Sareak

☉ Galdakao

Haurrek mahukak eta txalekoak erabili ahal izango dituzte Galdakaoko Elexaldeko igerilekuan 2023an

Gaur egun ezin daitezke besoko flotagailuak eta txalekoak erabili Galdakaoko Elexaldeko igerileku handian eta horrek ezinegona sortu zuen duela urtebete erabiltzaile askoren artean. Euren arazoa sare sozialetan eta sinadura-bilketa baten ondorioz plazaratu ostean, Udalak herritarren kexak argitu eta Elexaldeko igerileku handian mahukak eta txalekoak erabili ahal izateko aldaketak iragarri ditu datorren udari begira.

|

Elexaldeko igerilekuak // Geuria

Gaur egun umeek ezin ditzakete besoko flotagailuak eta txalekoak erabili Galdakaoko Elexaldeko igerileku handian eta horrek ezinegona sortu zuen duela urtebete erabiltzaile askoren artean. Euren arazoa sare sozialetan eta sinadura-bilketa baten ondorioz plazaratu ostean, Udalak herritarren kexak argitu eta Elexaldeko igerileku handian mahukak eta txalekoak erabili ahal izateko aldaketak iragarri ditu datorren udari begira.

“Igeriketan tarteko etapa bat daukate haurrek eta bertan flotatzearen onuraz gozatzen dute haurrek, helduok igeri egitearen beldurra kentzen diegun heinean”, azaldu zuen sareetan Haizea Castañiza erabiltzaileak. Besoetako flotagailuek eta txalekoek haurrei “segurtasuna eta autonomia” ematen diete haurrei Castañizaren arabera “eta aldiberean igeri egitea dibertigarria dela erakusten die umeei”.

Kexak sareetan

Egoera hori aldatu ahal izateko, igerilekuko hainbat erabiltzaileek kexa helarazi zioten Galdakaoko Udaleko teknikariei baina kexa horiek “eraginik izan ez zutela” azaldu zuen Castañizak sare sozialen bidez. Horregatik, change.org plataformaren bitartez sinadura-bilketa abiarazi zuten udan zehar eta momentura arte 150 pertsona baino gehiagok sinatu dute eskakizuna.

Udalaren arabera, Elexaldeko araudia 2005ekoa da eta “teknikariekin osotasunean” aztertu beharrekoa da: “Gobernu taldeak arazoari irtenbidea ematea erabaki du eta horretarako araudian aldaketa egin beharko dugu”, azaldu du Ainhoa Valenciano González Galdakaoko kirol teknikariak. “Hala ere, aldaketa horiek datorren udan aplikatuko dira eta gaur egungo debekuak dagoen moduan jarraituko du aurtengo denboraldia amaitu arte”, gehitu du.

Araudiko puntu zehatz horrez gainera, Udal ordezkariek gogoratu dute “mahuka eta txalekoen kontuaz gainera araudi osoa aztertu” eta egin beharreko aldaketak eta tramitazioak gauzatu ahal izateko “denbora beharko dutela”.

Haizea Castañizak, bere partetik, sare sozialen bidez laguntza eman duten auzotarren laguntza eskertu du.

 

☉ Galdakao

Zabaleako jaiak antolatu dituzte lehen aldiz: maiatzaren 25ean izango dira

|

Besteak beste paella txapelketa izango da Zabaleako jaien lehen edizioan // Artxiboa, Geuria

Lehen aldiz Zabaleako jaiak antolatuko dituzte Galdakaon. Eratu berri den Zabalea Elkarteak antolatuko ditu jaiak maiatzaren 25ean.

Besteak beste, paella txapelketa, haurrentzako ekintzak, mus eta igel txapelketak, barbakoa eta dantzaldia izango dira.

Egitaraua / Zabaleako jaiak 2024

Maiatzak 25, larunbata
10:00 Txupinazoa
10:30-14:00 Paella txapelketa
11:30 Zuberoako Maskarada elizako plazan
11:30 Haur jolasak
12:30 Kalejira
17:00 Mus txapelketa
19:00 Igel txapelketa
20:00 Barbakoa
22:00 Dantzaldia

Osorik irakurri

☉ Galdakao

Galdakaoko institutuek 567 euro lortu dituzte bigarren eskuko merkatu solidarioan

|

GBGE elkarteari emango diote lortutako dirua // Geuria

Bigarren eskuko merkatu solidarioa antolatu zuten maiatzaren 17an, ostiralez, Galdakaoko Andra Mari Lanbide Heziketako, Bengoetxeko, Elexaldeko eta Eguzkibegiko ikasleek.

Bertan izan ginen eta Aitor Salazar, Miren Muñoz eta Elizabeth Fernandez Bengoetxe Institutuko Ekodelegatuekin berba egin genuen.

Ikasleek GEURIAri adierazi diotenez, 567 euro lortu zituzten merkatu solidarioan. Bilduko duten dirua GBGE elkarteari emango diote.

“Guretzat emaitza oso ona da”, adierazi diote GEURIAri ikasleek.

Osorik irakurri

☉ Galdakao

Zuberoako Maskarada ekarriko du Galdakaora Andra Marik 33 urteren ostean

|

Pagolako gazteek aurten antzeztutako Maskaradak // Argazkiak: Maite Irizar, Amaiur Aristi (dantzan.eus)

Andra Mari Dantza Taldeak Zuberoako Maskarada ekarriko du Galdakaora, azkenekoz 33 urte izan ostean. Maiatzaren 25ean, larunbatez, izango da eta Pagolatik (Zuberoa) etorriko dira dantzariak eta barrikadak eta ofizioak antzeztuko dituzte.

Maskarada 11:30ean hasiko da Andra Mari elizatik, Ardanza parkean, eta Iturrondotik eta Santi Brouard plazatik ere igaroko dira. Arratsaldean Santi Brouard plazan izango da ekitaldia 17:00etan, eta euria bada, frontoira lekualdatuko dute.

“Duela 33 urte izan genuen azken aldiz Zuberoako Maskarada Galdakaon, Altzairen eskutik. Eta orain, 33 urteren ostean berriro ere Zuberoako Maskarada dakargu gure herrira, aurten Pagolaren eskutik”, diote Andra Mari Dantza Taldetik.

Egitaraua / Zuberoako Maskarada

Maiatzak 25, larunbata

Barrikadak
11:30 Andra Mari eliza (Ardanza parkea)
12:30 Iturrondo plaza
13:30 Santi Brouard plaza

Ofizioak
17:00 Santi Brouard plaza. Euria bada, frontoian

Osorik irakurri

☉ Galdakao

Varsoviako irakasleek Galdakaoko Elexalde Institutuko metodologia ezagutu dute

|

Varsoviako Szkola Podstawowa institutuko bi irakasle izan dira Elexaldeko metodologia aztertzen // Elexalde BHI

Galdakaoko Elexalde Institutua Erasmus+ proiektuan murgilduta dago. Ikasturte honetan ‘Create and Experience a Better Europe’ proiektuan ari dira parte hartzen Galdakaoko ikasleak, Varsoviako (Polonia), Berlingo (Alemania) eta Casertako (Italia) ikasleekin.

Iazko azaroaren 24tik abenduaren 2ra bitartean Elexaldeko Institutuak harrera egin zien Varsoviako zazpi ikasleri, Berlingo seiri eta Casertako hamaika ikasleri, eta eurekin etorritako zazpi irakasleri. Eta aurtengo martxoan Galdakaoko hamabi ikaslek eta bi irakaslek Caserta (Italia) bisitatu zuten.

Maiatzean, gainera, hilaren 15etik 17ra, Varsoviako Szkola Podstawowa institutuko bi irakaslek Job Shadowing bat egiteko aukera izan dute Elexalde Institutuan: “Job Shadowing-a beste irakasle batzuek emandako eskolak zuzenean behatzean datza, beste herrialde batzuetako hezkuntza nolakoa den, zein metodologia erabiltzen duten eta ikasleek nola ikasten duten lehen pertsonan ezagutzeko. Horri guztiari esker, zer aldatu edo hobetu daitekeen hausnartu eta ondorioak atera daitezke, job shadowing-ean parte hartzen duten ikastetxeekin esperientziak eta baliabideak trukatzeaz gain”, azaldu dute Elexalde Institutuko Erasmus+ programako arduradunek.

“Gure ikastetxetik, joan den ikasturtean, bi irakasle Poloniara joan ziren Szkola Podstawowa eskolara (Varsovia), Poloniako sistemak nola funtzionatzen duen jakiteko eta sistema horren kalitatea hobetzeko gure IES Elexalde ikastetxean aplikatu ahal izateko”, diote.

Poloniako eta Euskal Herriko hezkuntza sistemei buruz hausnartu dutela diote Elexalde Institutuko arduradunek: “Era berean, Elexalde BHIk egiten dituen proposamenak erakutsi dizkiegu. DBHko hainbat taldetan ikusi dute, halaber, proiektuen metodologia gaztelania eta ingelesa dela. Halaber, Ahozkotasuna irakasgaian eztabaiden bidez eta modu ludikoan hitz egindako ingelesa nola lantzen den ikusi ahal izan dute”.

“Job Shadowing-a oso aberasgarria izan da eta etorkizunean elkarlanean jarraitu nahi dugu”, diote.

Osorik irakurri

☉ Galdakao

Bideoa / Bigarren eskuko merkatu solidarioa antolatu dute Galdakaoko institutuek

|

Bigarren eskuko merkatu solidarioa antolatu zuten ostiralean Galdakaoko Andra Mari Lanbide Heziketako, Bengoetxeko, Elexaldeko eta Eguzkibegiko ikasleek. Bilduko duten dirua GBGE elkarteari emango diote.

Aitor Salazar, Miren Muñoz eta Elizabeth Fernandez Bengoetxe Institutuko Ekodelegatuekin berba egin genuen.

Osorik irakurri