Sareak

☉ Basauri

“Euskararen eta Euskal Herriaren unibertso osoa ekarri du Euskarabilak gurera”

2018an eten zuen bere jarduna Euskarabila Elkarteak. Bi urte geroago ‘Euskarabilaren ahotsak. Basauriko euskara elkartearen lorratza’ liburua argitaratu berri dute.

|

Bi urte baino gehiago dira Euskarabila Basauriko Euskaldunon Elkarteak bere ibilbideari amaiera ematea erabaki zuenetik. 1996an eratu zuten elkartea Basaurin eguneroko bizitzan, euskararen normalizazioan eta erabileran bultzatzeko bilgune gisa; adin, lanbide, ideologia, kolore zein gizarte-esparru guztietako euskaldunak biltzeko, alegia. Bi hamarkada baino gehiago egon zen jardunean Euskarabila.

Barne-hausnarketa egin ondoren hartu zuten ibilbideari amaiera emateko erabakia: “Barne-hausnarketa egin ondoren hartu genuen erabakia 2018ko otsailaren 23an egin genuen ezohiko batzar orokorrean. Gure jardunari amaiera emateaz gain, konpromiso bat ere hartu genuen: elkartearen jarduna eten aurretik, Euskarabilak bere ibilbidean egindakoari buruzko informazioa bildu, ordenatu, euskararen aldeko mugimenduan kokatu eta dibulgaziorako prestatzea”, dio Ludi Viguera Olivan Euskarabilako kide izandakoak. Hain zuzen ere, ‘Euskarabilaren ahotsak. Basauriko euskara elkartearen lorratza’ liburua argitaratu berri dute. Elkarlanean aritu dira Viguera, Garbiñe Ubeda Goikoetxea idazlea eta Alejo Moreno Sainz maketatzailea, Edorta Arana Arrieta, Mari Luz Esteban Galaza eta Txerra Rodriguez Gomez aholkulariekin koordinazioan.

“Pena ematen zigun dena horrela ixteak. Egia esan bizitza horrelakoa da: zaudenean zaude eta ez zaudenean desagertzen zara. Eta elkarteekin are gehiago. Hogeita bi urtez egindako ahalegin kolektibo hori batu egin behar zen eta orduan erabaki genuen liburu bat argitaratzea”, dio Ludik: “Dokumentazio lan itzela egin behar izan dugu. Gauza kuttuna egin nahi genuen, eta lorratz ona utziko ziguna”.

Liburuak bi atal ditu: alde batetik ‘Ahotsak’ eta bestetik ‘Lorratzak’. Lehenengoak Euskarabilaren alde “buru-belarri” aritu direnen bizipenak, sentsazioak eta testigantzak jasotzen ditu. Guztira, hogei elkarrizketa: Isabel Bizkarguenaga Romero, Jesusmari Amundarain Urkola, Edu Castaño Garrido, Alvaro Rabelli Yanguas, Joxean Pelea Martinez, Iñigo Isuskiza Arana, Rober Gonzalez Garcia, Karmele Albisu Soroa, Hilario Mozo Martinez, Bego Larrea Azkuenaga, Miren Urretxu Santamaria, Isa Castillo Etxano, Alberto Delgado Fernandez de Ganboa, Ainhoa Cabrera Abejonar, Jesus Gomez Picon eta Irati Gomez Aranberri, Azucena Cabezudo Rubio, Amaia Aurrekoetxea Legorburu, Txerra Rodriguez Gomez eta Ludi Viguera Olivan. Bigarren atalean, datu jakingarriez gain, garaian garaiko irudiak eta Aikor! barne-buletinean bildutako informazioa aurki daitezke.

ESPERIENTZIETATIK GOGOETARA. Garbiñe Ubeda tolosarrak Euskarabilaren historia kontatu du liburuan. “Edorta Arana EHUko irakasle eta lagunak proposatu zidan Euskarabila Elkartearen ibilbideari buruz liburua idaztea. Hasieran ez zegoen batere zehaztuta lana, ez zer egin behar zen ezta nola egin behar zen ere. Unibertsitateko zenbait ikaslek hasi zuten lana baina erdibidean gelditu zen. Orduan, ikasle horiek egindakoa aprobetxatuz, lanean hasi ginen”, dio Garbiñek.

“Nik oso argi neukan hainbeste urte egin dituen talde batek arrasto luzea utzi behar izan duela: ekintza asko eta gauza asko, alegia. Talde horren arima, grina, sentipenak nahi nituen jaso liburuan, eta hori islatzeko modurik errazena elkarrizketa lasaiak dira, galdera zehatzik gabekoak”, dio Garbiñek: “Militante eta kide oso aktibo izan ziren horien hitzak jasotzen dira liburuan: haien gogoak, grinak edota ezinak”.

Garbiñek dio liburuan garbi ageri dela egon den ezintasuna: “Ez bakarrik Basauri delako. Beste edozein herritan gauza bera topatuko duzu, errealitatea hori delako. Euskarari garrantzia eman nahi diozu, erdigunean jarri, erabilera sustatu, baina ezinean zaude, ez dagoelako zure esku. Eta ez da ezkortasuna, errealitateari fokua jartzea da, beldurrik gabe. Eta esan bideak badaudela. Gero, emaitza kaxkarra dela? Bai, baina emaitza bat da, eta hori dauka erakusteko Euskarabilak”.

Bestetik, Euskarabilak herritik at egin duen lana ere goraipatu du Garbiñek: “Euskaren mundutik nator ni, baina maila nazionalera begira, ez oinak herri batean dituen talde batetik. Alde horretatik erronka polita izan zen niretzat, eta konturatu nintzen herri bateko talde batek agian beste talde nazional batek baino ikuspegi nazionalagoa duela. Ikusi besterik ez dago zer lotura sortu dituzten zuberotarrekin, nola lagundu dituzten beste ikastola batzuk. Zentzu horretan, euskararen eta Euskal Herriaren unibertso osoa ekarri du Euskarabilak Basaurira”, dio Garbiñek.

EUSKARABILA, TESI BATEKO ARDATZ. Txerra Rodriguez Gomez deriotarra aholkulari lanetan izan da ‘Euskarabilaren ahotsak. Basauriko euskara elkartearen lorratza’ liburuaren prozesuan. 2015etik 2016ra bitartean Parte-hartze eta Garapen Komunitarioari buruzko masterra egin zuen EHUn eta master amaierako lana Euskarabilaren inguruan egin zuen: “Euskara elkarteen inguruko doktore tesi bat egitea pentsatu nuen, eta etxetik hurbil neukan bat aukeratu nuen: Euskarabila. Batez ere 2011n elkarteak egindako barne-hausnarketa horren ondorioz. Interesgarria iruditzen zitzaidan ibilbide luze samarra zeukan euskara elkarte bat aztertzea, zelan bidean nolabaiteko txiribuelta eman zuen”, dio Txerrak.

“Galdetegi bat bidali nien 30 pertsonari. Horietatik hamar Euskarabilan zuzenean inplikatutakoak ziren, beste hamarrek gauza puntual batzuetan parte hartu ohi zuten, eta beste hamar Euskarabilatik kanpo zeuden”, dio Txerrak: “Lerroburuei dagokienez, alde batetik 2011n elkarteari buelta bat ematea lortu zen. Batez ere egiteko moduan edota ekintzetan, baina aldi berean, ez ziren gainditu aurretik elkarteak zituen arazo batzuk. Hala nola, beste jende batengana heltzea eta elkartearen inguruan jende gehiago inplikatzea. Eta hori izan da Euskarabilaren jarduna etetearen arrazoi nagusienetako bat”.

BASAURIN BE BAGARATIK AMAIERARA. Euskarabilak 2018an eten zuen bere jarduna, baina amaiera “askoz ere lehenagotik” zetorrela dio Ludik: “2011rako taldea oso ahulduta zegoen, baina azken ahalegin bat egin nahi izan genuen. Topagunearen laguntzaz, gogoeta saio batzuk antolatu genituen ez bakarrik Euskarabilan momentu hartan zegoen jendearekin baizik eta esparrua gehiago zabalduz. 30 bat lagun batu ginen eta oso gogoeta interesgarria izan zen. Euskarabilaren helburu argia zen taldea indartzea eta neurri batean esan daiteke indartu zela, denon artean erabaki genuelako egin behar zela zerbait ikusgarria, harro sentiaraztekoa, eta herrian hemen gaudela oihukatzeko izango zena”, dio Ludik. Eta horrela sortu zuten 2012an Basaurin Be Bagara ekimena.

2012tik 2017ra bitartean urtero, Euskararen Egunaren harira, formatu ezberdineko jaiak antolatu zituzten. “Horrek agian, kalera begira, ez zuen erakusten Euskarabilak benetan barruan zuen indar falta. Egun handiak ziren beti, partaidetza handikoak, zoriontasunekoak, eta bolo-bolo ibiltzen zen ekimena zen. Baina barruan ez zegoen indarrik eta nik uste dut 2018an heldu zela momentua atea ixteko”, dio Ludik.

“Euskarabila Elkarteak amaitutzat eman du bere ibilbidea. Hemendik aurrerako erronken aurrean —adibidez, Euskaraldia— nola erantzun, euskaltzale bakoitzaren baitako erabakia izango da, baina zalantzarik ez izan zeregin ugari daukagula oraindik Basaurin euskararen normalizazioa lortzeko. Jarraitu euskararen bila, txarto egindakoak barkatu eta ondo egindakoak gogoan hartu”, dio Ludik.

San Fausto Digitala inprimategian (Agirre Lehendakaria, 2) jaso ahal izango du alerik interesa duenak, agortu arte

☉ Basauri

Haurreskola publiko berri bat eraikitzea proposatu du Basauriko EH Bilduk gerakinarekin

|

Basaurin bi haurreskola publiko daude: bata Basozelain eta bestea San Migelen (argazkikoa) // Geuria

Basauriko Udalak 15,6 milioi euroko gerakina du. Udal gobernu taldeak azaldu duenez, “soberakin horrek auzo eta espazio publikoetako beharrei erantzuten lagunduko die, baita herritarrei zuzendutako zerbitzuak, laguntzak eta prestazioak areagotzen eta sendotzen ere”, diote.

EH Bildu udaltaldeak gerakin hori erabiltzeko bere proposamenak egin ditu. Guztira 14 dira koalizio ezkertiarrak egin dituen proposamenak; tartean, haurreskola berri bat eraikitzea Bizkotxalde ikastetxean (Lope de Vega eraikina zen tokian).

Gaur egun Basaurin bi haurreskola publiko daude: bata Basozelain (Etxeko Seine) eta bestea San Migelen (Etxeko Kuttuna).

Proposamen horrez gain, beste hauek ere egin ditu Basauriko EH Bilduk:

  • Energia berriztagarria eta iraunkorra sortuko duten tokiko energia-komunitateen eraketa bultzatzeko azterketa teknikoa
  • Plaka fotoboltaikoak Soloarte eta San Migeleko futbol zelaietan
  • Kareagako bide osasungarria eraikitzea
  • Udalerriko eremu guztiak lotuko dituen bidegorri-sarea eratzeko azterketa
  • Hiri-ortuak ezartzea
  • Udal-sukalde bat eratzeko azterketa teknikoa. Etxe-Maitia Adinekoen Egoitzari, Ikastetxeei jantokiak eta persona xaurgarriei zerbitzua emango liokeena. Zerbitzu hori, eskualdeko ekoizle eta hornitzaileen produktuak lehenetsiko lituzke
  • Bono-eskola berriro martxan jartzea
  • Erabilera sozialerako etxebizitza bat erostea
  • Gernika kalea 24-32 eraberritzea
  • Basozelaiko argiteria hobetzea
  • San Migeleko frontoi ondoan dagoen kantxan aterpea jartzea
  • Kareaga auzoan hobekuntzak urbaniazioan: Bidasoa kaleko oinezkoentzat bidea eta Frantzisko Perea kaleko parkea
  • Kulturgunea eraikitzea Social Antzokiaren ondoan: erabilera anitzerako kultur eraikin berria

Ezkerreko koalizioak ez du zehaztu proposamen bakoitzaren zenbatekoa, baina zera esan dute: “Berriro eskua luzatzen diogu udal gobernuari proposamen hauek kontuan har ditzan, jakinda Udalkutxako eta gerakinaren diru osagarriarekin urrats garrantzitsuak emateko aukera dugula”.

Osorik irakurri

☉ Basauri

Bideoa / Maialen Ibarra sanmigeldarrak ‘Zalantzari esker’ singlea kaleratu du

|

Maialen Ibarra 'Zalantzari esker' bideoklipean // Maialen Ibarra

Maialen Ibarra sanmigeldarrak ‘Nire egia zuen ezpainetan’ EPa kaleratuko du aurten. Guztira sei abesti izango ditu, eta gaur bertan ‘Zalantzari esker’ lehen singlea kaleratu du.

“‘Zalantzari esker’ gure bizitzako alderdiak zalantzan jartzeko, begiak irekitzeko eta esnatzeko gonbidapena da. Gainera, horrelako sormen prozesu batekin aurrera egitera ausartzeak eragin dezakeen beldurraz eta aldi berean, pozaz ere hitz egiten digu”, dio Ibarrak.

Dagoeneko entzungai dago abestia Spotifyn, eta bideoklipa ere ikusgai dago Youtuben. Bideokliparen proposamen bisuala Ane Berriotxoarena da. Besteak beste, Olaia Inziarte, Olatz Salvador edo Liher-ekin lan egin du Berriotxoak.

“Maialenen ahotsaren naturaltasunak eta freskotasunak doinu itsaskorrak eta indar handiko leloa bultzatzen du. Gitarrek eta sintetizadoreek eskua ematen diote elkarri, xurgatzen gaituen nostalgia, ilusio eta determinazio burbuila sortzeko. Soinu indartsua, ahots naturala eta beat itsaskorrak dira lehen single honen elementu garrantzitsuenak”, diote bere sormen taldekoek.

Datozen hilabeteetan bigarren, hirugarren eta laugarren singleak kaleratuko ditu Ibarrak, eta azken horrekin batera, EP osoa egongo da entzungai Spotifyn.

“Artistikoki oso sendoa”

Maialen Ibarrak 22 urte ditu eta 2022an ‘Zuei’ abestia kaleratu zuen. Era berean, iazko uztailean ‘Ametsekin jolasten’ kanta aurkeztu zuen Mikel Iturbe FMartenekin batera.

Maialen Ibarrarekin batera bere sormen taldean lanean daude: Mikel Iturbe (kudeaketa eta proiektuaren zuzendaritza), Mon Dvy (ekoizlea), Marina N. (ilustratzailea eta diseinatzaile grafikoa), Ane Berriotxoa (zuzendari, argazkilari eta gidoilaria) eta Maitane Campos (argazkilaria eta zuzendaria).

Mon Dvy ekoizleak, besteak beste, Bengo, Alba Reche edo Samuraï bezalako artistekin lan egin du. “The Blue Estudios-ekin batera artistikoki oso sendoa den proiektu baten aldeko apustua egin dugu denon arten”, diote.

2022ko azaroan elkarrizketa egin genion Maialeni eta orduan esan zigun EPa prestatzen zebilela. Reela ere publikatu genuen GEURIAko sareetan. Bada, laster ikusiko du argia bere lehen EPak.

Osorik irakurri

☉ Basauri

Basaurik 15,6 milioi euroko gerakina izango du, “auzoetako beharrei erantzuteko”

|

Basaurin dauden behar guztien artean lehentasunak ezarri beharko dituztela adierazi dute udal ordezkariek // Geuria

Basauriko Udalak 21,6 milioi euroko diruzaintzako gerakinarekin itxi du 2023ko ekitaldia.

Hala ere, zenbateko horri aurtengo kontuetan borondatezko zenbatekoak kendu behar zaizkiola azaldu dute udal ordezkariek; “gutxi gorabehera, 6 milioi euro”, diote udal arduradunek.

Gauzak horrela, 15,6 milioi eurokoa izango da Udalak erabilgarri izango duen gerakina.

Basauriko udal gobernu taldeak azaldu duenez, “soberakin horrek auzo eta espazio publikoetako beharrei erantzuten lagunduko die, baita herritarrek erabiltzen dituzten udal-instalazioak eta -ekipamenduak hobetzen eta basauriarrei eskainitako zerbitzuak, laguntzak eta prestazioak areagotzen eta sendotzen ere”, diote.

Udal arduradunek gaineratu dute udalerrian dauden behar guztien artean lehentasunak ezarri beharko dituztela, “premiaren, inpaktuaren eta kostu ekonomikoaren arabera”, diote.

Osorik irakurri

☉ Basauri

Lau basauriarrei 25 urteko lana saritu die Bizkaiko Futbol Federazioak

|

Francisco Javier Gonzalez 'Arija', Jose Angel Labrador, Felix Soto eta Tatxo Aberasturi, Jon Zugazagoitia Basauriko Udaleko Kirol zinegotziarekin batera // Jon Zugazagoitia

Bizkaiko Futbol Federazioak lau urrezko intsignia banatu die lau basauriarrei. Eta horiek dira: Tatxo Aberasturi, Félix Soto, Francisco Javier González ‘Arija’ eta José Ángel Labrador.

Zuzendaritza postuetan 25 urte baino gehiago eman dituzte: Tatxo Aberasturik eta Felix Sotok UD San Miguelen, Francisco Javier Gonzalez ‘Arija’k Indartsu Clubean eta Jose Angel Labrador Bizkaiko Futbol Federazioan lehendari orde bezala.

Lau basauriarrez gain, beste hamar presidenteren lana aitortu du Federazioak. Omenaldian Iñaki Gómez Mardones presidentea, Carlos Sergio Kiroletako Foru Zuzendaria eta Angel María Villar izan dira.

Osorik irakurri

☉ Basauri

Kareaga eta Montefuerte artean 150 zuhaixka berri landatuko dituzte, Basaurin

|

Otsailaren 18an izango da landaketa jardunaldia eta 60 lagunek hartuko dute parte // Sagarrak talde ekologista

Bertoko zuhaixkak landatzeko jardunaldia antolatu du Sagarrak talde ekologistak, Kareaga Auzo Elkartearen eta Basauriko Udalaren babesarekin. Guztira, 150 zuhaixka landatuko dituzte.

Ekimena otsailaren 18an izango da Kareaga eta Montefuerte arteko ibilbidean, 10:00etatik 13:00etara bitartean.

Jardunaldian 60 lagunek hartuko dute parte: “Ume asko etorriko dira igandeko jardunaldira eta nagusi asko ere”, diote Sagarraketik.

Duela sei urte hasi zen Sagarrak Kareaga auzoa eta Montefuerte parkea lotzen dituen oinezkoentzako bidea bertoko zuhaixkekin birlandatzen, “babes-hesi bat sortzeko helburuarekin”.

Bandalismo salaketa

Sagarrak talde ekologistatik salatu dutenez, urteak daramatzate bertoko zuhaixkekin Kareaga eta Montefuerte arteko zonaldea basoberritzeko jardunaldiak antolatzen, “baina azken urtean, oraindik identifikatu gabeko pertsonen bandalismoa jasan dute landaketa horiek”.

Azken hilabeteetan inguru horretan izandako gertakariak salatu ditugu. Pertsona jakin batzuk bandalikoki jokatzen ari dira landatutako zuhaixken aurka, egindako lanari boikota eginez eta inguruan ingurumen-kaltea eraginez. Era berean, egindako lana adierazteko panel bat txikitu dute”, salatu dute talde ekologistatik.

Azken urtean ekintza bandalikoak jasan dituztela salatu du Sagarrakek // Sagarrak talde ekologista

Gertakari hauek guztiak Ertzaintzan eta Udaltzaingoan salatu ditu Sagarrakek, eta Basauriko Udalari ere eman diote horien berri.

“Horrelakorik ez gertatzeko neurriak hartzeko eskatu dugu behin eta berriz. Ez dugu inolako informaziorik, eta oraingoz ez dakigu prebentzio-neurririk hartu dutenik horrelakorik ez gertatzeko. Gertakari larri horien aurrean Udalak eta segurtasun-indarrek jarrera aktiboagoa izatea eskatzen dugu”, diote.

Osorik irakurri