☉ Basauri
Javi Conde: “Etsita bukatu dut zenbaitetan eta proiektu solidarioa bertan behera uztea pentsatu dut”
Maratoi Solidarioak eta egokitutako atletismo taldea dira, besteak beste, Javi Conde basauriarrak bere gain dituen ekimenak. GEURIA berarekin izan da Artunduaga kiroldegian, gai horiek hizpide.
Javi Conde (Basauri, 1964) atleta paralinpiko basauriarra 2008. urtean profesionalki erretiratu zenetik ekimen solidarioak egiten dabil mundu osoan zehar. Maratoi Solidarioak proiektua da horietako bat eta egoitza olinpiko zein paralinpiko izan diren 28 herrialdetan 42 kilometrotako lasterketak egitean datza. Era berean, Javi Conde-Saiatu Atletismo Egokitua taldean dabil umeak entrenatzen.
Bost urte joan dira hasi zinenetik…
2010. urtean hasi ginen proiektu honi itxura ematen. Profesionalki 2008. urtean erretiratu nintzen eta nire nahia korrika egiten jarraitzea zen. Orduan, errekurtso gutxi dituzten pertsonei laguntzeko asmoarekin pentsatu genuen ideia ona izango zela korrika egiteagatik diru-laguntzak erakunde ezberdinei banatzea.
Zelakoa izan zen proiektuaren hasiera?
Oso modu umilean hasi ginen: 1.000 euro batu genituen lehendabizikoz eta Gobernuz Kanpoko Erakunde (GKE) bati eman genizkion.
Gaur egunera arte hogeita sei lasterketa burutu dituzue…
Hala da, hogeita sei Maratoi Solidario egin ditugu dagoeneko eta guztira 133.000 euro eman ditugu. Hazkunde nabaria izan du proiektuak.
Maratoiak egin aurretik ba al dakizue zein GKEtara bideratuko duzuen dirua?
Gutxi gora-behera, laurogeita hamar erakunderi eman diegu laguntza eta esan beharra daukat ez dugula aldez aurretik pentsatzen. Momentuan erabakitzen dugula esan daiteke.
Hogeita zortzi egoitza olinpiko eta paralinpikotan maratoiak egingo dituen munduko lehen atleta izango zara…
Egia esan, poztasunez betetzen nau horrek. Batik bat, egunerokotasunean lan handia eskatu duen erronka delako eta ez delako batere erraza. Poztasuna ez dit erronka hau betetzen lehendabiziko atleta izateak bakarrik ematen, denbora horretan jende asko ezagutu izanak ere bai, asko ikasi dugulako eta, gainera, ikusi dudalako jende asko dagoela munduan besteei laguntzeko prest, musutruk.
Nola hasten da harremana egoitza olinpiko eta paralinpikoekin?
Egoitza hauek maratoiak antolatzen dituzte urtean zehar eta Javi Conde Maratoi Solidarioakeko taldea horietako batera doa beste atleta bat izango balitz bezala. Dortsala erosi eta edonork egin dezake korrika, hau da, ez gara antolatzaileekin harreman zuzenean jartzen. Inskribatu eta parte hartzen dugu.
2015eko urrian 27. maratoia egingo duzue Melbournen (Australia). Nola prestatzen duzue lasterketa?
San Louiseko (Missouri) maratoia -26. maratoia- apirilaren 12an egin dugu. Itzultzean errendimendua jaitsi behar izan dut, dagoeneko 50 urte ditudalako eta esfortzu horietatik errekuperatu egin beharra dagoelako. Hala ere, egunero entrenatzen dihardugu.
Maratoi Solidarioen bost urte hauen hausnarketa egitea eskatuko banizu…
Oso positiboa izan da, eta oraindik ere bada. Baina, batez ere, une txarrengatik da positiboa. Izan ere, etsita bukatu dut zenbaitetan eta proiektua bertan behera uztea pentsatu dut. Hala ere, momentu onak datozenean konturatzen zara egin duzun ibilbidea oso aberasgarria izan dela, eta aurrera jarraitzen laguntzen dizute.
Gaur egun egokitutako Saiatu Atletismo Taldean egiten duzu lan. Nola sortu zen ekimen hau?
2015. urtean Saiatu Atletismo Taldeak 20. urteurrena ospatuko du. Garai haietan ezgaitasunik gabeko pertsonek parte hartzen zuten eta Bidebieta Atletismo Taldea zuen izena. Denborarekin izen ezberdinak izan ditu. Atletismo egokitua egiten hasi ginen orain dela hamabi urte inguru eta gaur egun Saiatu Fundazioak babesten du.
47 kirolari ditugu aurten. Bizkaia mailan egokitutako atletismoaren fitxa guztiak gure taldeak ditu. Basaurikoak asko gara, baita Lemoa, Getxo, Bilbo zein Mutrikukoak ere.
Javi Conde
Saiatu atletismo eskola
Egokitutako atletismoaren barruan erreferente zarete Bizkaian eta Euskal Herri mailan…
Bai. Euskadiko zein Bizkaiko Kirol Egokituen Federazioa gurekin jartzen da harremanetan eta zuzenean bidaltzen dizkigute kirolariak. Bizkaia mailan fitxa guztiak gure taldeak ditu; kirol mota hau eskaintzen dugun bakarrak gara Bizkaian. Euskadiko txapelketetan parte hartzen duten %65 gure kirolariak dira.
Zenbat pertsona daude federatuta Saiatu Egokitutako Atletismo Taldean?
Denboraldi honetan guztira berrogeita zazpi fitxa ditugu. Basauriko herritarrak dira gehienak, baina Lemoako, Getxoko, Bilboko zein Mutrikuko ere kirolariak baditugu.
Zein da Saiatu Atletismo Taldeak egiten dizun ekarpena?
Joko Paralinpikoetan irabazi duzun dominak ez du konparaziorik atletismo talde honek ematen dizunarekin. Umeen eta gazteen bilakaera ikusteak asko asetzen zaitu. Oinarrizko ariketa batean hobekuntzaren bat ikustea ikaragarria da.
Bizkaiko suhiltzaileek euren sare sozialetan jakitera eman dutenaren arabera, pertsona bat errekara erori da Basaurin, eta erreskate lanetan aritu dira suhiltzaileak.
Ezbeharra Arizko zubi alboan gertatu da, 19:00ak aldera, eta ez da azken asteetan eman den antzeko gertakari bakarra: urtarrilaren 17an, 21 urteko gazte bat Basauriko Arizko zubitik erori zen.
[INFORMAZIOA OSATZEN]
☉ Basauri
Ezohiko erregularizazio-prozesuari buruzko aholkularitza eta informazio hitzaldiak antolatu ditu Basauriko Udalak
Bakarkako aholkularitza zerbitzua eta informazio hitzaldiak Basaurin erroldatuta dauden edo herrian bizi diren atzerritarrei daude zuzenduta
Basauriko Udalak, Gertu atzerritarrentzako lege-aholkularitza zerbitzuaren bitartez, laguntza emango die administrazio-egoera irregularrean dauden eta ezarritako muga-eguna baino lehenagotik Estatuan bizi diren atzerritarrei, ezohiko erregularizazio-prozesuan.
Alde batetik, bi informazio hitzaldi antolatu dituzte: otsailaren 27an (10:00etan) eta martxoaren 3an (18:30ean). Bi hitzaldiak Basozelai Gizarte Etxean izango dira eta Gertu zerbitzuko abokatu espezizatu batek emango ditu.
Eta bestetik, aholkularitza zerbitzua eskainiko diete bakarka interesdunei.
Hitzaldietara bertaratzeko edota aholkularitza jasotzeko izena eman behar dute interesa dutenek 944 666 300 telefono zenbakira deituz, haz@basauri.eus helbide elektronikora mezua bidaliz, Herritarrentzako Arreta Zerbitzura bertaratuz, inmigracion@basauri.eus helbide elektronikora mezua idatziz edo Gizarte-langileen bitartez.
“Oraingoz ez dagoenez behin betiko informazio ofizialik, garrantzitsua da zuhur jokatzea, ordainketarik ez egitea eta izapiderik ez hastea informazio ofizial egiaztatua jaso arte”, diote udal ordezkariek.
☉ Basauri
Marieneako lehen Bollojardunaldiak antolatuko dituzte otsailaren 28an Basaurin
Mahai-inguruak, bazkaria, Albina eta Divina Drag ikuskizuna, poteoa eta kontzertuak antolatu dituzte
Marieneako Bolleren Taldeak Marieneako I. Bollojardunaldiak antolatuko ditu otsailaren 28an, larunbatez. Eta lehen jardunaldi horien izenburua izango da ‘Desira okertuak eta gorputz supertsiboak’.
‘Gorputz supertsioak’, ‘Desira okertuak’ eta ‘Lagunak bakarrik? Transfeministon adiskidetasunari buruz hizketan’ mahai-inguruak (11:00etatik aurrera), bazkaria (15:00etan), sorpresa bat (16:30ean), Albina eta Divina Drag ikuskizuna (18:00etan), poteoa (19:00etan) eta Txarraska Gaztetxean Labar taldearen kontzertua eta DJ Katiuskaren eta DJ Txitxiren emanaldiak (20:30etik aurrera) antolatu dituzte.
“Desira heterosexual eta gorputz normatiboaren inposizioari ezetz esateko elkartuko gara. Gorputz anitzak, bestelako identitateak eta bizitzeko modu disidenteak ospatuko ditugu”, diote.
Bollojardunaldia topagune bat dela esan dute: “Bollofobiari aurre egiteko, gure gorputzak politizatzeko eta gure desiren aniztasuna aldarrikatzeko”.
“Protagonisten ahotsak lehen pertsonan erdigunean jartzera gatoz, ahotsak eta haien gorputzak, haien bizipenak. Gure gorputz subertsiboak erdigunean jartzea politika egiteko eta erresistentzia izateko modu bat bezala ulertzen baitugu”, diote.
Marieneako I. Bollojardunaldietan parte hartzea doakoa da, baina interesa dutenek izena eman behar dute berdintasuna.basauri.eus webgunearen bitartez, mezua bidalita marienea@basauri.eus helbide elektronikora, 946 124 100 telefono zenbakira deituz edo zuzenean Marieneara bertaratuz.
Basauriko Argazkilari Elkarteak 15 urte beteko ditu aurten. 2011n sortu zuten elkartea zaletu batzuek argazkigintza ikasi, praktikatu eta zaletasuna hobetzen jarraitzeko helburuarekin.
“Basauriko Udalak berak antolatu eta diruz laguntzen dituen Ibaiganeko argazki-tailerreko ikastaroetan parte hartzen duten zaleak hurbiltzen saiatzen gara gure elkartera, baita zaletasun bera duten pertsona guztiak ere, zaletasun hau sustatzen jarraitu ahal izateko”, diote elkarteko ordezkariek.
Basauriko Argazkilari Elkarteak egoitza du Leon kaleko 13. zenbakian, eta hamaika ekintza antolatzen dituzte. Esaterako, ikasteko eta aholkuak emateko asteroko bilerak, argazkigintzari buruzko hitzaldiak, irteerak hilero, hileroko erronka bat, erakusketak edota Basauriko beste talde eta elkarte batzuekin lankidetzak.
“Gaur egun Euskadiko Argazkilari Elkarteko kideak gara, eta harremanak ditugu Euskadiko eta Euskaditik kanpoko beste argazki-elkarte batzuekin”, diote.
Urtarrilean Asier Iragorri alkateak eta Maria Larrinaga Kultura arloko zinegotziak bertatik bertara ezagutu zuten Basauriko Argazkilari Elkartearen jarduna eta euren lokala bisitatu zuten.
Zigor Orbe Sevillano preso basauriarra aske gelditu da zigor osoa bete ostean.
2004an atxilotu zuten Orbe Basaurin autobus bat erretzegatik, gidaria barruan zegoenean.
Frantzian atxilotu zuten eta 2010ean Espainiako estatuaren esku utzi zuten.
2021ean Cadizetik Zaballako espetxera lekualdatu zuten zigorraren hiru laurdenak betetzear zituenean. Orduan, Espetxe Erakundetik esan zutenez, indarkeria gaitzetsi zuen, bere gain hartu zuen biktimei egindako kaltea eta haien erreparazioaren alde egin zuen.
2022an hirugarren gradua onartu zioten eta 2023ko abuztutik baldintzapeko askatasunean zegoen. Orbek zigor osoa bete du.
Basaurin errekara erori den pertsona bat erreskatatu dute suhiltzaileek
Padura Mendi taldea: 75 urte mendizaletasuna bultzatzen
Ezohiko erregularizazio-prozesuari buruzko aholkularitza eta informazio hitzaldiak antolatu ditu Basauriko Udalak
Argazkiak | Euriak ez ditu Arrigorriagako herri-inauteriak geldiarazi
Argazkiak | Lau urtaroak, Oilategi Deluxe eta Txorimaloak izan dira mozorrorik onenak Basaurin
