Aurten 20. urteurrena ospatzen da Ixatxak Sariak ematen dituztela Basaurin. San Jose ikastetxearen ikasle ohien elkarteak banatzen ditu urtero sari hauek 1997tik.
Ixatxak Sarien helburua da udalerriko pertsonak edota instituzioak omentzea, gizartearekiko, kulturarekiko edota kirolarekiko egiten duten lanarengatik. Aurten, omenduak izango dira Itziar Ituño aktorea eta Lantegi Batuak Fundazioa.
Sari banaketa martxoaren 19an, igandez, izango da San Jose ikastetxeko areto nagusian. Edurre Dantza Taldeak eta Danbolin Txistulari Elkarteak emanaldia eskainiko dute 11:30etik aurrera eta 12:30ean gala ospatuko da.
Garaikurra Victor Sarriugarte artista basauriarrak sortu zuen etaValentin Fernandez ‘Pinceles’ pintorea du oinarri, ‘Ixatxak’ ezizenez ere ezaguna.
