Sareak

☉ Basauri

Koldo Garcia Etxebarria: “Ikertzea ez da dohaintza kontua. Zerbait egonkorra izan beharko luke”

Genetikan doktore, ikertzailea da Koldo Garcia basauriarra. Bere lanaz, zientziaz, genetikaz, ikerkuntzaz eta dibulgazioaz aritu gara berarekin

|

Koldo Garcia Etxebarria / Geuria

Duela hamabost urte hasi zen lanean Euskal Herriko Unibertsitateko genetikako laborategian Koldo Garcia Etxebarria (Basauri, 1982). “Orduan ez nekien, baina nire ikertzaile-karreraren abiapuntua izan zen hori”, dio Garciak. Hain zuzen ere, ikertzaile lanetan dihardu ordutik. Gaur egun, Biodonostia Osasun Ikerketako Institutuan dabil lanean, gaixotasun gastrointestinalen sailean: “Genetika erabilita gaixotasun horiek hobeto ezagutzen eta tratamendu hobeagoak egin daitezkeen ikertzen lan egiten dugu”, dio Garciak. Bereziki, heste-gaixotasun inflamatorioan, kolon minberaren sindromean, koloneko minbizian eta beste gaixotasun gastrointestinal batzuetan zentratzen da bere lantaldea. Ikerkuntza arloan lan egiteaz gain, zientzia “herritar xumeei” transmititzen ere aritzen da. Bere ibilbideaz, ikerkuntzaz, eman diren aurrerapausoez eta zientziaren dibulgazioaz hitz egin dugu berarekin.

Biologoa, genetikan doktore, ikertzailea, zientziazalea zara, Koldo Garcia.
Hala da. Pila bat izenorde naiz! Biodonostia Osasun Ikerketako Institutuan egiten dut lan, ikertzaile bezala. Osasun-ikerketako lehen euskal institutua da eta bertan naiz Genetika Gastrointentinalaren taldearen buru. Duela bi urte eta erdi pasatxo iritsi nintzen Biodonostiara.

Zer egiten duzu bertan?
Bada, gaixotasun gastrointestinalak batzuk ondo definitzen dira eta beste batzuk ez. Orduan, nik eta nire taldeak egiten duguna da, edo behintzat saiatzen garena egiten da, genetika erabilita gaixotasun horiek hobeto ezagutzea eta tratamendu hobeagoak egin daitezkeen ikertzea. Azken finean, egiten duguna da gaixoen sintomak apaldu, baina berez jatorria ez dakigu zein den. Beraz, genetikaren bidez hori aztertu egiten dugu.

Taldearen helburu nagusia da gaixotasun gastrointestinala (GI) sortzen duten mekanismo genetikoak azaltzea. Bereziki, heste-gaixotasun inflamatorioan (HGI), heste (kolon) minberaren sindromean (HMS), koloneko minbizian eta beste gaitz GI batzuetan zentratzen da taldea, betiere genetikaren ikuspuntutik. Ea zerbait berria atera dezakegun eta tratamendu hobeagoak lor ditzakegun.

Zer da genetikaren ikuspegitik lan egitea?
Lanean ari gara gaizki dauden geneak (edo arrisku-geneak) eta horiek sortzen dituzten aldaerak identifikatzen, ikuspegi genetiko, bioinformatiko eta genomiko funtzionalak aplikatuta. Kontuan hartu behar da, guk datuak baino ez ditugula aztertzen (medikuek emandakoak edo biobankuetatik bidalitakoak); hau da, ez dugula zuzenean pertsonekin lan egiten telesail askotan ikusten den bezala.

Lan egiten duzun arloan gauzak hoberantz egin dutela esango zenuke?
Baietz esango nuke. Gaixotasun gastrointestinalen inguruan gero eta gehiago dakigu. Azken urteetan asko aurreratu da. Adibidez, Euskal Autonomia Erkidegoan (EAE) egiten den kolon minbiziaren arloan lagin asko jasotzen dira eta horrek laguntzen du askoz ere analisi sakonagoak egitea. Lagin asko jasota, bereizmen gehiago ematen dizu azterketak egiterako orduan, eta hor egin diren lanak oso ondo datoz gauzak aurre-esateko eta tratamenduak hobetzeko.

Noiztik jarduten duzu ikerkuntzan?
Orain dela urte asko hasi nintzen ikertzen. Tesia egiten hasi nintzen 2006an Euskal Herriko Unibertsitatean (EHU), Genetikako departamentuan, eta ordutik nabil ikerkuntzan.

Hamabost urte orduan.
Bai. Egia esan ez dakit oso ondo zelan biziraun dudan ikerkuntzan! (kar, kar)

Zergatik diozu hori?
Ikerkuntza kinka larrian dagoela esango nuke. Nik uste oso ahula dela, batez ere finantziazio aldetik. Esango nuke instituzioek zientzia alde batera utzi dutela eta gehiago zentratu direla izapide kontuetara, eta horrek, nik uste, arazo handiak sortzen ditu gure ogibidean eta hortaz, gizartean.

Nire iritziz, eskaintzen dioten finantziazioa ez da behar bestekoa. Eta horrek gauzak ikertzeko behar dugun denbora mugatzen du halabeharrez. Errealitatea da ikertzaileok ez dakigula zehazki zenbat denbora dugun gure ikerketak egiteko. Normalean, dirua eta lanpostuak mugatuak dira, eta horrek esan nahi du ez dagoela egonkortasunik. Eta, noski, gizarteari kalte egiten dio horrek.

Ez dakizu orduan noiz arte egongo zaren proiektu horretan lanean?
Proiektuak beti daude martxan, baina nork eramango ditu proiektu horiek aurrera behin behinekotasunean bizi bazara? Agian proiektua ematen dizute, baina ez dago pertsona bat horretara guztiz dedikatuta. Eta horrek egiten duena da prozesua zaildu. Urtebeteko kontratuak dira gureak. Lana egon, badago. Ez dagoena dirua da.

Eta horretan instituzioek dute azken hitza.
Bai. Nire uste apalean instituzioek diru gehiago eman beharko lukete ikerkuntzarako. Berez, EAEn ez gara heltzen produktu gordinaren % 2ra. Eta, izatez, gomendagarria da % 2a baino gehiago izatea.

Diotenez, ordea, Estatu mailan, EAE, Katalunia eta Galizia gorenean omen gaude ikerkuntzan.
Bai. Egia da Estatu mailan gainontzeko autonomia erkidegoak baino puntu bat gorago daudela EAE, Katalunia eta Galizia, baina ez dakit zein puntura arte den garrantzitsua hobeagoa izatea. Nik zalantzak ditut zientzian edo ikerkuntzan nola neurtzen duten autonomia erkidego bat hobeagoa izatea. Ez dakit zenbat eta publikazio gehiago atera, horrek benetan zerbait esaten duen, edo benetan ikusi behar dena den zer eragin duen egiten duzun lan horrek ordaintzen dizun gizartean. Ez dakit hori nola neurtzen den, edo neurtzerakoan, zer ikusiko genukeen.

Katalunian ere lanean ibili zinen.
Bi urte eman nituen Bartzelonan lanean eta bertan lan egiteko prozeduragatik, orokorrean, Katalunian askoz argiago daukate eta proportzionalki diru gehiago inbertitzen dute ikerkuntzara. Han kooperatiboagoak dira; hemen, ordea, gehiago kostatzen da hori, lehiatu egiten da gehiago, kolaboratu baino.

Zein zentzutan lehiatu?
Ikertzaile taldeen artean badago lehiakortasun puntu bat. Azken finean, baliabideak mugatuak direnez eta mundu guztiak berdinak behar dituenez… Ez dut esaten jendea min egitera doanik, baina agian interesgarriak izan daitezkeen kooperazioak ez dira ematen.

Ikerkuntzak zein aurrerapauso eman ditu?
Behintzat nik ezagutzen dudanagatik, egia da saiatu saiatzen garela aurrerapausoak ematen, baina ez dakit zein puntura arte lortzen dugun. Argi dago ikerkuntzaren bidez gauza asko hobetu direla. Adibidez, genetikan gauza deigarri bat gertatzen da: orain dela gutxi aztertu zuten eta esan zuten 90. hamarkadatik gaur egunera behin eta berriz, orokorrean eta mundu osoan, gauza berdinak ikertzen gabiltzala. Orduan, sentsazioa da: badakizu aurrera egiten dugula eta hobetu egiten dugula, baina ez dakit zein puntura arte benetakoa den. Noski, hamabost urtetan gauza asko aldatu eta hobetu dira, baina nik uste zerbait gehiago falta dela.

Zer falta da?
Bada, ikertzaileoi falta zaiguna da gizartearekin gehiago inplikatzea. Askotan uste dugu guk bakarrik gure lana egin behar dugula eta listo, baina kontuan izan behar dugu, zergen bitartez, jendeak ordaintzen duela gure lana. Orduan jendeak eskubidea dauka jakiteko ikertzaileok zer egiten dugun. Bestetik, nahi baldin badugu jendea ikerkuntzan inpikatzea, saldu egin beharko dugu egiten dugun lana eta zer egin nahi dugun. Gizarteari azaldu behar diogu ikertzaileok egiten duguna.

Horretan datza dibulgazioa…
Hala da. Adibidez, nik dibulgazioa oso modu naturalean egiten dut. Oso erraza egiten zait komunikatzea eta nik hautu hori hartu nuen: zientzia dibulgatzearena, alegia. Oso garrantzitsua iruditzen zait. Alde batetik, jendeak nire lana ordaintzen duela ikusita, zerbait egiteko aukera ikusi nuen eta bestetik, bigarren arrazoia izan zen jendearen parte hartzea zientziarekiko sustatzea. Ez da bakarrik esatea “guk gauza garrantzitsuak egiten ditugu”, baizik eta azaldu zeintzuk diren gauza garrantzitsu horiek. Modu horretan jendea jabetu egingo da horretaz eta behintzat parte hartzeko aukera ematen diezu.

Zelan dibulgatzen duzu zuk zientzia?
Alde batetik badaude dibulgaziora dedikatzen diren blogak. Adibidez, EHUko Kultura Zientifikoaren Katedrak ‘Zientzia Kaiera’ bloga du eta bertan hilean behin idazten dut nik. Era berean, hitzaldiak eskaintzen ditut. Batzuetan hitzaldiak umoristikoagoak dira eta beste batzuetan serioagoak, baina bietan zientzia herritarrenagana gerturatzen dugu. Azken finean zientzia normatzea da asmoa.

Irekiak dira hitzaldi horiek?
Bai, bai. Herritar guztientzako irekiak dira hitzaldiak. Esate baterako, behin genetika orokorrari buruzko hitzaldia eman nuen jubilatuen egoitza batean. Berrogei lagun inguru gerturatu zen, gainera oso interesatuak denak. Galdera mordoa egin zidaten, eta batzuk zorrotzak! Genetikaren inguruko gaiek jende asko erakartzen dute. Jendearen imaginazioan genetika izugarria da, eta hitzaldiaren izenburuan genetika hitza agertzen bada, bisitak gora doaz, eta niri gauza horiek ikaragarri pozten naute, herritarrekin hurbiltzen nautelako.

Zientziaren dibulgazioa euskaraz egitearen inguruan galdetuko banizu.
Normalean dibulgazio gehienak gazteleraz izaten dira. Zientziari buruzko hitzaldiak eta argitalpenak eta gainera euskaraz ez daude horrenbeste, baina pixkana horretan ari gara batzuk. Nik, esaterako, blog bat sortu nuen: edonola.net. Eduki guztiak euskaraz idazten ditut bertan.

Noiz hasi zinen edonola.net blogarekin?
Duela sei urte dibulgatzen hasi nintzenean, horretarako ere dedikatu nuen bloga: dibulgatzen jarraitzeko. Hasieran nire “harrikadak” kontatzeko erabiltzen nuen bloga, leku pertsonal bezala. Gero, modu zehatzago batean dibulgatzen hasi nintzen, gaur egunera arte. Hasiera hasieratik asmoa izan da nire lana azaltzea eta Twitter bidez zabaltzea.
Blogak ateak zabaldu dizkit publikora zuzenean hitz egiteko edo beste leku batean, modu serio batean-edo, dibulgatzeko. Blog xume bat da; ez ditut bisitak bilatzen. Nik beti esaten dut: baldin badago pertsona bat genetikari buruz euskaraz jakin nahi duena, nik betetzen diot bere plazerra.

Zehazki, zer dibulgatzen duzu blogean?
Normalean egiten dudana da genetikaren kontzeptu arruntak azaldu jendeak ulertu ditzan. Era berean, publikatzen ditudan artikulu zientifikoak azaldu egiten ditut, baita zientziari buruzko gogoeta orokorrak (ikusten ditudan gauza onak, arazoak…) publikatu ere.

Dibulgazioaren harira, EiTBk maratoi solidarioak burutzen ditu urtero ikerkuntza arloan dirua lortzeko.
Parte hartzen duen jendearen intentzioa oso ona da, eta gainera, guztiz ulergarria. Nork esango dio ezetz, adibidez, haur minbizia ikertzearen aldeko zerbaiti? Baina ikertzea ez da dohaintza kontu bat. Zerbait egonkorra izan beharko luke. Inori ez zaio burutik pasatzen, esaterako, errepide bat egiteko maratoi bat egitea. Finantzaketa hori burutzeko, hasieratik amaierara arte, aurrekontu bat zehazten da urtero. Bada, ikerkuntzan gauza bera egin beharko litzakete.

Aurten, ‘Lau teilatu’ abestia erabilita zabalkunde gehiago egin diote maratoiari, eta bertan Eusko Legebiltzarreko kideek parte hartu dute. Euren lana ez da ‘Lau teilatu’ grabatzea, baizik eta aurrekontuetan ikerkuntzari behar duen pisua ematea, eta adibiez, aurrekontuen eztabaidan ez dute ikerkuntzari buruz ezer esan. Maratoi horietan ikerkuntzarako dirua lortzea ondo dago, baina zerbait osagarria izan beharko litzateke.

☉ Basauri

#A21 / Emaitzak / Basauri / EAJk nagusitasunez irabazi du, eta EH Bildu bigarren indarra estreinekoz

#A21 / Basauri / Eusko Legebiltzarrerako hauteskundeak 2024 / Emaitzak

|

Osorik irakurri

☉ Basauri

Ruben Galas, Alex Garciaren lehengusua: “Oso pozik gaude Alex azkenean itzuliko delako”

“Bihotzez asko eskertzen diogu Basauri herriari, bereziki Basozelaiko Auzo Elkarteari martxan jarri duen kanpainagatik”, dio Rubenek.

|

Alex Garcia Galas igandean eramango dute Gurutzetako Ospitalera // @DjGalas

Alex Garcia Galas basauriarra Thailandiatik Euskalherriratuko du Defentsa Ministerioak. Ostiral arratsaldean, 17:00etan, medikalizatutako hegazkin bat Bangkokera bidean irten zen, eta Alexen senideek ostiralean bertan GEURIAri adierazi ziotenez, gaur, igandea, helduko da Gurutzetako Ospitalera.

“Zulo beltz baten barruan airea sartzea bezalakoa da. Gertu izango dugu, baina aldi berean Alexek duen larritasuna ez da aldentzen. Hala ere, gutxienez, etxean izango dugu”, dio Ruben Galas basauriarrak, Alexen lehengusuak.

Ruben eta bere senideak “oso pozik” daude Alex eurengandik gertu izango delako: “Familian pozez gainezka gaude, hainbat arrazoiengatik: alde batetik, jendea gurekin nola iraultzen ari den ikusteagatik, eta bestetik, nire lehengusua azkenean itzul daitekeelako”.

“Eskerrik asko bihotzez, Basauri!”

Basozelaiko El Maño Auzo Elkarteak kanpaina solidarioa jarri du martxan Alexen eta bere familiaren alde dirua biltzeko. Alde batetik, itsulapikoak jarri ditu herriko saltoki eta tabernetan, eta beste alde batetik, apirilaren 27an eta 28an asteburu solidarioa antolatu dute.

“Bihotzez asko eskertzen diogu Basauri herriari, bereziki Basozelaiko Auzo Elkarteari martxan jarri duen kanpainagatik”, dio Rubenek.

“Basauri beti izan da herri solidarioa. Herriko Taldeen barruan eta Alaiak taldearen barruan egiaztatu dut urte askoan, eta orain niri zuzenean eragiten didan honekin frogatu dut. Ez nuen uste inoiz hurbiletik joko ninduenik, baina zoritxarrez tokatu zait. Hala eta guztiz ere, ikusten ari gara beste behin ere Basauri solidarioa dela bertako herritar guztiekin. Asko eskertzen da, bihotzez”, dio.

Bilduko duten dirua Alexen familiari emango dio Basozelaiko Auzo Elkarteak, Thailandian egindako gastuak ordaintzeko. “Thailandiako gutxieneko fakturazioa egunean 2.500 eurokoa izan da, eta mediku proben arabera, kopuru horretatik gora gastatu dugu”, dio Rubenek.

Era berean, Alexen familiak hegazkin medikalizatu bat kontratatu zuen 221.000 euroan modu pertsonalean aberriratzeko asmoarekin, baina bidaia ezin izan zutenez egin, “barne-odoljario larria izateko arriskua” zegoelako, diru hori galdu zuen familiak. Alexen lagunek crowfunding kanpaina ere abiarazi zuten, eta kanpaina itxita, 114.445 euro bildu dituzte.

“Hasieran inork ez zigun jaramonik egiten, etsita geuden, baina orain mundu guztia gu laguntzeko prest dago. Ikaragarria da. Liluratuta gaude”, dio Rubenek.

Osorik irakurri

☉ Basauri

Basauriko Bidebietak antolatutako XXI. Gazte Txapelketak Bizkaiko 129 pilotari neurtuko ditu

Txapelketari hasiera eman diote apirilean eta ekainera arte luzatuko da. Guztira 109 partida jokatuko dira

|

Txapelketarei hasiera eman diote apirilean eta ekainera arte luzatuko da // Arxtiboko irudia, Geuria

Bidebieta Esku Pilota Klubak hasiera eman dio XXI. Gazte Txapelketari. Apirilaren 14an hasi zuten txapelketa eta guztira 129 pilotari neurtuko dira.

Bidebieta, Arguia, Adiskide, Iluntxo, Itsasalde, Mandoia, Izarra, Danok Lagunak, Balmaseda, Danak Bat, Usansolo, Upo Mendi, Lagun Artea, Lagun Onak, Getxo, Joko Alai, Lemoa, Durango, Olaburu, Olgetan, Kurene, Zaldua, Markina, Akarregi, Lezama, Arkupe, Lea Ibarra, Txumuluxueta, Gure Kirola, Gallarta eta Orma Bi klubetako pilotariek hartuko dute parte.

Txapelketa San Migeleko frontoian jokatuko da eta ekainera arte luzatuko da. Guztira 109 partida jokatuko dira: lagunartekoak, umetxoak, goxua, umeak, gaztetxoak, neskak, kadeteak, gazteak eta nagusiak kategorietan.

Egutegia/ Bidebieta XXI. Gazte Txapelketa

Apirilak 14, igandea
16:00 – San Migeleko frontoia
– Umetxoak A taldea: Ekain Artabe-Liher Garcia (Bidebieta-Arguia) vs Kerman Uribesalgo-Harri Artola (Adiskide-Iluntxo)
– Goxua B taldea: Hegoi Yanguas-Saioa Gonzalez (Bidebieta-Lemoa) vs Egoitz de Miguel-Izaro Sistiaga (Izarra-Lemoa)
– Umeak B taldea: Izan Fontalba (Danok Lagunak) vs Inar Etxaburu (Bidebieta)
– Umeak D taldea: Aritz Rodriguez (Bidebieta) vs Iñigo Artolatxipi (Balmaseda)
– Umeak E taldea: Eloi Elortza (Balmaseda) vs Aratz Mendieta (Arguia)
– Gaztetxoak E taldea: Luken Argueta-Danel Trias (Upo Mendi-Lemoa) vs Luken Uriarte-Jon Aperribai (Adiskide-Bidebieta)
– Kadetetak A taldea: Markel Sololuze-Khadim Lo (Markina-Akarregi) vs Sendoa Calvo-Enaitz Uribe (Bidebieta)
– Gazteak A taldea: Izei Saratxu-Xabier Atxutegi (Lezama-Bidebieta) vs Alex Andrinua-Etxahun Olazabalaga (Lea Ibarra, Txumuluxueta)
– Gazteak B taldea: Iñigo Bergantiños-Jaime Andrinua (Lagun Artea-Lea Ibarra) vs Ibai Ormaetxea-Haritz Solaguren (Arkupe-Olaburu)

Apirilak 21, igandea
10:30 – San Migeleko frontoia
– Goxua A taldea: Endika Fuente-Arhane Mendibil (Bidebieta-Mandoia) vs Endika Alvaro-Malen Gonzalez (Bidebieta-Lemoa)
– Gaztetxoak D taldea: Jon Urrutikoetxea-Aran Goti (Upo Mendi-Mandoia) vs Ekaitz Ortega-Oier Gil (Bidebieta-Olgetan)
– Neskak A taldea: Laia Aparizio-Irene Azkona (Bidebieta-Usansolo) vs Jaiona Elortza-Olatz Bernal (Lagun Artea-Bidebieta)
– Neskak B taldea: Maialen Gaston-June Agirrebeitia (Lemoa-Zaldua) vs June Urrutikoetxea-Malen Mena (Durango-Lemoa)
– Kadeteak B taldea: Izei Urkidi-Jon Fraile (Akarregi-Lagun Onak) vs Maren Aparizio-Jon Bengoetxea (Bidebieta-Joko Alai)

Apirilak 21, igandea
16:00 – San Migeleko frontoia
– Lagunartekoak: Ane Ureña vs Aiuri Setien (Bidebieta)
– Lagunartekoak: Mateo Del Hoyo vs Egoi Muñoz (Bidebieta)
– Lagunartekoak: Danel Zugazaga vs Julen Ventura (Bidebieta)
– Lagunartekoak: Dario Del Hoyo vs Endika Bilbao vs June Bilbao (Bidebieta)
– Umetxoak B taldea: Unai Villapun-Ibai Liaño (Bidebieta) vs Markel Uriarte-Eki Barahona (Adiskide-Mandoia)
– Umetxoak E taldea: Unax Garcia-Ninbe Mendieta (Bidebieta-Arguia) vs Aritz Leivas-Iraia Martelo (Bidebieta-Iluntxo)
– Umeak A taldea: Enetz Lopategi (Danak Bat) vs Julen Serrano (Bidebieta)
– Gaztetxoak A taldea: Urko Gil-Ametz Bernaola (Bidebieta-Olaburu) vs Alain Martinez-Gilen Gomez (Bidebieta)
– Gaztetxoak B taldea: Aitzol Gomez-Liher Juez (Bidebieta-Lagun Onak) vs Jokin Arrieta-Adei Gorospe (Danak Bat-Olaburu)

Apirilak 28, igandea
12:00 – San Migeleko frontoia
– Lagunartekoak: Gorka Gonzalez vs Manez Izagirre (Bidebieta)
– Lagunartekoak: Oihan Sanchez vs Irati Liaño vs Julene Ugarte (Bidebieta)
– Umetxoak A taldea: Liher Garcia-Harri Artola (Arguia-Iluntxo) vs Kerman Uribesalgo-Ekain Artabe (Adiskide-Bidebieta)
– Umetxoak B taldea: Ibai Liaño-Eki Barahona (Bidebieta-Mandoia) vs Markel Uriarte-Unai Villapun (Adiskide-Bidebieta)
– Gaztetxoak E taldea: Ekiotz Angulo-Hodei Saenz de la Cuesta (Bidebieta-Durango) vs Luken Argueta-Danel Trias (Upo Mendi-Lemoa)

Apirilak 28, igandea
16:30 – San Migeleko frontoia
– Umeak E taldea: Ugaitz Bikarregi (Usansolo) vs Eloi Elortza (Balmaseda)
– Gazteak B taldea: Liher Ortiz de Zarate-Unai Gil (Olaburu-Bidebieta) vs Iñigo Bergantiños-Jaime Andrinua (Lagun Artea-Lea Ibarra)
– Nagusiak, final laurdenak: Arkaitz Egillor-Eneko Bercedo (Gure Kirola-Bidebieta) vs Julen Zenigaonaindia-Aitor Verde (Adiskide-Gallarta)

Maiatzak 5, igandea
11:30 – San Migeleko frontoia
– Goxua B taldea: Egoitz De Miguel-Izaro Sistiaga (Izarra-Lemoa) vs Aimar Caballero-Urtzi Heredia (Bidebieta-Izarra)
– Umeak E taldea: Aratz Mendieta (Arguia) vs Ugaitz Bikarregi (Usansolo)
– Gaztetxoak A taldea: Aimar Yanguas-Euri Muruzabal (Bidebieta-Mandoia) vs Urko Gil-Ametz Bernaola (Bidebieta-Olaburu)
– Gaztetxoak B taldea: Danel Guerrero-Ibai Santamaria (Bidebieta) vs Aitzol Gomez-Liher Juez (Bidebieta-Lagun Onak)
– Gaztetxoak D taldea: Ekaitz Ortega-Oier Gil (Bidebieta-Olgetan) vs Unax Alcalde-Markel Unda (Bidebieta)

Maiatzak 5, igandea
16:30 – San Migeleko frontoia
– Umetxoak E taldea: Ninbe Mendieta-Iraia Martelo (Arguia-Iluntxo) vs Aritz Leivas-Unax Garcia (Bidebieta)
– Goxua A taldea: Endika Alvaro-Malen Gonzalez (Bidebieta-Lemoa) vs Beñat Urrutikoetxea-Amaiur Beroiz (Bidebieta-Lemoa)
– Umeak D taldea: Iñigo Artolatxipi (Balmaseda) vs Guren Ruiz (Danok Lagunak)
– Gazteak A taldea: Aimar Gomez-Aitor Zuazo (Bidebieta-Getxo) vs Izei Saratxu-Xabier Atxutegi (Lezama-Bidebieta)
– Nagusiak, final laurdenak: Beñat Rementeria-Gorka Sobron (Olaburu-Bidebieta) vs Alen Garcia-Erdain Ibarrondo (Gallarta-Bidebieta)

Maiatzak 12, igandea
11:00 – San Migeleko frontoia
– Lagunartekoak: Ane Ureña vs Aiuri Setien (Bidebieta)
– Lagunartekoak: Mateo Del Hoyo-Julen Ventura vs Egoi Muñoz-Danel Zugazaga (Bidebieta)
– Umetxoak A taldea: Liher Garcia-Kerman Uribesalgo (Arguia-Adiskide) vs Harri Artola-Ekain Artabe (Iluntxo-Bidebieta)
– Umetxoak B taldea: Ibai Liaño-Markel Uriarte (Bidebieta-Adiskide) vs Eki Barahona-Unai Villapun (Mandoia-Bidebieta)
– Umetxoak D taldea: Jon Marina-Oier Recio (Bidebieta) vs Peio Gallastegi-Enaitz Fernandez (Adiskide-Itsasalde)
– Kadeteak A taldea: Sendoa Calvo-Enaitz Uribe (Bidebieta-Durnago) vs Haitz Ortiz de Zarate-Unax Agirrebengoa (Olaburu-Bidebieta)
– Kadeteak B taldea: Maren Aparizio-Jon Bengoetxea (Bidebieta-Joko Alai) vs Julen Carrasco-Aiur Goikoetxea (Bidebieta-Arkupe)

Maiatzak 12, igandea
16:30 – San Migeleko frontoia
– Umeak A taldea: Markel Fernandez de Pinedo (Itsasalde) vs Enetz Lopategi (Danak Bat)
– Umeak B taldea: Ekain Fernandez de Pinedo (Itsasalde) vs Izan Fontalba (Danok Lagunak)
– Gaztetxoak A taldea: Alain Martinez-Gilen Gomez (Bidebieta) vs Aimar Yanguas-Euri Muruzabal (Bidebieta-Mandoia)
– Gazteak B taldea: Ibai Ormaetxea-Haritz Solaguren (Arkupe-Olaburu) vs Liher Ortiz de Zarate-Unai Gil (Olaburu-Bidebieta)
– Nagusiak, final laurdenak: Aitor Briongos-Iskander Egillor (Orma Bi-Gure Kirola) vs Ruben Azkona-Beñat Garcia (Usansolo-Upo Mendi)

Maiatzak 19, igandea
11:00 – San Migeleko frontoia
– Umeak D taldea: Guren Ruiz (Danok Lagunak) vs Aritz Rodriguez (Bidebieta)
– Gaztetxoak E taldea: Luken Uriarte-Jon Aperribai (Adiskide-Bidebieta) vs Ekiotz Angulo-Hodei Saenz de la Cuesta (Bidebieta-Durango)
– Neskak A taldea: Jaione Elortza-Olatz Bernal (Lagun Artea-Bidebieta) vs Maialen Bedia-Ainhize Etxebarria (Lagun Artea-Txumuluxueta)
– Neskak B taldea: June Urrutikoetxea-Malen Mena (Durango-Lemoa) vs Eva Martinez-Zoihartze Basauri (Bidebieta-Lagun Artea)
– Nagusiak, final laurdenak: Mikel Karrillo-Xabier Aristondo (Bidebieta-Kurene) vs Iñaki Peña-Aimar Iturbe (Bidebieta-Zaldua)

Maiatza 19, igandea
16:30 – San Migeleko frontoia
– Umetxoak D taldea: Oier Recio-Enaitz Fernandez (Bidebieta-Itsaslde) vs Peio Gallastegi-Jon Marina (Adiskide-Bidebieta)
– Umetxoak E taldea: Ninbe Mendieta-Aritz Leivas (Arguia-Bidebieta) vs Iraia Martelo-Unax Garcia (Iluntxo-Bidebieta)
– Goxua A taldea: Beñat Urrutikoetxea-Amaiur Beroiz (Bidebieta-Lemoa) vs Endika Fuente-Arhane Mendibil (Bidebieta-Mandoia)
– Umeak A taldea: Julen Serrano (Bidebieta) vs Markel Fernandez de Pinedo (Itsasalde)
– Umeak B taldea: Inar Etxaburu (Bidebieta) vs Ekain Fernandez de Pinedo (Itsaslde)
– Gaztetxoak B taldea: Jokin Arrieta-Adei Gorospe (Danak Bat-Olaburu) vs Danel Guerrero-Ibai Santamaria (Bidebieta)
– Gaztetxoak D taldea: Unax Alcalde-Markel Unda (Bidebieta) vs Jon Urrutikoetxea-Aran Goti (Upo Mendi-Mandoia)

Maiatzak 26, igandea
10:30 – San Migeleko frontoia
– Lagunartekoak: Dario Del Hoyo-Julene Ugarte (Bidebieta) vs Endika Bilbao-Irati Liaño (Bidebieta) vs June Bilbao-Oihan Sanchez (Bidebieta)
– Lagunartekoak: Manex Agirre vs Gorka Gonzalez (Bidebieta)
– Umetxoak D taldea: Oier Recio-Peio Gallastegi (Bidebieta-Adiskide) vs Enaitz Fernandez-Jon Marina (Itsasalde-Bidebieta)
– Umetxoak finalerdia: A taldeko bikotea vs B taldeko bikotea
– Gaztetxoak final laurdenak: 1A vs 2B
– Gaztetxoak final laurdenak: 1B vs 2D
– Gaztetxoak final laurdenak: 1D vs 2E
– Gaztetxoak final laurdenak: 1E vs 2A
– Gazteak A taldea: Alex Andrinua-Etxahun Olazabalaga (Lea Ibarra-Txumuluxueta) vs Aimar Gomez-Aitor Zuazo (Bidebieta-Getxo)

Maiatzak 26, igandea
16:30 – San Migeleko frontoia
– Goxua B taldea: Aimar Caballero-Urtzi Heredia (Bidebieta-Izarra) vs Hegoi Yanguas-Saioa Gonzalez (Bidebieta-Lemoa)
– Umeak final laurdenak: 1A vs 2B
– Umeak final laurdenak: 1B vs 2D
– Umeak final laurdenak: 1D vs 2E
– Umeak final laurdenak: 1E vs 2A
– Kadeteak A taldea: Haitz Ortiz de Zarate-Unax Agirrebengoa (Olaburu-Bidebieta) vs Markel Sololuze-Khadim Lo (Markina-Akarregi)
– Kadeteak B taldea: Julen Carrasco-Aiur Goikoetxea (Bidebieta-Arkupe) vs Izei Urkidi-Jon Fraile (Akarregi-Lagun Onak)

Ekainak 2, igandea
11:30 – San Migeleko frontoia
– Umetxoak finalerdia: D taldeko bikotea vs E taldeko bikotea
– Gaztetxoak finalerdia: 1A-2B vs 1D-2E
– Gaztetxoak finalerdia: 1B-2D vs 1E-2A
– Neskak A taldea: Maialen Bedia-Ainhize Etxebarria (Lagun Artea-Txumuluxueta) vs Laia Aparizio-Irene Azkona (Bidebieta-Usansolo)
– Neskak B taldea: Eva Martinez-Zoihartze Basauri vs Maialen Gaston-June Agirrebeitia (Bidebieta-Lagun Artea)

Ekainak 2, igandea
17:00 – San Migeleko frontoia
– Umeak finalerdia: 1A-2B vs 1D-2E
– Umeak finalerdia: 1B-2D vs 1E-2A
– Nagusiak finalerdia: Briongos-Egillor I (Orma Bi-Gure Kirola) edo Azkona-Garcia (Usansolo-Upo Mendi) vs Rementeria-Sobron (Olaburu-Bidebieta) edo Garcia-Ibarrondo (Gallarta-Bidebieta)
– Nagusiak finalerdia: Egillor II-Bercedo (Gure Kirola-Bidebieta) edo Zenigaonaindia-Verde (Adiskide-Gallarta) vs Karrillo-Aristondo (Bidebieta-Kurene) edo Peña-Iturbe (Bidebieta-Zaldua)

Ekainak 9, igandea
11:00 – San Migeleko frontoia
– Neskak finalerdia: 1A vs 2B
– Neskak finalerdia: 1B vs 2A
– Kadeteak finalerdia: 1A vs 2B
– Kadeteak finalerdia: 1B vs 2A

Ekainak 9, igandea
16:30 – San Migeleko frontoia
– Lagunartekoak: Aiuri Setien vs Ane Ureña (Bidebieta)
– Lagunartekoak: Mateo Del Hoyo-Danel Zugazaga vs Egoi Muñoz-Julen Ventura (Bidebieta)
– Lagunartekoak: Dario Del Hoyo-Irati Liaño vs Endika Bilbao-June Bilbao vs Julene Ugarte-Oihan Sanchez (Bidebieta)
– Goxua finalerdia: 1A vs 2B
– Goxua finalerdia: 1B vs 2A
– Gazteak finalerdia: 1A vs 2B
– Gazteak finalerdia: 1B vs 2A

Ekainak 16, igandea
10:00 – San Migeleko frontoia
– Umetxoak finala
– Goxua finala
– Umeak finala
– Gaztetxoak finala
– Neskak finala
– Kadeteak finala
– Gazteak finala
– Nagusiak finala

Osorik irakurri

☉ Basauri

Asteburu solidarioa antolatuko dute Basaurin, Alex Garcia Galas herrikidearen alde

Apirilaren 27an eta 28an antolatu du asteburu solidarioa Basozelaiko El Maño Auzo Elkarteak. Besteak beste, haurrentzako parkea, paella solidarioa, bingo solidarioa eta zozketak antolatu dituzte

|

Basozelaiko El Maño Auzo Elkarteak jarri ditu martxan ekimen solidarioak Basauriko Udalaren laguntzarekin // Geuria

Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.

Aurreikuspenen arabera asteburu honetan aberriratuko du Defentsa Ministerioak hegazkin medikalizatu batean.

Aberriratzea emango den arren, ekimen solidarioek ez dute etenik. Basaurin, esaterako, El Maño Basozelaiko Auzo Elkarteak kanpaina bat jarri du martxan dirua biltzeko.

Alde batetik, itsulapikoak jarri ditu herriko saltoki eta tabernetan: “Momentuz 84 itsulapiko jarri ditugu herriko saltoki eta tabernatan, baina eskari gehiago jaso ditugu eta beste itsulapiko sorta bat jasotzeko zain gaude”, dio Gorka Del Rio Basozelaiko Auzo Elkarteko kideak.

Eta, beste alde batetik, apirilaren 27an eta 28an asteburu solidarioa antolatu dute Basaurin. Besteak beste, haurrentzako parkea, urdaiazpiko moztailea, paella solidarioa, bingo solidarioa, barra solidarioa eta zozketak antolatu dituzte.

“Ekimen solidario hauetatik bilduko dugun dirua Alexen familiari emango diogu. Familiak egin behar izan dituen —eta gaur egun egin behar dituen— gastuak ordaintzeko izango da”, dio Gorkak. Datuak datu, egunero Thailandian 3.000 eta 4.000 euro artean gastatzen ditu Alexen familiak, mediku probak egin ahal izateko.

Egitaraua / Asteburu solidarioa Alexen alde

Apirilak 27, larunbata
Haur Parkea: zezen mekanikoa, puzgarriak, goma elastikoa, jostailuak…
16:00-19:00 Solobarriako karpa

Apirilak 28, igandea
Barra solidarioa, musika eta zozketak (herriko saltokiek dohaintzan emandako produktuak) egunean zehar
12:00-19:00 San Jose Ikastetxeko jolastokia

Urdaiazpiko moztailea
12:00 San Jose Ikastetxeko jolastokia

Paella solidarioa
14:30 San Jose Ikastetxeko jolastokia

Bingo solidarioa: Iker Muniain Athelticeko jokalariak dohaintzan emandako Kopako finaleko kamiseta bat
18:00 San Jose Ikastetxeko jolastokia

Osorik irakurri

☉ Basauri

Basaurik itsulapikoak jarri ditu Thailandian gaixo dagoen herrikidearen senideak laguntzeko

El Maño Basozelaiko Auzo Elkarteak kanpaina bat jarri du martxan dirua biltzeko. Herrian zehar momentuz 84 itsulapiko jartzeaz gain, apirilaren 27an eta 28an ekitaldi solidarioak antolatuko dituzte

|

Basauritik zehar 84 itsulapiko jarri ditu Basozelaiko Auzo Elkarteak, Alexen familiak Thailandian egindako gastuak ordaintzeko // Geuria

Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.

Otsailaren 25ean ospitaleratu zuten Zainketa Intentsiboetako Unitatean (ZIU) eta ordutik bere senideak Euskal Herriratzeko ahaleginetan dira.

Alexen ingurukoek zabaldu dutenez, familiak, “etsi-etsian”, hegazkin medikalizatu bat kontratatu zuen bertara ekartzeko, baina ez zioten hegan egiten utzi, “barne-odoljario larria izateko arriskua” baitzegoen.

Familiak 221.000 euro jarri zituen hegazkin medikalizatu hori kontratatzeko, baina ezin izan dutenez erabili, diru hori galdu dute.

Gauzak horrela, crowfunding kanpaina bat abiarazi dute Alexen lagunek eta senideek. Momentuz 114.445 euro bildu dituzte.

Diru bilketa Basaurin

Basaurin El Maño Basozelaiko Auzo Elkarteak kanpaina bat jarri du martxan dirua biltzeko: “Basozelaiko Auzo Elkartetik gure babesa adierazi nahi diogu gure bizilagun Alexen familiari eta apirilean zehar ekitaldi solidarioak antolatuko ditugu”, diote.

“Basozelaiko saltokietan itsaulapikoak jartzen hasi ginen, baina sare sozialen bitartez ekimenak izan duen oihartzuna ikusita, Basauri osora hedatu dira itsulapikoak”, dio Gorka Del Rio Basozelaiko Auzo Elkarteko kideak.

Guztira, 84 itsulapiko daude herriko saltokietan zehar. “Gainera, beste itsulapiko asko ere jarri ditugu Basauritik kanpo, adibidez, Eibartik idatzi ziguten bertan ere itsulapikoak jartzeko”, dio.

Bilduko duten dirua Alexen familiari emango dio Basozelaiko Auzo Elkarteak: “Bildutako dirua familiak egin behar izan dituen —eta gaur egun egin behar dituen— gastuak ordaintzeko izango da”.

“Egunero Thailandian 3.000 eta 4.000 euro artean gastatzen ari da familia, Alexi probak egin ahal izateko”, zehaztu dute El Maño Auzo Elkartetik.

Asteburu solidarioa

Beste alde batetik, itsulapikoez gain, El maño Basozelaiko Auzo Elkarteak asteburu solidarioa antolatu du apirilaren 27an eta 28an Basaurin.

Besteak beste, haurrentzako parkea, urdaiazpiko moztailea, paella solidarioa, bingo solidarioa, barra solidarioa eta zozketak antolatu dituzte.

Aberriratzea, asteburuan

Alexen senideak Margarita Robles Defentsa ministroarekin harremanetan jarri ziren aste hasieran eta horrek egoera aztertuko zuela adierazi zien.

Eitb-k jakinarazi duenez, asteburu honetan egingo dute basauriarraren aberriratzea. Marisol Garmendia Espainiako Gobernuak Euskadin duen ordezkariak baieztatu duenez, hegazkina asteburu honetan abiatuko da eta gaur arratsaldean jakinaraziko dituzte Alexen premiazko aberriratze dispositiboari buruzko xehetasunak.

Osorik irakurri