☉ Galdakao
Bideoa / Emakumeen Etxea eraikitzeko prozesua hasi dute Galdakaon
Emakumeen Etxea eraiki nahi dute Galdakaon. Oraindik ez dakite non eraikiko den etxea, baina oinarriak zehazteko prozesu parte hartzailea abiarazi dute.
Emakumeen Etxea eraiki nahi dute Galdakaon. Oraindik ez dakite non eraikiko den etxea, baina dagoeneko hasi dira proiektua ehuntzen. Hain zuzen ere, Galdakaoko Emakumeen Etxea izango denaren oinarriak zehazteko prozesu parte hartzailea abiarazi dute. “Proiektua behar bezala gauzatu dadin, ezer baino lehen oinarriak landu behar dira. Lehenengo edukia eta gero jantzia, etxea”, dio Iñigo Hernando alkateak. Zentzu horretan, prozesuko protagonistak emakumeak izango direla adierazi du Hernandok, eta horretarako herriko emakume guztiek parte hartzeko deia luzatu dute udal ordezkariek: “Emakumeak izango dira protagonista, hasieratik amaierara. Eragile feministak, kolektibo ezberdinetako emakumeak, alderdi politikoetako emakumeak edota norbanakoak deitzen ditugu Galdakaoko Emakumeen Etxea izango denaren oinarriak zehazteko prozesuan parte hartzera”, dio Nerea Orozko Berdintasun arloko zinegotziak.
Mota, jatorri eta izaera guztietako emakumeentzat “hurbileko eta konfiantzazko” gunea eraikitzea helburu izanik, talde eragilean parte hartzeko gonbita egin die alderdi zein elkarte guztietako emakumeei, zein bertan parte hartu nahi duten emakume guztiei: “Elkarlanean Emakumeen Etxea izango dena diseinatu nahi dugu”, dio Orozkok. “Galdakaoko emakumeen behar, nahi eta desioak kontutan hartuko dituen etxea eraikitzeko eraikuntza kolektiboa egin behar da”, dio Irati Garai parte hartze prozesua gidatuko duen Farapi elkarteko kideak: “Gerora etxean egongo diren emakumeak saretzen hasteko eta ezagutzeko ikasketa prozesua elkarrekin eraiki behar dugu. Hau da, talde kohesioa sustatu behar dugu”.
Berdintasun Kontseilua izango da hasiera batean hausnarketa horren abiatuntu, baina taldea zabaldu beharra dagoela adierazi dute. Gauzak horrela, talde eragileko parte izan nahi dutenek berdintasuna@galdakao.eus helbide elektronikora idatzi behar dute. “Hala ere, talde eragilean zuzenean parte hartu ezin edo nahi ez dutenentzat ere zabalik egongo da parte-hartze prozesua online”, dio Garaik. Udal webgunean ‘Galdakaoko Emakumeen Etxearen sorrerarako partaidetza prozesua’ izeneko bannerra jarriko dute.
Parte-hartze prozesua iraila edo urrira arte luzatuko dela adierazi dute udal ordezkariek: “Pandemia egoera honek guztiz baldintzatzen gaitu. Egoera zaila da, eta ez dakigu zehazki noiz arte luzatuko den prozesu parte hartzailea, baina aurreikusten dugu iraila-urrira arte luzatu daitekeela”. Prozesuan zehar mahai inguruak antolatzeko asmoa ere agertu du udal gobernu taldeak: “Mahai inguruak antolatzeko asmoa daukagu, eta Euskal Herriko beste Emakumeen Etxeetako jendea elkartzea nahiko genuke, baina noski, egoera honek zaildu egiten du hori antolatzea”, dio Orozkok. Hego Uribe eskualdean Basaurin Marienea Emakumeen Etxea dago eta horren ibilbidea gertutik jarraitu dutela dio Orozkok: “Eurekin elkartu izan gara, eta prest agertu dira euren esperientzia galdakoztarrokin partekatzeko”.
“Tresna oso garrantzitsua izango da Galdakaoko Emakumeen Etxea. Ez da toki bat bakarrik izango: egitasmo globala da”, dio Orozkok: “Hausnarketaren bidez emakumeak ahalduntzea bilatzen da, eta ahalduntze horren bidez aldaketarako tresna izatea. Hortaz, ardatz bakartzat feminismoa hartuta, alde guztietako indarrak batu eta sinergiak landu behar dira”.
Emakumeen Etxea Galdakaon eraikitzea “aldarrikapen historikoa” dela gogorarazi du Iñigo Hernando alkateak. “Emakumeen Etxea eraikiko dugu Galdakaon. Udal gobernu talde honen apostu irmoa da politika feministak aurrera eramatea”, dio Hernandok: “Gizarteak eraldaketa bat eskatzen du eta argi daukagu nahitaez feminismotik eraldatu behar dugula”.
☉ Galdakao
Julen Gabiria galdakoztarrak euskaratu duen ‘Elkanoren herriari bueltaka’ liburua aurkeztuko dute Durangoko Azokan
Julen Gabiria idazle eta itzultzaile galdakoztarrak ‘Elkanoren herriari bueltaka’ liburua euskaratu du aurten, eta Durangoko Azokan salgai egongo da abenduaren 5etik 8ra bitartean.
Ander Izagirre idazle donostiarrak argitararatu zuen gazteleraz liburua 2022an, eta bi urte ondoren, euskarazko bertsioa aurkeztuko dute euskal liburuen eta diskoen azoka handian.
Bai Gabiriak bai Izagirrek liburuaren aurkezpena egingo dute abenduaren 8an, igandez, Ahotsenea-Literatura gunean, 16:30etik 17:00etara bitartean.
☉ Galdakao
Iskander Sagarminaga eta Eider Eibar Durangoko Azokan izango dira ‘Margo Pitarak’ proiektua aurkezten
Iskander Sagarminaga eta Eider Eibar Durangoko Azokan izango dira ‘Margo Pitarak’ proiektua aurkezten. Abenduaren 6an, ostiralez, izango da 17:30etik 17:50era Landakoguneako Kabi@n.
Proiektu transmedia da eta igerilari galdakoztarrak eta Eider Eibar ilustratzaileak 7 itsasoen erronkak igerian eta marraztuz euskaraz sorturiko eduki digitalak biltzen ditu: eskulanak, euskarazko sticker animatuak, mapa interaktiboak, bideoak edota animazioak.
Beste alde batetik, Galdakaon bizi den Eider Eibarrek ‘Kokoak’ liburua argitaratu du aurten, eta Durangoko Azokan ere aurkezpena egingo du. Abenduaren 5ean, ostegunez, izango da 16:30etik 17:00etara Saguganbara gunean.
‘Kokoak’ liburua 3 urtetik gorako umeentzat dago zuzenduta eta Kokoen unibertsoa ezagutaraztea du helburu: “Koko Mako, Maki Moko, Kako Mako eta Koko Miko hitz-joko magikoa abestu eta Kokoak azaldu dira, izaki fantastiko txikiak, gure sorkuntza artistikoko lanetan laguntzen digutenak marrazkietan zulotxoak egin eta bertara sartuz”, dio sinopsiak.
Abenduak 3 ditu gaur: Euskararen Nazioarteko Eguna. Galdakaon goizean Mintzodromoa egin dute Iturrondoko karpan (hemen argazkiak!) eta jarduera aprobetxatuta Maria, June, Naroa, Aitor eta Rebeca galdakoztar saltseroak GEURIAko mikroaren aurrean jarri ditugu!
Zein da eurentzat euskal abestirik onena? Eta liburu bat aukeratu beharko balute? Zein da euskarak duen hitzik politena? Euren erantzunak jaso ditugu!
Euskararen Nazioarteko Eguna da gaur. Galdakaon Mintzodromoa egin dute Iturrondo plazako karpan eta guztira 120 lagun batu dira: Bengoetxe eta Eguzkibegi ikastetxeetako eta euskaltegietako ikasleak eta irakasleak, herriko eragileetako ordezkariak eta norbanakoak elkartu dira eta euskara ahoan izan dute ordu t’erdiz. Hiru gai izan dituzte hizpide: ‘Urak har ditzakeen eremuetan eraikitzea’, ‘Zeregin gehiegi, baina denbora gutxi’ eta ‘Ikasgai berria proposatzea’.
☉ Galdakao
Jon Eguskiza eta Kepa Otaegi galdakoztarrek ‘Momotxorroak’ dokumentala aurkeztuko dute Durangon
‘Momotxorroak: Kaos baten istorioa’ dokumentala abenduaren 5ean aurkeztuko dute Irudienean. Bertan izango dira Andra Mari Dantza Taldeko ordezkariak
Galdakaoko Andra Mari Eusko Dantzari Taldeak ‘Momotxorroak: Kaos baten istorioa’ dokumentala egin du Jon Eguskiza eta Kepa Otaegi taldekideek zuzenduta.
Dokumentalak Altsasuko (Nafarroa) inauteri tradizionalak berreskuratzeko eta biziberritzeko prozesua jasotzen du: “Antzinate handiko jaia izan zen, eta ahaztuta geratu zen, harik eta Ricardo Aldasorok, herriko nagusienetako batek, momotxorro mitikoak (ospakizun horren elementu nagusia) gogora ekarri zituen arte. Hain zuzen ere, oroitzapen horrek bultzatu zuen Altsasuko inauterien berpiztea, ‘Momotxorroak: Kaos baten istorioa’ dokumentalak jasotzen duen prozesua”, diote.
Andra Mari Eusko Dantzari Taldeak inauteri horiei buruzko ikerketa eta berreskuratze lanari ekin zion, Juan Antonio Urbeltz folkloristak bultzatuta, azken horrek Jose Maria Satrustegiren ‘Neguko solstizioa’ lanean oinarrituta.
“Urteetan ikertu ondoren, 1978an Andra Mari dantza taldeak lehen aldiz plazaratu zuen inauteria Altsasun, interes handia piztuz eta Altsasuko komunitatea mugiaraziz, bereziki belaunaldi berriak, non, jai hau biziberritzeko erronka hartu baitzuten. 1982an, inauteriak gogo biziz ospatu ziren berriro Altsasun, eta, ordutik, tradizio horri eutsi dio urtez urte, 2012an Nafarroako Gobernuaren interes turistikoko festa gisa aitortuta”, diote.
Galdakao-Altsasu konexioa
Ikus-entzunezkoaren helburu nagusia da Andra Mari Eusko Dantzari Taldearen lana eta tokiko komunitateak ospakizun hori berpizteko hartu zuen konpromisoa erakustea, XX. mende hasieran azken aldiz antzeztu zenetik, 70eko hamarkadan berpiztu zen arte.
“Dokumentalaren helburu nagusia da belaunaldi berriei euskal kulturaren balioa eta esanahia helaraztea, inauteri horien berreskurapenean parte hartu zutenen testigantza zuzenen bidez”, diote.
Euskal folklorearen arloko pertsona aipagarrienen esperientziak eta testigantzak jaso dituzte dokumentalean. Besteak beste, Mikel Zamalloa, Manu Jauregi eta Koldo Telleria Andra Mariko kideek; Patxi Goikoetxea, Amaia Oiarbide, Enrique Zelaia eta Satur Leoz Altsasuko kultur eragileek; eta Juan Antonio Urbeltz Euskal Herriko folklore maisua zein kultur eragileak hartu dute parte dokumentalean.
Era berean, ikus-entzunezkoak Galdakao eta Altsasuren arteko lankidetza-harremanei balioa eman diela adierazi dute Andra Mari Dantza Taldeko ordezkariek.
Durangoko Azokan
‘Momotxorroak: Kaos baten istorioa’ dokumentala Durangoko Azokan aurkeztuko du Andra Mari Dantza Taldeak.
Abenduaren 5ean, ostegunez, Durangoko Zugaza zineman, Irudienean, ikusi ahal izango da dokumentala, 17:30etik aurrera. Emanaldiaren ostean solasaldia egongo da.
Hego Uribeko eta Kurdistango musikariek emanaldia eskainiko dute Durangoko Azokan
‘Txapel’ek ‘Izarrak eta Haitzak’ liburua aurkeztuko du Pou anaiekin, Durangon
Arrigorriagako Gazteguneak Gabonetako irteera antolatu du Donostiako izotz pista eta ihes gelara
Argazkiak / Euskara ahoan, 120 lagunek hartu dute parte Galdakaoko Mintzodromoan
Argazkiak / Tortilla, indabak eta giro bikaina Usansoloko jaietako herri bazkarian
Argazkiak / ‘Konponbidea ez bazara, arazoa zara’ lemapean manifestazioa egin dute A25ean Galdakaon
Hego Uribeko eta Kurdistango musikariek emanaldia eskainiko dute Durangoko Azokan
Bideoa / Zein da euskarak duen hitzik politena? Galdakaon erantzun dute!
