Etxebarriko kiroldegiko tarifak eguneratu dituzte. Urriko osoko bilkura % 8ko igoera onartu zuten LVPren eta EAJren aldeko botoekin eta EH Bilduren kontrako botoekin.

Datuak datu, kiroldegiko tarifak urtean 4 eta 11 euro artean igo dituzte: “Abonu Familiarra, hots, gurasoak eta 22 urtetik beherako familiakide guztiak barne hartzen dituen abonua urtean 11 euro igo da, hilean euro bat baino gutxiago. Banakako abonuari dagokionez urtean 6,5 euro gehiago dira. Eta umeen, gazteen eta adinekoen abonua urtean 4 euro igo da”, azaldu dio Iker Lopez alkateak GEURIAri.

Kiroldegiko tarifak % 8 igotzeko proposamena enpresa kudeatzailearena izan zen, Lopezek urriko osoko bilkuran zehaztu zuenez: “Kostu energetikoak garestitu eta Bizkaiko Kirol Instalazioetarako Hitzarmenaren ondoriozko soldatak igo egin direlako proposatu zuen tarifen igoera”, dio.

“Garrantzitsua da azpimarratzea Udalak, hainbat urtetan zehar, kiroldegiko tarifak izoztuta mantendu zituela, igoerarik aplikatu gabe. Hala ere, energiaren igoeraren eta soldaten berregokitzen eraginez, igoera bi urtetan banatu behar izan da. 2024an igoera partzial bat aplikatu zen, eta orain, 2025ean, gainerako doikuntza gauzatu da”, zehaztu du Lopezek.

2025eko Binakako Esku Pilota Txapelketaren jardunaldi bat jokatuko da bihar, urtarrilak 11, Etxebarriko frontoian. Artola-Mariezkurrena II eta Peña II-Albisu neurtuko dira. Artolaren berragerpena izango da lesioa atzean gainditu ondoren.

Aurretik, Serie B txapelketako partida jokatuko da: Alberdi II-Salaverri II vs Senar-Eskiroz.

Lehen partida 17:15ean izango da eta ondoren izango da 2025eko Binakako Esku Pilota Txapelketako partida.

Sarrerak online salgai daude 15 eta 20 euroan.

Urtarrilaren 1ean goizaldean gazte talde bat Etxebarrin erasotua izan zen. GEURIAk jakin ahal izan duenez, horietako bati ebakuntza egin behar izan zioten urtarrilaren 2an, “ostikaden bitartez masailezurra ere hautsi ziotelako”. Beste lagun bati sudurra hautsi zioten.

Eraso hori salatzeko, gaur, urtarrilak 9, 19:00etan Zintururi plaza txiki geratu da: mila herritar inguruk babesa erakutsi diete biktimei, eta herrian erasorik ez dutela onartuko adierazi dute. Herritarren erantzuna irmoa izan da.

Iker Lopez alkateak hitza hartu du elkarretaratzean: “Gure gazteak beren auzoan eta herrian seguru sentitzea nahi dugu, eta ez gaude prest segurtasunik ezaren eta beldurraren sentsazioa gure kaleetaz jabetzeko. Indarkeria-ekintza hori onartezina da, eta sustatzen ditugun errespetu-, bizikietza- eta bake-balioen aurka doa”.

“Edozein indarkeria motaren aurrean, ezezko borobila oihukatzen dugu. Egunero borrokatzen dugu herri seguru baten alde”, zehaztu du Lopezek, eta gaineratu du “babes osoa” helarazten dietela biktimei eta euren familiei: “Bakarrik ez zaudetela jakin dezazuen nahi dugu. Etxebarriko herria zuekin dago”.

Etxebarri “espazio segurua, askatasunezkoa, errespetuzkoa eta bizikidetzakoa” izatea eskatu du Lopezek. Elkarretaratzea isila izan da eta bost minutu iraun ditu, Lopezek adierazpena irakurri ostean.

Ertzaintza gertatutakoa ikertzen ari da. Biktimek salaketa jarri zuten urtarrilaren 7an.

Herritarren bizikidetza hobetzeko eta gizartean alarma sortzen duten edo komunitateari kalte egiten dioten arazoei erantzuteko Gatazkak kudeatzeko talde berria jarri du martxan Etxebarriko Udalak.

Gatazka taldea arduratuko da espazio publikoan eragina duten egoerei, komunitatearen segurtasunari edo udalerriaren barruan eragile desberdinak inplikatzen dituzten gatazkei aurre egiteaz. “Hau da, ez da norbanakoen arteko liskarretara mugatuko”, zehaztu dute udal ordezkariek.

Taldearen osaeran udal arlo ezberdinek parte hartzen dute, hala nola, Gizarte Ekintzak, Gizarte Segurantzak, Udal Bulego Teknikoak eta Osakidetzak, Bitartekaritza eta Bizikidetza Zerbitzuekin batera dihardutela.

“Sailen arteko lankidetza honi esker, interbentzio estrategia eraginkorrak diseinatu eta kasuen jarraipena bermatu ahal izango da”, diote udal arduradunek.

Taldea bi hilerik behin batuko da: “Kideen arteko komunikazioa eta koordinazioa etengabea izango da, erantzun arinak eta udalerriaren beharrei egokitutakoak eskaintzeko”, diote.

“Etxebarriko Udalak elkarrizketaren eta adostasunak bilatzearen aldeko apustua indartzen du ekimen honekin, gatazken konponbiderako funtsezko tresna gisa”, diote.

Gabon zahar egunean, goizaldean, gazte talde bat Etxebarrin erasotua izan zela gaitzetsi du Udalak.

GEURIAk jakin ahal izan duenez, horietako bati ebakuntza egin behar izan zioten urtarrilaren 2an, “ostikaden bitartez masailezurra ere hautsi ziotelako”, adierazi dute. Beste lagun bati sudurra hautsi zioten.

Eraso horren aurrean, elkarretaratzea deitu du Udalak urtarrilaren 9an, ostegunez, 19:00etan Zintururi plazan. Kontzentrazioa “isila eta baketsua” izango dela adierazi dute udal ordezkariek eta herritarrei dei egiten diete bat egiteko.

“Gure gazteak beren auzoan eta herrian seguru sentitzea nahi dugu, eta ez gaude prest segurtasunik ezaren eta beldurraren sentsazioa gure kaleetaz jabetzeko. Indarkeria-ekintza hori onartezina da, eta sustatzen ditugun errespetu-, bizikietza- eta bake-balioen aurka doa”, diote Udaltik, sare sozialetan publikatu duten adierazpenean.

Ildo horretan, biktimei eta euren familiei elkartasuna adierazi diete udal ordezkariek: “Gure babes osoa helarazten diegu”.