Sareak

☉ Basauri

Bizkotxalde eskolako pabilioi berria 2016an irekitzea aurreikusten dute

|

basauri bizkotxalde eskola 2014

2,5 milioi euroko aurrekontua ezarri du Eusko Jaurlaritzak. 18 hilabetez luzatuko dira obrak eskolan. Eraikuntza lanak egin nahi dituzten enpresek abenduaren 12a baino lehen aurkeztu beharko dute euren eskaintza.

Hilabete askoko itxaronaldiaren ostean, Basauriko Bizkotxalde ikastetxeko berritze-lanak gero eta gertuago daude. Izan ere, Eusko Jaurlaritzako Hezkuntza, Hizkuntza Politika eta Kultura Sailak pabilioi berria eraikitzeko obren esleipenerako lehiaketa abian jarri du. Jaurlaritzaren aurreikuspenen arabera, lanek 2.509.452,89 euroko aurrekontua izango dute eta 18 hilabeteko epean burutuko dira. Euskadiko Kontratazio Publikoaren webgunean jakinarazi dutenez, enpresek abenduaren 12ra arte izango dute euren proiektuak aurkezteko aukera.

Urriko osoko bilkuran mozioa aurkeztu zuen Bizkotxalde Haur eta Lehen Hezkuntzako Ikastetxeko Eskola Kontseiluak, ikastetxearen gaur egungo eta etorkizuneko egoera salatzeko asmoz. Mozioak talde politiko guztien –EAJ, PSE, EH Bildu eta PP– aldeko bozka jaso zuen eta azpiegitura berri horren garrantzia nabarmendu zuten. Andoni Busquet Basauriko alkateak dioenez, “Hezkuntza Sailak berak udaberrian jarritako epeak beteko dituela seguru nago”. Horrela, abenduaren amaieran hasiko lirateke pabilioi berria eraikitzeko lanak eta 2016-2017 ikasturterako instalazioek prest egon beharko lukete.

HEZKUNTZA SAILAK UDABERRIAN JARRITAKO EPEAK BETEKO DITUELA SEGURU NAGO ANDONI BUSQUET, BASAURIKO ALKATEA

SEI URTEKO BORROKA

Azpiegitura berriak 2009. urtean eraitsitako eraikina ordezkatuko du eta Haur Hezkuntzako ikasleentzat izango da. “Gaur egun, bi eta hiru urteko umeak Agirre Lehendakaria kaleko eraikinean daude, eta gainontzekoak, Uribarri kalekoan”, dio Idoia Argiarro Bizkotxalde eskola kontseiluko kideak. “Aurrefabrikatutako sei modulu ditugu jolas patioan. Ikasturtero espazioak egokitu eta berrantolatu behar izaten ditugu gure hezkuntza proiektua garatu ahal izateko, ikasle guztiek ikaslekua izan dezaten”. Horiek horrela, Guraso Elkarteak zein ikastetxeko irakasleek sei urteko borroka izan dute berritze-lanak aurrera atera daitezen: hainbat agerraldi egin dituzte kolore gorriz jantzita Basauriko kaleetan “pabilioi berri horren eraikuntza errealitate bihur dadin”.

Eskola kontseiluko kidearen esanetan, “badira sei ikasturte Bizkotxalde eskolakoak Uribarri kaleko eraikin publikora etorri ginela. Agindutakoaren arabera, 2012an Santiago kalean Haur Hezkuntzarako eraikin berria inauguratu behar genukeen”. 2014an, ordea, egoerak bere horretan jarraitzen du. 2016ko ekainera arte itxaron beharko dute ikasle, irakasle eta gurasoek Bizkotxalde Ikastetxea bere osotasunean ikusteko.

IKASLEEI TOKIA EGITEKO URTERO MOLDATU BEHAR IZAN DITUGU JOLASTOKIAN DITUGUN MODULUAK. IDOIA ARGIARRO, BIZKOTXALDE ESKOLAKO KONTSEILUKO KIDEA

2014/2018KO PLANEAN

Bizkotxalde HLHIko berritze-lanen gaia aurreko legealdian jarri zen Eusko Jaurlaritzaren mahai gainean. Ikastetxearen eraikin berria 2011. urtean eraikiko zela aurreikusi zuten arren, aurrekontu falta zela eta ez zen posible izan. Ondoren, 2013ra atzeratu zuten proiektua, gaur egungo egoerara iritsi arte.

Cristina Uriarte Hezkuntza, Hizkuntza Politika eta Kultura sailburuak apirilean adierazi zuenez, “Bizkotxalde Ikastetxeko obrak 2014/2018 Azpiegitura Planaren barruan sartzen dira”. Behin lanak lizitaziora aterata, abenduaren bukaeran pabilioi berria eraikitzea aurreikusten zutela ere gaineratu zuten Jaurlaritzatik apirilean bertan. Ordutik hona, Udalak, Jaurlaritzak eta ikastetxeko ordezkariek hainbat bilera izan dituzte Bizkotxalde eskolako eraikin berria egin dadin.

☉ Basauri

Touré detektibearen telesaila 2024an estreinatuko dute ETBn eta TVEn

|

Detective Toure telesaileko aktoreak, tartean Itziar Ituño basauriarra // RTVE

Jon Arretxe idazle basauriarrak sortutako Touré detektibeari buruzko telesaila laster ikusi ahal izango dugu pantaila txikian. Hain zuzen ere, aste honetan bukatu dituzte grabazioak eta aurreratu dute telesaila 2024an estreinatuko dutela EITBn eta RTVEn.

Hiru hilabete baino gehiagoko grabaketak izan dira eta irailean bukatu dute filmazioa. Grabazioa Bilboko zenbait txokotan izan da, hala nola, Arriaga antzokian, Salbeko zubian eta San Frantzisko auzoan, Arretxeren sagako lekurik ezagunetan. Era berean, Getxoko Muxikebarri Zentroan ere eszena batzuk filmatu dituzte.

Malcolm Treviño-Sitté izango da Mahamoud Touré, eta telesailean ikusiko ditugun gainerako aktoreak dira: Itziar Ituño basauriarra, Unax Ugalde, Loreto Mauleón, Itsaso Arana, Urko Olazabal, Gorsy Edu, Emilio Buale, Goize Blanco, Lander Otaola, Ayoub El Hilali, Jon Olivares eta Ane Gabarain.

RTVEren, Detective Touré AIEren, Tornasol Mediaren, DeAPlanetaren eta EITBren arteko koproduzioa da telesaila, eta Europa Creativa Media programaren laguntza du.

Sei kapitulu

Telesailak sei kapitulu izango ditu eta Esteban Crespok eta Violeta Salamak zuzendu dituzte. Arretxek berak 2023ko apirilean GEURIAri adierazi bezala, “kapitulu bakoitza liburu batean oinarrituta dago”.

Guztira Touréri buruzko bederatzi nobela argitaratu ditu Arretxek: ‘19 kamera’ (Erein, 2012), ‘612 euro’ (Erein, 2013), ‘Hutsaren itzalak’ (Erein, 2014), ‘Estolda jolasak’ (Erein, 2015) ‘Sator lokatzak’ (Erein, 2016), ‘Ez erran deus’ (Erein, 2018), ‘Mesfidatu hitzez’ (Erein, 2019), ‘Dortokaren begirada’ (Erein, 2021) eta ‘Lyrica Garaia’ (Erein, 2022). Hala ere, lehenengo sei liburuetan dago oinarrituta telesaila.

Intriga, umorea eta “pertsonaia maitagarriak” uztartzen ditu telesailak, eta David Perez Sañudok (‘Ane’) —2021ean egokitutako gidoi onenaren Goya saria irabazi zuen— eta Carlos Vila Sextak (‘Los misterios de Laura’) sortu dute, gidoian Flora González Villanuevaren laguntzarekin.

Ikus-entzunezkoak bi aholkulari izan ditu, pertsonaia afrikarrak telesailean irudikatzeari begira: Lucía Mbomio (kazetaria, Espacio Afro-ko kidea eta 2020an Espainiako Giza Eskubideen Aldeko Elkartea komunikazio-sariaren irabazlea) eta Mamadou Ngom (‘Munduko Medikuak’ elkarteko kulturarteko bitartekaria eta Bilboko Mugimendu Panafrikanistaren koordinatzailea). Arretxe ere telesailaren grabaketetan izan da.

Arretxeren lehena

‘Detective Touré’ Jon Arretxek pantaila txikirako egindako lan baten lehen egokitzapena da. Arretxek 30 urte baino gehiagoko ibilbidea du literatura munduan eta Espainiako eleberri beltzaren egile handienetako bat da. Bere liburu gehienak, jatorriz euskaraz argitaratuak, bestseller bihurtu dira Hego Euskal Herrian.

Telesailak momentuz sei kapitulu izango ditu. Denboraldi gehiago ikusteko aukera izango dugu hurrengo urteetan? Lehen denboraldi honen emaitzak argituko du zalantza.

Osorik irakurri

☉ Basauri

’20.000 especies de abejas’ filma azkenean ez da lehiatuko Oscar sarietan egoteko

|

Espainiako Zinema Akademiak gaur iragarri du zein film aurkeztuko dion Hollywoodeko Akademiari Oscarren atzeriko film onenaren atalean hautagai izateko. Eta hori da Juan Antonio Bayonaren “La sociedad de la nieve”. Hortaz, kanpo geratu dira Esti Urresola laudioarraren ‘20.000 especies de abejas’ eta Victor Ericeren ‘Cerrar los ojos’.

Oscarretan ez, baina Europa mailan harrera ona izan du Sofia Otero aktore gazte basauriarra protagonista duen ‘20.000 especies de abejas’ filmak. Izan ere, 2024ko Europako Publikoaren Zinemako LUX Sarirako izendatu dituzten bost tituluetako bat da. Sari hori Europako Parlamentuak bultzatzen du, Europako balioen unibertsaltasuna zein kulturaren aniztasuna edo Europar Batasunaren eraikuntza-prozesuari buruzko lanak goraipatzeko.

Sariak filmaren azpitituluak Europar Batasuneko 23 hizkuntza ofizialetan finantzatzea barne hartzen du, eta jatorrizko hizkuntza pertsona gorrei eta entzuteko zailtasunak dituztenei egokituko zaie. Zinta irabazlea Europako Parlamentuan 2024ko martxoan egingo den zeremonia batean iragarriko dute.

Izendapen hori Europako Zinemaren Akademiaren sarietarako iragarrita dagoenari gehitu behar zaio. Bertan, Urresolaren zintak beste 18 titulurekin lehiatzen du, erakunde horren iritziz, “europar zinemagileen bikaintasuna ordezkatzen baitute, Europako aniztasuna, aniztasuna eta sormena balioesten baitituzte”.

Donostiako Zinemaldian

Beste alde batetik, ‘20.000 especies de abejas’ Donostiako Zinemaldian proiektatuko dute. Hain zuzen ere, filmak hasiera emango dio Zinemira euskal zinemari berariaz eskainitako sailari iraialren 22an (19:15). Hala eta guztiz ere, lehiaketatik kanpo proiektatuko dute filma, Donostian eman aurretik dagoeneko estreinatu delako.

Osorik irakurri

☉ Basauri

Bideoa | Sute batek Kareaga Goikoa kaleko etxebizitza bat kiskali du Basaurin

Zauriturik egon ez den arren txakur bat onik atera dute etxebizitzatik

|

Gaur 13:45ak aldera sutea piztu da Kareaga Goikoa kaleko etxebizitza batean, Basaurin. Berehala gerturatu dira suhiltzaileak eta sutea amatatu dute.

Lehen ikerketen arabera, elementu elektriko batek hartu du su. Etxea kiskalita geratu da, baina ez da zauriturik egon. Sutea piztu den momentuan ez zen pertsonarik barruan; bai, ordea, txakur bat, baina suhiltzaileek onik atera dute.

“Kalera atera naiz eta ikusi dut ke beltza ateratzen zela etxetik. Goma-usain handia zegoen, eta hainbat bizilagunen artean koordinatu gara suhiltzaileei eta ezagutzen dugun etxeko jabeari deitzeko.

Udaltzainak eta Ertzaintza azkar bertaratu dira, eta minutu gutxiren buruan suhiltzaileak etorri dira”, adierazi dio GEURIAri Kareagako bizilagun batek: “Oso beldurtuta geunden. Bagenekien txakur bat zegoela barruan, eta etxeko emakumea barruan ez zegoela ziurtatu dugunean, lasaitu gara”.

Uholdeak eta sutea

Irailaren 16an jazo ziren euri-jasa gogorrek Kareaga Goikoa kalea urez gainezka utzi zuten minutu batzuez. “Zorte txarra izan da: auzokide berak larunbateko uholdeak jasan ditu, eta oraon sutea”, adierazi digu bizilagun berak.

Osorik irakurri

☉ Basauri

Basauri ‘2024ko Kirolaren Europako Hiria’ izateko hautagaia da

|

Hautagaitzaren bideo-aurrerapenaren irudi bat // Basauriko Udala

Basauri, ‘2024ko Kirolaren Europako Hiria’ izateko hautagaia da. Horren berri eman du gaur Basauriko Udalak.

“Ondo merezitako izendapena izango litzateke klubentzat, Basauriko oinarrizko kirolarentzat eta Basauri Kirolaken instalazioak erabiltzen dituzten eta instalazio horiek bizirik mantentzen dituzten erabiltzaile eta kirolari guztientzat. Basaurik merezi du!”, adierazi dute udal ordezkariek.

Osorik irakurri

☉ Basauri

«Denok uste dugu Mikelats elkarteak bizi handia ematen diola San Migeli»

Mikelatsek aurpegi berriak ditu eta azken hilabeteetan San Migelgo jaiak antolatzen aritu dira. Erantzukizun “handia” dutela baina gogotsu daudela diote

|

Mikeltaseko batzordekide berriekin batu gara San Migeleko jaiak hasi aurretik // Geuria

San Migeleko jaiak ate joka daude. Irailaren 23tik urriaren 1era bitartean hamaika jarduera antolatu ditu Mikelats Kultur Elkarteak (egitaraua osorik hemen). Batzorde osoa duela hilabete batzuk berritu dute, eta aurpegi berriak ikusiko ditugu Mikelatsen, denak 20 eta 26 urte bitartekoak. Eta horiek dira: Maialen Ibarra, Nerea Escalada, Joseba Martialay, Marko Lopez, Maider Kortabarria, Eder Mendoza, Jon Coteron eta Maider Lopez, besteak beste (guztira 15 lagun daude batzordean). Eurekin solasean izan gara jaiak hasi aurretik.

Aurrekoek batzordea utzi eta denbora bat ordezkaritzarik gabe egon zen Mikelats, baina ondoren zuek agertu zineten. Zergatik eman zenuten urrats hori?
Eder Mendoza: Ikusten genuen auzoan ez zegoela ordezko egokirik Mikelats elkarteaz arduratzeko.
Maider Kortabarria: Ez zegoen inor prest urrats hori emateko, eta azkenean gure ingurukoekin berbetan batu ginen.
Maialen Ibarra: Hemen gauden guztiok bizi izan dugu San Migel Mikelatsekin. Denok uste dugu Mikelatsek bizi handia eman diola San Migeli, eta hori bat-batean kentzea zartada izugarria izango zatekeen. Horregatik eman genuen guk urrats hori.

Erantzukizun handia sumatuko duzue.
M.I.: Bai. Jendea pozik egon da azken urteetan Mikelatsek egin duen lanarekin, eta orain denak berriak garela, ez dakigula batzuetan zer egin behar den… Egia da, aurreko batzordean zeudenengandik laguntza handia jaso dugula, baina sentitzen dugu presio moduko bat, jendeak espero duelako aurretiaz izan duen zerbait, eta maila hori mantentzen ahalegindu gara.
M.K.: Gazteak garenez, askok pentsatuko dute ez garela arduratsuak, baina ez da horrela. Ez gara Mikelats zuzentzera sartu arrazoi barik. Buru-belarri egon gara azken hilabeteetan eta ahal dugun onena egingo dugu.

Aurreko batzordean zeudenengandik laguntza handia jaso duzuela diozue.
E.M.: Bai, asko eskertzen diegu azken 10 urteetan egin duten lana, eta asko eskertzen diegu azken hilabeteetan eman diguten laguntza ere.
M.I.: Denok, bai aurreko batzordekoek zein guk, nahi dugu San Migelentzat onena, gauzak ondo ateratzea, jaiak politak izatea. Eta arazoren bat izan badugu, aurreko batzordekoei deitu eta momentuan bertan lagundu digute.

Mikelatseko batzodekide berriak // Geuria

Zelan ikusi duzue zuen burua lehenik eta behin San Migeleko jaiak antolatzen?
M.K.: Hasieran oso galduta sentitu ginen, eta lanez gainezka. Baina aurrekoen laguntzarekin bidea egiten aritu gara eta ondo moldatu gara.
M.I.: Bai, gidatu egin gaituzte gauzak zelan egin jakiteko. Baina egia da ez dela dena erraza izan. Gazteak gara eta lana, ikasketak edo eskolaz kanpoko ekintzak ditugu, eta denok egun batean batzea zaila da. Guztira 15 lagun gaude batzordean, baina inoiz ez gaude den-denak batera.

Aurtengo jaietako programaz galdetuko banizue?
M.I.: Gauza berriren bat egongo da, baina aurreko urteetako antolakuntza berdina jarraitu dugu aurten. Gauzak aldatu nahi ditugu, baina horretarako denbora gehiago behar dugu. Berandu sartu ginen Mikelatsen, eta berriak izanda, aurten ez dugu astirik izan. Saiatu gara gauzak mantentzen, eta ahal den heinean, gure ustez jendearen gustukoa dena gehituko dugu datozen urteetan.

Zer gauza berri, adibidez?
M.I.: Elektrotxaranga bat ekarriko dugu. Iaz, paella-janaren ondoren egitarauan hutsune handi bat zegoela ikusi genuen eta aurten, egun berean, arratsalde osoan zehar kaleak girotzeko elektrotxaranga bat izango dugu. Bestetik, kontzertuetan ere aldaketa bat egin dugu: lehen bi banda tributu zeuden eta aurten bi erromeria jarri ditugu.

Zaila izan da kontzertuen antolaketa?
E.M.: Kontzertuak antolatzea izan da zailena, bai. Maialenek esan duen bezala, berandu sartu ginen Mikelatsen eta, adibidez, kontzertuak antolatzeko orduan, talde askok jada euren agenda beteta zeukaten. Gero, musika taldeen prezioak ere asko igo dira… Datorren urtean lehenago hasiko gara taldeekin kontaktatzen.

Prezioen gorakada aipatu duzunez, aurrekontuaren zati handi bat kontzertuetara bideratuko zenuten.
M.I.: Bai, kontzertuetara bideratzen da diru gehien. Kontrolatzen egon gara zer egin zitekeen eta zer ez, baina maila ona mantendu nahi genuen. San Migelen kontzertuak beti izan dira garrantzitsuak.

Mezu bat sanmigeldarrei eta jaietan gozatzera etorriko direnei?
E.M.: Animatu daitezela etortzera, ondo pasatzera eta ekintzetan parte hartzera!
M.I.: Gure lehenengo urtea dela, baina espero dugula dena ondo joatea. Eta egunerokoan laguntza ere eskertzekoa dela.

Osorik irakurri