☉ Arrigorriaga
Enpresa, elkarte eta dendetan euskara sustatzeagatik laguntzak emango ditu Basauriko Udalak

Aurten diru-laguntza eskatzeko epea bi alditan zabalduko da, bai enpresentzat eta bai elkarteentzat. Era berean, euskara ikasleentzat ere bekak emango dituzte Basaurin eta Arrigorriagan.
Basauriko Udalak euskara bultzatu edo sustatzen ari diren enpresei, merkatariei eta elkarteei diru-laguntzak emango dizkie. Enpresek edo elkarteek erabiltzen dituzten testuek euskaraz edo euskaraz eta gaztelaniaz idatzita egon behar dute eta idazkia elebiduna izatekotan, euskarazko testuari lehentasuna emango zaio, bai tamaina aldetik bai ordena aldetik. Behar izatekotan, Basauriko Euskara Zerbitzuak idazkien ikuskatzea egingo du eta hizkuntza-aholkularitza eskaini dute 944 666 312 telefonoan eta euskara@basauri.net posta elektronikoan.
Enpresa zein merkataritza alorrean eskabideak egiteko epea zabalik dago uztailaren 5era arte (euskara sustatzeko ekintzak 2014ko urriaren 1etik 2015eko ekainaren 30era arte egin badituzte) eta bestetik, uztailaren 1etik abenduaren 5era arte (euskaren promozioa 2015eko uztailaren 1a eta azaroaren 30a artean egingo bada).
Elkarteei dagokienez, eskaerak aurkezteko epeak hurrengo datetan itxiko dira: ekainaren 30ean (2014ko abenduaren 1etik 2015eko ekainaren 30a arteko jarduera egin dutenentzat) eta uztailaren 1a eta azaroaren 30a artean (2015eko uztailaren 1etik azaroaren 30era arte euskara promozionatuko dutenentzat).
EUSKARA IKASTEKO BEKAK BASAURIN ETA ARRIGORRIAGAN
Euskaltegi publikoetan zein homologatuetan edo Euska Herriko Unibertsitatean antolatu diren ikastaroetan izena eman duten euskara ikasleentzako diru-laguntzak emango ditu Basauriko Udalak. Subentzio hauetan parte hartzeko interesatuek hurrengo epeak dituzte: uztailaren 10era arte (2014ko urriaren 1etik 2015eko ekainaren 30era arteko ikastaroetan parte hartu dutenentzat) eta urriaren 9ra arte (uztailean, abuztuan eta irailean ikastaroa egingo dutenentzat).
Arrigorriagaren kasuan, Udalak hainbat beka eskainiko ditu: beka arrunta, beka berezia (baliabide nahikorik ez daukaten udal euskaltegiko ikasleei zuzendua) eta lekualdatzeak laguntzeko beka (Abusutik udal euskaltegira joan-etorriak egin behar dituzten lagunei zuzendua). Irailaren 30era arte egongo da zabalik eskaerak aurkezteko epea udaletxean zein Abusu Zentro Soziokulturaleko Herritarren Arretarako Zerbitzuan.
☉ Arrigorriaga
Auzoak, Hirigintza eta Gizarte Ekintza izango dute ardatz Arrigorriagako 2024rako aurrekontuek
Udal gobernuaren asmoa da aurrekontuak abenduko osoko bilkuran onartzea

EH Bilduk, NOAk eta Arrigorriaga Garak osatzen duten Udal Gobernuak abenduko osoko bilkuran onartu nahi ditu 2024rako aurrekontuak, eta oposizioaren “ekarpenen zai” daudela adierazi dute udal ordezkariek.
Aurreko legealdian ez bezala, baina, gehiengo osoa dute, eta ez lukete oposizioko alderdien beharrik kontuak aurrera eramateko.
16.064.210,21 euroko aurrekontua izango da, eta aurreikusten diren inbertsiorik handienak auzoetan, hirigintzan eta gizarte-ekintzara bideratutakoak dira.
Aipatu dituzten proiektuetariko batzuk honako hauek dira: Ollargan auzoa urbanizatzea, udal kiroldegi berria eraikitzeko beharrezkoa den proiektu-lehiaketa egitea, Auzotaxi zerbitzurako zuzkidura edo eskolan inbertsioak egitea.
“Pertsonen bizitzak udal politikaren erdigunean jartzeko konpromisoa” berretsi nahi du udal gobernuak aurrekontu proposamen honekin, eta horregatik gizarte politiketan hainbat berrikuntza planteatzen dituzte; etxez etxeko laguntza zerbitzura bideratutako partida handitzea adinekoentzako edo mendekotasuna dutenentzako zerbitzuaren kalitatea bermatzeko eta hobetzeko; partida berri bat, mendekotasunaren lehen fasean daudenentzako Eguneko Zentroaren zerbitzu berriari aurre egiteko; ZAINDUZ programara bideratutako diru-kopurua handitzea, zaintzaileak zaintzeko erronkari erantzunez; eta gazteei laguntza psikologikoa emateko partida.
Maite Ibarra alkatearen hitzetan “2023-2027 gobernu planarekin koherenteak diren aurrekontu kilikagarri eta arduratsuak” dira, eta “ingurumenarekiko erronkak, auzoak eta egoera zaurgarrietan daudenak babestea” dute helburu.
☉ Arrigorriaga
Osakidetzak Arrigorriagako Osasun Zentroa birmoldatuko du, Udalarekin eraikin berriaren kokalekua bilatzen duen bitartean
Obrek iraun bitartean jarduera osasun-zentroaren atzealdean instalatutako 8 moduluetan egingo da

Osakidetzak oharra kaleratu du Arrigorriagako Osasun-Zentroa birmoldatuko duela esateko, udalarekin batera eraikin berriaren kokalekua bilatzen duen bitartean. Bai udaletik zein langile eta erabiltzaileen aldetik askotan salatu izan da egungo eraikinaren egoera, irisgarritasun arazoei eta instalazioen zaharkitzeari dagokionez. Orain dela hilabete, kasurako, sabaiaren zati bat erori zen.
Azken hilabeteetan hainbat bilera egin dituzte udal ordezkariek eta Osakidetzako arduradunek, azkena joan den astean, eta bide horretan pauso erabakigarria da honako hau.
Osakidetzako arduradunek adierazi dutenaren arabera “eraberritze-lanak zenbait fasetan egingo dira, udalerriko herritarrei une oro osasun-arreta bermatze aldera”.
Obrek iraun bitartean, “obren eraginpean dagoen jarduera osasun-zentroaren atzealdean instalatutako 8 moduluetan egingo da” borobildu dute.
Egingo diren jarduketen artean “sabaia eta estalkia birmoldatuko dira eta eraikinaren zurezko egituraren ondoriozko, batez ere, egiturazko kalteak konponduko dira”.
“Eraberritze-lanekin batera”, zehaztu dute, “Osakidetza eta Arrigorriagako Udala etorkizuneko anbulatorioa eraikitzeko beste kokaleku bat zehazteko lanean ari dira. Garai berrietara egokituko den zentro berri horrek udalerriko herritarren egungo premiak beteko ditu”.
☉ Arrigorriaga
Euskararen Nazioarteko Eguna Abenduaren 4a arte luzatuko dute Arrigorriagan
Kike Amonarrizen hitzaldi batekin bukatuko dira Euskararen Nazioarteko Egunarekin lotutako ekintzak

Azaroaren 28an hasi zen Euskararen Nazioarteko Egunaren programazioa Arrigorriagan, eskola eta institutuko ikasleekin egin diren hainbat ekintzekin.
Asteburuari begira, Disko Txantxa Mugi Boogiek kantuz, dantzaz eta barrez beteko du kantxa urdina gaur arratsaldean, 18:00etan.
Igandean, abenduaren 3an, Euskararen Nazioarteko egunean, herriko plaza hankaz gora jarriko dute Artizarra Musika Eskolak, Estropezu Bertso Eskolak eta Aritz Berri taldeak, eguerdiko 13:00etatik aurrera.
Herritarrek ere protagonismoa izango dute, euskararekin lotutako bizipenak eta esperientziak partekatuko baitituzte arlo, jatorri eta ibilbide ezberdineko arrigorriagarrek.
19:00etan, aldiz, Ekizak kontzertua eskainiko du Lonbo Aretoan.
Bukatzeko, biharamunean, Kike Amonarrizen etorriak, ezagutzak eta umore onak “si yo no sé euskera, ¿cómo le puedo ayudar”? hitzaldi kitzikagarria eskainiko du, 17:00etatik aurrera Arrigorriagako eskolan.
☉ Arrigorriaga
Argazkiak / Euriak ez du greba feminista orokorraren aldarria amatatu Arrigorriagan

Goiz osoan zehar euria bidelagun izan duten arren, horrek ez du Greba Feminista orrokorraren aldarria amatatu Arrigorriagan.
11:00etan herri kafea egin dute herriko plazan, eta ondoren elkarretaratzeak kateatu dituzte Nagusien egoitzan, Osasun Zentroan eta eskolan. Eguerdian bazkaria egingo dute Lamiaenan, eta arratsaldean Bilboko manifestaziora batuko dira.
☉ Arrigorriaga
Bideoa / Leyre Rodriguez gogoratu dute Arrigorriagan, indarkeria matxistaren azken biktima herrian

A25. Emakumeenganako Indarkeriaren Aurkako Nazioarteko Eguna dela eta, Arrigorriagako Udalak eta eragile feministek hainbat ekimen antolatu dituzte hilabetean zehar, herritarrak indarkeria matxistaren inguruan sentsibilizatzeko.
Ekintza horien artean, berezi eta hunkigarrienetakoa Abusun egin da gaur bertan: indarkeria matxistaren biktimak diren emakume guztiei omenaldia egin diete, eta bereziki, Leyre Rodriguez Montero gogoratu dute, Arrigorriagako azken biktima (2015ean erail zuen bere bikotekide ohiak), bere omenez Ollarganeko parkean instalatu duten monolitoan.
Horrez gain, Ollarganeko eta Teodosia Ortega parkeak atondu dituzte, Estatuan hildako emakumeen izenak eta euritako moreak zuhaitzetan jarriz.
Egunarekin bukatzeko, Gazteguneak berdintasunaren aldeko diana antolatu du eta Anarik “Ezta bat gutxiago ere” kontzertua eskainiko du Lonbo Aretoan.