☉ Galdakao
Azucena Campo, Galdakaoko Korrika Laguntzailea: “Korrikak gogorarazten digu euskara zein garrantzitsua den”
Leonen jaioa, Galdakaora etorri zen umetan familiarekin. Beste euskara ikasle batzuekin batera, Galdamintza elkartea sortu zuen orain zortzi urte.
Orain dela zortzi urte hasi zen Azucena Campo (Leon, 1962) Korrikaren alde pausoak ematen. Hamar urte zituela Galdakaora etorri zen familiarekin eta ordutik hona hainbat ekintzetan parte hartu du euskararen alde. Lagun talde batekin sortu zuten Galdakaoko Euskara Elkartea: “Galdakaon euskara bizirik mantentzeko ahaleginak egin genituen”. Hasierako urte hartatik gaur egunera arte AEK eta lagun talde horren artean elkarlana izan dela nagusi adierazi digu. Hori dela eta, gehienak Korrika Laguntzaile bihurtu dira.
Galdamintza esango banizu…
Orain dela zortzi urte sortu genuen Galdakaoko Euskara Elkartearen izena zen. Elkartean geunden gehienak euskara ikasleak ginen, baina pare bat irakaslek ere parte hartu zuten. Gaur egun elkartea desagerturik dago.
Nola egin zinen Korrika Laguntzaile?
AEKrekin beti izan dut kontaktua euskara ikaslea nintzenetik. Momentu hartatik aurrera euskaltegiak zer behar duenaren arabera laguntzen diet beste lagun talde batekin batera.
Esate baterako…
AEKko kideekin elkartzen ginen bileraren batean eta zer behar zuten adierazten ziguten: Korrika etorri aurretik ibilbidea markatzea, dendetara joan eta Korrika Lagunak bilatzea, Korrika Laguntzaile izateko gutunak bidaltzea, pankartak egin eta hauekin kaleak apaintzea, besteak beste.
Eta, laguntza hori noiz hasten da martxan?
Korrika hasi baino hilabete batzuk lehenago hasten gara gauzak antolatzen, baina aste batzuetako kontua da gure lana. Egun eta ordu zehatz batzuetan elkartzen gara Korrika Lagunok. Adibidez, egun batean bi ordutan gutun guztiak bidaltzen dizkiegu dendariei eta beste batean kartelak jartzen ditugu. Aste gutxi batzuetako kontua besterik ez da.
Elkarlana oso garrantzitsua izango da Korrika Laguntzaileek egiten duzuen lan horretan…
Bai, hasieran elkarte moduan hasi ginen, baina gaur egun norbanako lana da eta guztion artean ados jartzen gara gauzak antolatzeko.
Guztira zenbat lagunek parte hartzen duzue Korrika laguntzen?
Jende dezente elkartzen gara: batzuk Berbalagun programako partaideak gara eta beste batzuk Galdakaoko euskaltzaleak dira, baita euskararen alde dauden erdaldunak ere. Ez dago parte hartzaile kopuru zehatzik. Izan ere, gure lanaren, denboraren eta ordutegien arabera elkartzen gara.
Eta, Korrika urtea ez denean…
Hainbat ekintzetan parte hartzen jarraitzen dugu. Esan dizudan moduan, Berbalagun programaren bidez mantentzen ditugu bai gure kontaktuak bai gure jarduerak eta AEKtik antolatzen dituzten ekintza guztietan parte hartzen dugu.
Euskarari dagokionez, uste duzu gazteek parte hartzen dutela euskararen eta Korrikaren aldeko ekimenetan?
Bai, nire ustez parte hartze handia dago euren aldetik euskararen aldeko ekitaldiak egiten direnean. Eta Korrikari dagokionez, batzuk are gehiago inplikatzen dira.
Lehenengo Korrika eta 19. Korrika ezberdinak omen dira…
Lanaren aldetik, nire iritziz gaur egun beti egin behar da lehen baino lan gehiago. Borondatezko lana da, baina oso beharrezkoa. Euskara sustatzearen alde denean beti egin behar da zerbait gehiago eta inplikazio gehiago eskatzen du horrek. Gaur egun egiten dugun lana gutxi da euskararentzako eta gazteek kontzientzia gehiago izan behar lukete.
Korrikaren aldeko laguntzari esker, zein da egiten duzun hausnarketa?
Nire ustez, jendeak jarrera positiboa du eta horrela jarraitu behar du denbora luzez. Korrikak poza eta jaia esan nahi du, euskararen alde egiteko pauso oso handia. Herri eta probintzia ezberdinetako herritarrak elkartzen ditu eta hori oso aberasgarria da: gogorarazi egiten digu euskara zein garrantzitsua den.
☉ Galdakao
Galdakaoko 2024ko aurrekontu proposamenak “inbertsio ahalmen handia” du oinarri
48,8 milioi eurokoa da kaleratu duten proposamenaren zenbatekoa, iazkoarekin alderatuta “% 4,91ko igoera” jasotzen duena
Aurrekontu proiektuaren aurkezpena egin du gaur eguerdian Galdakaoko udal gobernuak, Iñigo Hernando alkateak eta Alberto Ealo Ogasun zinegotziak gidatuta. Bertan egon dira, baita, gobernua osatzen duten EH Bildu, Auzoak eta Usansolo Herria alderdietako bozeramaileak.
48,8 milioi eurokoa da kaleratu duten proposamenaren zenbatekoa, iazkoarekin alderatuta “% 4,91ko igoera” jasotzen duena, ogasun zinegotziak adierazi duenaren arabera.
Abenduaren 21eko osoko bilkuran onartzeko asmoa daukate. Oposizioarekin hartu eman izan dutela ziurtatu dute, eta “ekarpenen zai” daudela.
Modu berean, eta Usansolori dagokionez, egun aurrekontua “juridikoki zatiezina” dela azaldu dute, baina hainbat partidetan “banaketa proportzionala” aurreikusten dutela.
Gazta, lau zatitan
Proposamena lau zati handitan banatzen den gazta bat bailitzan aurkeztu dute. Ealok zati horien zenbatekoak xehetu ditu:
- Zerbitzuak (% 51): 29.934.591 €,
- Giza Baliabideak (% 29): 13.925.454 €
- Inbertsioak (% 12): 6.039.231 €
- Diru laguntzak (% 8): 3.793.538 €
Udal gobernu taldeak aurkeztu du 2024ko kontuen proposamena // Geuria
Zenbaki orokorrez harago, Hernandok zifra horien atzean dagoen ikuspuntua azaldu du, aurrekontuak bi oinarri dituela azpimarratuz: alde batetik, “herritarrei ematen zaizkien zerbitzuen kalitatea bermatzea eta hobetzen joatea”, eta bestetik “udalaren inbertsio ahalmen handia indartzea”. Bi helburu handi horien adibide da zerbitzuen atalak gaztaren erdia baino gehiago jaten duela, %51, hain zuzen ere.
Beste partida batzuen artean, hondakinen bilketari dagokion partida bikoiztu dela nabarmendu du, eta guztira hondakinen kudeaketara zein kale garbiketara 5 milloi euro bideratzen direla.
Gazteriari dagokionez, iaz martxan jarri zuten zerbitzu psikologikoa mantenduko dute, eta herriko gazteei emantzipazioan laguntza eskainiko dien zerbitzua martxan jarriko dute. Bi asmoen aurrekontua guztira 433.000 euroko da.
Pertsona nagusien kolektiboa ere aintzat hartzen du proposamen honek, eta 150.000 euro jarriko dituzte programa ezberdinetara.
Inbertsioak, indartsu
Inbersioen atala ere azpimarratu nahi izan du Galdakaoko alkateak: “beste herri batzuekin alderatuta inbertsio ahalmena oso handia da”. Zenbakitan jarrita, 6 milloitik gora, aurrekontuaren % 12a.
Proiektu esanguratsuenen artean, honako hauek aipatu ditu:
- Txomin Egileor kalearen eraldatzea erreka eta bere ingurua biziberritzeko proiektu integral baten baitan kokatu du. Milloitik gorako inbertsioa egingo dute, norabide bakarrekoa izango da kalea, eta bidearen beste karrila bidegorri batekin lotuko dute.
- Saneamendua eta ur honiduran hobekuntza nabarmenak egingo dituzte, Usansolon, Trokan edo Ibaizabal kalean, besteak beste. Hemen ere milloitik gorako inbertsioa aurreikusten da.
- Elexalde eliza aurreko etxea erosiko du Udalak, “herritarren eskura jartzeko”. Proiektuaren nondik norakoak “dagokion momentuan” zehaztuko dira.
Bukatzeko, diru laguntzetan ia lau milloi bideratuko ditu Udalak, besteak beste, larrialde egoeran dauden pertsonentzako laguntzak mantenduz (981.000 euro), sustapen ekonomikoari eta enpleguari dagokion partida hornituz (enplegu plana, ekintzaileei, dendari elkarteari eta Erletxeko enpresariei diru laguntza), edo herriko taxilariekin adostuko den auzo-taxi zerbitzua martxan jarriz.
Gaztaren beste bi zatiak udalaren gastu estrukturalek osatzen dute, Giza Baliabideak, % 29a, (13.925.00 euro), eta Finantza Gastuak (51.650 euro).
Abenduaren 3a Euskararen Nazioarteko Eguna da. Galdakaon ekitaldi nagusia egin dute Torrezabal Kultur Etxean, eta bertan ekainean zendu zen Izaskun Rekalde usansolotar euskaltzalea gogoratu dute.
Ikastolako lagunak, lankideak eta Pantailak Euskaraz eta Arnas Dezagun ekimenetako bere lagunak izan dira ekitaldian, besteak beste. Era berean, Pantxoa Karrere abeslari lapurtarrak eta bere alabak musikaz girotu dute emanaldia. Taupadak Dantza Eskolak ere parte hartu du.
Izaskunen senideak ere ekitaldira bertaratu dira Torrezabalera eta Karmele Gorroño galdakoztarrak egindako ilustrazioa jaso dute. Ekitaldia Johana Lasheras eta Jon Gomez kazetariek gidatu dute.
☉ Galdakao
Gazte berbodromoa, ekitaldia eta Izaskun Rekalderi omenaldia antolatu dituzte Euskararen Egunaren harira Galdakaon
Abenduaren 3a da Euskararen Nazioarteko Eguna. Galdakaon hainbat jarduera antolatu dituzte, ez bakarrik abenduaren 3an bertan, baizik eta aurreko egunetan ere.
Besteak beste, azaroaren 29an Mintzodromoa antolatu zuen Barandiaran AEK euskaltegiak Kurtzeko plazan eta Maximo Moreno Musika Eskolako ikasleek kalejira egin zuten.
Abenduaren 1etik 3ra bitarteko asteburuan ere hamaika gauza egongo dira Galdakaon: gazte berbodromoa, musika ekintza kooperatiboak, beldurrezko ihes gela, euskara eta ostalaritza sustatzeko kanpaina, talo eta sagardo dastaketa eta Euskararen Eguneko ekitaldi nagusia.
Euskararen Eguneko ekitaldi nagusian, euskararen lorpenak eta erronkak aurkeztuko dituzte, eta Izaskun Rekalde usansolotar euskaltzaleari omenaldia egingo diote. Ekainean hil zen. Berarekin batera euskara sustatzeko hainbat ekimenetan parte hartu duten kide ugari etorriko dira Galdakaora igandean, baita Pantxoa kantaria ere. “Izaskunek ereindako haziari ura botatzen jarraituko dugu”, esan du Gaizka Uriarte Aitu elkarteko kideak.
Euskararen Eguna 2023 | Egitaraua
Abenduak 1, ostirala
20:00 Gazte berbodromoa Ganguren tabernan
Abenduak 2, larunbata
12:00 + 17:00 Beldurrezko ihes gela Plazakoetxeko Topagunean (+12 urte)
Abenduak 2-3
Urretako ostalariekin elkarlanean, euskara eta ostalaritza sustatzeko kanpaina. Euskaraz eskatzeak saria izango du.
Abenduak 3, igandea
12:00 ‘Euskararen lorpenak eta erronkak’ ekitaldia eta Izaskun Rekalderi omenaldia Torrezabalen. Sarrerak agortuta
13:00 Talo eta sagardo dastaketa Agirre Lehendakariaren plazan
Zaintza sistema eraldatzeko asmoz, egun osoan zehar hamaika ekintza egin dituzte Hego Uriben greba feminista orokorraren barruan. Galdakaon goizeko lehen orduan gosari kolektiboa egin dute, baita piketeak ere, eta ondoren 12:30ean manifestazioa egin dute Zuhatzutik Santi Brouard plazara ehunka herritarrek. Hauek dira Aitzol Zamalloa argazkilari galdakoztarrak atera dituen argazkiak:
Emakumeen kontrako indarkeriaren aurkako nazioarteko eguna da gaur, azaroak 25. Galdakaon elkarretaratzea deitu du Momoakek udaletxeko plazan. Dozenaka lagun batu dira kontzentraziora.
Gabonetarako egitarau oparoa prestatu dute Arrigorriagan
Ekitaldiz beteta dator Zeberioko Abendu Kulturala!
Ugaobono 2023 kanpaina martxan da tokiko merkataritza sustatzeko helburuarekin
Pediatra lanaldi osoan egotea eskatu dute San Migelen ehundik gora herritarrek
Argazkiak / Izaskun Rekalde omendu dute Galdakaon, Euskararen Eguneko ekitaldi nagusian
Argazkiak / Zaintzak pribatizatzearen kontrako aldarrikapena eraman dute Ugaora grebalariek
Bideoak / Patio inklusiboa eta lorategia lotu dituzte Uribarri Institutuko ikasleek, ekologia ardatz
GEURIA Rikardo Arregi Kazetaritza Sarien ekitaldian izan da, Naiz, EITB eta Berria-rekin batera
