☉ Etxebarri
Institutuko jantokiko soberakinak aprobetxatzeko lehen Rexcatering hozkailua jarri dute Etxebarrin
Etxebarriko Institutuko jantokiko janari-soberakinak kudeatzeko, berreskuratzeko eta aprobetxatzeko Rexcatering ekimena jarri dute martxan herrian. Hain zuzen ere, ‘vending’ makina bat jarri dute Kultur Etxearen kanpoaldean (Andaluzia kalea), eta Institutuko jantokian ikasleek jan barik uzten duten janaria tuperretan jarri ondoren, berriro jendaurrean jarriko dute makina horren bitartez. Bizkaiko lehenengo Rexcatering hozkailua da Etxebarrikoa eta martxan izango da maiatzaren 2tik aurrera.
“Pertsona guztiei zuzendutako proiektu honen unibertsaltasuna azpimarratzekoa da, erabiltzaileen egoera sozioekonomikoa edozein izanik ere. Tuperrak hartzea doakoa da eta edonork erabiltzeko moduan egongo dira”, dio Iker Lopez Etxebarriko zinegotziak.
Etxebarriko Institutuko ikasleek kudeatuko dute Rexcatering proiektua eta ‘vending’ makina. “Ikasleak oso pozik daude. Askok interesa jarri dute proiektuan eta parte hartzeko konpromisoa hartu dute. Egunero, DBH3 eta DBH4ko ikasleek soberan geratu diren tuperrak ekarriko dituzte ‘vending’ makinara, edozein herritarrek har ditzan”, dio Nerea Perez Etxebarriko Institutuko Agenda 30eko bigarren arduradunak.
Prestakuntza espezifikoa
‘Vending’ makina hori hornitzeko, programa bat jarri dute abian Etxebarriko Institutuan. Programa horretan, DBHko ikasleek, jantokiko langileek eta irakasleek hartzen dute parte. Horretarako, prestakuntza espezifikoa jaso dute, prozesu osoan eman beharreko urratsak ezagutzeko: ontziratzea (% 100 konpostagarriak diren ontzietan); termozigilatzea (film konpostagarriarekin); ontzien etiketak; tenperatura-eraisgailutik pasatzea (izozkailua); eta tuperrak makinara eramatea eta jasotzea.
“Lehen urratsa sukaldeko langileek egingo dute; gainerakoak ikasle-taldeek koordinatuko dituzte, irakasleek eta Rexcateringek gainbegiratuta. Gainera, tuperren jarraipena egingo dute aplikazio informatiko baten bidez, makinan dauden tuperrak zorrotz kontrolatzeko”, dio Perezek.
‘Residuo 0’ Fundazioaren laguntza eta aholkularitza izango dute Institutuko ikasleek, eta Etxebarriko Udalak ekonomikoki lagundu du. Etxebarriko Enpresa Txiki eta Ertainen (ETE) eta Ideia Berritzaileen lehiaketa irabazi zuen iaz proiektuak, eta aurten jarri dute martxan. Ingurumen eta gizarte kontzientzia duen ostalaritza-zerbitzu kolaboratiboa da Rexcatering, jantoki handiekin, eskola-jantokiekin, udaletxeekin eta hezkuntza-zentroekin lankidetzan aritzen dena, soberakinak berreskuratzeko eta elikagaien kontsumoa eraginkorra izateko. “Jatorrizko ideia eta helburua janaria zabortzat hartu ezin den gizartea lortzea da. Eguneroko irtenbideak bilatzen ditu elikagaiak berrerabiltzeko eta etorkizunean arau-aldaketak lortzeko, herritar guztien sentsibilizazioa, parte hartzea eta aktibazioa landuz”, dio Alvaro Saiz ‘Residuo 0’ Fundazioko kideak (Galdakaoko GBGEko kide ere bada Saiz).
Oraingoz Etxebarriko Institutuko jantokiko janari-soberakinekin beteko dute Rexcatering hozkailua. “Asmoa dugu Kukullaga ikastetxeko jantokietara ere proiektua hedatzea, baina aztertu behar dugu. Izan ere, ikasleen adina 12 urtetik beherakoa da eta korapilotsuago izan daiteke”, dio Iker Lopezek. Era berean, Etxebarriko industriaguneetan dauden enpresei aukera luzatuko die Udalak: “Dagoeneko enpresa bat harremanetan jarri da proiektuaz galdezka. Ikusiko dugu aurrera egingo duen. Espero dezagun baietz”.
☉ Etxebarri
Mintzodromoa, Txiki Jaia eta kantu tailerra antolatu dituzte Etxebarrin Euskararen Egunaren testuinguruan
Euskararen Nazioarteko Eguna ospatzeko programa azaroaren 29an hasiko dute Etxebarrin
Abenduaren 3a Euskararen Nazioarteko Eguna da. Horren harira, Etxebarrin hainbat jarduera antolatu dituzte: Etxebarri Txiki Jaia, Mintzodromoa, Kantamintza kantu tailerra eta Euskarazko Produktuen Txokoa.
Egitaraua azaroaren 29an, ostiralez, hasiko da: Kukullagako ikasleei zuzenduta, Etxebarri Txiki Jaia antolatuko dute goizez frontoian.
Ondoren, abenduaren 3an, 09:30ean, Mintzodromoa antolatuko dute udaletxeko plazan jarriko duten karpan. Aurtengoa hirugarren edizioa da eta antolakuntzatik adierazi dutenez, “edonork parte har dezake”. Baldintza bakarra izango da euskaraz berba egitea.
Mintzodromoan parte hartzeko interesa dutenek izena eman behar dute 944 267 005 telefono zenbakira deituz edo etxebarri@euskaraldia.eus helbide elektronikora idatziz.
Bestetik, abenduaren 4an, asteazkenez, Kantamintza kantu tailerra izango da Cimen, 18:30ean. “Kantatzen duen herria inoiz ez denez hilko, nagusientzako tailer hau antolaru dugu”, diote udal ordezkariek.
Eta, azkenik, abenduaren 9tik 12ra bitartean Euskarazko Produktuen Txokoa antolatuko dute ludoteketan, 17:00etatik 19:00etara bitartean.
Etxebarriko Udaletik gogorarazi dutenez, ‘Euskaraz bizi nahi dut’ banderak salgai daude 3 euroan Euskara Zerbitzuan, Cimen.
Abenduaren 1ean, igandez, Etxebarri X-Treme lasterketaren 12. edizioa antolatuko dute.
Aurreko edizioetan bezala, lasterketak disziplina desberdinak hartuko ditu: txakurkrosa, trailak eta martxa.
Zehazki, bost lasterketa izango dira: 35 kilometroko traila (09:30), txakurkrosa (09:45), martxa (10:00), trail txikia (11:15) eta 10 kilometroko traila (11:30).
Bost modalitateek kiroldegian izango dute irteera eta helmuga.
Izena emateko epea zabalik dago azaroaren 29ra arte etxebarrixtreme.com webgunearen bitartez.
☉ Etxebarri
Jarrera matxistak identifikatzeko “neurgailu erraldoia” jarriko dute A25ean Etxebarrin
Azaroaren 25ean ‘Biolentometroaren’ inaugurazioa egingo dute eta elkarretaratzea deituko dute indarkeria matxista salatzeko
Indarkeria Matxistaren Aurkako Nazioarteko Egunaren harira, azaroaren 25ean jarrera matxistak identifikatzeko “neurgailu erraldoia” jarriko dute Santa Ana kalean, Etxebarrin.
‘Biolentometroa’ izena jarri diote, eta egunerokoan dauden jarrera matxistak zerrendatu dituzte 1etik 30era, biolentzia graduaren araberakoak.
Txantxa mingarriak, gezurrak, jeloskortasuna, mehatxatzea, laztan agresiboak, atzamarkadak, bultzatzea, telefono eta ordenagailu gakoak lapurtzea, sare sozialetan jazarpena, bikotekidearen argazkiak edo bideoak argitaratzea haren baimenik gabe, tratu txarrak, seme-alabak izatera behartzea, harreman sexualetara bultzatzea, bortxaketa eta hilketa jasotzen ditu ‘Biolentometroa’k.
Jarrera matxistak identifikatzeko neurgailuaren inaugurazioa azaroaren 25ean bertan izango da 12:00etan, Udalaren adierazpenaren ostean.
Arratsaldean, 18:00etan elkarretaratzea deitu dute udaletxeko plazan, eta ondoren, ekintza soziala egingo dute.
☉ Etxebarri
Bideoa / Zientziak zelan hobetzen du gure bizi-kalitatea? Etxebarriko Zientzia Astean izan gara!
Zientzia Asteari hasiera eman diote Etxebarrin. Aurtengo edizioa bederatzigarrena da eta zientzia herritarren bizi-kalitatea hobetzeko “tresna indartsua” dela azalduko dute azaroaren 23ra bitartean.
Lehen jardunaldian, azaroaren 18an, Arantxa Renteria Tecnaliako osasun-ikertzaileak hitzaldi bat eman zuen Etxebarri Institutuko DBH 4. mailako ikasleen aurrean: ‘Kirurgia birsortzailea: Biomaterialekin robotizatutako belauneko inplantea’.
Hitzaldian bertan izan zen GEURIA, eta aukera izan genuen Arantxa Renteriarekin berba egiteko, baita Gotzone Larrea Etxebarri BHIko Berrikuntza arloko arduradunarekin eta Uxue Diz ikaslearekin ere.
☉ Etxebarri
Javi Condek eta Jon Salvadorrek 7 tona elikagai bildu dituzte Bizkaiko Elikagaien Bankuaren alde
Javi Conde atleta basauriar-etxebarritarrak eta Jon Salvador atleta erandioarrak erronka solidario berria burutu dute. Urriaren 30ean Bilboko El Corte Inglés saltoki handietan 10 milia egin zituzten korrika, helburu solidario baten alde: Bizkaiko Elikagaien Bankuari 7 tona elikagai ematea, alegia.
Gaur, erronka burutu eta bi astera, txeke solidarioaren banaketa egin dute Etxebarrin. Bertan izan dira Conde eta Salvador, Iker Lopez Etxebarriko alkatea eta Luis Crovetto Bizkaiko Elikagaien Bankuko ordezkaria.
“Erronka gogorra izan da aurtengoa, baina poztasun handikoa. Beste batzuetan erronkak leku zailetan egin ditugu dira, hala nola, Gabarran edo Bizkaiko Zubian, eta oraingoan beste modu batera aurre egin behar izan diogu. Hala ere, dena ondo atera da eta oso pozik gaude”, adierazi du Javi Condek.
Luis Crovetto Bizkaiko Elikagaien Bankuko ordezkaria ere pozik agertu da: “Bizkaiko Elikagaien Bankutik 20.000 pertsona laguntzen ditugu eta 7 tona elikagai jasotzea ekimen solidario honi esker, benetan eskertzekoa da”.
Etxebarri eta Basauri, Javirekin bat
Erronka solidarioa modu pertsonalean egiten dute Javik eta Jonek, baina erakundeen laguntza ere jasotzen dute. Esaterako, Etxebarriko Udalak lankidetza-hitzarmena du Javi Conderekin eta bere ekimen solidarioekin: “Urtero aurrekontutik diru-partida bat gordetzen dugu Javik antolatzen dituen ekimen solidarioetarako. Kopuru hori 1.500 eurokoa da”, dio Iker Lopez Etxebarriko alkateak.
Javi Conde Etxebarrin bizi da gaur egun, baina basauriarra da. Horregatik, Etxebarriko Udalaz gain, Basauriko Udalaren laguntza ere badu Condek bere ekimen solidarioak burutzeko: “Basauriko Udalarekin ere elkarlanak egiten ditugu eta aurten 1.000 euro eman dituzte dohaintzan Bizkaiko Elikagaien Bankuaren alde”.
“Etxebarriko zein Basauriko udalak laguntzeko beti prest agertu dira erronka solidario bat buruan izan dudan bakoitzean. Beste batzuetan beste helburu batera bideratu dugu dirua; adibidez, beharra zuen herritarren bat laguntzeko edo gaixotasunen bat ikertzeko. Aurten, Bizkaiko Elikagaien Bankua laguntzea erabaki dugu eta, beti bezala, bi udalek ere bat egin dute”, dio Condek.
Bizkaiko Elikagaien Bankuarentzako laguntza entregatu berri, Javi eta Jon hurrengo erronka solidarioa prestatzen hasi dira. “Danak eta Valentziako hondamendiak erronka berri bat egitera planteatu gaituzte. Pentsatuko dugu noiz eta non egin!”, dio Condek.
Elikagaien Bilketa Handia
Azaroaren 22an eta 23an Elikagaien Bilketa Handia egingo du Bizkaiko Elikagaien Bankuak. Hego Uribe eskualdeko supermerkatuetan ere bilketak antolatuko dituzte. Crovettok adierazi duenez, olioa, haurrentzako elikagaiak, latak eta kontserbak dira gehien behar dituztenak.
“Bizkaia lurralde solidarioa da eta ziur Bilketa Handian elikagai asko utziko dizkigutela herritarrek”, dio Crovettok. Hala ere, gogorarazi du biltegiak leporaino dituztela eta horregatik herritarrek bono sistema bat hautatu dezaketela: “Bonoak erosi ditzakete, orduan diru hori gorde eta behar denean erosketak egiten ditugu biltegietara eramateko”.
Era berean, Bilketa Handirako boluntarioak “ezinbestekoak” direla aipatu du Crovettok, eta herri batzuetan faltan dituztela esan du: “Adibidez, Etxebarrin boluntarioak behar ditugu azaroaren 22an eta 23an herriko supermerkatuetan egoteko. Supermerkatuetan boluntariorik egon ezean, bilketa ez da horren handia izaten”, dio Crovettok.
Boluntario izateko interesa dutenek izena eman dezakete Bizkaiko Elikagaien Bankuko webgunean edo 944 499 258, 946 053 779 edo 747 454 396 telefono zenbakietara deituta.
Hego Uribeko eta Kurdistango musikariek emanaldia eskainiko dute Durangoko Azokan
‘Txapel’ek ‘Izarrak eta Haitzak’ liburua aurkeztuko du Pou anaiekin, Durangon
Arrigorriagako Gazteguneak Gabonetako irteera antolatu du Donostiako izotz pista eta ihes gelara
Argazkiak / Euskara ahoan, 120 lagunek hartu dute parte Galdakaoko Mintzodromoan
Argazkiak / Tortilla, indabak eta giro bikaina Usansoloko jaietako herri bazkarian
Argazkiak / ‘Konponbidea ez bazara, arazoa zara’ lemapean manifestazioa egin dute A25ean Galdakaon
Bideoa / Zein da euskarak duen hitzik politena? Galdakaon erantzun dute!
Bideoa / Olentzeroren eta Mari Domingiren etxea zabalik dago jada Basaurin!
