☉ Basauri
“Danbolin Txistulari Elkartean txistuari beste ikuspegi bat ematen ahalegintzen gara”
2015ean Danbolin Txistulari Elkarteak 30. urteurrena ospatuko du. Apirilean kontzertu berezia eskainiko dute Social Antzokian eta eurekin batera hainbat kolaboratzaile igoko dira eszenatokira.
1985eko martxoa. Data horretan sortu zen irabazi asmorik gabeko Danbolin Txistulari Elkartea, Indartsu, Edurre eta Agintzari Dantza Taldeetako txistularien elkartzea gauzatu zenean. Ordutik hona 30 urte igaro dira eta oraindik Basauriko eta inguruko herrietako kaleak txistuaren doinuaz alaitzen dituzte. Urteurrena ospatzeko, apirilaren 18an kontzertua eskainiko dute Social Antzokian.
50. hamarkadan “entzutez” jotzen zuten bizpahiru txistulari zeuden Basaurin eta Rafa Colás klarinete jolearen ardurapean txistulari talde txikia sortu zen. Garai horretan San Migelen ere beste talde bat sortu zen: Patxi Ibarra bizilagunak -morgatarra jaiotzez- txistuaren eta danbolinaren trebetasuna irakasten hasi zen. “Rafa zein Patxi ezinbestekoak izan ziren Indartsu eta Edurre Dantza Taldeen sorreran eta 80. hamarkada hasierara arte txistua jotzen irakatsi zuten San Migel eta Ariz auzoetan”, dio Imanol Pagola Danbolin Txistulari Elkarteko lehendakariak. 1975. urtean Pozokoetxe auzoan Agintzari Dantza Taldea eratu zen. Hala, euskal folkloreko hiru talde basauriarretan berrogehi txistulari inguru zeuden 80. hamarkadan.
Hala ere, baliabide eta irakasle eskasia zela eta, txistu irakaskuntzaren etorkizuna kolokan jarri zen eta 1983an hiru dantza taldeetako txistulariek Basauriko Udalari solfeoa, txistua, danbolina, silbotea eta atabala irakasteko elkartea sortzea proposatu zioten. Urte hartako abuztuan izan ziren uholdeen ondorioz, 1985era arte atzeratu zen Basauriko Udal Txistu Eskolaren sorrera. Eskola horri esker, ikastetxeetan klaseak antolatzen hasi ziren eskolaz kanpoko ekintza moduan. Horiek horrela, “alde batetik banda zegoen eta beste alde batetik txistua irakasteko eskola”, dio Pili Castro zuzendariak. 1994. urtean elkarte ofizial moduan sortu zen Danbolin Txistulari Elkartea.
Basauriko Musika Eskola martxan jarri zenean, Danbolin elkartekoek erabaki zuten txistua irakasteari utziko ziotela: “Izan ere, Musika Eskolan profesionalak daude eta bertan txistua ondo ikasteko errekurtso gehiago egongo zirela pentsatu genuen. Orduan erabaki genuen banda bakarrik izan behar genuela”, dio Castrok. Azken urteotan ikasle kopurua txikiagotu bada ere, Txistulari Taldea egonkor mantendu da eta gaur egun 30 lagun inguru daude: “Gazteenak 25 urte ditu eta helduenak 60 urte”, dio Aitor Ogiza kideak.
Danbolin Txistulari Elkartearen erronka nagusia Musika Eskolako ikasleek euren ikasketak amaitu ondoren bandara salto egitea da: “Horren alde lan egiten ari gara. Adibidez, Social Antzokian emango dugun emanaldian Eskolako hainbat ikaslek parte hartuko dute”.
GAUR EGUNGO MUSIKARA MOLDATUZ
Aitor Ogiza txistulariaren iritziz, gure eskualdean euskal folklorearen egoera ez da orain dela urte batzuetako berbera: “Lehen ume eta gazte gehiagok ematen zuten izena dantza taldeetan, baina gaur egun ikasle kopurua murriztu egin da”. Eskolaz kanpoko ekintza aukera ugari dagoela argudiatu du Pili Castrok, “eskaintza zabalagoa izatean, normala da euskal folklorea irakasten duten lekuetan jende gutxiago egotea”. Hala ere, Imanol Pagolak argi izpia ikusten du: “Basaurin hiru dantza talde ditugula azpimarratu behar dugu. Gainontzeko hiriekin edo herriekin konparatuta, Basauri oso berezia da”.
Egoera horren aurrean, Danbolin Txistulari Elkartean txistuaren munduari beste ikuspegi bat ematen ahalegintzen dira: “Euskal musika lantzen dugu, baina beste motatako musika ere jotzen dugu. Gaur egungo musikara egokitzen dugu txistuaren doinua. Adibidez, apirileko kontzertuan tango bat eta soinu banda bat joko ditugu, besteak beste”.
Pili Castroren esanetan, “txistua zaletasuna da guretzat. Ez gara profesionalak, gu ez garelako txistua jotzetik bizi. Doan egiten dugu gure lana, eta Udaletik edo ekitaldi baten truke jasotzen dugun dirua elkarteko gauzetarako erabiltzen dugu”.
_______________
30 URTE HERRIGINTZAN EMANALDIA SOCIAL ANTZOKIAN
Danbolin Txistulari Elkartea 2010. urtean
Egitaraua guztiz zehazteko zertzelada pare bat falta den arren, 30. urteurrena ospatzeko ekitaldi berezi bat prestatu dute: apirilaren 18an Social Antzokian eskainiko dute kontzertua. “Hiru zatitan banatuko dugu emanaldia: Danbolin Txistulari Elkarteak zati bat egingo du, beste zati bat gonbidatu bezala etorriko den Berriozarreko Doinua bandak eskainiko du eta azkenik -zatirik politena seguraski- bi taldeen arteko nahasketa egingo dugu. Joan den urtean eurekin egin genuen elkartrukea eta aurten eurak Basaurira etorriko dira”, dio Pili Castrok.
Era berean, kontzertuan zehar, bai Danbolinen zatian bai Doinua bandarekin batera egingo duten zatian, kolaboratzaileak izango dituzte: pianoa, soinua, kontrabaxua, Basauri Koral Elkartea eta Zirzira abesbatzak, Agintzari, Basauritar eta Edurre Dantza Taldeak, Bizkaiko Gaiteroak eta Musika Eskolako ikasle batzuk, besteak beste: “Oso ikuskizun polita izango da, behin bakarrik egingo dugulako”.
Social Antzokiak berak prestatu du “30 urtez herria eginez” lema eta kartela. “Sorpresa izan da guretzat. Guk ez genuen horren berri eta oso gustura gelditu gara hautatu duten lemarekin”, dio Imanol Pagola lehendakariak.
Atzo eman zioten hasiera ‘El Conquistador’ saioaren 21. edizioari ETB2n. Aurten 37 lehiakidek hartuko dute parte, tartean, Maider Marcos bilbotarrak.
Basauri Eskubaloi Taldeko jokalaria da Maider: Zilarrezko Ohorezko Mailako talde seniorrean dabil.
Maiderrek 22 urte ditu eta eskubaloian jokatzeaz gain, gimnasta ere bada.
‘El Conquistador’ astelehenero emango dute ETB2n, 22:30ean.
Hego Uribeko zenbait herritarrek hartu dute parte ‘El Conquistador’ saioetan. Galdakaoko Mertxe Cornago (2007), Egoitz eta Ekaitz Rios (2010 – Egoitz irabazle), Nekane Arroyo (2012 eta 2020), Mari Carmen Alvarez (2013) eta Aritz Irusta (2023); Zaratamoko Riki Rekalde (2016); Ugaoko Aiskander Jauregi (2017, – bigarren sailkatua); eta Basauriko Alazne Gomez eta Alvaro Jimenez (2023).
Kapitain bezala ere izan zen Patri Espinar usansolotarra (2019ko eta 2020ko edizioetan).
☉ Basauri
Hitz-erdiko Kontaketak lehiaketak euskarazko ipuin laburrak jasoko ditu martxoa bitartean
Lehiaketaren zortzigarren edizioan parte hartzeko lanak urtarrilaren 15etik martxoaren 15era bitartean jasoko dituzte. Saritan 750 euroko bonuak banatuko dituzte
Hitz-erdiko Kontaketak lehiaketaren zortzigarren edizioa abiatuko du Zirt Zart Basaurik. Urtarrilaren 15etik martxoaren 15era bitartean jasoko dituzte euskarazko ipuin laburrak, gehienez 100 hitzekoak, zirtzart.basauri.eus webgunearen bitartez.
Aurten “Erabaki zuzena hartu ote nuen?” izango da ipuinek izan behar duten hasiera, antolatzaileek hala erabakita, eta esaldi horretatik abiatu beharko dituzte lanak.
Lehiaketa 12 eta 35 urte bitarteko gazteei dago zuzenduta eta asmoa da idazmenean interesa dutenen talentua aurkitzea.
Guztira bost sari banatuko dituzte: lehen sailkatuak 200 euroko bonua jasoko du, biharrenak 150 euroko bonua, hirugarrenak 100 euroko bonua, eta Elkar sariaren zein Basauri sariaren irabazleek bakoitzak 150 euroko bonuak jasoko dute.
Elkar sarian 12-17 urte bitartekoen proposamenak baino ez dituzte aintzat hartuko eta Basauri sarian herrian erroldatua egon beharko da parte hartzailea. Ipuin sarituak GEURIAn argitaratuko ditugu, bai paperezko alean zein webgunean.
Basauriko Udalaren Gazteria arloak antolatzen du lehiaketa eta Elkarren eta GEURIAren laguntza du. 2018an jarri zuten martxan lehiaketa eta urtetik urtera hazi egin da, ez bakarrik Basaurin, baizik eta Euskal Herri mailan ere.
Datuak datu, eta lehiaketak izan dituen formatu desberdinak tarteko, lehenengo edizioan 89 kontakizun jaso zituzten, bigarrenean 83, hirugarrenean 54, laugarrenean 204, bosgarrenean 288, seigarrenean 149 eta zazpigarrenean 155.
Iaz honako hauek izan ziren sarituak: Rebeca Fernandez Rueda (Barakaldo), Irene Izaguirre Chaparro (Villabona), Olatz Noberan Gartzia (Ondarroa), Andere Ramirez Garcia (Laudio) eta Izaskun Herce Quintana (Basauri).
Europara begira jarraitzen du Basauriko Urbi Institutuak. Ikasturte honetan arteari buruzko eTwinning proiektua ari dira gauzatzen: ArThenea proiektua, alegia.
Europako sei ikastetxetako ikasleak ari dira proiektuan parte hartzen: Kretako Chania hiriko Geniko Lykeio Akrotiriou (Grezia), Alsaziako Mulhouse Lavoisier (Frantzia), Asturiasko Mieresko Sanchez Lastra (Espainia), Pilseneko Gymnázium Lud´ka Pika (Txekiar Errepublika), La Reunion uharteko Lycée Jean Hinglo (Frantzia) eta Basauriko Urbi Institutua.
Proiektuaren barruan, abenduaren 2tik 8ra bitartean Basauriko ikasleak eta irakasleak Alsaziara joan ziren, eta abenduaren 10etik 15era Greziakoak Basaurira etorri ziren bisitan. “Esperientzia zoragarria, ikasleentzat ahaztezina”, adirazi dute Urbiko ordezkariek.
“Urbiko ikasleek, proiektua komunean lan egiteaz gain, euskal ohiturak, geografia, kultura, hizkuntza, monumentu enblematikoak eta altxorrak ezagutzera eman diete kanpotarrei. Bestalde Mulhouserako bisitan basauritarrak Europar Parlamentua bisitatatzez gain, Alsatziako Gabonetako merkatuak, ohiturak eta kultura ezagutzeko aukera izan zuten”, diote.
☉ Basauri
Artunduaga kiroldegiko aparkalekua berriro asfaltatzeko 123.000 euro bideratuko ditu Basauriko Udalak
Basauriko Udalak 527.000 euro bideratuko ditu herriko hainbat gune berriro asfaltatzeko: Soloarte kaleko aparkalekua eta Fleming Doktorea eta Menendez y Pelaio kaleak (97.000 euro); Artunduaga kiroldegiko aparkalekua (123.000 euro); eta Artunduaga kaleko errepidea Bilbondorantz (307.000 euro).
Gainera, Gabonak baino lehen errepide hauetako zuloak konpondu zituen Udalak: Basauritik San Migeleraino errepidearen zorua, Garbiguneko errepidea eta Urbi eta Gudarien kaleetakoa. Lan horietan inbertsioa 89.000 eurokoa izan da.
☉ Basauri
Basauriko Gomazko Paleta Txapelketak 27 bikote neurtuko ditu urtarriletik martxora bitartean
Basauriko Gomazko Paleta Txapelketari ekingo diote urtarrilean 27 bikotek. Bidebieta Pilota Taldeak antolatuta, aurtengoa 36. edizioa da.
Lehen eta bigarren mailako pilotariak neurtuko dira bikoteka txapelketan. Hori Hori (Elorrio), Artepe (gatika), Getxo, Amurrio, Alaitasuna (Bakio), Arteaga (gautegiz-Arteaga), Erdu Pilotan (Zornotza), Pagazpe (Usurbil), Galipa (Zierbena), Olarreta (Larrabetzu), Danak Bat (Mungia) eta Lea Ibarra (Munitibar) klubetakoak dira jokalariak.
Bigarren mailako kategorian 15 bikote lehiatuko dira, eta lehenengo mailan 12 bikote.
Txapelketa urtarrilaren 12an hasiko da martxoaren 30ean izango dira finalak. Partida guztiak igande guztietan jokatuko dira, arratsaldetan, Artunduagako frontoian.
Txapelketa osoko partidu bakoitzean pilotaririk onenaren saria banatuko du Bidebieta Pilota Taldeak.
Maialen Sanchez arrigorriagarrak urrezko domina eskuratu du Taekwondoko Bizkaia kopan
Etxebarriko kiroldegiko tarifak urtean 4 eta 11 euro artean igo dituzte
San Antonio eguna ospatuko dute Zeberioko Barañao auzoan
Argazkiak / Errege Magoen magiak etxeko txikienen ilusioa piztu du beste urte batez
Argazkiak / Jende andanak harrera egin die Errege Magoei Basaurin
Argazkiak / Euriak ez du Arrigorriagako txikienen ilusioa zapuztu Olentzero eta Mari Domingiren etorreran
Gorka Perez: «Mendiko artzaintza galtzen ari da eta han behar dira, hain zuzen ere, txakurrak»
Aztarnak Muralismo: «Denborak, esperientziak eta zailtasunek muralismoaren sormen-artean zaildu gaituzte»
