☉ Etxebarri
Lorena Velez: “Erabat gogortuta gaude horrenbeste albiste mingarri irakurrita eta irudi krudel ikusita”
Siriako errefuxiatuei laguntzea helburu duen ‘Etxebarri con Siria’ elkarteko presidentea da Lorena Vélez. Besteak beste, errefuxiatuei nola lagundu eta herritarron inplikazioa zenbatekoa den ditugu hizpide.
Siriako errefuxiatuei laguntzea helburu duen ‘Etxebarri con Siria’ elkarteko presidentea da Lorena Vélez. Besteak beste, errefuxiatuei nola lagundu eta herritarron inplikazioa zenbatekoa den ditugu hizpide
Borrokek eragindako iheslarien egoera dramatikoak bultzatuta eurei laguntza emateko elkartea sortu zuen Lorena Velezek (Bilbo, 1979) 2016an Etxebarriko beste bost lagunekin batera. Bilboko Santutxu auzoan hazi arren, 2008. urtetik etxebarriarra da Lorena, ogibidez ingeniaria. Hasieran bere harri-koskorra ekarri nahi izan zuen, baina, konturatu gabe, geldiezina den espiralean murgildu zen. Tragedien eta bidegabekerien aurrean gizarteak hartu ohi duen jarreraren inguruko hausnarketa egin digu eta dirua eta materiala biltzeko antolatzen dituzten ekintzen xehetasunak azaldu dizkigu. Eurek lortutakoa SOS Refugiados eta AAPS (Siriako Herriari Laguntzeko Elkartea) elkarteek bideratzen dute.
Noiz eta zergatik sortu zenuten ‘Etxebarri con Siria’?
2016. urtean Siriako gatazka protagonista nagusienetako bat izan zen hedabide orotan eta egoeraren berri jakiteak min egiten zidan, zerbait egin beharraren sentsazioa neukan. Urte horretan umeak eramateko motxilen bilketa egin zuen Donostiako ‘Pasaportes para Siria’ elkarteak eta nirea emateaz gain nire ingurukoei ere eskatu nien. Azkenean, Etxebarriko Harribide fundaziokoekin hitz egin ondoren, Udalarekin harremanetan jarri nintzen eta bilketa gunea jartzeko prest agertu zen. Egoera baliatuta, herritarrei deia luzatu genien eta ekimena arrakastatsua izan zen erabat. Motxilez gain, errefuxiatuentzat beharrezkoa zen gauza pila bat lortu genuen. Topera betetako 23 palet bidali genituen.
Partikular gisa lortu daitekeena ikusita eta ezagutu nituen lagunek animatuta irteteko ezinezkoa, edo behintzat oso zaila, den kiribil batean sartu nintzen.
Elkartea, dena den, iazko udan erregistratu genuen, diru-laguntzak eta jasotzeko ezinbestekoa baita. Herrian boluntario ugari dagoen arren, elkartean sei lagun baino ez gara.
Zein da helburua?
Elikagaiak edo premia-premiazkoak diren materialak bidaltzeko bilketak egiten ditugu eta dirua lortzeko ekintzak antolatu ere bai. Laguntza Sirian bertan dauden esparruetara eta Greziako iheslarienetara heltzen da.
Iaz mendi martxa antolatu zuten lehen aldiz Etxebarrin eta dirua biltzeko kanpaina egin zuten Etxebarri Con Siria elkartetik // Argazkia: Etxebarri Con Siria
Nola ikusten duzue Siriako gatazka?
Konplikatua da, gerra guztietan gertatzen den bezala interes gehienak ekonomikoak direlako eta konponbidea ez dagoelako herrialdean bertan daudenen esku, kanpoan baizik. Munduari ez zaio inporta Sirian bizi direnen edo herria behartuta utzi behar izan dutenen egoera. Ez naiz politikan batere aditua baina nire aburuz konponbidea urrun dago, oso urrun.
Nortzuk osatzen duzue ‘Etxebarri con Siria’?
Lehen aipatu bezala elkartea berria da oso eta bakoitzak bere kargua hartu du. Guztira sei gara: Silvia, Guillermo, Ali, Loli, Silvia eta ni neu.
Zeintzuk dira zuen burua ezagutzera emateko eta dirua biltzeko egiten dituzuen ekintzak edo jarduerak?
Jarduera handiak antolatzeko denbora eskasa dugu eta Etxebarri herri gaztea izanda familia ekintzak dira ondoen funtzionatzen dutenak. Nire senarra sukaldari ona denez, hilabetean behin, janaria prestatzeko tailerrak egiten ditugu, Harribidek utzitako gaztegune batean.
Iaz, bestalde, oso arrakastatsua izan zen Mendi Martxa antolatu genuen eta baita urte-amaierako kotilioia ere. Hortaz aparte, momentuan salgai ditugun produktuak saltzeko azoka-txikietan hartzen dugu parte.
Zer motatako bilketak egiten dituzue?
Orain arte bilketa ezberdinak egin ditugu: elikagaiena, pardelena, higiene eta behar-beharrezkoak diren produktuena, haur-kotxeena…SOS Errefuxiatuak elkartekoek guk baino hobeto dakite euren beharrak zeintzuk diren eta zer bildu esaten digutenean orduan hasten da gure lana. Gure zeregina kanpaina martxan jartzea da.
Aipatzekoa da arropa ematea errazena izan daitekeela baina biltzeko, zailena. Gutxi gara eta trasteleku bat eskuratu berri dugun arren, arropak leku handia behar du eta ondo sailkatzeko denbora asko behar da. Arropa emateko orduan askok irizpiderik ez dute eta baztertze lana ere gogorra izan ohi da. Errefuxiatuak behartsuak dira, bai, baina duintasunari eusten diote, ezin da edozer gauza dohaintzan eman.
Nora eta nola heltzen da laguntza?
Bi elkarte ezberdinekin egiten dugu lan. SOS Errefuxiatuakek Grezia du helburu eta AAPS (Siriako Herriari Laguntzeko Elkartea) Siriaraino sartzen da, bertan dauden kanpamentuetaraino. Seurrek doan egiten ditu estatu barruko bidalketak, baina Valentziako portuan dagoen edukiontzia zabalik mantentzea garestia da eta 3000 euro inguru balio du Greziara bidaltzen den edukiontzi bakoitzak. Greziara heltzen denean kamioietan sartu eta banaketa egiten da. Horregatik behar dute elkarte hauek dirua. Eurak dira txikiagoak garen elkarteon laguntza bideratzen dutenak.
Zer da errefuxiatu batek premiazkoa duena?
Logikoa denez, bizitokia, jatea, edatea eta abar, baina Europan beharrezkoa dutena errefuxiatu kondizioa eskuratzea da. Gehienek ez dute lortzen eta, beraz, legez kanpoko inmigranteak baino ez dira. Lege laguntza behar dute kondizio hori erdietsi ahal izateko. Atenasen ‘squad’ izeneko eraikinak okupatu dituzte eta hutsik dauden hainbat hotel utzi dizkiete bertan egoteko. Bestalde, anarkikoagoak diren beste hainbat lekutan ere badaude eta negargarriak diren kanpamentuetan ere bai.
Egoera kaskarrena, dena den, irletan dago (Lesbos, Quios…). Kanpin dendetan bizi dira eta bertan, adibidez, guretzat hain oinarrizkoa den beroa astintzea da lehentasuna.
Errefuxiatu batekin egoteko aukerarik izan al duzu?
Grezian dauden edo egon diren boluntarioekin bai, baina ez errefuxiatuekin. Nire semeak txikiak dira eta ez dut aukerarik ikusten. Agian aitzakia baino ez da, prest ez nagoen seinale. SOS Errefuxiatuaketik joatera animatzen gaituzte, eta egoera bertatik bertara ikustera, baina badakit ikaragarri sufrituko nukeela.
Kostata animatzen al da jendea halako proiektu batean parte hartzera?
Helburua etxean daukazun zerbait ematea bada erraz animatzen da, baina bestela ez. Alde batetik, gogortuta gaudelako erabat horrenbeste albiste mingarri irakurrita eta irudi krudel ikusita eta, bestalde, politikaren eragina oso handia delako, txarrerako noski. Etxebarrin, gainera, jarduerez gainezka gaude eta Udalak doan antolatzen ditu ia gehienak, horretara ohituta gaude.
Gakoa erakargarria edo ezberdina den jarduera bat eskaintzean datza, berdin dio solidarioa izatea edo ez. Ez gara herritarren edo boluntarioen jarrera kritikatzen ari, ezta pentsatu ere, kritika urrutirago doa. Gizartea bihozgabe bihurtzen ari da, guztiz itsu eta sor gaude. Zabalik ditugun fronteak gehiegi dira eta guztietara ezin garenez heldu ez dugu bakar batera iristeko ahaleginik egiten. Gure esperientzia oinarritzat hartuta argi dago, trukean ez baduzu ezer ematen jendea ez da joaten. Biziki interesgarriak izan diren sentsibilizazio-hitzaldiak eman ditugu eta arimarik ere ez da agertu.
Konta iezazkiguzu eskuartean dituzuen proiektuen nondik norakoak.
Udaberrira bitartean sukaldaritza tailerrekin jarraituko dugu eta maiatzean ‘Ehuneko bat’ jaialdia egingo denez salmahai bat jarri eta paella bat prestatzeko asmoa dugu, herrikoen eta herrira hurbiltzen direnean artean saltzeko. Udan geldialdi bat egon ohi da eta irailean gogotsu itzuliko gara Mendi Martxarekin; aurtengoa irailaren 29an izango da seguru asko. 2018koa ezin hobeto atera zitzaigun, giroa eta parte-hartzea bikainak izan ziren. Aurtengo helburua iazko arrakastari eustea izango da. Azkenik, urtea biribiltzeko, kotilioia, umeei zuzendutako ekintzaren bat eta nobedade izango den San Silvestrea.
Goiko lerroetan aipatutakoaz aparte, noski, SOS Errefuxiatuaketik eskatzen dizkiguten bilketa kanpainak martxan jartzeari ekingo diogu.
Afganistan, Irak, Siria, Grezian ez da gerrarik egon baina egoera benetan latzari egin behar izan diote aurre…
Bai eta azpimarratzekoa da gainera Grezia dela Europa mailan gerratik ihes egin duten lagun gehien hartu dituen herria. Kontrako mugimenduak ere badaude, baina gorriak ikusi ditu eta errefuxiatuak hartzen ari da.
☉ Etxebarri
‘Matxosfera eta honen inpaktua egungo gizartean’ hitzaldia emango du Jone Goitisolo gizarte-hezitzaileak Etxebarrin
Martxoaren 8ko programazioaren barruan, ‘Matxosfera eta honen inpaktua egungo gizartean’ hitzaldi-solasaldia antolatu dute Etxebarrin.
Martxoaren 10ean izango da saioa Kultur Etxean 18:00etatik aurrera, eta Jone Goitisolo Uriarte indarkeria matxistetan espezializatutako gizarte-hezitzaileak eta gizarte-langileak eskainiko du.
Hitzaldia gazteleraz izango da eta sarrera librea izango da.
☉ Etxebarri
Etxebarrik 16,4 milioi euroko aurrekontua onartu du, iaz baino % 12,17 gehiago
LVPren, PSEren eta EH Bilduren aldeko botoekin eta EAJren abstentzioarekin onartu dituzte aurtengo kontuak
Etxebarriko Udalak 16,4 milioi euroko aurrekontua kudeatuko du aurten, iaz baino 1,8 milioi gehiago (% 12,17 gehiago).
Igoera hori, besteak beste, Udalkutxatik dator: aurten 10,9 milioi dagozkio Etxebarriri, iaz baino 1,2 milioi gehiago.
Udalkutxarekin batera, udal zerga eta tasek 4,8 milioi euroko ekarpena egingo dute. “Aldaketa horren zati bat TAOren kudeaketa-eredu berriari dagokio, eta haren diru-sarrerak eta gastuak udal-aurrekontuan sartuko dira zuzenean”, diote udal ordezkariek.
“Kontu hauek udalerriaren benetako beharrei erantzuten diete, udal-egitura indartzen dute eta Etxebarri hobetzen duten proiektuetan aurrera egiteko aukera ematen digute, bai gaur egun, bai etorkizunera begira”, esan dute LVPko udal ordezkariek.
Aurrekontu proposamena otsailaren 24ko osoko bilkuran onartu zuten, LVPren, PSEren eta EH Bilduren aldeko botoekin eta EAJren abstentzioarekin.
Futbol zelaia “osorik” eraberritzea
Ibertsioei dagokienez, 625.000 euro bideratuko ditu Etxebarriko Udalak obren eta hiri-hobekuntzaren atalean, iaz baino 302.529 euro gehiago (% 93,5ko hazkundea).
“Igoera horri esker, ekitaldiaren hasieratik, udalerri osoan segurtasuna, irisgarritasuna eta espazio publikoen mantentzea hobetzen duten jarduerak sar daitezke. Horien artean daude Gaztela eta Nafarroa kaleen arteko loturan barandak jartzea, Lezama Legizamoneko igogailuen inguruan zurezko egiturak konpondu eta saneatzea eta kiroldegiaren barruko boulderrean elementuak berritzea”, diote udal arduradunek.
Era berean, Udalak bi “proiektu estrategiko” nabarmendu ditu: San Antonio hiribideko 8-20 ingurua berrurbanizatzea eta futbol zelaia “osorik” eraberritzea tabernarako kokapen berri bat proiektatuz.
Aldagailu inklusiboa eta metro geltokiaren inguruan komun publikoa jartzea ere aurreikusi ditu Udalak inbertsioen atalean. Azken kasu horretan, inbertsioa 320.000 eurotik gorakoa izango da, eta horietatik zati bat Bizkaiko Garraio Partzuergoak hartuko du bere gain, Etxebarriko Udalarekin lortutako akordioaren ondoren.
“Nolanahi ere, jarduketa horiek 2025eko ekitaldia itxi ondoren erabilgarri dagoen geldikinaren arabera gauzatuko diren proiektuak dira”, zehaztu dute udal ordezkariek.
Udalerriko merkataritza bultzatzeko eta jarduera ekonomikoa dinamizatzeko helburuarekin Etxebarri Bonuaren bi kanpaina zabalduko ditu Udalak 2026an zehar, eta horretarako 36.000 euro erabiliko dituzte.
Soldata-eguneraketak
Aurrekontuan, udal langileen kapitulura 4,9 milioi euro bideratuko dituzte, 499.696 euro gehiago.
“Errefortzu horri esker, dagozkion soldata eguneratzeak aplikatu ahal izango dira eta, aldi berean, udal-egitura indartu ahal izango da, hiru lanpostu estrategiko berri sortuz: Gizarte Zerbitzuetako arduradunaren figura, Bulego Teknikoko profil tekniko bat eta arlo horri lotutako administrazio lanpostu bat. Praktikan, plantillaren handitze horren ondorioz, espedienteak azkarrago kudeatuko dira, hirigintza-lizentziak eta -proiektuak azkarrago izapidetuko dira, udal inbertsioak bultzatzeko gaitasun handiagoa izango da eta gizarte-arreta hurbilagoa eta koordinatuagoa lortuko da”, diote.
Gainera, Udalak 738.514 euro igo du oinarrizko zerbitzu publikoak mantentzeko eta hobetzeko gastua, hau da, 2025ean baino % 10,21 gehiago. “Igoera horrek aukera ematen du udal-kontratuak eguneratzeko, mantentze-maila egokiak berreskuratzeko eta energia-kostuen eta hondakinen igoera bere gain hartzeko. Kostu horiek 120.000 euro inguru hazten dira aurreko urtearekin alderatuta, eta, horrela, herritarrei ematen zaizkien zerbitzuen jarraitutasuna eta kalitatea bermatzen dira”.
Haurrak, gazteak eta adinekoak
Haurren eta nerabeen arloan, aurrekontuan 100.000 euroko inbertsioa jasotzen da haur-parkeak eraberritzeko eta jolas-espazioak hobetzeko. Hori aurrekontu parte-hartzaileen prozesuan zehaztu zuten herritarrek.
“Halaber, haurrek eta gazteek erabiltzen dituzten kirol-instalazioetan eta espazio publikoetan hobekuntzak egingo dira, baita adinekoek ere”, diote.
Gazteriaren arloan, padel-pistak egokitzeaz eta kirol-ekipamenduetan beste hobekuntza batzuk egiteaz gain, Udalak 30.000 euroko dirulaguntza lerro berri bat sartu du, udalerriko gazteei etxebizitza alokatzeko laguntzak emateko eta haien emantzipazioa errazteko.
Adinekoen eremuan, 2026ko aurrekontuak arreta eta laguntza programak indartzen ditu, “2025ean egokitu behar izan ziren partidak berreskuratuz eta udal-hitzarmenen eta -laguntzen jarraipena bermatuz”, diote.
Transferentzia arrunten hazkunde orokorrak —263.628 euro gehiago, aurreko urtean baino % 10,15 gehiago— kolektibo horrentzako baliabideak finkatzea eta gizarte-estaldura hobea bermatzea ahalbidetzen du.
Gizarte Zerbitzuen eta kalteberatasun-egoeran dauden pertsonentzako arretaren arloan, Udalak urrats estruktural bat egin du Gizarte Zerbitzuen arduradunaren figuraren sorrerarekin, “Udalaren gaitasun teknikoa indartuz eta bizilagunentzako zuzeneko arreta hobetuz”. “Errefortzu horrekin batera, 2025a baino lehenagoko mailetara itzuli diren eta murriztu behar izan diren gizarte-laguntzen hainbat lerro berreskuratu dira”, diote.
☉ Etxebarri
Belaunaldien arteko konexioa ardatz izango dute aurten Etxebarriko M8ko programazioan
‘Belaunaldiak sarean. Oroimenak, zaintzak eta eraldaketak batuta’ lemapean programazioa prestatu dute Etxebarrin martxoaren 1etik 12ra bitartean
Emakumeen Nazioarteko Egunaren harira hamaika jarduera antolatu dituzte Etxebarrin martxoaren 1etik 12ra bitartean.
Aurtengo leloa da ‘Belaunaldiak sarean. Oroimenak, zaintzak eta eraldaketak batuta’, eta prestatu duten programaren helburua da belaunaldien arteko aliantzak ehuntzea.
“Gure aurrekoen oroimena aitortzen dugu, zaintzak aldarrikatzen ditugu bizitzari eusteko funtsezko zutabe gisa, eta eraldaketa kolektiboaren aldeko apustua egiten dugu, etorkizuna eraikitzeko tresna gisa. Izan ere, esperientziak, jakintzak eta borrokak konektatuz bakarrik jarraitu ahal izango dugu berdintasunean aurrera egiten”, diote udal ordezkariek.
Urtero bezala, Etxebarriko Berdintasun Batzordeak, Etxebarriko Udalarekin koordintatuta, programazio espezifiko bat aurkeztu du, emakumeen eskubideekiko konpromiso kolektiboa indartzeko eta Etxebarrin emakumeen eta gizonen arteko berdintasuna ikustarazteko.
M8 Etxebarri | Egitaraua
Martxoak 1, igandea
17:30 Zineforuma Kultur Etxean: ‘Las sufragistas’
Martxoak 3, asteartea
18:00 Idazketa feminista tailerra Kultur Etxean. Izena emateko: berdintasuna@etxebarri.eus
20:00 BZG Emakumeen Topaketa Morea frontoian: ‘Elkarrekin jokatzen, denok irabazten dugu’
Martxoak 5, osteguna
19:00 Ikaskuntzako desfilea Kultur Etxean
Martxoak 6, ostirala
12:00 Adierazpen instituzionala udaletxeko plazan
19:30 Areto futboleko partida kiroldegian: Beteranoen Selekzioa vs Kukuiaga AF
Martxoak 8, igandea
11:30 Kalejira Zintururitik udaletxeko plazara
12:00 Manifestuaren irakurketa eta jarduerak udaletxeko plazan
Martxoak 10, asteartea
18:00 Matxosfera solasaldia Kultur Etxean
Martxoak 12, osteguna
17.00 Irakurketa Klub Feminista Cimen: ‘Mujeres de arena y mirra’ (Hanan Al-Shaykh). Izena ematea: 688 606 674 / 944 267 005 / berdintasuna@etxebarri.eus
☉ Etxebarri
Euskotreneko plazan obrak egiten hasi da Etxebarriko Udala, “irekiagoa, ikusgarriagoa eta atseginagoa izateko”
Besteak beste, autobus-geralekua plazaren eremuaren barruan sartuko dute, “San Esteban etorbideko trafikoa arintzeko”. Gainera, plazan dagoen erlojua behin betiko kenduko dute
San Esteban etorbidea eta Barrondo kalea modu integralean eraldatzeko lanak hasi zituen Etxebarriko Udalak iazko abuztuan.
Ordutik, aparkaleku-sistema aldatu egin du Udalak, eta espaloiak zabaldu ditu.
Eta, orain, obren azken faseari ekin dio Udalak: Euskotren eta eliza ondoko plaza eraberritzea eta autobus geltokia hobetzea, alegia.
“Plazako esku-hartzeak espazioaren berrikuntza integrala ekarriko du, leku irekiagoa, ikusgarriagoa eta herritarrentzat atseginagoa izan dadin”, diote udal ordezkariek.
Jardueren artean nabarmentzekoa da autobus geltokia plazaren eremuaren barruan sartuko dutela: neurri horri esker, autobusek ez dute San Esteban etorbideko trafikoa oztopatuko. “Joan-etorri handiko bidea da, eta egunero erabiltzen da udalerrian sartzeko eta irteteko”, diote.
Era berean, inguruko heskaiak eta iturria kendu dituzte, “espazio erabilgarria irabazteko eta zabaltasun-pertzepzioa hobetzeko”, diote.
Erlojuari agur
Plazan dagoen erlojua ere kenduko du Etxebarriko Udalak: “Alde batetik, plazaren diseinu berrian gutxi integratuta egongo delako, eta bestetik, mantentze-kostu handiak eskatzen dituelako”, azaldu dute udal arduradunek.
Erlojua martxoko lehen astean kenduko dute. “Horretarako, Santa Ana kaleko errei bateko zirkulazioa eten beharko dugu, harik eta erlojua kendu arte”.
Aparkaleku berria Barrondon
Beste alde batetik, Barrondo eta Amama eta Aititen kaleen arteko elkargunean aparkaleku berria egokituko du Etxebarriko Udalak.
Guztira 26 plaza izango ditu. “Aparkalueku berri horri esker, beste eremu batzuetan ezabatutakoak konpentsatu eta gainditu ahal izango dira, udalerri osoan balantze positiboa eginez”, diote udal ordezkariek. Hain zuzen ere, San Esteban etorbidean aparkaleku batzuk kendu dituzte: obrak egin aurretik baterian aparkatzen zen bertan, eta orain linean aparkatu daiteke.
Otsailaren 21ean inauteri desfilea egin dute Etxebarrin [ikusi hemen argazki galeria!]. Jaia aprobetxatuta, kale-inkesta egin dugu GEURIAn!
Zaratamoko Outokumpu lantegi abandonatuan bizi diren bost pertsona atxilotu eta beste 23 identifikatu dituzte
Arrigorriagako Udalaren izenean informazio konfidentziala eskatzen ari direla salatu dute udal ordezkariek
“Oso eskertuta gaude eskualde honetan Errigorak bere tokitxoa izatea GEURIAri esker”
Argazkiak | Emakume Ekoizleen Nekazaritza Azokak ehunka lagun elkartu ditu Ugaoko kaleetan
Argazkiak | Ekain Perrino herrikideari babesa adierazteko elkarretaratzea egin dute Basaurin
Argazkiak | Ugaotarrek “Egunak eta gauak gureak dira” oihukatuz hartu dituzte herriko kaleak, M8an
“Oso eskertuta gaude eskualde honetan Errigorak bere tokitxoa izatea GEURIAri esker”
Bideoa | Besopean Guraso Elkartea: «Herri kirolekin haurren arteko aurrez aurreko harremanak sustatzen ditugu»
