetan”.
DIBERTITZEKO ETA DIRUA IRABAZTEKO AUKERA
Arrigorriagako eta Basauriko taldeek lehiaketan parte hartzea “esperientzia dibertigarria” izan dela aitortu dute. “Jarduera polita eta aberasgarria da eta, gainera, asko ikasten da horrelako ekimenekin”, dio Serranok. Era berean, sariak nabarmendu dituzte bi parte-hartzaileek: “Zorte ona izanez gero, dirua ere irabaz dezake Beldur Barik lehiaketara aurkezten denak”, dio Morenok.
Horiek horrela, bi talde hauek Beldur Barik txapelketako aurtengo edizioan ere izena emango dutela adierazi dute, bai lehiaketa orokorrean bai lokalean.
Gaur egun, Emakunde-Emakumearen Euskal Erakundeak antolatzen du Beldur Barik lehiaketa, Berdinsarea-Eudelen eta Araba, Bizkaia eta Gipuzkoako Foru Aldundien bultzadarekin batera.
☉ Arrigorriaga
David Cidre: «Arrigorriagan lurpeko aparkalekua eraikiko bagenu Bilboko Zabalgunean izaten ari diren bezalako lanak izango genituzke herrian»
David Cidre Hirigintza zinegotziarekin hitz egin du GEURIAk EAJk udaletxeko plaza azpian aparkaleku bat egiteko aukera aztertzeko proposamenaren haritik
Arrigorriagako EAJk udaletxeko plaza azpian aparkaleku bat egiteko aukera aztertu dezan eskatu dio Udal Gobernuari.
Jeltzaleen arabera, Arrigorriagako herrigunean aparkalekurik ez egotea “eguneroko mugikortasunerako sarbideari eragiten dion egiturazko arazoa” da. Horren haritik, eta EAJko ordezkarien arabera, “hainbat proposamen” egin dizkiote udal gobernuari aparkalekuak eremu jakin batean eraikitzeko eta “gobernu taldearen erantzunik eta onarpenik ez dutela izan” adierazi dute.
Horren haritik, GEURIAk David Cidre Hirigintza zinegotziarekin hitz egin du: “Udalerri askotan bezalaxe, Arrigorriagan autoa aparkatzea zaila da”, aitortu du Cidrek. “Auto asko daude udalerrian eta leku gutxi daude. Hala ere, esan beharrekoa da egoera ez dela larria ere”.
“Bere garaian txandakako aparkaleku bat sortzeko proposamena egin zuen EAJk”, azaldu du Cidrek. “Txandakako aparkaleku horiek batez ere kanpotik datozen pertsonei zuzenduta daude. Udalerrian autoa ordu pare batez uzteko aukera ematen dute baina gero bertatik kendu behar da ibilgailua”.
Udalak, txandakako aparkaleku hura eraikitzeko proposamena aztertu ostean atzera bota zuen: “Gaur egun Arrigorriagan aparkatzea zaila bada, era horretako aparkaleku bat ipiniko bagenu lekua kenduko genieke arrigorriagarrei”.
Gaur egun hiru txandakako aparkaleku daude Galdakaon (anbulatorioa, udaletxean eta Lapurdi kalean), bakarra Basaurin (anbulatorioaren ondoan) eta Ugaon (Gernikako plazaren inguruetan).
Eta lur azpian?
Joan den otsailaren 9an aurkeztutako mozioari dagokionez, alderdi jeltzaleko bozeramaileen arabera, Urgoiti pasealekuko 22 eta 24 eraikinetan hasiko dituzten obrekin bat etorriko lirateke eraiki gura duten lur azpiko aparkalekuaren balizko sorrera: “Aurkeztutako proposamenak ez du behartzen inolako obrarik egitera, baizik eta soilik datuekin eta zorroztasunarekin aztertzera ea jarduera hori positiboa eta bideragarria izango litzatekeen udalerriarentzat”.
Oposizioko ordezkariek azpimarratu dute aukera hori “seriotasunez aztertzeko unea” dela: “Bestela, posible da Arrigorriagak aukera paregabea galtzea hamarkadetan”.
Oposizioak aurkeztutako mozioa aztertu beharko du udal gobernuak, baina hala ere, David Cidre zinegotziak azaldu du, bulego teknikoarekin berba egin ostean, Urgoiti pasealekuko 22 eta 24 eraikinetan egin beharreko obra horiek eta EAJtik proposatu duten lur azpiko aparkalekuaren obren egitasmoa ez direla bateragarriak: “Etxebizitza batzuk eraiki gura dituzte eraikin horietan baina oraindik ez dago datarik ezta informazio zehatzik”.
David Cidre: “Era horretako obrek bi urte luzeko iraupena izaten dute gutxi gorabehera, eta herriko plaza itxi egin beharko litzateke ondorioz”
Udaletxe aurreko plazaren azpian aparkaleku bat jarri beharko balitz, egin beharreko lanak “erraldoiak” izango liratekela azaldu dio David Cidrek GEURIAri: “Era horretako obrek bi urte luzeko iraupena izaten dute gutxi gorabehera, eta herriko plaza itxi egin beharko litzateke ondorioz”.
Bada, egin beharreko obra Bilboko Zabalguneko plazan egiten ari diren lanekin alderatu du Cidrek: “Antzekoa litzateke. Egun osoan zehar zarata egingo lukeen makina zulatzaile erraldoi bat jarri beharko litzateke bertan”.
Gaur egun auto gutxi batzuentzako aparkalekuak daude udaletxeko azpiko garajean. Bertan udaltzaingoaren eta udal brigadako langileen ibilgailuak gordetzen dituzte. Guztira dozena erdi autorentzako lekua dagoela zehaztu du Auzoak eta Hirigintza zinegotziak. “Plaza azpian aparkaleku bat eraikitzeko une aproposena udaletxe berria egin zutenean izan zen, gaur egungo garajea handitzeko lan handiak egin beharko liratekeelako”.
Irisgarritasun plana, abian
Bestetik, aparkalekuaren arazoari irtenbidea emateko, Arrigorriagako Udala Irisgarritasun Plana garatzen ari da aspaldi, eta hurrengo hilabeteetan aurkezteko asmoa dutela aurreratu du Cidrek.
Plan horrek Arrigorriagako irisgarritasunaren gaur egungo “argazkia” eskainiko luke, besteak beste, ibilgailuak aparkatzeko arazoari aurre egin ahal izateko.
Aparkalekuak Abusun
Arrigorriagako Udalak Ollargan auzoan egindako berrurbanizazio lanek aparkalekuekin zegoen arazoa arindu arren, ez du Abusuko egoera guztiz konpondu. Izan ere, Bilboko Udalak TAO sistema ezarri zuenetik, La Peña auzoko gidari askok Arrigorriagako Abusu auzoan aparkatzen dituzte beren ibilgailuak, aparkatzeagatik ez ordaintzeko. Ondorioz, auzotarrek dohako aparkaleku gutxiago dituzte autoak aparkatzeko.
☉ Arrigorriaga
Erasmus+ akreditazioa eskuratu du Arrigorriagako institutuak eta Europako erreferente bilakatu da
Akreditazio honekin, Arrigorriaga BHIk bere ikasleak Europara bidaltzeaz gain, beste herrialde batzuetako irakasleak hartzeko prestaketa lanetan ere badabil, antolatuko duen ‘Arrigo Shadowing’ izeneko prestakuntza-aste berritzailearen bidez
Arrigorriaga BHI institutuak 2024-2027rako Erasmus+ akreditazioa eskuratu eta Europako erreferente bilakatu da. “Akreditazio honekin, Arrigorriaga BHIk bere ikasleak Europara bidaltzeaz gain, beste herrialde batzuetako irakasleak hartzeko prestaketa lanetan ere badabil, antolatuko duen ‘Arrigo Shadowing’ izeneko prestakuntza-aste berritzailearen bidez: , azaldu dute Arrigorriagako institututik.
“Kalitate-zigilu honek bermatu egiten du ikastetxeko ikasle eta irakasleek etengabe parte hartuko dutela atzerriko mugikortasun eta prestakuntza proiektuetan”, azaldu dute institutuko ordezkariek. “Gure oinarrizko helburua Europa gure ikasgelen luzapen bihurtzea da, modu erabat inklusiboan. Horregatik, indar berezia jarriko dugu gure Gela Egonkorrean, nazioarteko mugikortasuna ikasle guztientzat, salbuespenik gabe, eskuragarri dagoen eskubidea dela ziurtatuz”.
Institututik azaldu dute iraultza digitala bultzatuko dutela adimen artifizialaren erabilera etikoaren bidez: “bizikidetza eta balio demokratikoak indartuko ditugu BAT taldearekin, eta berrikuntza pedagogikoaren aitzindariak izan nahi dugu Ikaslab eta ADI Eskola bezalako erreferentziazko proiektuekin. Hori guztiori, gure ikasleak mundu global baten erronketarako prestatzen dituen eleaniztasun esparru baten barruan”.
“Kalitate-zigilu honek bermatu egiten du ikastetxeko ikasle eta irakasleek etengabe parte hartuko dutela atzerriko mugikortasun eta prestakuntza proiektuetan”
Erasmus+ akreditazioari esker, mugikortasun guztiak Europar Batasunak % 100ean finantziatuko dituela nabarmendu dute. Hori dela eta, ikasle eta irakasleek kostu ekonomikorik gabe parte hartu ahalko dute nazioarteko esperientzietan, “komunitate osoarentzat benetako aukera-berdintasuna bermatuz”.
Institutuko ordezkarien arabera, lehen urtean Alemanian, Herbehereetan eta Estonian aurreikusi dute lehen urteko nazioarteko plana. Ikasleen mugikortasunari dagokionez hiru talde aurreikusi dituzte eta guztira 30 ikaslek hartuko dute parte esperientzian. Irakasleen prestakuntzaren alorrean, ostera, Europako beste ikastetxe batzuetan behaketa profesionala egiteko hiru job shadowing aurreikusi dituzte zortzi irakaslerentzat (job shadowing-a pertsona batek langile batekin lanaldia egiten ikustea da, bere lana zelan garatzen duen ikusi eta ikasteko: hitzaren jatorria job (lana) eta shadow-tik dator (itzala).
☉ Arrigorriaga
Arrigorriagako EAJk udaletxeko plaza azpian aparkaleku bat eraikitzea proposatu dio udal gobernuari
Proiektu honek “eguneroko mugikortasunerako sarbideari eragiten dion egiturazko arazoari aurre egingo liokeela” adierazi dute EAJtik
Arrigorriagako EAJk mozio bat aurkeztu zuen joan den otsailaren 9an udal gobernuak bideragarritasun-azterketa bat egiteko. Helburua lurpeko aparkaleku bat eraikitzea litzateke, non eta udaletxeko plazaren azpian.
Aparkaleku hori, alderdi jeltzaleko bozeramaileen arabera, Urgoiti pasealekuko 22 eta 24 eraikinetan hasiko dituzten obrekin bat etorriko lirateke: “Aurkeztutako proposamenak ez du behartzen inolako obrarik egitera, baizik eta soilik datuekin eta zorroztasunarekin aztertzera ea jarduera hori positiboa eta bideragarria izango litzatekeen udalerriarentzat”.
Oposizioko ordezkariek azpimarratu dute aukera hori “seriotasunez aztertzeko unea” dela oraingoa: “Bestela, posible da Arrigorriagak aukera paregabea galtzea hamarkadetan”.
Horren haritik, Arrigorriagako herrigunean aparkalekurik ez egotea “eguneroko mugikortasunerako sarbideari eragiten dion egiturazko arazoa” dela adierazi dute EAJtik eta udalerri erdian obrak bat etortzea “aparteko aukera” eskaintzen dutela “luzerako irtenbide posible bat modu koordinatu eta estrategikoan aztertzeko”.
Proiektu hau burutu ahal izateko, 2025eko aurrekontua likidatu ondoren, diruzaintzako soberakina erabiltzeko aukera proposatu dute EAJtik: “Soberakin esanguratsu bat izango du Udalak, eta, horri esker, zorroztasunez aztertu ahal izango litzateke horrelako inbertsio baten bideragarritasun ekonomikoa, dela finantzaketa zuzenaren bidez, plazen salmentaren bidez, txandakako aparkaleku baten bidez edo legez”.
EAJ: “Aurkeztutako proposamenak ez du behartzen inolako obrarik egitera, baizik eta soilik datuekin eta zorroztasunarekin aztertzera ea jarduera hori positiboa eta bideragarria izango litzatekeen udalerriarentzat”
EAJko ordezkarien arabera, “hainbat proposamen” egin dizkiote udal gobernuari aparkalekuak eremu jakin batean eraikitzeko eta “gobernu taldearen erantzunik eta onarpenik ez dutela izan” adierazi dute.
Era berean, udal gobernuari eskatutako azterlanak “Hiri Antolamenduko Plan Orokorrarekiko (HAPO) hirigintza-bateragarritasuna eta esku-hartzearen bideragarritasun teknikoa, ekonomikoa eta juridikoa ebaluatu beharko lituzkeela” adierazi dute oposiziotik, “HAPOren aldaketa puntuala sustatu edo hirigintza-tresna espezifikoren bat izapidetu beharko balitz ere, aplikatzekoa den hirigintza-legeriaren arabera”.
☉ Arrigorriaga
Bideoa | Arrigorriagako Inauteria girotzeko Maskaradaren pertsonaiak atera dituzte kalera!
Otsailaren 14rako egitarau berezia antolatu dute Arrigorriagako inauterietan, eguerditik gauera bitartean, “Aratusterik ez!!” lelopean
Inauteriak girotzen hasi dira Arrigorriagan, eta horretarako Maskaradaren Zamalzainak, Entseinariak, Kantinerak… atera dituzte kalera!
Otsailaren 14rako egitarau berezia antolatu dute Arrigorriagako inauterietan, eguerditik gauera bitartean, “Aratusterik ez!!” lelopean.
“Mimo handiz prestatutako egitarau ederra geratu da otsailaren 14rako, beraz, animatu mozorratzera, ospatzera eta, batez ere, disfrutatzera! Kalean ikusiko dugu elkar!”, azaldu dute Inauteri batzordetik eta Gaztetxetik.
Herri bazkarian parte hartzeko tiketak beharko dira. Horiek Imara eta Sorgiñe tabernetan eskuratu daitezke 13 euroan: “Alergikoa, beganoa, zeliakoa… bazara abisatu arguiagazte@gmail.com helbidera idatziz edo 688 654 717 telefono zenbakira deituz”.
Egitaraua | Arrigorriagako herri inauteriak 2026
Otsailak 14, larunbata
12:00 Inauteriei ongi etorri deia: hartzaren eta mozorroen esnatzea, bertsoak, dantzak… udaletxeko plaza
15:00 Herri bazkaria + bingo musikatua, Gaztetxea
19:00 Elkarretaratzea, Odol emoileen plaza
19:30 Kalejira, herrian zehar
20:00 Ibarra inkisidorearen herri-epaiketa
21:00 Kontzertua: Gautegun erromeria
01:00 DJ gaua, Gaztetxea
☉ Arrigorriaga
Bazkaria, elkarretaratzea eta kalejira antolatu dute Arrigorriagako herri inauterietan
Herri bazkarian parte hartzeko tiketak beharko dira. Horiek Imara eta Sorgiñe tabernetan eskuratu daitezke 13 euroan
Otsailaren 14an egitarau berezia antolatu dute Arrigorriagako inauterietan, eguerditik gauera bitartean, “Aratusterik ez!!” lelopean.
“Mimo handiz prestatutako egitarau ederra geratu da otsailaren 14rako, beraz, animatu mozorratzera, ospatzera eta, batez ere, disfrutatzera! Kalean ikusiko dugu elkar!”, azaldu dute Inauteri batzordetik eta Gaztetxetik.
Herri bazkarian parte hartzeko tiketak beharko dira. Horiek Imara eta Sorgiñe tabernetan eskuratu daitezke 13 euroan: “Alergikoa, beganoa, zeliakoa… bazara abisatu arguiagazte@gmail.com helbidera idatziz edo 688 654 717 telefono zenbakira deituz”.
Egitaraua | Arrigorriagako herri inauteriak 2026
Otsailak 14, larunbata
12:00 Inauteriei ongi etorri deia: hartzaren eta mozorroen esnatzea, bertsoak, dantzak… udaletxeko plaza
15:00 Herri bazkaria + bingo musikatua, Gaztetxea
19:00 Elkarretaratzea, Odol emoileen plaza
19:30 Kalejira, herrian zehar
20:00 Ibarra inkisidorearen herri-epaiketa
21:00 Kontzertua: Gautegun erromeria
01:00 DJ gaua, Gaztetxea
Erreportajea | Botosani eta Zeberio lotzen dituen haria
Elexalde Institutuko 3. eta 4. mailako Usansoloko ikasleek 2026-2027 ikasturtean autobus zerbitzurik ez dutela izango salatu dute
Galdakaoko auzoak hobetzen jarraitzeko eta proposamen berriak definitzeko bilerak deitu ditu Udalak
Argazkiak | Galdakaoko ikastetxeek Santa Ageda bezpera ospatu dute
Argazkiak | Galdakao eta Altsasu senidetu egin dira inauterien transmisioari jarraipena emateko
Argazkiak | Lokatz artean lehiatu dira Ausartak Mendi Lasterketako korrikalariak Arrigorriagan
Erreportajea | Botosani eta Zeberio lotzen dituen haria
Bideoa | Gonzalo Lopez: «Arkotxara heldu nintzenean 40 mahai-joko nituen. Gaur ia 1.200 ditut gordeta»
