☉ Galdakao
12 agente aukeratu dituzte Galdakao-Usansolo ospitalean aparkaleku arazoak arintzeko
Gaur goizean lankidetza-hitzarmena sinatu du Galdakao-Usansolo ospitaleak eta Udalak ospitalean dauden aparkatzeko arazoei aurre egiteko.
Gaur goizean lankidetza-hitzarmena sinatu du Galdakao-Usansolo ospitaleak eta Udalak bertan dauden aparkatzeko arazoei aurre egiteko. Ospitalean eskainitako prentsaurrekoan Jon Guajardo Galdakao-Usansolo ospitaleko zuzendari-gerentea, Iñigo Hernando Galdakaoko alkatea eta Jose Luis Bernal enplegu zinegotzia egon dira.
Emaitza modura, mugikortasun jasangarriko 12 agente aukeratu dituzte beste urte batez ospitalera autoz doazen gidariei informatu eta laguntzeko, gerta daitezkeen aparkatzeko arazoak arintzeko. Langileek abuztutik abendura eskainiko diete laguntza gidariei eta aurreko urteetan egindako lana ikusita datorren urtean zerbitzua mantenduko duela iragarri dute Galdakaoko Udaleko ordezkariek.
Ospitaleko atzeko aldea, autoz beteta // Geuria
Gaur egun 300.000 pertsonei estaldura ematen die Galdakao-Usansolo ospitaleak eta bertan doako 1.000 auto aparkaleku baino gehiago eskaintzen ditu zentroak. “Aparkalekuarekin arazo argia eta kronikoa daukagu bertan”, izan dira Jon Guajardo Galdakao-Usansolo ospitaleko zuzendari-gerenteak. “Hitzarmen hau positiboa da guztiontzat eta hilabete batzuetan bada ere oso lagungarria izango da guretzat”.
Jose Luís Bernal, Jon Guajardo eta Iñigo Hernando, Galdakao-Usansolo ospitaleko aparkalekuan // Geuria
Datozen urteei begira konpondu nahi duten arazoa dugu honako hau: “Gaur egun autoak aparkatzeko doako leku asko badaude ere, arazo honi irtenbidea ematea benetan zaila da, langile eta paziente ugari daudelako bertan”, gehitu du zuzendariak. Gaur egungo garraiobideei esker pertsonen trafiko hori “arintzen” dela azpimarratu du Guajardok, “baina arazoak hor dihardu eta askotan ez da sanitario kopuruaren kontua, ospitalera etortzeak dakarren guztia baizik”.
Etorkizunean irtenbide irmoa bilatzen duten bitartean, Guajardok azaldu du “benetan eskertzekoak” direla Udalak denbora tarte mugatuan ospitaleari eskainitako epe laburreko “partxe” hauek.
Denontzat onuragarria
“Ez da hitzarmen hau sinatzen dugun lehen aldia”, izan dira Iñigo Hernando Galdakaoko alkatearen berbak. “Mugikortasun jasangarriko 12 agente kontratatu ditugu lan hauek egiteko eta gure ustez hitzarmen hauek benetan onuragarriak dira denontzat”
Pertsona bat, ospitalean aparkatuta dauden autoei begira // Geuria
Agenteak aukeratu badituzte, momentu honetan formazio-saioak jasotzen ari dira eta zerbitzua abuztuan jarriko dute martxan, sei hilabeterako. “Erabiltzaileek behin baino gehiagotan esan digute agenteen lana eskertzekoa dela eta betierekoa izan beharko litzatekeela”, aitortu du ospitaleko zuzendari-gerenteak.
“Benetan beharrezko zerbitzua dugu honako hau herritarrentzat”, gehitu du Jose Luís Bernal Galdakaoko enplegu arloko zinegotziak. “Egoera batzuetan benetan kaosa da ospitalean aparkatzea eta agente hauek urteko egun guztietan izatea benetan gustatuko litzaiguke, baina jasotzen ditugun diru-laguntzei mugatu behar gara“.
Enplegu arloko zinegotziaren arabera, Galdakaoko gobernu-taldea lehena izan zen Europako Next Generation 2020 diru-laguntzak eskatzen: “Bertan eskaintzen diren diru-laguntza guztien artean behar hauetarakoak aukeratu genituen”, aitortu du Bernalek.
Datorren urteari begira, agente hauen zerbitzuak bere horretan jarraituko duela ziurtatu dute udal ordezkariek: “Gobernu taldearen ekimen honen bidez aparkalekuen arazoa arinduko dugu alde batetik eta langileak beharrezkoak direla ikus dezakete bestetik”.
☉ Galdakao
Fernando Izagirrek ukatu egin du epaiketan DYAren dirua desbideratu izana
DYAko presidente izan zen garaian (2016-2021) ustez egindako irregulartasunengatik epailearen aurrean deklaratu du Izagirrek. Epaiaren zain dago galdakoztarra
Fernando Izagirre Bizkaiko DYAko presidente ohiak ukatu egin du gobernuz kanpoko erakundearenak ziren 4,75 milioi euro bereganatu izana.
Bere asmo bakarra Kataluniako osasun-garraioaren sektorean DYAren jarduera indartzea zela adierazi du galdakoztarrak epaiketan.
Izaguirrek azaldu zuenez, ez daki “ezertxo ere” kontabilitateari buruz, eta DYAk biltzen zituen 5 milioiko funtsak langile bati eskualdatu zizkion.
Epaiketa azaroaren 4an eta 5ean izan da Bizkaiko Auzitegian. Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi DYAren egoera ekonomikoa islatu behar zuten dokumentuak faltsutzeagatik.
Izagirrez gain, Juan Diego Gallardo bere bazkidea ere epaituko dute. Gallardorentzat 4 urteko kartzela-zigorra eskatu du Fiskaltzak.
Kekukoek, perituek eta akusatuek deklarazioa eman ostean, epaiaren zain daude.
☉ Galdakao
Galdakaoko Zuhatzu eta N-634 errepidea lotuko dituen zubi berria otsailean zabaltzea aurreikusi dute
Zuhatzu eta N-634 errepidea lotuko dituen zubia jartzeko lanak hasi dituzte Galdakaon. Muntaketa aste batean egingo dute eta ondoren urbanizazio lanak hasiko dituzte
Zuhatzu eta N-634 errepidea konektatuko dituen zubi berria instalatzeari ekin diote gaur, Galdakaon. Egituraren muntaketa aste batez luzatuko da eta gero urbanizazio lanak hasiko dituzte.
Aurreikuspenaren arabera zubi berria otsailean zabalduko dute. Pasabideak bi noranzkoetan izango ditu erreiak, baita alde bietan oinezkoentzako espaloi zabalak ere.
Azpiegitura berri honen eraikuntza Txomin Egileor kalearen berrantolaketarekin bat dator: “Horiek amaitzean, kaleak noranzko bakarreko zirkulazioa izango du. Beraz, zubi berriak Txomin Egileorren izaten diren trafiko pilaketak arinduko ditu eta mugikortasunaren fluxua hobetuko du, Zuhatzurantz eta handik Galdakao zein Bilborantz egiten diren ibilbideak erraztuz”, diote udal ordezkariek: “Zubia eremu horretako mugikortasuna hobetzeko funtsezko elementua izango da”.
Proiektu hau Txomin Egileor eta bere ingurunea berritzeko, lasaitzeko eta modernizatzeko prozesuaren barne dago, eta trafikoaren fluxua eta segurtasuna, eta oinezkoen mugikortasuna hobetzea ekarriko du.
☉ Galdakao
Fernando Izagirre DYAko presidente izandakoaren aurkako epaiketa bihar hasiko da
Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi dokumentuak faltsutzeagatik
DYAko presidente izan zen garaian (2016-2021) ustez egindako irregulartasunengatik ikerketapean egon da Fernando Izagirre galdakoztarra.
Ikerketa 2022an hasi zuten eta, hiru urte ostean, bihar hasiko da epaiketa.
Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi DYAren egoera ekonomikoa islatu behar zuten dokumentuak faltsutzeagatik.
Izagirrez gain, Juan Diego Gallardo bere bazkidea ere epaituko dute. Gallardorentzat 4 urteko kartzela-zigorra eskatu du Fiskaltzak.
Era berean, bi inputatuek DYAri 4,75 milioi euro baino gehiagoko kalte-ordaina ematea eskatu du Fiskaltzak. Eta akusatuen “bizibideak” eta “ondasunak” ikertzeko agindu dio Poliziari, etorkizunean gerta daitezkeen enbargoei begira, kondena bete behar badute.
Ikerketa 2022tik
DYAko zuzendaritza batzorde berriak salaketa jarri zuen 2022an, barne-auditoria batek alarmak piztu ondoren. Zehazki, “gauza arraro askorerekin” egin zuten topo auditorian, besteak beste, “diru txartelen erabilera okerra”.
Salaketa publiko egin eta Izagirrek Eusko Jaurlaritzako Larrialdietako zuzendari karguari eta Galdakaoko Udaleko EAJren bozeramailetzari uko egin zuen.
1986an hasi zen boluntario gisa Izagirre DYAn eta 2016an izendatu zuten presidente. 2021ean kargua utzi zuen Larrialdiei Aurre Egiteko eta Meteorologiako zuzendaritza hartu ondoren.
☉ Galdakao
Gizon bat espetxeratu dute Galdakaon bere lehengusina adingabeari sexu abusu jarraituak egiteagatik
Gizona, 50 urtekoa, Basauriko espetxean sartu dute. Sei urteko zigorra ezarri diote adingabeari sexu-abusu jarraitua egiteagatik 2016tik 2020ra bitartean
Gizon bat espetxeratu dute Galdakaon bere lehengusina adingabeari sexu abusu jarraituak egiteagatik.
El Correo egunkariak publikatu duenaren arabera, gizona, 50 urtekoa (G.Y.I.), Basauriko espetxean sartu zuten urriaren 17an. Bizkaiko Auzitegiak 2022an ezarri zion espetxe zigorra, baina kondenatuak epai bakoitza errekurrituz joan da azken instantziara iritsi arte, Auzitegi Gorenera, hain zuzen.
Sei urteko zigorra ezarri diote adingabeari sexu-abusu jarraitua egiteagatik 2016tik 2020ra bitartean, haurrak 8 eta 12 urte artean zituenean. Kondenatuak 42 urte zituen sexu abusuekin hasi zenean.
Gertaerak biktimaren amak aurkitutako gutun batzuen bitartez azaleratu ziren.
Lehen sententziak adierazten duenez, “musuak ahoan eman ohi zizkion eta ipurdia ukitzen zion”. Gainera, “zakila praken gainetik ukitzeko eskatzen zion eta bideo pornografikoak erakusten zizkion”.
Era berean, gizonaren mugikorrean haurren argazki sexualak aurkitu zituzten, eta adingabearen deklarazioaz gain, froga nagusietako bat izan zen adingabeari bideo bat grabatu ziola, zinta batean biluzik korrika, kamerak genitalak fokatzen zituela.
Epaiketan gizonak alegatu zuen bere jarduerek ez zutela “konnotazio sexualik”, eta “zaintzaile rola nahastu” zuela.
“Xanduli-manduli kirrikiki, eman goxokiak guri!”. Horrela ospatu dute Gau Beltza Galdakaon. Aurten elkarlanean antolatu dute arimen gaua Eguzkibegi Ikastolako eta Gandasegi eta Urreta ikastetxeetako gurasoek, Udalarekin lankidetzan. Ikusi hemen argazkiak!
Usansoloko ikasleek Galdakaoko Elexalde Institutura joateko autobus-zerbitzua “laster” izango dutela dio Jaurlaritzak
Fernando Izagirrek ukatu egin du epaiketan DYAren dirua desbideratu izana
‘Emakumeak eta industria musikala’ solasaldia antolatu dute gaur Marienean, MAZ Basauri jaialdiaren baitan
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
