Apirilaren 6tik 11ra bitartean izango a Itzulia. Eta lasterketak protagonismo berezia izango du aurten Hego Uribe eskualdean. Izan ere, Basauri-Basauri eta Galdakao-Galdakao etapak egin beharko dituzte txirrindulariek.

Gaur jakin dugunez, eta antolakuntzak hala zehaztuta, Basauriko etapa hirugarrena izango da, apirilaren 8an, asteazkena. Irteera oraindik non izango den zehaztu ez dute, baina helmuga Basozelain izango da, GEURIAn aurreratu genuen bezala.

Basauriko helmuga “zorrotza” izango da eta txirrindulariek % 12 eta % 16 arteko aldapa igo beharko dute.

Galdakaoko etapa hurrengo egunean, apirilaren 9an, jokatuko da. Laugarren etapa horretan ere txirrindulariek aldapa gogorra igo beharko dute: Elexaldekoa, hain zuzen. Horren berri ere eman genuen GEURIAn.

Lehenengo etapa Bilbon izango da, eta beste etapak izango dira: Iruñea-Astitz, Eibar-Eibar, eta Antzuola-Bergara.

Ainhoa Etxaide Amorrortu LAB sindikatuko idazkari ohiak ‘Emakumeen parte-hartze politikoa: gertatu (ez) diren aldaketak’ hitzaldia emango du euskaraz Marienean.

Otsailaren 12an, ostegunez, izango da 18:00etatik 20:00etara bitartean.

“Bizipenak partekatzea eta jakintzak kolektibizatzea izan da emakume askorentzat ikasteko modu nagusia. Gaur egun, emakume asko sartu dira esparru akademikoan, ikerketan, eta batzuek ikuspegi feminista ematen diete beren lanei. Hitzaldi honetan, bi ikerketatan ikasitakoa partekatuko dugu”, azaldu dute Marieneatik.

Hitzaldirako sarrera librea izango da, baina interesa dutenek izena eman behar dute berdintasuna.basauri.eus webgunearen bitartez, mezua bidalita marienea@basauri.eus helbide elektronikora, 946 124 100 telefono zenbakira deituz edo zuzenean Marieneara bertaratuz.

Hitz-erdiko Kontaketak lehiaketaren bederatzigarren edizioa abiatu du Zirt Zart Basaurik. Martxoaren 16ra bitartean jasoko dituzte euskarazko ipuin laburrak, gehienez 100 hitzekoak, zirtzart.basauri.eus webgunearen bitartez.

Aurten “Askotan pentsatu nuen une hartan” izango da ipuinek izan behar duten hasiera, antolatzaileek hala erabakita, eta esaldi horretatik abiatu beharko dituzte lanak idazleek.

Lehiaketa 12 eta 35 urte bitarteko gazteei dago zuzenduta eta asmoa da idazmenean interesa dutenen talentua aurkitzea.

Guztira bost sari banatuko dituzte: lehen sailkatuak 200 euroko bonua jasoko du, biharrenak 150 euroko bonua, hirugarrenak 100 euroko bonua, eta Elkar sariaren zein Basauri sariaren irabazleek bakoitzak 150 euroko bonuak jasoko dituzte.

Elkar sarian 12-17 urte bitartekoen proposamenak baino ez dituzte aintzat hartuko eta Basauri sarian herrian erroldatua egon beharko da parte hartzailea. Ipuin sarituak GEURIAn argitaratuko ditugu, bai paperezko alean zein webgunean.

Basauriko Udalaren Gazteria arloak antolatzen du lehiaketa eta Elkarren eta GEURIAren laguntza du. 2018an jarri zuten martxan lehiaketa eta urtetik urtera hazi egin da, ez bakarrik Basaurin, baizik eta Euskal Herri mailan ere.

Datuak datu, eta lehiaketak izan dituen formatu desberdinak tarteko, lehenengo edizioan 89 kontakizun jaso zituzten, bigarrenean 83, hirugarrenean 54, laugarrenean 204, bosgarrenean 288, seigarrenean 149, zazpigarrenean 155 eta zortzigarrenean 233.

Iaz honako hauek izan ziren sarituak: Lier Alvarez Palacios (Arrigorriaga), Xabat Irazabal Lopez (Gernika), Aroa Elortza Payros (Bergara), Elorri Argüeso Gundin (Bilbo) eta Zuriñe Leon Salcedo (Basauri). 

Eusko Jaurlaritzako Etxebizitza eta Hiri Agenda Sailak Basauri osoa tentsio handiko gune izendatzeko prozedura hasi du, Udalak duela hiru hilabete eskaera egin eta gero.

Udal arduradunek aurreikusten dute izendapena ekaina eta uztaila bitartean gauzatuko dela.
Eta, behin Basauri tentsio handiko eremu izendatuta, alokairuaren prezioak mugatuko dituzte.

Basaurik % 30eko muga gainditzen du alokairuko etxebizitza ordaintzeko egin beharreko esfortzuari dagokionez, % 30,8ra iristen baita.

Ondorioz, alokairuaren prezioak eta horiek etxebizitza ordaintzeko gehiegizko ahalegin ekonomikoan duten eragina mugatzeko asmoz, udal ordezkariek eta Eusko Jaurlaritzak ezinbestekotzat jo dute udalerria eremu tentsionatu izendatzea.

Plan espezifikoak garatzea

Legeak ezartzen duen bezala, Basauriko Udalak etxebizitzaren alorrean desorekak zuzentzeko beharrezkoak diren neurrien plan espezifiko bat eta horren garapen-egutegia idatzi behar du.

“Gure udalerriaren kasuan, izendapenaren ondoren garatu beharko den plan espezifikoan jasotako neurriak dagoeneko ezarrita daude edo ezartze-prozesuan daude. Aktibatu daitezkeen etxebizitza arloko tresna gehienak martxan daude dagoeneko, azken urteotan egindako lan garrantzitsuari esker. Enpresa espezializatu bati agindutako diagnostikoak eta neurri-planak hori berretsi besterik ez dute egin”, nabarmendu du Asier Iragorri Basauriko alkateak.

Planak ezartzen duen ekintza indartsuenetako bat etxebizitza eskuragarria sustatzea da. Esate baterako, 2026 eta 2029 urte bitartean alde batetik 362 etxebizitza —horietatik % 73 babes publikokoak izango dira—, eta bestetik 42 zuzkidura bizitoki eraiko dituzte Basaurin.

“Alokairura bideratutako ehunekoa, Eusko Jaurlaritzarekin batera Azbarren eremuan eta bizitoki-dotazionalen sustapenean egindako ekintza koordinatuaren bidez, aldian aldiko etxebizitza-eskaintza osoaren % 46 izango da gutxienez“, dio Iragorrik.

Etxebizitza hutsak mugiaraztea

Etxebizitza erosteko Euskadiko hiri garestirik gehienak Bizkaian daude, eta Basauri da bigarren eskuko etxebizitzen prezioaren urte arteko igoerarik handiena izan duena (% 18,5).

Basaurin 1.000 etxebizitza inguru daude hutsik eta Udala % 150eko errekargua ezartzen ari da erroldatutako pertsonarik ez duten etxebizitzei.

Bestetik, Udalak gauzatuko duen beste ekintza bat da Bizigune eta ASAP bezalako alokairuan bitartekaritza-programak sustatzea.

Gaur egun, Basaurik 53 etxebizitza ditu ASAP programan eta 207 Bizigunen: “Alokairu eskuragarriko merkatura bideratutako etxebizitza kopuru handia da hori, beste udalerri batzuetan (euskal hiriburuak barne) mugiarazitako etxebizitzekin alderatuz gero”, dio Iragorrik.

Zentzu horretan, Bizigune eta ASAP programetako kide diren etxebizitzei % 99ko hobaria ezartzen die Udalak, lehen % 50ekoa zenean.

Lokalak etxebizitza bihurtzea

Era berean, planak adierazten du udalerriak lokalak etxebizitza bihurtzeko ordenantza bat izan behar duela.

Basauriko Udalak 2021etik du ordenantza hori, baina udal arduradunek eguneratu eta malgutuko dute, mota horretako etxebizitza kopurua handitzea lortzeko.

“Aldaketa hori Eusko Jaurlaritzaren bizigarritasun-dekretu berria indarrean jartzen denean egin ahal izango da, baldintzetan malguagoa izango baita”, diote. Hego Uribe eskualdean, Galdakaon dagoeneko malgutu egin dute ordenantza hori.

Egoitza-eraikinen parkeko jarduketei eta hiri-birgaitzeari dagokienez, Basauriko Udalak lehendik ere ematen ditu dirulaguntzak eraginkortasun energetikoa, irisgarritasuna eta eraikinen birgaitzea sustatzeko. Planak proposatzen duen beste ekintza bat Gaztelagun programa sustatzea da, gazteen emantzipazioari laguntzeko alokairurako dirulaguntza baten bidez. Gaur egun, Basaurin alokairu libreko etxebizitza batean bizi diren 188 gazte dira laguntza horren onuradun.

Otsailaren 13tik 17ra bitartean Karnabas programazioa izango da herrian, eta desfileak, mozorro lehiaketak, kale ikuskizunak, tailerrak eta haurrentzako zein nagusientzako jarduerak antolatu dituzte.

Egitaraua | Karnabas 2026

Otsailak 13, ostirala
19:30-21:00 Kalejira musikala oinezkoen kaleetatik: ‘Afro Sound System’

Otsailak 14, larunbata
12:00 Edurre Dantza Taldearen inauterietako kalejira. Irteera Fernando Barkin kaletik; geldialdiak: Begoñako Andra Mari kalea, San Isidro plaza eta Galizia kalea
12:00 Basauritar Dantza Taldearen inauterietako kalejira. Irteera Azaroak 25 plazatik; geldialdiak: Begoñako Andra Mari kalea eta Solobarria plaza
17:45 Karnabas desfileko parte-hartzaileak elkartzea Social Antzokiaren inguruetan
18:00 Mozorro lehiaketa eta jaia San Migeleko frontoian
18:30 Inautxoren agurra Social Antzokiko balkoitik eta desfilearen hasiera. Ibilbidea: Nagusia kalea, Nafarroa, Begoñako Andra Mari, Nagusia, Goikosoloa eta Solobarria
20:30 Sari banaketa eta musika emanaldia Solobarrian: DJ Iker Fernandez

Otsailak 15, igandea
12:00 Agintzari Dantza Taldearen emanaldia. Irteera Ibaigane kaletik; ibilbidea: Begoñako Andra Mari, Balendin Berriotxoa, Resurreccion Maria de Azkue, Manuela Egiguren, San Isidro plaza, Antonio Fernandez eta Solobarria
18:00 Pailazoak Solobarrian: ‘Gaur jaia’
19:00-21:00 Karnabaseko Gazte Feria Social Antzokian (12-17 urte)

Otsailak 16, astelehena
17:15-18:00 Makillaje tailerra Basozelai Gizarte Etxean (4-10 urte)
17:15-18:00 Makillaje tailerra Kareaga Gizarte Etxean (4-10 urte)
18:00-19:30 Disko Dantza Arima Eroa Basozelai Gizarte Etxean (familiak eta 4-10 urteko haurrak)
18:00-19:30 Disko Txiki Familian Kareaga Gizarte Etxean (4-10 urte)

Otsailak 17, asteartea
11:00 Ipuin kontalaria eta tailerra Ibaigane Kultur Etxean (6-9 urte): ‘Inauterriekin gora ta behera’
17:00-20:00 Puzgarriak San Migeleko frontoian
18:00 Txokolatada San Migeleko frontoian
18:00 Haurren mozorro lehiaketa Solobarriako karpan. Sari banaketa, musika eta txokolatada