‘Sub (cero)’ proiektua aurkeztu du artista donostiarrak eta 6.000 euroko beka jasoko du. Datorren ikasturtean Basauriko ikastetxeetan tailerra emango du
Eduardo Lopez artista gipuzkoarrak (Donostia, 1965) irabazi du 2017ko Juan eta Pablo de Otaola beka, ‘Sub (cero)’ proiektua aurkeztuta. Pintura da proiektu honen ardatz nagusia, eduki poetikoekin uztartuta: “Nik ditudan kezkak margozten ditut eta nire helburua da ikusleek eurek beren buruari galderak egitea. Adibidez, bizitzari buruz, heriotzari buruz, maitasunari buruz, bizitzaren antolaketari buruz… gizakiak izan ditzakeen edozein ardurei buruz, alegia“, dio Lopezek.
Artista irabazleak 75 irudi aurkeztuko ditu, baita 200 orrialdeko liburu bat -irudi eta kontakizunekin- eta soinuekin sortutako beste eduki bat. Lopezek sei hilabete izango ditu bere proiektua burutzeko eta horretarako 6.000 euroko beka jasoko du. Ondoren, proiektuari buruzko memoria aurkeztu beharko du, bisuala zein idatzizkoa.
Bekaren 28. edizio honetan 33 proiektu aurkeztu dituzte 35 artistek. “Hautagaien maila oso altua izan da oraingoan ere. Beka zorrotza da eta hori artistek badakite. Horregatik aurkezten dituzte horren proiektu onak”, dio Juan Zapater Bilbao Arteko zuzendariak eta aurtengo Otaola bekaren epaimahaietako batek (Zapaterrekin batera izan da Nadie Barkate artista eta bekaren irabazlea 2015ean).
IBILBIDE OPAROA ARTEAREN MUNDUAN
Edu Lopez artistak ibilbide luzea du artearen munduan: Arte Ederretan lizentziatua da Euskal Herriko Unibertsitatean eta 50 erakusketa kolektibo baino gehiagotan parte hartu du Espainia mailan zein nazioartean. Orain arte jaso dituen sarien artean, Gure Artea (1998an) eta Donostiako Artista Hasiberriena (1990an) aipa litezke. Era berean, bilduma publiko eta pribatu esanguratsuetan dago bere obra.
Juan eta Pablo de Otaola beka 1990. urtean sortu zen. Otaola familiak finantziatzen du eta Basauriko Udalak kudeatzen du. Bere helburua da prestakuntza artistikoa sustatzea eta arte plastikoen eremuko sormenean laguntzea.
