Sareak

☉ Arrigorriaga

Etxean geratzeko aitzakiarik ez Gabonetan

|

basauri pin 2014

Basaurin hasi da dagoeneko Gabonaldia, eta Arrigorriagan eta Etxebarrin ere prest dituzte Eguberrietako egitarauak. Umeentzako Gabonetako Parkeak, Olentzerok eta Errege Magoek osotzen dituzte programak.

Abenduaren 12az geroztik martxan da Gabonaldia programa Basaurin. Urtarrilaren 6ra bitarte, Olentzero eta Errege Magoen kalejira, tailerrak, ludotekak, antzerkia eta kirol jarduerak izango dira, Udalak, Social Antzokiak, Kultur Etxeek eta Basauri Kirolakek antolatuta, Herriko Taldeak, Mikelats eta Merkatarien Elkartearekin elkarlanean.

Musikak ere izango du tarterik Gabonetan: abenduaren 19an euskarazko karaokea egingo da Basozelaiko Gizarte Etxean 17:30etik aurrera; hilaren 21ean 18:00etan Oihan Vega DJa etorriko da Social Antzokira eta 30ean Mikelatsek diskofesta –txokolatada barne- antolatu du San Migelgo frontoian. Horrez gain, abenduaren 23an 17:30ean Musika Eskolako ikasle eta irakasleek Basauriko kaleak alaituko dituzte gabon kantekin: Solobarria plazatik abiatuko dira eta Benta, Arizgoiti eta Eskolan bertan geldiuneak egingo dituzte.

Abenduaren 20an Artunduagako eta Urbiko Kiroldegiek helduentzako indoor zikloa prestatu dute 10:30etatik 12:00etara eta urtarrilaren 3an, 17:00etatik 19:00etara bitartean kiroldegi hauetako igerilekuek puzgarriak jarriko dituzte. San Migelen ere puzgarriak ipiniko dituzte frontoian urtarrilaren 2an, baita minigolf pista bat ere; 11:00etatik 14:00etara eta 17:00etatik 19:00etara egongo dira zabalik.

Arrigorriagako Udaleko Kultura Arloak ere programa zabala prestatu du Gabonetarako, abenduaren 21etik urtarrilaren 6ra luzatuko dena. Hilaren 21ean, 17:30etik 20:00etara ‘Olentzeroren postaria’ udaletxeko plazan egongo da. Bertan, Aritz Berri dantza taldea izango da, gaztainak banatuko dira eta Mari Domingik Arrigorriagako haurren gutunak jasoko ditu Olentzerori emateko. Hilaren 29an umeentzako jarduerak antolatu dituzte, tartean, Gabonetako xake-txapelketa, bai Abusun bai herrigunean. Era berean, Gazteguneak eta Gaztetxokoak ere Gabonetako festak ospatuko dituzte abenduaren 19an.

60 ekintza baino gehiago biltzen ditu, bestalde, Etxebarriko Udalak eta herriko elkarteek antolatu duten egitarauak: Abenduaren 26an, 27an eta 28an Gabonetako Haur Parkea irekiko da frontoian simulatzaile birtualekin, scalextric-arekin eta puzgarriekin, eta txikienek haur antzerkia, tailerrak eta ipuin kontalariak izango dituzte. Kirolari dagokionez, erakustaldiak eta txapelketak jokatuko dira: eskubaloia, futbola, judoa, taekwondoa edo igeriketa sinkronizatua.

Horrez gain, janari bilketa egingo da eta Olentzeroren eta Mari Dominigiren zapiak salgai jarriko dira Etxebarriko hainbat lekutan, bildutako dirua eta janaria Saharako umeei bidaliko zaie.

UMEENTZAKO GABONETAKO PARKEAK

Basauriko Gabon Parkeak abenduaren 19an, arratsaldez, irekiko ditu ateak eta urtarrilaren 6ra arte mantenduko da zabalik: 11:00etatik 14:00etara eta 17:00etatik 20:00etara, hilaren 24an eta 31an izan ezik, egun horietan goizez bakarrik egongo baita irekita. Adinaren arabera banatuko dira jolasak, tailerrak eta puzgarriak. Gainera, game gune bat ere prestatu dute. Karpatik kanpo motordun ibilgailuentzako zirkuitu bat egongo da, baita bide-segurtasun heziketa eta multiabentura jolasak ere.

Arrigorriagako Gabonetako Parkea abenduaren 26an eta 27an egongo da zabalik 11:00etatik 14:30era eta 17:00etatik 20:30era, Udal Kiroldegiko lehenengo solairuko areto handian. Sarrerak 2 euro balioko du. Abusu auzoan, berriz, abenduaren 23an eta 26an zabalduko ditu ateak Umeentzako Gabonetako Parkeak.

OLENTZEROREN HITZORDUAK

Abenduko azken egunekin batera Olentzero etorriko da bisitan gure herrietako kaleetara eta auzoetara. Hilaren 24an, 11:00etatik 13:30era Basauriko Arizgoiti plazan izango da Olentzero aurten jaio diren umeei harrera egiteko eta 16:30etik aurrera kalejira egingo du herriko kaleetan barrena. San Migelera helduko da 12:00etan, Hernan Cortes plazara. Era berean, txu-txu tren bat auzoan bueltaka ibiliko da.

Arrigorriagara, ostera, egun bat lehenago iritsiko da Olentzero. Abenduaren 23an 09:00etatik 12:30ak arte herriko eskolako umeekin izango da eta 24an Arandia egoitzan 11:00etatik 13:00etara. 17:00etan, txistulariak haren bila irtengo dira eta herriko kaleetan barrena ibiliko dira musika eta dantzak lagun dituztela. Abusura hilaren 24an etorriko da Olentzero. Azkenik, Etxebarrira hilaren 24an iritsiko da, 11:00ak aldera, eta 17:30ean San Antonio auzoko parrokian izango da.

ERREGE MAGOAK ETA EPIFANIA

Urtarrilaren 2an 18:30ean Erregeen Postaria Basauriko Arizgoiti plazara helduko da umeen gutunak jasotzera. Hilaren 5ean, berriz, Errege Magoak Social Antzokira iritsiko dira eta bertan egingo diete harrera herriko haurrei 11:00etatik 13:30ak arte. 18:00etan kabalgata egingo dute herriko kaleetan barrena.

Arrigorriagan Erregeen Postaria abenduaren 28an izango da 12:00etatik 14:00etara. Herriko Merkatarien Elkarteak haurrentzako jarduerak antolatuko ditu egun horretan. Urtarrilaren 5ean Epifaniaren antzezpenaren 42. Edizioa egingo dute udaletxeko plazan 19:00etatik 21:00etara eta hilaren 6an Errege Magoek eta haien pajeek Arandia egoitza bisitatuko dute 10:00etatik 12:00etara.

☉ Arrigorriaga

Arrigorriagako Gazte Egunak 300 lagun bildu ditu Gaztetxean, larunbatean

“Giro paregabea” izan zela aitortu dute Arrigorriagako Gaztetxetik, gaueko musika-eskaintza anitzarekin

|

Gazteak, bazkarian // Arrigorriagako Gaztetxea

Arrigorriagako Gazte Egunaren zortzigarren edizioa ospatu dute ekainaren 22an, Gaztetxean eta Argala plazan. Aurten, urteroko Hockey Txapelketa eta bertso bazkariaz gainera, Bafle poteoa antolatu dute herrian zehar.

Asteburuko eguraldi txarrak udaletxeko arkupeetara eraman du urteroko hockey txapelketa, iaz bezalaxe. Hala ere, Gazte Egunaren delaldiak “arrakasta handia” izan duela azaldu diote Gaztetxeko arduradunek GEURIAri: “140 lagun bildu ziren bertso bazkarian eta gerora 300 pertsona inguru izan ziren Gaztetxean”.

Izan ere bazkariko “giro paregabea” azpimarratu dute Gaztetxetik eta gaueko eskaintza musikala anitza izan zela azaldu dute: Rally48, Altxa Porru Erromeria eta Painapple taldeen kontzertuen lekuko izan ziren kontzertuetara gerturatu zirenak.

Osorik irakurri

☉ Arrigorriaga

Arrigorriagako san juan gaueko ekintzak kiroldegiko kantxa urdinean egingo dituzte

Arrigorriagako Udalak iragarri duenez, iratxoak eta sorginak 20:45etan antolatu dituzte

|

Haurrak, San Juan suan // Geuria

Hasiera batean Mendikoso eta Mintegi parkean antolatu zituzten san juan suen pizteak eta jarduerak lekualdatu ditizte asteburuko eguraldia dela eta. Arrigorriagako Udalak kiroldegiko kantxa urdinera lekualdatu ditu. Horiek horrela, 18:00etatik aurrerako ekintza guztiak bertan izango dira: iratxoak eta sorginak 20:45etan izango dira. Ondorioz, bertan ez dute surik piztuko.

21:35etan txokolate jana eta dantza egingo dute, 22:30ak arte.

Osorik irakurri

☉ Arrigorriaga

Arrigorriagako Harrotasun Asteak hitzaldiak, tailerrak eta Holi jaia ekarriko ditu herrira

Jarduera guztiak herrigunean antolatu dituzte, udaletxeko plazan eta baita Lamiaenan, ekainaren 24an, 28an eta 29an

|

Harrotasun Eguna, 2018an // Geuria

Ekainaren 24tik 29ra Harrotasunaren Astea antolatu dute Arrigorriagan eta hitzaldiak, tailerrak, bideo-proiekzioak eta Holi jaialdia antolatu du Arrigorriaga Harro taldeak Udalaren babesarekin.

Jarduera guztiak herrigunean antolatu dituzte, udaletxeko plazan eta baita Lamiaena emakumeen etxean ere

Egitaraua | Harrotasunaren astea 2024

Ekainak 24, astelehena
– 19:00 Dokumentala: Ekain Lersundi, Lamiaena

Ekainak 28, ostirala
– 17:00 eta 19:00 Escape Room LGTBIQ+, Lamiaena
– 19:00 Txapa tailerra, Lamiaena

Ekainak 29, larunbata
– 17:30 Arrigorriaga Harro taldearen bideoaren proiekzioa, Edurne Garitazelaiako Azokea aretoa
– 18:00 Umeentzako marrazketa tailerra, udaletxeko plaza
– 18:00 Arrigorriaga Harro hitzaldia + mokadutxoa, udaletxeko plaza
– 19:30 Holi jaia, udaletxeko plaza
– 20:00 Baflepoteo Transmaribibollo, herrian zehar

Osorik irakurri

☉ Arrigorriaga

Ume arrigorriagarrek puzgarriak, tailerrak eta ikuskizunak izango dituzte Madalenetan

Jai Batzordeak 17 jarduera baino gehiago prestatu ditu uztailaren 19tik 25era, egunez egun: antzerki saioak, tailerrak, buruhandiak, puzgarriak… herria umeentzako ekintzez beteko dute.

|

Haur bat, Arrigorriagako iazko txupinazoan // Geuria

Arrigorriagako Udala aurtengo jaietan izango diren jarduerak iragartzen ari da egun hauetan. Oraingo honetan umeentzat prestatutako ekintzen berri eman dute Udaletik.

Izan ere, Jai Batzordeak 17 jarduera baino gehiago prestatu ditu uztailaren 19tik 25era: antzerki saioak, tailerrak, buruhandiak, puzgarriak… herria umeentzako ekintzez beteko dute. Aurten ere Umeentzako parkea ipiniko dute Lehendakari parkean, hilaren 23an eta 24an, ordutegi ezberdinetan.

Egitaraua | Haurrentzako jarduerak 2024ko Madalenetan

Uztailak 19, ostirala
– 18:00 Jaioberriei aitortza-ekitaldia, Edurne garitazelaia kultur etxea
– 20:15 Buruhandiak, udaletxeko plaza

Uztailak 20, larunbata
– 12:00 Erraldoien kalejira, udaletxeko plazatik
– 19:30 Buruhandiak, Lehendakari Agirre parkea

Uztailak 21, igandea
– 11:00 Patinaje ibilbidea, herrian
– 11:00 Ekortzeko makina puzgarria, Joan XIII plaza
– 19:30 Buruhandiak, Lehendakari Agirre parkea

Uztailak 22, astelehena
– 19:00 Buruhandiak, Lehendakari Agirre parkea

Uztailak 23, asteartea
– 11:30 Umeentzako parkea, Lehendakari parkea (euria bada, eskolako patioa)
– 13:30 Buruhandiak, Lehendakari Agirre parkea
– 17:30 Umeentzako parkea, Lehendakari parkea (euria bada, eskolako patioa)
– 18:00 Izozki banaketa, Pergola

Uztailak 24, asteazkena
– 15:00 Umeentzako antzerkia: Izarren Hartza, Lehendakari Agirre parkea (euria bada, eskolako patioa)
– 18:30 Buruhandiak, Lehendakari Agirre parkea

Uztailak 25, osteguna
– 11:00 Entsalada tailerra, Ugertza parkea
– 17:45 XIII Tiragoma Txapelketa
– 18:30 Bitsa festa, Joan XIII plaza

Osorik irakurri

☉ Arrigorriaga

Arrigorriagako Arritxikerrakekoak ikasturteari euskaraz agur esateko elkartuko dira

17:30ean antolatutako Euskara Plazara izeneko gaurko jardueraren helburua familiak elkartu eta euskaraz berba egitea izango da

|

Familia bat, Arrigorriagako plazan // Geuria

Gaur bertan, ekainaren 20an, hitzordua ipini dute Arrigorriagako Arritxikerrak taldekoek ikasturteari agur esateko. 17:30ean antolatutako Euskara Plazara izeneko gaurko jardueraren helburua familiak elkartu eta euskaraz berba egitea izango da.

“Ez da jarduera gidaturik egongo; udaletxeko plaza euskararen arnasgune bihurtuko dugu”, azaldu dute Arritxikerraketik. Jarduera 0 eta 6 urte bitarteko haurrak dituzten familiei zuzenduta dago.

Osorik irakurri