Berria egunkariaren urteko harpidetza egiteagatik, Etxebarriko ostalariek diru-laguntzak jasoko dituzte. Hitzarmen honekin euskarazko hedabideen irakurlezaletasuna sustatu nahi dute
Etxebarriko Udalak lankidetza hitzarmena sinatu du gaur, urtarrilak 22, Berria egunkaria argitaratzen duen Euskal Editorea SL enpresarekin, Berriaren harpidetza sustatzeko Etxebarriko tabernarien artean.
Loren Oliva alkatea, Martxelo Otamendi Berriako zuzendaria, Iker Lopez Euskara zinegotzia eta Arpela Etxebarriko Euskaltzaleen Topaguneko kideak elkartu dira sinadura-ekitaldian, baita orain arte izena eman duten bi tabernen ordezkariak ere: Arkupe eta Ortzi.
Etxebarriko Udalak euskararen normalizazioaren alde aurrera daraman plangintzaren baitan (ESEP Normalizazio Plana) kokatzen da ekimen hau. Herritarren euskarazko hedabideen irakurzaletasuna sustatzeko, Etxebarriko Udalak eta Berria egunkariak Etxebarriko ostalaritza sektoreari egunkariaren harpidetza eskainiko die prezio berezi batean.
HITZARMENAREN NONDIK NORAKOAK
Bi entitateen arteko akordioaren bidez konpromiso hauek zehaztuko dituzte:
- Etxebarriko Udala herriko ostalaritza sektoreko establezimenduen artean kanpaina egin dadin arduratuko da, Berriaren harpidetza eskainiz.
- Kanpainaren zabalkunde eta komunikaziorako gutuna elkarlanean idatziko dute bi aldeek.
- Harpidetzen diren Etxebarriko taberna zein ostatuei, Berriak harpidetza %25 merkeago eskainiko die.
- Harpidetzen diren Etxebarriko taberna zein ostatu horiei, Berriari ordaintzen dioten diruaren portzentaia bat itzuliko die Etxebarriko Udalak diru-laguntza bidez. Gutxienez %50 eta gehienez %66,67.
- Tarifak: 2016an, aste osoko harpidetzaren urte osoko harpidetza tarifa, 452 euro da (Berriak beherapena aplikatu aurretik).
- Harpidetza kuotari, Kontsumorako Prezioen Iindizea (KPI) gehituko zaio hurrengo urteetan.
- Berriak harpidedun egingo den Etxebarriko tabernari edo ostatuari kobratuko dio harpidetza osoa eta ondoren, behin eskaera aurkeztuta, Etxebarriko Euskara Zerbitzuak araututako diru laguntza bidez jasoko dituzte berauek arestian aipatu diru-laguntzak.
- Establezimenduren batek harpidetza aldia amaitu aurretik baja emango balu, harpidetza epealdia amaitu arteko kuota zatia itzuliko zaio.
- Hitzarmen honek lau urteko epea izango du. Indarrean dagoen bitartean, Etxebarriko Udalak ekitaldiko aurrekontu bakoitzean aurrekontu-partida egokia ezartzeko konpromisoa hartzen du. Behin lau urte horiek igarota eta bi aldeek hala nahi izanez gero, hitzarmena berritu eta luzatzeko aukera izango da.
