Lova Lois astrabuduarrak irabazi du Rockein musika lehiaketaren 11. edizioaren sari nagusia. Besteak beste, sari nagusiari esker honakoa egingo du: EP profesional bat grabatu, ekoitzi eta masterizatuko du Bilboko El Tigre estudioetan, EParen 500 kopia diseinatu eta editatuko ditu CD euskarrian, bideoklip profesional bat grabatuko du, eta MAZ Basauri jaialdian edo Bizkaiko areto onenetako batean kontzertua eskainiko du.

Bestetik, Sweet Rage azken belaunaldiko metal seikote bizkaitarrak (baxu-jotzailea Usansolokoa da) tokiko talderik onenaren saria irabazi du; euskarazko talderik onena Islabat taldea izan da, Asier Olabarrieta elgoibartarraren rock intimista proiektua, Andoni Alonso galdakoztarra taldean duena; eta Nun kantautore gasteiztarrak Eskarabilera Saria jaso zuen.

Sweet Rage taldeak eta Nun musikariak MAZ Basauri jaialdian edo Bizkaiko areto onenetako batean joko dute datorren urtean, eta Islabat taldeak abesti bat grabatzeaz eta ekoizteaz gain, MAZ Basauri jaialdian edo Bizkaiko areto onenetako batean joko du.

Aurten Rockeineko finalean epaimahaia osatu dutenak izan dira: Álvaro Fierro (musika kritikaria, musika dokumentalen zuzendaria eta Kultumetriako arduraduna, kulturaren eremuan inpaktua aztertzeko enpresa); Eva Ausín (ekoizlea, konpositorea, gidoilaria eta koreografoa. Let ‘s Dance konpainiako zuzendaria eta Espainiako Arte Eszenikoen Akademiako kidea); Jon Agirrezabalaga (soinu-ekoizle eta -ingeniaria El Tigre Estudiosen (Bilbon). Musikaria eta konpositorea WAS eta Zabalan); María Larrinaga (Basauriko Udaleko Kultura zinegotzia); Iker Bárbara (MondoSonoro aldizkariaren Euskal Herriko eta Errioxako edizioaren koordinatzailea, kultur sustatzailea eta DJa); eta Javier Jiménez (Arrigorriagako Gaztegunea).

Finala azaroaren 18an, larunbatez, izan zen Basauriko Social Antzokian, sarrera doan. Gainera, Rockeinen Youtube kanalean zuzenean emititu ziren emanaldiak, eta oraindik ere ikusgai daude kontzertuak.

6 finalista, 191 parte-hartzaile

Rockeineko finalean sei taldek edo bakarlarik jotzen dute zuzenean Social Antzokian. Aurten talde edo musikari hauek igo dira Basauriko eszenatokira:

Aurtengo edizioan, guztira, 191 artistak eman dute izena, zortzigarren urtez jarraian parte hartze marka gaindituz. Datuak datu, 2013an 85 izen-emate jaso zituzten, 2014an 105, 2015ean 95, 2016an 110, 2017an 129, 2018an 135, 2019an 146, 2020an 169, 2021ean 179 eta 2022an 188.

Rockein Hergo Euskal Herriko bakarlari eta taldeei zuzendutako musika-lehiaketa da. Basauriko Udalak antolatzen du lehiaketa, Arrigorriagako, Galdakaoko eta Laudioko Udalen laguntzarekin, eta Bizkaiko Foru Aldundiaren babesa ere jasotzen du ekimenak.