☉ Galdakao
Lituaniako hezkuntza sistema bertatik bertara ezagutu dute Galdakaoko Elexalde Institutuko irakasleek
Marta Gaitero Ingeleseko irakasleak eta Naia Gastelu 2030 Agendako arduradunak Lituaniako Prezidento Adamkaus Gimnazija ikastetxean astebeteko job shadowing egonaldia egin dute
Eramus+ programaren barruan, Galdakaoko Elexalde Institutuko Marta Gaitero eta Naia Gastelu irakasleek astebeteko job shadowing egonaldia egin dute Lituaniako Prezidento Adamkaus Gimnazija ikastetxean.
Zehazki, Lituaniako hezkuntza sistema bertatik bertara ezagutu dute: “Tradizioa, irakaskuntza-praktika berritzaileak eta ingurumen-balioekiko konpromiso sendoa uztartzen dituen hezkuntza-sisteman murgiltzeko aukera izan dugu”, diote.
Hainbat hezkuntza-etapatan saioak behatu zituzten, nazioarteko ekitaldietan parte hartu zuten eta bisita kulturalak egin zituzten, “hezkuntzarekiko ikuspegi berezi bat ezagutuz”.
“Lehen unetik nabarmentzen da ikastetxearen egitura sendoa eta arauekiko errespetua. Eraikinerako sarbidea txartel magnetikoekin egiten da, eta ikasleek, txikitatik, euren materiala, bazkariak eta jantokiko errutinak modu autonomoan kudeatzen dituzte. Bigarren hezkuntzan, irakasgai bakoitzak bere gela du, eta ikasleak dira gelaz gela mugitzen direnak. Antolaketa honek kontzentrazioa eta eraginkortasuna sustatzen ditu, irakasleen etengabeko zaintzarik gabe”, azaldu dute irakasleek Lituaniako egonaldia bizi ostean.
Egituratutako irakaskuntza, metodologia anitzekin
Irakasleen gidaritza duten saioak ikusi zituzten, “nahiz eta ikasleen parte-hartze aktiboa eta zentzuzko jarduerak ere ikus zitezkeen”, diote.
Prezidento Adamkaus Gimnazija ikastetxeko ikasgela bat // Elexalde BHI
“Lehen Hezkuntzan, Matematikako ikasgai batean perimetroaren kalkulua eskolako Eco-Feria proiektuarekin lotu zen. Irakaslea hurbila zen eta Classroom Screen bezalako baliabide digitalak erabili zituen saioa gidatzeko”, azaldu dute.
Bigarren hezkuntzan, Elexaldeko irakasleek ingeleseko ikasgai batean parte hartu zuten, “komunikazioa, pentsamendu kritikoa eta kontzientzia globala lantzeko diseinatua, Kenyako kultura ardatz hartuta”, diote, eta gaineratu dute: “Bideoak, jolasak eta abestiak erabiliz, ikasleek errespetua eta jakin-mina garatu zuten bestelako errealitateekiko, Garapen Jasangarriko Helburuekin (GJH) bat eginez”.
Zientzietako ikasgai batean ere parte hartu zuten, formatu tradizionalagoarekin: “Azalpen teorikoak liburu digitalen bidez, eta ondoren banakako lana”, diote.
“Elikagaien Teknologia bezalako irakasgaietan, teoria eta praktika uztartzen ziren jasangarritasunaren eta ekonomia zirkularraren printzipioen bidez. Ikasleek, esaterako, hondakin organikoekin egindako landare-lorontzi berrerabilgarriak sortzen zituzten”, diote.
Jasangarritasuna eta berrikuntza
‘ECO Ideas for Lithuania 2025’ nazioarteko ekitaldia ere ezagutu zuten Elexaldeko irakasleek: “Ikasleek, irakasleek eta atzerriko gonbidatuek ingurumenaren inguruko gaiak eztabaidatu zituzten eta Eco-Feria batean parte hartu zuten, ikasleek eurek diseinatu eta ekoitzitako produktuak saldu zituzten”, diote.
Prezidento Adamkaus Gimnazija ikastetxeko Lehen Hezkuntzako eta Bigarren Hezkuntzako ikasleak // Elexalde BHI
“Ekitaldi hau urteko proiektu diziplinarteko baten amaiera izan zen eta jasangarritasuna curriculum osoan nola txertatuta dagoen erakutsi zuen”, diote.
Beste alde batetik, job shadowing egonaldiari esker Vilnius eta Trakaiko bisitak egin zituzten Elexaldeko irakasleek: “Bertan, ikasleek aire libreko orientazio-jardueretan parte hartu zuten, talde-lana eta kultura arteko komunikazioa sustatzeko helburuarekin. Nazioarteko proiektuen trukerako foro bat ere antolatu zen, eta horrek aukera eman zuen beste ikastetxe europar batzuekin (Portugal, Tenerife, Erroma eta Lituaniako musika eskola bat) harremanak ezartzeko, etorkizuneko lankidetzarako ateak zabalduz”, diote.
“Esperientzia honek ikusiarazi digu Lituaniako hezkuntza-eredua ikasleen autonomia eta erantzukizunean oinarritzen dela, egituratutako irakaskuntzan eta jasangarritasunarekiko konpromiso argian. Nahiz eta metodologia batzuk tradizionalak izan, ikaskuntza esanguratsuan eta ikasleak herritar aktibo, kritiko eta ingurunearekiko konprometitu gisa prestatzeko ahalegina nabarmena da”, ondorioztatu dute Elexalde Institutuko irakasleek.
☉ Galdakao
Galdakaoko Adiskide Pilota Elkarteak 50 urteko ibilbidea ospatuko du jai giroan igandean
Adiskidek 1975ean ekin zion ibilbideari, bost lagunen ekimenez, eta gaur egun 60 pilotari inguruk osatzen dute taldea. Urte hauetan zehar, Urrutikoetxea, Elezkano edo Larunbe bezalako pilotariak igaro dira bertatik
Adiskide Pilota Elkarteak 50. urteurrena bete du aurten, eta ospakizun berezia antolatu du domekan, azaroaren 10ean, Kurtzeko frontoian, 10:30etik aurrera. Aurretik, gaur arratsaldean, 50.urteurreneko txapelketako finalak jokatuko dituzte: 19:00etan emakumeak arituko dira: Aldai-Gaminde Ibarrola-Capellanen aurka, eta ordubete geroago gizonezkoak: Victor-Urbisu alde batetik, Carregal-Merino II bestetik.
Igandeko ospakizunari dagokionez, belaunaldien arteko partidek emango dio hasiera egunari, eta ondoren bazkari herrikoia egingo dute.
Ez dira hauek, ordea, urteurrenaren harira egin dituzten ekitaldi bakarrak: argazki-erakusketa ere jarri zuten martxan Torrezabal Kultur Etxean, Adiskideren 50 urteko ibilbideko une eta oroitzapen garrantzitsuenak jasotzen dituena. Erakusketa gaur arte egongo da ikusgai.
Elkarteko presidente Gaizka Uriarte Zearrak GEURIAri emandako elkarrizketan aipatu bezala, taldeak betidanik argi izan ditu bere oinarriak: “euskara, auzolana eta esku pilota”.
Adiskidek 1975ean ekin zion ibilbideari, bost lagunen ekimenez, eta gaur egun 60 pilotari inguruk osatzen dute taldea. Urte hauetan zehar, Urrutikoetxea, Elezkano edo Larunbe bezalako pilotariak igaro dira bertatik.
Egun handia izango dute domekan, Adiskideko kideentzat ez ezik, euskal pilotazale eta galdakoztar guztientzat ere.
☉ Galdakao
Auzolana eta musika oinarri, Galdakaoko Elkarlaguntza Sareak jaialdia antolatu du Basauriko Txarraska Gaztetxean
Aurkezpenaren aurretik eta ondoren fj Muff, Tarisko, Vulcanizafas eta Marlon Random arduratuko dira musikaz eta festa girotzeaz
Galdakaoko Elkarlaguntza Sareak (GES) jaialdi berezia antolatu du gaur, azaroaren 7an, ostirala, Basauriko Txarraska gaztetxean, 17:00etatik aurrera. Ekimena sarearen filosofia jarraituz antolatu dute, auzolanean eta autogestioan oinarrituta.
Jaialdian Burgoseko Escuela de Pueblos kolektiboa izango da gonbidatu berezi gisa, euren proiektua aurkezteko. Talde honek ere elkarlaguntzan eta komunitatearen indarrean oinarritutako jarduera sozialak garatzen ditu, eta horregatik gonbidatu dute Galdakaoko Elkarlaguntza Sareko kideek.
Aurkezpenaren aurretik eta ondoren fj Muff, Tarisko, Vulcanizafas eta Marlon Random arduratuko dira musikaz eta festa girotzeaz.
Jaialdian bildutako diru guztia Galdakaoko Elkarlaguntza Sarea (GES) finantzatzeko erabiliko da, kolektiboak egiten duen elkartasun-lana bideragarri egiteko asmoz.
☉ Galdakao
Fernando Izagirrek ukatu egin du epaiketan DYAren dirua desbideratu izana
DYAko presidente izan zen garaian (2016-2021) ustez egindako irregulartasunengatik epailearen aurrean deklaratu du Izagirrek. Epaiaren zain dago galdakoztarra
Fernando Izagirre Bizkaiko DYAko presidente ohiak ukatu egin du gobernuz kanpoko erakundearenak ziren 4,75 milioi euro bereganatu izana.
Bere asmo bakarra Kataluniako osasun-garraioaren sektorean DYAren jarduera indartzea zela adierazi du galdakoztarrak epaiketan.
Izaguirrek azaldu zuenez, ez daki “ezertxo ere” kontabilitateari buruz, eta DYAk biltzen zituen 5 milioiko funtsak langile bati eskualdatu zizkion.
Epaiketa azaroaren 4an eta 5ean izan da Bizkaiko Auzitegian. Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi DYAren egoera ekonomikoa islatu behar zuten dokumentuak faltsutzeagatik.
Izagirrez gain, Juan Diego Gallardo bere bazkidea ere epaituko dute. Gallardorentzat 4 urteko kartzela-zigorra eskatu du Fiskaltzak.
Kekukoek, perituek eta akusatuek deklarazioa eman ostean, epaiaren zain daude.
☉ Galdakao
Galdakaoko Zuhatzu eta N-634 errepidea lotuko dituen zubi berria otsailean zabaltzea aurreikusi dute
Zuhatzu eta N-634 errepidea lotuko dituen zubia jartzeko lanak hasi dituzte Galdakaon. Muntaketa aste batean egingo dute eta ondoren urbanizazio lanak hasiko dituzte
Zuhatzu eta N-634 errepidea konektatuko dituen zubi berria instalatzeari ekin diote gaur, Galdakaon. Egituraren muntaketa aste batez luzatuko da eta gero urbanizazio lanak hasiko dituzte.
Aurreikuspenaren arabera zubi berria otsailean zabalduko dute. Pasabideak bi noranzkoetan izango ditu erreiak, baita alde bietan oinezkoentzako espaloi zabalak ere.
Azpiegitura berri honen eraikuntza Txomin Egileor kalearen berrantolaketarekin bat dator: “Horiek amaitzean, kaleak noranzko bakarreko zirkulazioa izango du. Beraz, zubi berriak Txomin Egileorren izaten diren trafiko pilaketak arinduko ditu eta mugikortasunaren fluxua hobetuko du, Zuhatzurantz eta handik Galdakao zein Bilborantz egiten diren ibilbideak erraztuz”, diote udal ordezkariek: “Zubia eremu horretako mugikortasuna hobetzeko funtsezko elementua izango da”.
Proiektu hau Txomin Egileor eta bere ingurunea berritzeko, lasaitzeko eta modernizatzeko prozesuaren barne dago, eta trafikoaren fluxua eta segurtasuna, eta oinezkoen mugikortasuna hobetzea ekarriko du.
☉ Galdakao
Fernando Izagirre DYAko presidente izandakoaren aurkako epaiketa bihar hasiko da
Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi dokumentuak faltsutzeagatik
DYAko presidente izan zen garaian (2016-2021) ustez egindako irregulartasunengatik ikerketapean egon da Fernando Izagirre galdakoztarra.
Ikerketa 2022an hasi zuten eta, hiru urte ostean, bihar hasiko da epaiketa.
Fiskaltzak zazpi urteko kartzela-zigorra eskatu du Izagirrerentzat: 4 urte eta erdi administrazio desleialeko delitu jarraituengatik eta 2 urte eta erdi DYAren egoera ekonomikoa islatu behar zuten dokumentuak faltsutzeagatik.
Izagirrez gain, Juan Diego Gallardo bere bazkidea ere epaituko dute. Gallardorentzat 4 urteko kartzela-zigorra eskatu du Fiskaltzak.
Era berean, bi inputatuek DYAri 4,75 milioi euro baino gehiagoko kalte-ordaina ematea eskatu du Fiskaltzak. Eta akusatuen “bizibideak” eta “ondasunak” ikertzeko agindu dio Poliziari, etorkizunean gerta daitezkeen enbargoei begira, kondena bete behar badute.
Ikerketa 2022tik
DYAko zuzendaritza batzorde berriak salaketa jarri zuen 2022an, barne-auditoria batek alarmak piztu ondoren. Zehazki, “gauza arraro askorerekin” egin zuten topo auditorian, besteak beste, “diru txartelen erabilera okerra”.
Salaketa publiko egin eta Izagirrek Eusko Jaurlaritzako Larrialdietako zuzendari karguari eta Galdakaoko Udaleko EAJren bozeramailetzari uko egin zuen.
1986an hasi zen boluntario gisa Izagirre DYAn eta 2016an izendatu zuten presidente. 2021ean kargua utzi zuen Larrialdiei Aurre Egiteko eta Meteorologiako zuzendaritza hartu ondoren.
Argazkiak / Enriqueta Hortalak badu bere kalea eta herritarren merezitako omenaldia Arrigorriagan
El Kangri: «Egiten dudan Rap-ak nire bizitza du oinarri, inor kaltetzeko asmorik gabe»
Galdakaoko Adiskide Pilota Elkarteak 50 urteko ibilbidea ospatuko du jai giroan igandean
Argazkiak | Mozorroak jantzi eta kalera irten dira zeberioztarrak Gau Beltzan
Argazkiak | Antzerkia, tailerrak eta edabe magikoa prestatu dituzte Galdakaon Gau Beltza ospatzeko
