☉ Etxebarri
‘Rexcatering’ proiektu galdakoztarrak irabazi du Etxebarriko ETE eta Ideia Berritzaileen lehiaketa
Azaroaren 15ean Viladecansen ospatuko den ‘Innpulso Ekin: Berrikuntzako alkate eta ideia berritzaileen V. Bileran’ aurkeztuko du Etxebarriko Udalak ‘Rexcatering’ proiektua. Loren Oliva alkatearekin batera Residuo Cero Fundazioko Marta Suarez, Ainhoa Crespo, Juan Marcos de Miquel eta Álvaro Saiz joango dira.
Etxebarriko Enpresa Txiki eta Ertainen (ETE) eta Ideia Berritzaileen lehiaketak badu irabazlea: ‘Rexcatering’ proiektua. Residuo Cero Fundazio galdakoztarrak aurkeztutako ideia da hori eta epaimahaiak aho batez hautatu du proiektu irabazlea. Rexcatering, ingurumen eta gizarte kontzientzia duen ostalaritza-zerbitzu kolaboratiboa da, jantoki handiekin, udaletxeekin eta hezkuntza-zentroekin lankidetzan aritzen dena, soberakinak berreskuratzeko eta elikagaien kontsumoa eraginkorra izateko. “Jatorrizko ideia eta helburua janaria zabortzat hartu ezin den gizartea lortzea da. Eguneroko irtenbideak bilatzen ditu elikagaiak berrerabiltzeko eta etorkizunean arau-aldaketak lortzeko, herritar guztien sentsibilizazioa, parte hartzea eta aktibazioa landuz”, diote udal ordezkariek.
Zehazki, sukalde zentraletan eta jantoki kolektiboetan elikagai-soberakinak berreskuratzeko proiektu integrala da. “Ekimen aitzindari honek ‘zero elikagai’ xahutzea lortu nahi du, soberakinak besteen eskura jartzea Zero Zabor Hozkailuak ekimenaren bitartez, banaketa guneen eta elikagaiak banatzeko entitateen transferentzien bitartez”, diote. Bestalde, proiektu hau ikastetxeetako hezkuntza-planetan txertatuta dagoela adierazi dute udal ordezkariek, “gaiaren inguruko sentsibilizazio eta heziketa kanpaina bat sortuz”.
Residuo Cero Fundazioak, sari gisa, 1.500 euro jasoko ditu Rexcatering proiektuaren exekuzio-kostuak estaltzeko. “Ebaluazio-batzordearen erabakiak proiektuaren izaera berritzailea eta ingurumen-helburua islatzen ditu, bereziki Nazio Batuek proposatutako garapen jasangarriko helburuekin (GJH) batuta eta Europar Batasunak hondakinen arloan sustatutako ingurumen-proposamen eta estrategien esparruan”, diote udal ordezkariek.
Vending motako hozkailuak
Rexcatering proiektuaren helburua da elikagaiak ez xahutzea eta hondakin organikoa murriztea. Horretarako, zero kostuko vending motako hozkailuak kalean instalatzea da helburua, eskola-jantokietan, ospitaleetan, egoitzetan edota enpresa handietan soberan dauden elikagaiak biltzeko, eta horiek aprobetxatu nahi dituenaren eskura jartzeko.
Galdakaoko Boluntarioen Gizarte Elkartearen (GBGE) Hozkailu Solidarioa proiektua du aurrekari Rexcatering proiektuak, eta gaur egun Hernanin, Azpeitian, Plentzian edo Valentzian dago ezarrita. “Hozkailua publikoa eta doakoa da, eta elikagaiak ontzi konpostagarrietan biltegiratuta eta etiketatuta daude”, dio Residuo Cero Fundazioko kideek. Besteak beste, Ainhoa Crespo eta Álvaro Saiz Residuo Cero Fundazioko kideak dira. 2018an eratu zuten fundazioa.
Ordezkaritza Innpulso Sarean
Innpulso Sarea ekimenaren barruan, azaroaren 15ean Viladecansen (Bartzelona, Katalunia) ospatuko den ‘Innpulso Ekin: Berrikuntzako alkate eta ideia berritzaileen V. Bileran’ aurkeztuko du Etxebarriko Udalak ‘Rexcatering’ proiektua. Bilera horretan Innpulso Sarea (Zientzia eta Berrikuntzarako Hirien Sarea) osatzen duten udalerriak izango dira, eta bertan izango dira Loren Oliva Etxebarriko alkatea eta, berarekin batera, Residuo Cero Fundazioko Marta Suarez, Ainhoa Crespo, Juan Marcos de Miquel eta Álvaro Saiz Etxebarriko ETE eta Ideia Berritzaileen V. Lehiaketako irabazleak. ‘Innpulso Ekin: Berrikuntzako alkate eta ideia berritzaileen V. Bilera’ streaming bidez jarraitu ahal izango da Red Innpulso-ren YouTube kanalaren bitartez. Deialdi hori Europako Batzordeak sustatutako “100 Climate-Neutral Cities – by and for the Citizens” misioaren esparruan egingo da.
2011tik Innpulso Sareko kide da Etxebarri. Sare hori Zientziaren eta Berrikuntzaren Hiria bereizgarria duten udalerriek osatzen dute, eta bereizketa hori Ekonomia eta Lehiakortasun Ministerioak ematen die berrikuntzarekin ahalegin eta konpromiso handia erakutsi duten hiriei, bai eta tokiko eremutik produkzio-ereduaren aldaketari egiten dioten ekarpenari ere. Zentzu horretan, Etxebarri aspaldidanik aritu da lanean enpresa arloko eragileekin, bereziki Berrikuntza arloko ETEekin haien lehiakortasun maila hobetzeko asmoarekin. Etxebarriko ETE eta Ideia Berritzaileen lehiaketan irabazle izan dira: Hirix, Mugikon, Lekushare, Aldakelu inklusiboak, eta orain Rexcatering.
Gazteen ideiak, sarituak
Bestalde, aurten, nobedade bezala, Etxebarriko gazteei zuzendutako kategoria ezarri dute ETE eta Ideia Berritzaileen lehiaketan. Ildo horretan, epaimahaiak nabarmendu du lehiaketa honen gazte-modalitatearekin lortutako helburuetako bat betetzeko aurkeztu diren gainerako ideien ekarpena aitortzearen garrantzia, hau da, Etxebarriko gazteak aktiboki bultzatzea, aisialdia eraikitzea eta udalerriko gizarte-bizitzan parte hartzea sustatzea.
Gauzak horrela, gazteen hiru ideia berritzaile saritu dituzte: Unai Zubillagaren ‘Erremintegia’ (500 euroko saria jaso du), Asier Corderoren ‘Impresión 3D Retos Sociales’ (300 euro) eta Eneko González, Irati Santos, Ander Urtiagaren ‘App Recomienda’ (200 euro). “ETE eta Ideia Berritzaileentzako V. Lehiaketa honetan parte hartu duten pertsona guztiek Behargintza zerbitzuaren laguntza jaso dezakete hainbat laguntza, prestakuntza eta aholkularitza programatara sartzeko. Helburua beraien ideiei balioa ematea da, negozio proiektu arrakastatsuak izan daitezen”, diote udal ordezkariek.
☉ Etxebarri
Mintzodromoa, Txiki Jaia eta kantu tailerra antolatu dituzte Etxebarrin Euskararen Egunaren testuinguruan
Euskararen Nazioarteko Eguna ospatzeko programa azaroaren 29an hasiko dute Etxebarrin
Abenduaren 3a Euskararen Nazioarteko Eguna da. Horren harira, Etxebarrin hainbat jarduera antolatu dituzte: Etxebarri Txiki Jaia, Mintzodromoa, Kantamintza kantu tailerra eta Euskarazko Produktuen Txokoa.
Egitaraua azaroaren 29an, ostiralez, hasiko da: Kukullagako ikasleei zuzenduta, Etxebarri Txiki Jaia antolatuko dute goizez frontoian.
Ondoren, abenduaren 3an, 09:30ean, Mintzodromoa antolatuko dute udaletxeko plazan jarriko duten karpan. Aurtengoa hirugarren edizioa da eta antolakuntzatik adierazi dutenez, “edonork parte har dezake”. Baldintza bakarra izango da euskaraz berba egitea.
Mintzodromoan parte hartzeko interesa dutenek izena eman behar dute 944 267 005 telefono zenbakira deituz edo etxebarri@euskaraldia.eus helbide elektronikora idatziz.
Bestetik, abenduaren 4an, asteazkenez, Kantamintza kantu tailerra izango da Cimen, 18:30ean. “Kantatzen duen herria inoiz ez denez hilko, nagusientzako tailer hau antolaru dugu”, diote udal ordezkariek.
Eta, azkenik, abenduaren 9tik 12ra bitartean Euskarazko Produktuen Txokoa antolatuko dute ludoteketan, 17:00etatik 19:00etara bitartean.
Etxebarriko Udaletik gogorarazi dutenez, ‘Euskaraz bizi nahi dut’ banderak salgai daude 3 euroan Euskara Zerbitzuan, Cimen.
☉ Etxebarri
Etxebarri X-Tremek bost lasterketa mota hartuko ditu abenduaren 1ean
Abenduaren 1ean, igandez, Etxebarri X-Treme lasterketaren 12. edizioa antolatuko dute.
Aurreko edizioetan bezala, lasterketak disziplina desberdinak hartuko ditu: txakurkrosa, trailak eta martxa.
Zehazki, bost lasterketa izango dira: 35 kilometroko traila (09:30), txakurkrosa (09:45), martxa (10:00), trail txikia (11:15) eta 10 kilometroko traila (11:30).
Bost modalitateek kiroldegian izango dute irteera eta helmuga.
Izena emateko epea zabalik dago azaroaren 29ra arte etxebarrixtreme.com webgunearen bitartez.
☉ Etxebarri
Jarrera matxistak identifikatzeko “neurgailu erraldoia” jarriko dute A25ean Etxebarrin
Azaroaren 25ean ‘Biolentometroaren’ inaugurazioa egingo dute eta elkarretaratzea deituko dute indarkeria matxista salatzeko
Indarkeria Matxistaren Aurkako Nazioarteko Egunaren harira, azaroaren 25ean jarrera matxistak identifikatzeko “neurgailu erraldoia” jarriko dute Santa Ana kalean, Etxebarrin.
‘Biolentometroa’ izena jarri diote, eta egunerokoan dauden jarrera matxistak zerrendatu dituzte 1etik 30era, biolentzia graduaren araberakoak.
Txantxa mingarriak, gezurrak, jeloskortasuna, mehatxatzea, laztan agresiboak, atzamarkadak, bultzatzea, telefono eta ordenagailu gakoak lapurtzea, sare sozialetan jazarpena, bikotekidearen argazkiak edo bideoak argitaratzea haren baimenik gabe, tratu txarrak, seme-alabak izatera behartzea, harreman sexualetara bultzatzea, bortxaketa eta hilketa jasotzen ditu ‘Biolentometroa’k.
Jarrera matxistak identifikatzeko neurgailuaren inaugurazioa azaroaren 25ean bertan izango da 12:00etan, Udalaren adierazpenaren ostean.
Arratsaldean, 18:00etan elkarretaratzea deitu dute udaletxeko plazan, eta ondoren, ekintza soziala egingo dute.
☉ Etxebarri
Bideoa / Zientziak zelan hobetzen du gure bizi-kalitatea? Etxebarriko Zientzia Astean izan gara!
Zientzia Asteari hasiera eman diote Etxebarrin. Aurtengo edizioa bederatzigarrena da eta zientzia herritarren bizi-kalitatea hobetzeko “tresna indartsua” dela azalduko dute azaroaren 23ra bitartean.
Lehen jardunaldian, azaroaren 18an, Arantxa Renteria Tecnaliako osasun-ikertzaileak hitzaldi bat eman zuen Etxebarri Institutuko DBH 4. mailako ikasleen aurrean: ‘Kirurgia birsortzailea: Biomaterialekin robotizatutako belauneko inplantea’.
Hitzaldian bertan izan zen GEURIA, eta aukera izan genuen Arantxa Renteriarekin berba egiteko, baita Gotzone Larrea Etxebarri BHIko Berrikuntza arloko arduradunarekin eta Uxue Diz ikaslearekin ere.
☉ Etxebarri
Javi Condek eta Jon Salvadorrek 7 tona elikagai bildu dituzte Bizkaiko Elikagaien Bankuaren alde
Javi Conde atleta basauriar-etxebarritarrak eta Jon Salvador atleta erandioarrak erronka solidario berria burutu dute. Urriaren 30ean Bilboko El Corte Inglés saltoki handietan 10 milia egin zituzten korrika, helburu solidario baten alde: Bizkaiko Elikagaien Bankuari 7 tona elikagai ematea, alegia.
Gaur, erronka burutu eta bi astera, txeke solidarioaren banaketa egin dute Etxebarrin. Bertan izan dira Conde eta Salvador, Iker Lopez Etxebarriko alkatea eta Luis Crovetto Bizkaiko Elikagaien Bankuko ordezkaria.
“Erronka gogorra izan da aurtengoa, baina poztasun handikoa. Beste batzuetan erronkak leku zailetan egin ditugu dira, hala nola, Gabarran edo Bizkaiko Zubian, eta oraingoan beste modu batera aurre egin behar izan diogu. Hala ere, dena ondo atera da eta oso pozik gaude”, adierazi du Javi Condek.
Luis Crovetto Bizkaiko Elikagaien Bankuko ordezkaria ere pozik agertu da: “Bizkaiko Elikagaien Bankutik 20.000 pertsona laguntzen ditugu eta 7 tona elikagai jasotzea ekimen solidario honi esker, benetan eskertzekoa da”.
Etxebarri eta Basauri, Javirekin bat
Erronka solidarioa modu pertsonalean egiten dute Javik eta Jonek, baina erakundeen laguntza ere jasotzen dute. Esaterako, Etxebarriko Udalak lankidetza-hitzarmena du Javi Conderekin eta bere ekimen solidarioekin: “Urtero aurrekontutik diru-partida bat gordetzen dugu Javik antolatzen dituen ekimen solidarioetarako. Kopuru hori 1.500 eurokoa da”, dio Iker Lopez Etxebarriko alkateak.
Javi Conde Etxebarrin bizi da gaur egun, baina basauriarra da. Horregatik, Etxebarriko Udalaz gain, Basauriko Udalaren laguntza ere badu Condek bere ekimen solidarioak burutzeko: “Basauriko Udalarekin ere elkarlanak egiten ditugu eta aurten 1.000 euro eman dituzte dohaintzan Bizkaiko Elikagaien Bankuaren alde”.
“Etxebarriko zein Basauriko udalak laguntzeko beti prest agertu dira erronka solidario bat buruan izan dudan bakoitzean. Beste batzuetan beste helburu batera bideratu dugu dirua; adibidez, beharra zuen herritarren bat laguntzeko edo gaixotasunen bat ikertzeko. Aurten, Bizkaiko Elikagaien Bankua laguntzea erabaki dugu eta, beti bezala, bi udalek ere bat egin dute”, dio Condek.
Bizkaiko Elikagaien Bankuarentzako laguntza entregatu berri, Javi eta Jon hurrengo erronka solidarioa prestatzen hasi dira. “Danak eta Valentziako hondamendiak erronka berri bat egitera planteatu gaituzte. Pentsatuko dugu noiz eta non egin!”, dio Condek.
Elikagaien Bilketa Handia
Azaroaren 22an eta 23an Elikagaien Bilketa Handia egingo du Bizkaiko Elikagaien Bankuak. Hego Uribe eskualdeko supermerkatuetan ere bilketak antolatuko dituzte. Crovettok adierazi duenez, olioa, haurrentzako elikagaiak, latak eta kontserbak dira gehien behar dituztenak.
“Bizkaia lurralde solidarioa da eta ziur Bilketa Handian elikagai asko utziko dizkigutela herritarrek”, dio Crovettok. Hala ere, gogorarazi du biltegiak leporaino dituztela eta horregatik herritarrek bono sistema bat hautatu dezaketela: “Bonoak erosi ditzakete, orduan diru hori gorde eta behar denean erosketak egiten ditugu biltegietara eramateko”.
Era berean, Bilketa Handirako boluntarioak “ezinbestekoak” direla aipatu du Crovettok, eta herri batzuetan faltan dituztela esan du: “Adibidez, Etxebarrin boluntarioak behar ditugu azaroaren 22an eta 23an herriko supermerkatuetan egoteko. Supermerkatuetan boluntariorik egon ezean, bilketa ez da horren handia izaten”, dio Crovettok.
Boluntario izateko interesa dutenek izena eman dezakete Bizkaiko Elikagaien Bankuko webgunean edo 944 499 258, 946 053 779 edo 747 454 396 telefono zenbakietara deituta.