☉ Basauri
Unai Etxebarria: “Bideoak ikusiz eta ikusiz garatu dut hobeto jotzeko abilezia”
Koldo Etxebarria ‘Kurrux’ du aita Unaik. Berarekin hasi zuen ibilbidea: trikitilari kaleetan, Arizgoiti taldearekin oholtzan eta orain Atzekabe taldean. Iazko udan 25 kontzertutik gora eman zituzten
Txikitatik musika zainetan eraman duen mutila da Unai Etxebarria (Basauri, 1993). Bere aitarekin triki-pandero bikote bezala aritu da Basauriko kaleetan barrena, baita Arizgoiti Erromerian kontzertuak ematen ere.
Noiz hasi zinen musikan?
Urtebeterekin pianoarekin hasi nintzen trasteatzen eta gero hiru urterekin hartu nuen nire lehenengo trikitixa. Aita alboan egonda berarengandik jaso nuen hau jotzeko oinarrizko jakintza, geroztik bakarrik aritu izan naiz bideoak ikusten abilezia hobetzeko eta beste musika-tresna batzuk jotzen ikasteko. Orain kitarra, trikitixa eta panderoa jotzen ditut, baina dudarik gabe, nire grina abestea da, horrek bizia ematen dit eta nire sentimenduak kanporatzeko instrumenturik zuzenena da.
Noiz hasi zinen zure aitarekin jotzen?
Etxean betidanik, batez ere gabonetan edo urtebetetzeetan, baina profesionaltasunez edo, hamalau urterekin hasi nintzen berarekin kalejiretan trikitixa eta panderoa jotzen. Boloa geneukan bakoitzean nire lagunak utzi eta berarekin joateko erantzukizuna hartu nuen; hau ia astebururo errepikatzen zen. Beraz, esan dezaket nire gaztaroa jo eta jo izan dela, musikan sakonki sartuta. Egia esan, denbora gutxi pasatu izan dut lagunekin eta gaur egun ere antzera nabil, baina musika niretzat oso garrantzitsua denez eta horrekin hazi naizenez, ez dut ikusten beste bizimodurik.
Dena den, honi ez diot hainbeste garrantziarik ematen boloekin jende piloa ezagutzen delako eta, beraz, ez naizelako bakarrik sentitzen. Gainera askotan lagun hobeak egiten dira denbora laburrean giro berean sartuta egondakoekin, denbora luzean alboan bizi izan direnekin baino.
Hamazazpi urterekin Arizgoiti Erromeriarekin jotzen hasi nintzen baina bi edo hiru urte baino ez nintzen egon; utzi behar izan nuen nire gauzak ikasteko eta deskantsatzeko astirik ez neukalako. Egun, noizean behin haiekin jotzera gon- bidatzen naute eta pozik parte hartzen dut oso etapa polita moduan gogoratzen dudalako hura.
Bizi izan al duzu beldur eszenikorik?
Bai, gogoratzen dut Basauriko San Fausto batzuetan, hamabost urterekin gutxi gorabehera, aitarekin jo nuela erromerian ordubeteko kontzertu batean eta oso txarto pasatu nuela, baina geroztik zorionez ez dut izan arazorik. Poliki-poliki kon antza hartzen joan nintzen eta gogoz eta indarrarekin igotzen hasi nintzen oholtza gainean den-dena uzteko eta topera disfrutatzeko helburuarekin.
Zelakoa da aitarekin talde berean jotzea?
Berarekin pasatzen dut ia denbora guztia eta azkenean egia da nire aita dela, baina horrez gain lagun mina ere bada; berarekin ez daukat ia sekreturik. Berak nire aitonarekin eta nire aitonak nire birraitonarekin edukitako harremana daukagu; haiek ere musikariak ziren eta elkarrekin jotzen zuten, azken nean, aita-seme, anai-arreba, lagun minak.
Gure kontraesanak ditugun arren, harreman oso polita daukagu eta jotzen ari garenean begirada batekin badakigu zer egin nahi dugun, urteekin lortu dugu musika-tresnekin hitz egiteko beharrik ez izatea.
2014ean Arizgoiti Erromeriarekin jotzen amaitu eta gero zertan ibili zara?
Aitarekin bikote moduan trikitixa eta panderoa jotzen jarraitu nuen arren, konposatzen hasi nintzen eta nire ustez letra onak zirenez kalera atera behar nituen. Uda horretan bi lagunekin lotu eta Atzekabe sortu zen. 2015eko udan bonbazoa izan zen, hogeita bost bat kontzertu eman genituen, maketa txikitxo bat grabatu genuen eta aurten diska bat ere prozesuan daukagu.
Hainbeste kontzerturekin ba al daukazu bidaiatzeko astirik?
Oso gutxi egia esan, baina saiatzen naiz urtean astebete hartzen irteeratxo bat egiteko. Adibidez, aurreko urtean Italian izan nintzen, Erroman hain zuzen ere, baina aprobetxatu nuen bideoklip bat grabatzeko; beraz, bidaiak pixka bat deskonektatzeko diren arren, badaukate lanarekin harremanik.
Uda honetan ETB-1eko Kantugiro saioan ikusi zintugun, zelakoa izan zen esperientzia hori?
Esperientzia oso polita izan zen, Gernikan egindako soian parte hartu nuen Nun Hago abestia interpretatuz. Lagun asko egin nituen, baina harremanik estuena batez ere irabazi zuenarekin izan nuen eta badaukagu elkarrekin zeozer grabatu eta internetera igotzeko proiektua. Beraz nahi izanez gero hor ikusi ahal izango nauzue. Bestela, espero dezagun edozein herriko jaietan oholtza gainean elkar ikustea, hori musikan jarraitzen dudan seinale izango da, seinale ona beraz.
Urtarrilaren 25ean, larunbatez, GKSk manifestazioak deitu ditu Bilbon eta Iruñean (18:00, Jesusen Bihotza plazatik), ‘Gerraren eta faxismoaren aurka, gazte langileok lehen lerrora’ lemapean.
Mobilizatzeko deialdia zabaltzeko helburuarekin, Basaurin eta Galdakaon mural-margoketak antolatu dituzte gaur, urtarrilak 18: goizean Basaurin eta arratsaldean Galdakaon.
Muralaren diseinua Elene Uribarri galdakoztarrak egin du eta Basaurin dozena bat gazte batu dira.
Eguerdian batu dira Bentako plazan Basauriko GKSko dozena bat gazte // Geuria
Olatz Galindez Verano Hego Uribeko GKSko kidearekin berba egin dugu goizean Basaurin: “Azken aldian eskualdean hedatzen ari dira faxismoari bidea ireki ahal dioten ideia erreakzionarioak, konkretutik, arrazistak eta matxistak. Adibidez, Basaurin pintada arrazistak agertu dira eta Arrigorriagan eraso arrazista bat eman zen abenduan”.
“Faxismoa langile klasearen aurkako ideologia eta praktika bezala identifikatzen dugu, eta sektore zaurgarrienak kolpatzen ditu; batez ere, migranteak, emakume langileak eta LGTBI kolektiboak. Horregatik, horren aurrean ikusten dugu beharrezkoa dela kaleak hartzea eta gurekin mobilizatzera animatzen zaituztegu”, dio Galindezek.
☉ Basauri
Basaurik 82.000 euro gastatu behar izan zituen 2024an ekintza bandalikoek eragindako kalteak konpontzeko
Zenbateko osoaren erdia baino gehiago, 45.800 euro, Solobarriako karpako pintadak eta olana konpontzeko erabili zituen iaz Basauriko Udalak
2024an zehar herrian izandako ekintza bandalikoek eragindako kalteak konpontzeko 82.000 euro gastatu zituen Basauriko Udalak.
Datuak datu, kalte hauek ordaindu zituen iaz Udalak:
- Eraikinetako hormetako edo Solobarriako karpako pintadak kentzeko: 45.800 euro
- Erre zituzten 10 edukiontzi ordezkatzeko: 12.000 euro
- Igogailuak konpontzea: 11.844 euro
- Bizkotxaldeko parkeko sareak eta segurtasun-zoru berriak konpontzeko: 7.477 euro
- Arrapala mekanikoetako beiren haustura konpontzeko: 4.260 euro
- Komun publikoetan egindako ekintzak garbitzeko: 1.016 euro
“Ekintza horiek kalte handiak sortzen dizkiete zuzenean basauriar guztiei, espazio publiko partekatuak hondatzen dituzte eta herritar guztiengan eragin duen aparteko gastua dakarte”, diote udal ordezkariek: “Adibidez, norbaitek nahita eragitea igogailuek eta arrapala mekanikoek ibiltzeari utz diezaioten izugarrizko kaltea da mugikortasun murriztua duten bizilagun askorentzat”.
Gauzak horrela, Basauriko Udalak dei egiten die gizalegerik gabe jarduten duten edo beren ardurapeko pertsonei hori egiten uzten dieten herritar gutxi horiei, eta eskatzen die haien ekintzen ondorioez jabe daitezen.
Pirritx, Porrotx eta Marimotos pailazoek ‘Euskararen zuhaitza’ oparitu zieten iazko maiatzean Basozelaiko Beat taldekoei. Pago bat da eta Sagarrak talde ekologistaren laguntzarekin, abenduan landatu zuten auzoan.
Ekitaldira bertaratu ziren. “Landatu dugun pago txiki honek, Euskararen zuhaitza, hazi egingo da eta horrekin batera euskararen erabilerak ere egingo du gora gure auzoan”, diote Beateko kideek.
Sagarrak taldeko ordezkariak kultura guztietan zuhaitzek balore sinboliko handia dutela nabarmendu zuen: “Euskal Herrian bi zuhaitz nagusi ditugu: haritza eta pagoa. Zuhaitzek eta basoek, hizkuntzak eta kulturak bezala, lurra behar dute sustraiak landatzeko. Zuhaitza hazi egingo da gu apenas konturatu gabe, eta espero dezagun ere euskal hiztunak ere haztea zuhaitzarekin batera”.
☉ Basauri
Bizkaiko Buruz buruzko esku pilota txapelketako finalak jokatuko dituzte larunbatean Basaurin
Basauriko Bidebieta Pilota Taldetik bi ordezkari izango dira finaletan: Jon Aperribai kadete mailan eta Eva Martinez emakumezkoen kategorian
Bizkaiko Buruz buruko esku pilota txapelketako finalak hartuko ditu Basaurik urtarrilaren 18an, larunbatez, Artunduagako frontoian, 10:00etatik aurrera.
Lau final jokatu dira: kadeteak, gazteak, emakumeak eta nagusiak.
Basauriko Bidebieta Pilota Taldetik bi ordezkari izango dira finaletan: Jon Aperribai kadete mailan eta Eva Martinez emakumezkoen kategorian.
Aperribaik, gainera, Hego Uribe eskualdeko aurkaria izango du aurrean: Zaratamoko Upo Mendi klubeko Oier Gil.
Lau final
Urtarrilak 18, larunbata
Artunduagako frontoia · 10:00
Kadeteak (3. maila): Jon Aperribai -Bidebieta- vs Oier Gil -Upo Mendi-
Gazteak (3. maila): Galder Buruaga -Lagun Artea- vs Aratz Diez -Olaburu-
Emakumezkoak: June Agirrebeitia -Durango- vs Eva Martinez -Bidebieta-
Nagusiak (3. maila): Markel Cabello -Lezama- vs Enaitz Arandia -Danak Bat-
☉ Basauri
38 urteko gizon bat atxilotu dute Basaurin beste pertsona bati pistola batekin mehatxatzeagatik
Ertzaintzak 38 urteko gizon bat atxilotu du Basaurin, beste pertsona bati pistola batekin mehatxatzeagatik eta gertakarian parte hartu zuten agenteen aurka jotzeagatik.
Gertaerak atzo arratsaldean jazo ziren. Bakoitza bere ibilgailuan zihoan eta atxilotua modu arriskutsuan gidatzen zegoenez, atzetik zihoan gidariak argi-keinuak egin zizkion.
Aurretik zihoan gidariak orduan pistola atera zuen leihotik eta airera tiro egin zuen, eta ondoren, beste gidariaren aurka apuntatu zuen “modu mehatxagarrian”, Segurtasun Sailetik adierazi dutenez.
Gertaera horren ondoren, bistatik galdu ziren Basaurira iritsi arte. Bertan, biak beraien ibilgailuetatik jaitsi ondoren, berriro topo egin zuten, eta arma zeramanak berriro erabili zuen, mehatxu gehiago eginez.
Biktimak Sos Deiakera deitu zuen eta Ertzaintzako agenteak berehala bertaratu ziren eta ustezko egilea identifikatu zuten.
Identifikatzerako orduan, atxilotuak agenteen aurka egin zuen irainekin eta heriotza-mehatxuak egin zizkien.
Ertzainek ikusi zutenez, atxilotuak alkohola kontsumitzearekin bateragarriak ziren sintomak zituen eta minutu batzuk lehenago ibilgailua gidatzen ari zenez, agenteek alkoholemia-proba egin zioten: baimendutako tasa baino askoz ere handiagoa eman zuen. Gauzak horrela, bide-segurtasunaren aurkako delituagatik ere eginbideak ireki dizkiote.
Bideoa / Gerraren eta faxismoaren aurkako murala margotu du Hego Uribeko GKSk Basaurin
Iker Lopez eta Loren Oliva Etxebarriko alkateak ikertuko dituzte, ‘udaltzain faltsuaren kasuan’
Euskaraldia antolatzeko lehen bilera deitu dute Galdakaon urtarrilaren 22an
Argazkiak / Errege Magoen magiak etxeko txikienen ilusioa piztu du beste urte batez
Argazkiak / Jende andanak harrera egin die Errege Magoei Basaurin
Argazkiak / Euriak ez du Arrigorriagako txikienen ilusioa zapuztu Olentzero eta Mari Domingiren etorreran
Bideoa / Gerraren eta faxismoaren aurkako murala margotu du Hego Uribeko GKSk Basaurin
Gorka Perez: «Mendiko artzaintza galtzen ari da eta han behar dira, hain zuzen ere, txakurrak»
