→Galdakao

Sinadura-bilketa egin dute Galdakaoko Elexaldeko igerilekuan haurrek mahukak eta txalekoak erabiltzeko

galdakao elexalde igerilekuak

Galdakaoko hainbat herritarrek sinadura bilketa abiarazi dute change.org plataformaren bidez haurrek, heldu baten laguntzaz, Elexaldeko igerileku handian mahukak eta txalekoak erabili ahal izateko.

Elexaldeko igerilekuak // Utzitakoa

Galdakaoko hainbat herritarrek sinadura bilketa abiarazi dute change.org plataformaren bidez haurrek, heldu baten laguntzaz, Elexaldeko igerileku handian mahukak eta txalekoak erabili ahal izateko. Besoko flotagailuak eta txalekoak igerileku handian erabiltzearen debekua igerilekuaren araudian jasota dago eta horrek egonezina piztu du hainbat herritarrengan.

“Igeriketan tarteko etapa bat daukate haurrek eta bertan flotatzearen onuraz gozatzen dute haurrek, helduok igeri egitearen beldurra kentzen diegun heinean”, azaldu dute sareetan eskabidea gauzatu duten herritarrek. “Haur eta gurasoen arteko konfidantza hori ezin daiteke gauzatu uretan elkarren artean besarkatuta bagaude”.

Besoetako flotagailuek eta txalekoek haurrei “segurtasuna eta autonomia” ematen diete haurrei Haizea Castañiza auzotarraren arabera “eta aldiberean igeri egitea dibertigarria dela erakusten die umeei”.

Arazoa ez da berria: iaz kexa bat jarri zuten auzotar kaltetuek: “Egoera honen aurrean, galdakaoztarrok Urretako igerilekuetara joatea dugu irtenbide bakarra, bertan, logikoa denez, ez dagoelako horrelako murrizketarik eta iazko kexak eraginik ez zuela izan ikustean, sinadura-bilketa egitea erabaki dugu, araua aldatu ahal izateko”.

Guraso batzuk ere haurrak Basaurira eramaten dituzte igeri egitera, irtenbide modura. “Ulergarria da baloiak eta koltxonetak sartzearen debekua egotea, baina mangitoak edo jantzitako txalekoak ez erabiltzea debekatuta egoteak ez dauka ez hanka ez bururik”, azaldu du beste guraso batek.

Galdakaoko Udala jakinaren gainean dago eta udal ordezkariek azaldu dute irailean bertan hasiko direla egoera aztertzen: “Araudia 2005. urtekoa da eta kirol instalazioen teknikariekin berrikusi beharra dago gaur egungo beharretara egokitu ahal izateko”, iragarri dute. “Hala ere, prozesu hau burutu ahal izateko denbora beharko dugu”, gehitu dute.

Gora

Geuria Laguntzaileak Geuria Laguntzaileak