Sareak

☉ Basauri

Zurrakapotea, 40 urte Basaurin

|

Los Turcos alt text

Basauriko Turcos koadrilak Nafarroako Erriberatik ekarri zuen zurrakapotea eta lagun artean edateko prestatzen zuten. Nork imajinatuko zuen garai hartan ia 50 urtetako herentzia utziko zutenik!

Basauriko zurrakapotearen jatorria ezagutzeko 60. hamarkadako amaierara itzuli behar dugu. 1968an hamar koadrila egun ezagutzen ditugun San Faustoko jaiak ospatzen hasi ziren, horien artean Turcos izenekoa. Bertan, Antonio ‘Sesma’ -ezizen horrekin ezagutzen zuten lagunek- gaztea zegoen. Jaioterria Sesman (Nafarroako Erribera) zuen baina basauriarra zen eta bere herriko festetako edaria ekarri zien Basauriko lagunei. Behintzat, horrela gogoratzen dute Iñaki Intxaustik eta Jaime Izagirrek, Turcos-eko sortzailetako bik. Ziur asko Nafarroan bizi izandako istorioak Basauriko jaietan ere bizi nahi izango zituen eta horretarako zurrakapotea lagungarri izango zela pentsatu zuen “Sesma”k.

Turcos koadrilakoak edabea dastatzeko prest agertu ziren. Prestaketa oso erraza zen: ardo klaretea, limoien zukua, kanela, azukrea eta dena nahastu. Gero, jalkitzen utzi eta edan. Ardoarekin ere ez zen arazorik egon. Sabino Gojenola zen hornitzailea. Garai hartan, Galarreta upeltegietan lan egiten zuen. Upel txikiak erabiltzen zituzten zurrakapotea egiteko eta denek lan egiten zuten “Sesma”ren aginduak betez, bera baitzen zurrakapotea egiten trebeena. Jaime Izagirreren gogoeten arabera, “denok lagundu behar izaten genuen, koadrilan 18-20 lagun ginen hasieran eta irakaslearen aginduak betetzen genituen. Normala da, orain, hain jendetsuak diren koadriletan zurrakapotearen lana gutxi batzuen esku geratzea”.

Gaur egun, Basauriko jaietako 15 koadrilek batez beste 30.000 litro egiten dituzte urtero baina urte haietan “ezinezkoa zen hainbeste edari egitea”. Koadrilan ez ziren asko eta zurrakapotea nobedadea zen gehiengoarentzat. “Guretzat eta lonjara zetozen lagunentzat prestatzen genuen, beraz, gutxi egitearekin nahikoa zen. Amaitzen zenean berriro prestatzen genuen”, dio Intxaustik.

 

AZKAR HEDATU ZEN
Zurrakapotea Basaurira heldu eta urte gutxitara, beste bederatzi koadrilek edaria egiten ikasi zuten eta jaietan ezinbesteko bihurtu zen. Koadrilak honako hauek ziren: Turcos, Zoroak, Piratas (orain Itsaslapurrak), Zigorrak, Edurreko dantzariak, Txikerrako lagunak, Laguntasuna, Ogeta Bat-eko 21ak, Hauspoak eta Incas taldeko neskak. Ondoren etorri ziren Aldatxa, Basajaunak, Mozkorrak, Ontzak, Txano Gorritxu, Alaiak eta Urbiko Lagunak.

Berrogeita sei urte pasatu dira egun ezagutzen ditugun jaiak jaio zirenetik eta berrogei inguru, basauriarrak zurrakapotea dastatzen hasi zirenetik. Hori bai, edaria egiteko modua aldatu egin da, adibidez, gaur egun basauriarrek nahigo dute ardo beltza hasierako klaretea baino.

 

ZURRAKAPOTEA, CALAHORRAN SORTUA
Non du sorterria zurrakapoteak? Oso zaila da zehatz-mehatz jakitea baina askoren ustetan Calahorran (Errioxa) hasi ziren “edabe magikoa” egiten. Are gehiago, bertako Peña Philips ‘Mientraselcuerpoaguante’ taldeak -aurten bere 60. urteurrena ospatu duenak- zurrakapotearen benetako bultzatzailea dela uste du eta benetako errezeta eurek bakarrik ezagutzen dutela diote.

Egia izan ala ez, San Faustoetako edaria ohikoa da Errioxako hainbat herritako jaietan. Gainera, beste hainbat lekutara hedatu da, adibidez, Burgos, Soria, Nafarroako Erribera, Euskadi, Albacete, Granada, Jaen, Ciudad Real, Cuenca edo Guadalajarara. Gainera, prestatzeko eta edateko modua ezberdina da herri bakoitzean. Adibidez, Sorian ardoari ura botatzen diote eta ondoren bestelako osagaiak.

☉ Basauri

Basauri Bonua kanpaina berria martxan izango da apirilaren 22tik maiatzaren 19ra arte

|

Bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko // Geuria

Basauri Bonua kanpaina berria abiaraziko du Udalak apirilaren 22tik maiatzaren 19ra bitartean. Guztira herriko 140 saltoki atxiki dira kanpainara, iaz baino zazpi gehiago.

Aurreko urteetan bezala, bi bonu mota igorriko dituzte: bata 4 eurokoa, bezeroek 6 euro gastatu ahal izateko; eta bestea 10 eurokoa, 15 euro gastatzeko.

Aurrekoetan bezala, bonuak ez dituzte formatu fisikoan aterako. Bonuak kanpainari atxikitako establezimenduetan eskuratu behar dira, eta gehienez ere 60 eurora arteko bonuak erosi ahal izango dira NAN/IFZ/AIZ bakoitzeko. Ezin izango dira diru-truke aldatu eta, erabiltzen ez badira, ez da dirua itzuliko.

Kanpainara atxiki diren establezimenduen zerrenda apirilaren 22an bertan publikatuko dute bono.basauri.eus webgunean. Hala ere, saltoki bakoitzak Basauri Bonua identifikazio-eranskailua izango du.

100.000 euro gehiago

Basauriko Udalak 300.000 euro bideratu ditu aurtengo kanpainara, iaz baino 100.000 euro gehiago.

“Guztira 300.000 euro bideratuko ditugu ekimen honetara, baina udalerrian izango duen inpaktu ekonomikoa askoz ere handiagoa izango da, bezero bakoitzak bonua eskuratzean eta erosketa egitean ordaintzen duen kopurua gehitu behar baitzaio kopuru horri”, diote udal ordezkariek.

Osorik irakurri

☉ Basauri

Basauriko Meeting Probak maiatzaren 5ean izango dira Artunduagako kiroldegian

|

Proba Nazioarteko Batzorde Paralinpikoaren Nazioarteko Atletismo Egutegian sartuta dago // Geuria

Basauriko Meeting Probak maiatzaren 5ean, igandez, izango dira Artunduagako kiroldegian 09:00etatik aurrera. Aurten 26. edizioa da eta guztira 40 proba izango dira, tartean kategoria paralinpikokoak.

Izan ere, proba Nazioarteko Batzorde Paralinpikoaren Nazioarteko Atletismo Egutegian sartuta dago, eta, beraz, meetingaren emaitzek errekorretarako eta KPIren rankingerako balioko dute.

Basauriko Meeting Probetan parte hartzeko izena emateko epea zabalik dago apirilaren 21era arte. “Beharrezkoa da atletek, gidariek eta entrenatzaileek izena emateko inprimakia betetzea”, diote batzorde antolatzailetik.

Meetinga Basauriko Merkatari Elkarteak antolatzen du, Udalaren laguntzarekin.

Osorik irakurri

☉ Basauri

Basauri metro geltokia itxi dute “sute txiki” batengatik

|

basauri metro bilbao 2016 bost urte
Basauriko metro geltokia // Artxiboko irudia, Geuria

Arazo teknikoak direla eta, Etxebarri eta Basauri geltokien artean zerbitzua eten egin du Metro Bilbaok. Gainera, Basauri geltokia itxita egongo dela adierazi dute, “beste abisurik eman arte”.

Suhiltzaileek jakinarazi dutenez, “sute txiki bat” piztu da metro trenaren gainean, eta adierazi dutenez Metroko langileek eurek amatatu dute.

Osorik irakurri

☉ Basauri

Thailandian gaixo dagoen basauriarra ekartzeko hegazkin medizalizatua prestatzen ari dira

|

Alex Garcia, Usoa Martinez bere emaztearekin batera //

Alex Garcia Galas basauriarra (Basauri, 36 urte) pankreatitisak jota gaixorik dago Bangkokeko (Thailandia) ospitale batean.

Otsailaren 25ean ospitaleratu zuten Zainketa Intentsiboetako Unitatean (ZIU) eta ordutik bere senideak Euskal Herriratzeko ahaleginetan dira.

Alexen ingurukoek zabaldu dutenez, familiak, “etsi-etsian”, hegazkin medikalizatu bat kontratatu zuen bertara ekartzeko, baina ez zioten hegan egiten utzi, “barne-odoljario larria izateko arriskua” baitzegoen.

Familiak 221.000 euro jarri zituen hegazkin medikalizatu hori kontratatzeko, baina ezin izan dutenez erabili, diru hori galdu dute.

Gauzak horrela, crowfunding kanpaina bat abiarazi dute Alexen lagunek eta senideek. Momentuz 91.371 euro bildu dituzte.

Defentsa Ministerioarekin harremana

Alexen senideak Margarita Robles Defentsa ministroarekin harremanetan jarri ziren aste hasieran eta horrek egoera aztertuko zuela adierazi zien.

Orain, Eitb-k jakinarazi duenez, Defentsa Ministerioak baieztatu du pankreatitisa duen gaztea Espainiaratzeko (Madrilera eramango lukete) hegazkin medikalizatua prestatzen hasi direla, baina oraingoz ez dutela datarik zehaztu.

Diru bilketa Basaurin

Estatuko zein Euskal Herriko hainbat herritarrek dohaintzak egin dituzte. Momentuz 91.371 euro bildu dituzte eta asmoa da 221.000 eurora iristea.

Basaurin El Maño Basozelaiko Auzo Elkarteak kanpaina bat jarri du martxan dirua biltzeko: “Basozelaiko Auzo Elkartetik gure babesa adierazi nahi diogu gure bizilagun Alexen familiari eta datozen egunetan zehaztuko ditugu egingo ditugun ekitaldi solidarioak”, diote.

“Basozelaiko saltokietan itsaulapikoak jarriko ditugu Alexen familiari dohaintzak egiteko, eta diru-sarrerak egiteko kontu-zenbaki bat zehaztuko dugu”, adierazi dute.

Osorik irakurri

☉ Basauri

Ikastetxeetako jolastokiak ikuspegi feministarekin eraldatzeko prosezua hasi dute Basaurin

|

Apirilaren 23an egingo dute mahai-inguru irekia / Geuria

Ikastetxeetako jolastokiak ikuspegi feministarekin eraldatzeko prozesua hasi dute Basaurin. Horretarako Udaleko Berdintasun Arloak jardunaldi bat antolatu du eskoletako jolastokiak ikuspegi feministarekin eraldatzearen garrantziari buruzko gogoeta bultzatzeko.

‘Patioetan hamaika aukera. Jolastokiak konpon eta berdintasuna lor’ lemapean, apirilaren 23an mahai-inguru ireki bat antolatu dute Basauriko Udalak eta Marieneak 1era2kain egitasmoaren barruan.

Jardunaldia Ibaigane Kultur Etxean izango da 17:30etik 20:00etara bitartean, eta Basauriko jolastokiak eraldatzeko prozesuan parte hartu duten Lehen Hezkuntzako ikastetxeen esperientziak aurkeztuko dituzte, “haien zailtasun, erronka eta aukerekin”.

Ildo horretan, etorkizuneko erronkak jasoko dituzte “eskola-ingurune inklusibo, genero-estereotiporik gabekoa eta ingurunearen eta pertsona guztien zaintzaz arduratutako baterantz urratsak egiten jarraitzeko”.

Jardunaldian parte hartu nahi duten herritarrek izena eman behar dute esteka honen bitartez edo 605 173 119 telefono zenbakira deituz apirilaren 22a baino lehen.

Osorik irakurri