Sareak

☉ Basauri

Emakumeak Aniztasunean elkartea ere euskararekin bat

|

basauri emakumeak aniztasunean be bagara 2015

Laugarren urtez ospatuko da aurten Basaurin Be Bagara jaia eta Euska­rabila Elkarteak laguntza eskatu dio Emakumeak Aniztasunean elkartea­ri: “Bai Euskarabilak bai guk Basau­rin euskararen erabilera sustatze­ko ahaleginak egiten ditugulako jo dute guregana, dio Francy Fonseca Linares Emakumeak Aniztasunean elkarteko zuzendariak: “Gure el­kartean munduko edozein tokitako emakumeak gaude, ez dakigu eus­karaz, baina hizkuntzarekiko jarrera baikorra daukagu, euskara ikastaroa egin genuen eta gure seme-alabak D ereduan matrikulatzen ditugu”.

Azaroaren 29rako Euskarabilak prestatu duen jaian Emakumeak Aniztasunean elkarteak bi ekintze­tan hartuko du parte. Alde batetik, pankarta bat egingo dute Basaurin Be Bagara lemarekin: “Patchwork bat egingo dugu, hau da, ehun ez­berdinetako zatiak lotu eta josi egingo ditugu. Eta, noski, edozei­nek parte har dezake ekimenean”, dio Francyk. Apirila bukatu arte, asteartetan (18:00etatik 20:00eta­ra) eta asteazkenetan (10:00etatik 12:00etara) Echando Raices zen­troan elkartuko dira. “Lemako letra bat josi barik utziko dugu, azaroaren 29an Solobarria plazan bertan jos­teko”, dio Francyk.

Bestetik, kontakizun labur bat egingo dute: emakume migratzai­leen esperientzia kontatuko duen istorioa, alegia. Irailetik aurrera ha­siko dira narrazioa eratzen, euskara­tu egingo dute eta jaian antzeztuko dute.

2008TIK EMAKUMEAREN AHALDUNTZEA BULTZATZEN

Orain dela zazpi urte sortu zen Emakumeak Aniztasunean elkartea. Jatorri ezberdineko hogei emaku­me inguruk osatzen dute elkartea; basauriarrak ere badaude. Geroztik, hainbat jarduera burutzen dituzte 2010ean sortutako Echando Raices Kulturen Arteko Zentroan. “Hizkun­tzak ikasteko ikastaroak (arabiera, ingelesa, frantsesa) edo laguntza eskolarra euskaraz ematen ditugu. Gainera, doako ekintzak ere anto­latzen ditugu: coffe break, zinema forum eta erakusketak, besteak beste”, dio Francy Fonseca zuzen­dariak. Emakumearen ahalduntzea formazioan, orientabidean edo atentzioan bultzatzea dute xede nagusi.

☉ Basauri

Etxebarria aita-seme trikitilariek ‘Familia gara’ disko berria aurkeztu dute Social Antzokian

Gaur aurkeztu dute disko berria Basauriko antzokian. Inaxio Perurena harrijasotzailea gondidatu izan dute aurkezpenean

|

Unai eta Koldo Etxebarria Inaxio Perurenarekin Social Antzokiko oholtzan // Geuria

Etxebarria aita-seme trikitilariek disko berria kaleratuko dute: ‘Familia gara’. Lan berria Durangoko Azokan abenduaren 6an kaleratu aurretik, diskoaren aurre-aurkezpena Basaurin egin nahi izan dute bi basauriarrek.

Gaur, azaroak 29, 13:00etan Social Antzokian egin dute aurkezpena. Bertan Inaxio Perurena harrijasotzailea eta laguna izan dute gonbidatu. Besaulkietan etxebarritarren lagunak, senideak eta ezagunak egon dira.

Sorpresak, bertsioak eta abesti propioak

Diskoak 12 abesti ditu, euskarazko, gaztelerazko eta ingelesezko kantekin. ‘Familia gara’ lan berrian oinarrizko euskal estiloari heldu diote: “estilo dantzagarriak, baladak, koplak, rantxerak eta rock doinuak entzun daitezke, eta baita indar handiko bertsioak ere”, diote.

“Sorpresak, bertsioak eta abesti propioak ere ez dira faltako! Esaterako, ‘Sorioneku familia gara’, Euskal Herria eta gure kulturaren batasuna elkartzen dituen abestia”. Abesti horren bideoklipa 2023ko martxoan argitaratu zuten, eta bertan agertzen da, besteak beste, JJ Vaquero bakarrizketagilea.

‘Loretxoa’, ‘Ikusi mendizaleak’ eta ‘Let it be’ abestien bertsioak ere jasoko ditu lan berriak. Trikitixa eta panderoa dira instrumentu nagusiak eta horiekin batera akordeoia, kitarra, baxua, teklatua, sintetizadoreak eta bateria ere entzun daitezke.

Diskoa salgai egongo da Durangoko Azokan 15 euroan.

Osorik irakurri

☉ Basauri

Sinadura bilketa hasi dute Kareagan pediatria zerbitzuan murrizketarik ez egiteko

|

Kareagako anbulatorioan hasi dute sinadura bilketa gaur // Geuria

Kareagako eta San Migeleko pediatria zerbitzuetan Osakidetzak murrizketak egin dituela salatu dute hainbatetan auzotarrek. Zehazki, San Migeleko pediatrak irailean erretiroa hartu ondoren ez dutela beste pediatrarik kontratatu eta Kareagako bi haur-medikuetatik batek lanaldia erdibitu beharko duela bi anbulatorioetan salatu dute.

Abenduaren 1etik aurrera formalizatuko da neurri hori. Kareaga, El Maño-Basozelai eta Bidebieta auzo elkarteak eta Kareagako eta Gazteluko ikastetxeetako guraso elkarteak euren “kezka” azaldu dute: “Neurri horrek zerbitzuaren kalitatea larriki okertzea dakar”.

Gauzka horrela, sinadura bilketa hasi dute Kareagako osasun zentroan, eta aurreratu dute ekintza gehiago egingo dituztela.

Osorik irakurri

☉ Basauri

Bideoa / ‘Azaroak 25 plaza’ zabaldu dute gaur Basaurin

|

Azaroak 25 dituen honetan Emakumeen kontrako indarkeria ezabatzeko nazioarteko eguna ospatzen da. Basaurin goizean ekitaldia egin dute hemendik aurrera ‘Azaroak 25’ plaza deituko den lekuan, San Pedro elizaren ondoan.

Plazari ‘Azaroak 25’ jartzeko erabakia Udaleko osoko bilkurak aho batez hartu zuen urrian, eta gaur, eguna aprobetxatuta egin dute ekitaldia 12:00etan. Askoa Etxebarrieta Lasherasek, La Pulga Flamencok ikuskizuna eskaini ondoren, Paz Diaz Gonzalez Basauriko mugimendu feministako kide mitikoak plazaren plaka desestali du.

Osorik irakurri

☉ Basauri

Merkatu solidarioa antolatu dute Basaurin, Bielorrusako umeen alde

|

Merkatu solidario bat // Artxiboko irudia, Geuria

Merkatu solidarioa antolatu du Basaurin Acobi elkarteak Bielorrusiako umeentzat dirua biltzeko. Merkatua zabalik dago abenduaren 3ra bitartean Agirre Lehendakaria kaleko 57. zenbakiko lokalean, Herriko Taldeaken ondoan.

Liburuak, jostailuak, tresneria, apaingarriak edota imitaziozko bitxiak bildu eta salduko dituzte lokalean. “Espazioa dela eta, ezin dugu arroparik jaso edo saldu”, diote antolatzaileek.

Merkatu solidarioa zabalik dago astelehenetik larunbatera 18:00etatik 20:30era, eta igandetan 12:00etatik 14:00etara.

“Gerra kontuengatik etortzerik ez dutenez, dirua bidaliko diegi han behar dutena eros dezaten”, diote sustatzaileek.

Osorik irakurri

☉ Basauri

Etxez etxeko laguntza zerbitzuan arreta ordu gehiago eskainiko ditu Basauriko Udalak

|

ELZren erabiltzaileen autonomia pertsonala sustatu nahi du Udalak // Geuria

Etxez etxeko laguntza zerbitzuaren (ELZ) araudia berrituko du Basauriko Udalak. Besteak beste hobekuntza hauek onartuko dituzte azaroko osoko bilkuran: mendekotasun-mailaren bat onartua duten erabiltzaileei arreta emateko ordu gehiago eskainiko dituzte, “nahi izanez gero eta egoerak ahalbidetuz gero, etxean denbora gehiago egon ahal izan daitezen”, dio Maria Larrinaga Gizarte Politikako zinegotziak.

Zehazki, bizikidetza-unitatean kide batek baino gehiagok baldin badute mendekotasun-balorazioa, maila handiena duenari dagozkion orduez gain, mendekotasun egoeran dagoen beste pertsonari dagokion ordu kopurua % 50 handituko dute.

Era berean, desgaitasuna onartuta duten 60 urtetik gorako pertsonek eta mendetasunik onartua ez duten 65 urtetik gorakoek ere gehienez 20 zerbitzu-ordu jaso ahal izango dituzte hilean, aldez aurretik balorazio teknikoa eginda.

“Azpimarratu behar da 85 urtetik gorako pertsonek, bakarrik bizi badira eta familian nahiz gizartean laguntza-sare nahikorik ez badute, erregelamendua onartu ostean, etxez etxeko laguntza eskatu ahal izango dutela hilean gehienez 30 orduz, bestelako baloraziorik egin behar izan barik”, dio Larrinagak.

Arau-testu berrian jasotako hobekuntzen artean, balorazio teknikoaren arabera babesgabetasun-egoeran edo arriskuan, bazterketa-egoeran edo abandonu-egoeran dauden edo tratu txarrak jasaten ari diren pertsonek hilean gehienez 30 zerbitzu-ordu jaso ahal izango dituzte, “betiere etxez etxeko laguntza-zerbitzuak eman ditzakeen prestazioak behar badituzte”, dio.

“Oro har, neurri horien bitartez, ELZren erabiltzaileen autonomia pertsonala sustatu gura dugu eta, horretarako, zerbitzuaren intentsitatea eta malgutasuna areagotzeaz gain, prestazioak konbinatzeko aukera ere handiagoa izango da”, dio Larrinagak.

Osorik irakurri