☉ Etxebarri
Izaro Saiz: «Kirolak matematikak besteko garrantzia dauka gure etxean»
Aurten Mediterraneoko Jokoetan aritzeko deitu du Espainiako Selekzioak Izaro Saiz otsailaren 27tik martxoaren 4ra Náfplion (Grezia)
Izaro Saiz García (Sopela, 2006) Etxebarriko Kukullaga Eskubaloi Taldeko gazte eta zilar kategorietako jokalaria da. Aurten Mediterraneoko Jokoetan aritzeko deitu du Espainiako Selekzioak otsailaren 27tik martxoaren 4ra Náfplion (Grezia). Maletak egin eta Madrilera abiatu baino lehen entrenamendu saioan izan ginen berarekin Etxebarriko kiroldegiko kantxan eta talde osoak transmititu digun gauza bera eskaini digu Kukullagakoak bai aurrez aurre, bai ariketak egiten zituen bitartean: hurbiltasuna, zintzotasuna eta gogor borrokatzeko gogo nekaezina. Kirol ibilbidean egin duen lehen elkarrizketa dugu honako hau eta ziur gaude atzetik beste hainbeste etorriko direla.
Zorionak, Izaro! Zer sentitu zenuen Mediterraneoko Eskubaloiko Txapelketan Espainiako selekzioarekin jokatuko zenuela esan zizutenean? Urduritasun handia eta poztasuna. Ezin nuen sinetsi ni aukeratu nindutela. Espainiako Selekzioa urrun dagoen zerbait izan da beti niretzat. Jokalari askok askotan pentsatu dugu lor ezin daitekeen helburu dela, eta hara! Deitu zidatenean ezin nuen gertatzen ari zena sinetsi.
Nolakoa izan zen dei hura? Otsailaren 8an deitu zidaten telefonoz. Momentu hartan eskolan nengoen. Telefonoa itzalita neukan eta klasea amaitu zenean, telefonoa piztu eta mezu zaparrada jaso nuen. Telefonoak eztanda egingo zuela zirudien! Lagunen, taldeko kideen eta beste eskubaloi taldeetako zorion mezuak jaso nituen. Momentu hartan ez nuen ezer ulertzen. Orduan familiako Whatsapp taldea begiratu nuen eta aitak deialdia bidali zidala ikusi nuen. Momentu hartan komunera joan nintzen eta aitari deitu nion telefonoz. Dardarka nengoen eta aitak esan zidan lehen gauza zera izan zen: “Zaude lasai eta ez ezazu asko flipatu”. Pozgarria da, bereziki Espainiako gazteen selekzioak taldea eginda zeukalako orain urte batzuk eta bertan egoteko oso aukera gutxi daudelako.
María Fernándezekin batera Espainiako Selekzioko gazteen azken fitxaketak izan zineten. Zer esan nahi du horrek guztiak zuretzat? Handicap-a da niretzat. Ez ditut selekzioko joko-eskemak eta aurreko txapelketetan egindako jokaldiak ezagutzen. Beraz, ahalegin berezia egin beharko dut ahalik eta lasterren integratu eta nesken joko-maila erdiesteko.
Zer esan zizuten Kukullaga Eskubaloiko taldekideek? Zoragarria izan zen. Gauzarik onena, zalantzarik gabe. Taldekide guztiak asko poztu ziren. Egun hartan entrenamendu saioa izan genuen Etxebarrin eta animo mezuak eta besarkadak eman genizkion elkarri. Jende horrek guztiak Kukullaga Eskubaloi Taldea osatzen duela jakitea izugarria da. Beraiei eskerrak eman behar dizkiet jasotako maitasun guztiagatik eta horrek eman didan ilusio itzelagatik.
Berria jakitean entrenamendu saioak aldatu zenituen? Nire errutinak berdina izaten jarraitu du. Arlo fisikoan saioak antolatzeaz Cáceres eta Manolo arduratu dira, gazte eta zilar kategorietako taldeetan, denboraldia hasi zenetik.
Zenbat denbora eskaintzen diozu eskubaloiari astero? Astean hiru entrenamendu saio ditut eta asteburuetan partida bat edo bi jokatzen ditugu: zilar kategoriako talde nagusian jokatu behar badut partida bi izan ohi dira asteburuetan. Benetan garrantzitsua da niretzat gazteen kategoriako kideekin egotea. Hala ere, denboraldi honetan Zilarrean jokatzeak asko eman dit eta nagusiek ere ondo baino hobeto zaintzen naute!
Zer espero duzu Mediterraneoko Txapelketatik? Joan den urtarrilean Euskadiko Selekzioarekin emandako maila mantentzearekin aski izango nuke Mediterraneoan. Erronka hau berria da niretzat eta talde berri batekin lehiatzea nolakoa den ikusi nahi dut. Bertako jokalariek nik baino maila altuagoa dute, Grezian arituko diren taldeek bezalaxe. Hori uste dut nik behintzat.
Gogorrak izango dira, beraz, nazioarteko aurkariak? Ez ditut taldeak banan-banan ezagutzen ezta bertako jokalariak ere. Hala ere, ziur nago partida zailak jokatuko ditugula, oso fisikoak. Azken batean, txapelketan parte hartuko duten taldeek eskubaloiko diziplina maila altua dute.
Espainiako Selekzioarekin Mediterraneoko Txapelketara joateko ez duzu maila makala izango. Agian, txikitatik hasi zinelako eskubaloian. 8 urterekin hasi nintzen eskubaloian, eskolako taldean. Gimnasia erritmikoarekin saiatu nintzen baina ez nintzen oso elastikoa eta oso haserre heltzen nintzen etxera saio bakoitzaren ondoren. Gauzak horrela, amak, garai batean eskubaloian jokatu zuenez, baloi bat oparitu zidan eta etxeko terrazan sakeak egiten irakatsi zidan. Benetan gustatu zitzaidan eta dibertigarria zen. Gainera, taldean jokatzeko kirola da eta horrek arreta erakarri zidan bereziki. Horiek horrela, eskubaloi taldea sortu genuen eskolan eta lehiatzen hasi ginen.
Zein eskolatan izan zen hori? Urdanetan. Gero denboraldi bat eman nuen Zuazon eta bertatik Kukura egin nuen salto. Hona heldu nintzenean helburu nagusi bat neukan: entrenamendu saio bakoitzean aurreko saioko markak hobetzea. Azken batean, Kukullagako taldean maila oso altuko kirolariak daude eta horrek nire alde onena atera du, zalantzarik gabe. Etxebarriko Kukullaga taldea nagusiki neskena da eta bertako jokalariak zaintzeaz gain errendimendurik onena ematea lortzen dute. Euskadiko Txapelketako kategoria ezberdinetako emaitzak ikustea besterik ez dago horretarako! Iaz, esaterako, gazteen eta kadeteen taldeek Euskadiko Txapelketa irabazi genuen eta Espainiako sektoreetarako sailkatu ginen. Hau ez da azken urteetako joera soilik: 2018an, haurren kategoriako taldea Espainiako txapeldun izan zen klubetan. Itzela da hori. Niretzat ohorea da talde horretako entrenatzailearekin eta hainbat jokalarirekin jokatzea. Hauxe da Etxebarrira etorri nintzenean bilatzen nuena eta topatu dut.
Beraz, Etxebarriko eskubaloia kirolaz harago doan zerbait dela esango zenuke? Herrian 12.000 lagun inguru bizi dira eta harrigarria da eskubaloiarekiko dagoen zaletasuna. Kirolaz blai dago herria eta poztasun itzela ematen du herrian neskatilak Kukullaga Eskubaloiko txandalarekin ikusteak. Oso harro nago familia honen parte izateaz.
Nolako garrantzia dauka zuretzat eskola kirolak umeengan gaur egun? Eskola kirola beharrezkoa dela uste dut. Etxean, kirolak matematikak besteko garrantzia dauka. Azken batean, ikasketetan ondo egoteko aukera ematen dit. Osasun aldetik onurak ekartzeaz gain, kirolak sakrifizioaren balioa erakusten dio praktikatzen duenari. Alde akademikoak duen garrantzi antzekoa du. Jokalari izugarriak ezagutzen ditut, ez bakarrik eskubaloikoak, kirolari trebeak izateaz gainera esparru akademikoan primerakoak. Kirolak, gainera, hortzak berdintzeko laguntzen du ere.
Eta bestelako kirolik praktikatzen al duzu? Ez daukat denborarik. Libre ditudan egunak berreskuraketarako erabiltzen ditut. Ahal dudanean San Mamesera noa Athletic jokatzen ikustera eta udan mendi eta bizikleta martxak egiten ditut gurasoekin.
☉ Etxebarri
Iker Lopez eta Loren Oliva Etxebarriko alkateak ikertuko dituzte, ‘udaltzain faltsuaren kasuan’
Frogatuz gero Udalean bazekitela agentearen titulazioa faltsua zela kargugabetu baino askoz lehenago, prebarikazio delitua egotzi ahal izango dizkiete udal ordezkariei
LVP udaltaldeak komunikatu bidez zabaldu duenez, Iker Lopez egungo Etxebarriko alkatea eta Loren Oliva alkate ohia ikertuko dituzte ‘udaltzain faltsuaren kasuan’ deliturik egin zuten jakiteko.
“Egoera hau erabateko ezustekoa izan da gu guztiontzat. Gure ustez, Udalak zuzen jokatu du, baina deigarriena da gure ordezkariak ikertuak izatea, udalean ezarritako kontratazio-prozesu guztietan erabakiak alde batera utzi eta prozesu horien emaitzak berrestera mugatu direnean”, adierazi dute LVPtik.
Lopezek eta Olivak epaitegietan agertu beharko dute, baita Etxebarriko azken bi udaltzainburuak ere. Udaltzain “faltsua” ere ikertzen ari da Fiskaltza eta epaitegietara joateko ere deituko dute.
Frogatuz gero Udalean bazekitela agentearen titulazioa faltsua zela kargugabetu baino askoz lehenago, prebarikazio delitua egotzi ahal izango dizkiete udal ordezkariei, baita fondo publikoak bidegabe erabiltzea ere, eskubiderik ez zuen pertsona bati nominak ordaindu baitzizkioten.
“Auzia judizializatuta dagoenez, oraingoz, ezin da xehetasunik eman. Horregatik, harritzekoa da komunikabide ezberdinetan ateratzen ari diren egi-erdiak eta era guztietako informazio partzial eta osatu gabeak argitaratzen egotea. Norbaitek gaia aztertu beharko luke, prozesu judizial batean dagoen informazioa zabaltzea delitua izan baitaiteke”, diote LVPtik.
Justiziarekin “elkarlanean” arituko direla adierazi dute LVP udaltaldetik: “Oraingoz lasai egoteko eta justiziarekin elkarlanean aritzeko garaia da. Ahal denean, egoerari buruzko informazio zehatza emango da. Bitartean, Etxebarri hobe baten alde lanean jarraituko dugu, hori baita gure izateko arrazoia eta gure helburu bakarra”.
EAJren alerta iaz
“Udaltzain faltsuaren” istorioak zeresana eman zuen abenduan Etxebarriko herritarren artean. Arkauteko Polizia eta Larrialdietako Euskal Akademiako titulua ustez faltsutu zuen 30 urteko gizon batek hiru urte baino gehiago eman zituen behin behineko lanetan Etxebarrin, 2019tik 2024ko maiatzera bitartean.
Bajak eta ordezkapenak egiten zituen, Udaleko lan-poltsan izena eman ondoren. Gertakari honen harira, prentsaurrekoa eman zuen Iker Lopez alkateak abenduaren 18an: “Udaltzaingoko kide baten irregulartasuna jakin bezain pronto barne-ikerketa abiarazi genuen, eta hortik eratorritako ondorioekin Fiskaltzaren esku utzi genuen kasua”.
Kasua Fiskaltzaren esku dago eta dokumentuak faltsutzearen delitua egin duen ikertuko du. Era berean, funtzio publikoak usurpatzea eta armak legez kanpo edukitzea ere leporatu ahal dizkiote, eta bost urteetan zehar, bajak eta ordezkapenak egin zituen bitartean, kobratutako dirua itzultzera behartu dezakete: hilero 2.000 euro garbi inguru.
Etxebarriko EAJk idatzi bat aurkeztu zuen Udalean, alkatetzara zuzenduta, udaltzain “faltsu” horri buruzko ikerketaz galdetzeko. Gainera, 2024ko maiatzean gaia osoko bilkuran aurkeztu zuen alderdi jeltzaleak. Hala ere, abendura arte ez zen publiko egin kasua, El Correo egunkariak albistea atera zuen arte.
☉ Etxebarri
Koma, Rat-Zinger, Eraso V eta EUKZ izango dira Etxebarriko 2025eko Ehuneko Bat jaialdian
Sons of Aguirre & Scila, Los del Humo, Anal Hard, Chuleria Joder, Bihotza, Skinsects eta talde sorpresa batek osatuko dute 2025eko kartela. Sarrerak salgai daude dagoeneko
Maitzaren 23an eta 24an izango da Ehuneko Bat Punk-Rock jaialdia Etxebarrin, Bekosolo parkean. Aurten bederatzigarren edizioa da eta antolatu dituzten kontzertu guztien berri eman dute gaur.
Koma, Rat-Zinger, Eraso V eta EUKZ (El ultimo ke zierre) izango dira jaialdian, baita Sons of Aguirre & Scila, Los del Humo, Anal Hard, Chuleria Joder, Bihotza, Skinsects eta talde sorpresa bat.
Sarrerak salgai daude woutick.es webgunean. Etxebarriko Irudi Kafen eta Bilboko Brixton dendan ere salgai daude sarrerak. Bi egunetarako bonuaren kostua 40 eurokoa da, ostiraleko kontzertuak bakarrik ikusteko sarrera 20 eurokoa da eta larunbatekoak bakarrik ikusteko 29 eurokoa.
Ehuneko Bat 2025
Maiatzak 23, ostirala
Koma + Eraso V + Skinsects
Prezioa: 20 euro
Maiatzak 24, larunbata
Rat-Zinger + Sons of Aguirre & Scila + Los del Humo + Anal Hard + Chuleria Joder + EUKZ + Bihotza + Talde sorpresa
Prezioa: 29 euro
*Bi eguneko bonua: 40 euro
☉ Etxebarri
Etxebarriko Udaltzaingoa ofizialorde batekin eta beste bi agente gehiagorekin indartu dute
Txanda bakoitzean agintari bat egongo dela ziurtatu dute Udaletik, “eta honek aukera emango du, edozein gertakizunen aurrean, erantzuteko orduan koordinazio eta eraginkortasun handiagoa izateko”, diote.
Udaltzaingoaren lantaldea indartu dute Etxebarrin. Ofizialorde berri bat sartu da lanean urtarrilean, baita beste bi agente berri ere.
Modu horretan, txanda bakoitzean agintari bat egongo dela ziurtatu dute Udaletik, “eta honek aukera emango du, edozein gertakizunen aurrean, erantzuteko orduan koordinazio eta eraginkortasun handiagoa izateko”, diote.
“Getxoko Udaltzaingotik eta zerbitzu-eginkizunetan datorren ofizialorde-buru berriak polizia-kudeaketan esperientzia sendoa izateaz gain, herriko segurtasuna indartzeko ikuspegi berria ere badakar”, diote udal ordezkariek.
Etxebarriko Udaltzaingoa 22 pertsonek osatzen dute: 18 gizonek eta 4 emakumek, Udaltzainburu ofizialorde eta administrariak barne, “udalerriko segurtasun beharrei erantzuteko gaitasuna indartuz”, diote.
VinfoPol appa
Etxebarriko Udaltzaingoa modernizatzeko bidean, administrazio-kudeaketak eta Udaltzaingoaren eguneroko eragiketak optimizatzeko Udalak aplikazio berri bat ezarri du: VinfoPOL.
“Tresna teknologiko hori taldearen premia espezifikoetara egokitzeko diseinatuta dago, eta eskura dauden baliabideak modu eraginkorragoan kudeatzen eta hobeto antolatzen lagunduko du”, diote udal arduradunek.
Gainera, aplikazioak barne-prozesuak arintzea ahalbidetuko duela adierazi dute Udaletik, “herritarrei eskainitako zerbitzuaren kalitatea hobetuz eta larrialdi egoerei erantzuteko denbora murriztuz”.
“Modernizazio teknologiko horrek indartu egiten du Udalak zerbitzu publiko hurbilagoak eta eraginkorragoak eskaintzeko egiten duen ahalegina”, diote.
Auto berria
Bestetik, udal-polizia-auto berri bat gehitu du Etxebarriko Udalak renting modalitatean. “Ibilgailua Dacia SUV hibridoa da, eta erregaiaren kontsumoan duen eraginkortasunagatik ez ezik, emisio kutsatzaileen maila baxuagatik ere nabarmentzen da, Etxebarriko Udalak ingurumena babesteko duen konpromisoa islatuz”, diote.
“Auto hori erostea udal-parke higikorra modernizatzeko estrategia zabalago baten barruan kokatzen da, zerbitzu publikoak jasangarritasunaren eta efizientziaren printzipioetan oinarrituz. Ekimen honekin, udalerriak klima-aldaketaren aurkako borrokarekin eta praktika arduratsuak sustatzearekin duen konpromisoa indartzen du”, diote.
☉ Etxebarri
Etxebarriko kiroldegiko tarifak urtean 4 eta 11 euro artean igo dituzte
Kiroldegiaren tasa % 8 igotzea onartu zuen Etxebarriko udalbatzak iazko urrian, eta urtarriletik dago indarrean
Etxebarriko kiroldegiko tarifak eguneratu dituzte. Urriko osoko bilkura % 8ko igoera onartu zuten LVPren eta EAJren aldeko botoekin eta EH Bilduren kontrako botoekin.
Datuak datu, kiroldegiko tarifak urtean 4 eta 11 euro artean igo dituzte: “Abonu Familiarra, hots, gurasoak eta 22 urtetik beherako familiakide guztiak barne hartzen dituen abonua urtean 11 euro igo da, hilean euro bat baino gutxiago. Banakako abonuari dagokionez urtean 6,5 euro gehiago dira. Eta umeen, gazteen eta adinekoen abonua urtean 4 euro igo da”, azaldu dio Iker Lopez alkateak GEURIAri.
Kiroldegiko tarifak % 8 igotzeko proposamena enpresa kudeatzailearena izan zen, Lopezek urriko osoko bilkuran zehaztu zuenez: “Kostu energetikoak garestitu eta Bizkaiko Kirol Instalazioetarako Hitzarmenaren ondoriozko soldatak igo egin direlako proposatu zuen tarifen igoera”, dio.
“Garrantzitsua da azpimarratzea Udalak, hainbat urtetan zehar, kiroldegiko tarifak izoztuta mantendu zituela, igoerarik aplikatu gabe. Hala ere, energiaren igoeraren eta soldaten berregokitzen eraginez, igoera bi urtetan banatu behar izan da. 2024an igoera partzial bat aplikatu zen, eta orain, 2025ean, gainerako doikuntza gauzatu da”, zehaztu du Lopezek.
2025eko Binakako Esku Pilota Txapelketaren jardunaldi bat jokatuko da bihar, urtarrilak 11, Etxebarriko frontoian. Artola-Mariezkurrena II eta Peña II-Albisu neurtuko dira. Artolaren berragerpena izango da lesioa atzean gainditu ondoren.
Aurretik, Serie B txapelketako partida jokatuko da: Alberdi II-Salaverri II vs Senar-Eskiroz.
Lehen partida 17:15ean izango da eta ondoren izango da 2025eko Binakako Esku Pilota Txapelketako partida.
Sarrerak online salgai daude 15 eta 20 euroan.
Bideoa / Gerraren eta faxismoaren aurkako murala margotu du Hego Uribeko GKSk Basaurin
Iker Lopez eta Loren Oliva Etxebarriko alkateak ikertuko dituzte, ‘udaltzain faltsuaren kasuan’
Euskaraldia antolatzeko lehen bilera deitu dute Galdakaon urtarrilaren 22an
Argazkiak / Errege Magoen magiak etxeko txikienen ilusioa piztu du beste urte batez
Argazkiak / Jende andanak harrera egin die Errege Magoei Basaurin
Argazkiak / Euriak ez du Arrigorriagako txikienen ilusioa zapuztu Olentzero eta Mari Domingiren etorreran
Bideoa / Gerraren eta faxismoaren aurkako murala margotu du Hego Uribeko GKSk Basaurin
Gorka Perez: «Mendiko artzaintza galtzen ari da eta han behar dira, hain zuzen ere, txakurrak»
